Alegh a He a Mbatamen mba Shin Tine

SHA iyange i Sati, ke’ uwer u Oktoba 2, inyom i 1999 la, i mase kúùsù Mkombo u Watch Tower Bible and Tract Society of Pennsylvania u i zough kwa môm ke’ Inyom la sha kwaghyôôn u kpilighyol. Iorov 10,594 mba yange ve za̱ mkombo la shin ve lu ca ve lu nengen a nenge sha televishen la cii yange sághèr ve iyol u ungwan ér i seer iorov mbagenev unyiin sha Mbatamen mba Shin Tine mba̱ Mbashiada mba Yehova mbara yô. Alegh a he ne cii ka Mbakristu mba i shigh ve mkurem yô, man ati ve yô ka Samuel F. Herd; M. Stephen Lett; Guy H. Pierce; man David H. Splane.

• Samuel Herd yange hii tom pania ke’ inyom i 1958, man ka kom ke’ inyom i 1965 yô, hide gba eren tom u sôron ningir man haregh zan zan ar ke’ inyom i 1997 la. Been heela kera yô, un vea kwase na, Gloria, hingir tsombor u Betel ú ke’ tar u United States, ape Anmgbian Herd á ker eren tom ken Afishi a Nengen sha Tomshiren la. Heela tseegh ga, shi lu ishuen i Kômatii u Nengen sha Tomshiren kpaa.

• Stephen Lett yange hii tom pania ke’ uwer u Disemba 1966, shi hii u eren tom shin Betel ke’ inyom i 1967 zan zan ar ke’ inyom i 1971 la ke’ tar u United States. Ken uwer u Oktoba, ke’ inyom i 1971 la, a vôso kwase na, Susan, maa shi kôr ave eren tom u ikpur pania je. Ka kom ke’ inyom i 1979 yô, a hingir ortamen u sôron ningir man a er tom ne zan zan mase kúùsù ke’ inyom i 1998 la. Lu sha mhii u uwer u Aipor, ke’ inyom i 1998 la je, un vea Susan ve hingir tsombor u Betel ú ke’ United States la ye. Ka heela kpa yange e̱r tom ken Afishi a Nengen sha Tomshiren shi lu ishuen i Kômatii u Nengen sha Ityesen kpaa ye.

• Guy Pierce yange tsèr tsombor shi yèsè ú kera cii ve, un man kwase na ve mase hiin tom pania ke’ uwer u Aipor, ke’ inyom i 1982 la ye. Á hingir ortamen u sôron ningir ke’ inyom i 1986, man a e̱r tom ne zan zan ar ke’ inyom i 1997, zum u un vea kwase na, Penny, ve hingir tsombor u Betel ú ke’ United States la. Anmgbian Pierce lu ishuen i Kômatii u Nengen sha Mbatomov.

• David Splane yange hii tom pania ke’ uwer u Setemba, ke’ inyom i 1963 la. A tèmà klase u sha 42 ke’ makeranta u Gileadi la, been yô a za e̱r tom mishen ke’ tar u Senegal ke’ Afrika, shi a mough a yem a za er tom u sôron ningir ke’ tar u Canada anyom 19. Hii ke’ inyom i 1990 la je, un man kwase na, Linda, hii u eren tom shin Betel ke’ tar u United States, ape Anmgbian Splane yange er tom ken Afishi a Nengen sha Tomshiren man Kwaghngeren kpaa la. Hii ke’ inyom i 1998 la je, ngu ishuen i Kômatii u Nengen sha Kwaghngeren.

U seer sha alegh a he ne yô, ka ati a mba ve lu Mbatamen mba Shin Tine hegen je ne. Ka C.W. Barber man J. E. Barr man M. G. Henschel man G. Lösch man T. Jaracz man K. F. Klein man A. D. Schroeder man L. A. Swingle man D. Sydlik. E̱r Mbatamen mba Shin Tine ve seer ingyegh hegen shi ve gbe uwer u nengen sha ityom i ior mba Aôndo ve lu shiren tar sha won cii ne ga shi ve lu kuren ugbayol vev mba ke’ jijingi vough vough nahan, se cii se mba eren msen ser Yehova a̱ za hemen u veren ve doo doo shi a̱ taver ve kpaa.