“U Kiriki” Hingir “Kweior”
“U Kiriki” Hingir “Kweior”
“U kiriki una hingir kweior, man u hemban ndahar una hingir ikurior i ageegh.”—YESAIA 60:22.
1, 2. (a) Hii nan ime i cir tar nyiana? (b) Iwanger i Yehova ngi zan a za hemen u wanger sha ior nav nena?
“IME ia cir tar, man angôghime kpaa una cir akuraior; kpa we yô, TER Una mondo iwanger sha a we, iengem Na kpaa á nenge a i sha a we.” (Yesaia 60:2) Mkaanem man pase mlu u akaa a lu shin tar hii ke’ inyom i 1919 zan zan ar hegen ne. Mbakristu Mbaaiev venda ikyav i tesen mlu u sha inja i tor u Yesu Kristu á lú hegen ne, un u a lu “iwanger i tar” la. (Yohane 8:12; Mateu 24:3) E̱r ‘ishima vihi Satan tsung,’ un u a lu orhemen u “mba ve lu utor sha tar cii mba ime ngin” ne yum yô, dubuanyom u sha 20 la hemba lun u tswam cii shi i hemba timin orumace ker kpaa. (Mpase 12:12; Mbaefese 6:12) Ior mbá ke’ ime i ke’ jijingi la kpishi.
2 Nahan kpa iwanger ngi mondon nyian her. Yehova ngu ‘tan iwanger’ sha mbacivir un, ve asande a mba i shigh ve mkurem la. Ka ve mba shin tar mbà ve til sha ityough ki “kwase” na u sha la je la. (Yesaia 60:1) Hemban je yô, hii shighe u í pase ve sha ikyev i Babilon í tuhwa ke’ inyom i 1919 la je tsô ve hii u tan iwanger i Aôndo la shi ve na ‘iwanger ve mondo sha ishiv mbi iorov’ kpaa. (Mateu 5:16) Hii ke’ inyom i 1919 zan zan va ar ke’ inyom i 1931 la, e̱r mbá masen haan mbamhen mba Babilon mba tagher mzehemen la kera yô, iwanger i Tartor lù hemban mondon a mondo cii. Nahan ve gba seer a seer, je kuma udubu upue imôngo e̱r Yehova lu ivin ityendezwa na i̱ a kaa nahan la, ér: “Me kohol asande a Iserael a a shi her la je, Me zua ve imôngo er iyôngo ken ityôr nahan man er ikumuile ken atô u ijiir ve i yan toho yô; á hura iuu sha mngee u ior.” (Mika 2:12) Iengem i Yehova yange hemba mondon sha ior nav tseer tseer ke’ inyom i 1931 la cii, zum u ve ngohol iti i Mbashiada mba Yehova la.—Yesaia 43:10, 12.
3. Yange ikyav va mase tesen ér dugh mba i shigh ve mkurem la sha kpa iwanger i Yehova ia wanger sha mbagenev nena?
3 Lù u Yehova a ta iwanger sha asande a “anikumuile u kpeghee” la tseeghlee? (Luka 12:32) Ei. Iyoukura [Zwa Buter] i uwer u Setemba 1, 1931 la tese uwegh sha nongo ugen kpaa. I̱ pase inja i Esekiel 9:1-11 doo doo nahan ér or u yange lù aa korough ku inki ku orngeren, u̱ i er kwagh u nan ke’ avur shon la ka asande a mba i shigh ve mkurem mbara je la. Ka unô, “or” la á ver ve ikyav sha atsulu? Ka “iyôngo igen” la, mbara mba ve lu a ishimaverenkeghen i va lun ke’ paradiso shin tar gbem sha won la. (Yohane 10:16; Pasalmi 37:29) Ke’ inyom i 1935 la, i mase kaven nongo u “iyôngo igen” ne ér ka ‘zegeikpelaior . . . i̱ i̱ dugh ken hanma ikurior’ la, ka ve mba apostoli Yohane yange nenge a ve ke’ mpase u sha mnenge je la. (Mpase 7:9-14) Hii ke’ inyom i 1935 la zan zan hegen, i ver ishima u kohol zegeikpelaior la tsung je.
4. Ka unô ve lu “utor” man “akuraior” a i er kwagh u á ke’ Yesaia 60:3 laa?
4 I ôr kwagh i za̱ gber sha tom u kohol ior ne ke’ kwaghôron u profeti u Yesaia nahan ér: “Akuraior aa va hen iwanger you, utor kpaa vea va hen iwanger i i mondo sha a we la.” (Yesaia 60:3) Ka unô ve lu “utor” mba i er kwagh ve heen mbana? Ka asande a ior 144,000 mba ve shi her la, mba vé lú mbayandyako i Tartor u sha a Yesu imôngo, shi ve lu hemen tom u eren shiada la. (Mbaromanu 8:17; Mpase 12:17; 14:1) Nyian ne, e̱r asande a mba i shigh ve mkurem la a mase shin udubu kpuaa tseegh yô, mba ve lu “akuraior” la hemba ve iyenge yem zende zende je, ka ve mba ve lu a ishimaverenkeghen i lun shin tar, ve ve he’ Yehova ér a̱ tese ve shi ve lôhôn mbagenev ér vé kpa ve̱ er nahan la.—Yesaia 2:3.
Mbacivir Yehova a Ishimatseen
5. (a) Ka nyi akaa i̱ tese ér ishimatseen i ior mba Yehova ngi a sure ga? (b) Ka ityar i nyi i zough a mseer ke’ inyom i 1999 la je ishar i de? (Nenge ngeren u i cagh sha peeji 27 zan zan 30 la.)
5 Mbashiada mba Yehova mba ainge ne tese ikyav i ishimatseen ke’ derianyom u sha 20 la je zua ga! Shin e̱r ve seer a seer zuan a mbamkighir nahan kpaa, e̱r inyom i 2000 lù zurum la kpa ishimatseen ve la pande ga. Ve kôr tindi u Yesu wa ér: “Gema nen akuraior cii a̱ hingir mbahenen” la ave ahar her. (Mateu 28:19, 20) Inyom i tom i masetyô ke’ derianyom u sha 20 i̱ i̱ kar la, ingyegh ki hemban cii ki mbapasen loho u dedoo gban uwer ga la lu iorov 5,912,492. Ve er tom u ôron ior mbagenev kwagh u Aôndo man mbaawashima nav kuma iyenge i kpilighyol i lun mbaahwa 1,144,566,849. Ve hide ve za sôr iorov 420,047,796 mba i sar ve la shi ve hen Bibilo a iorov 4,433,884 gbilin. Ibaver i tom u shiren a ishimatseen ne i̱ kpilighyol je zua ga!
6. Kanyi kwagh i he yange i er sha ci u upaniaa, man yange i vengese kwagh la nena?
6 Janawari u a kar la, Mbahemenev mba shin Tine yôô ér i oghom ahwa a i gbe u pania vea naan la. Ior kpishi yange ve nyôr tom u pania u kèkè la kua ú ishuen pania la kpaa. U tesen ikyav yô, ke’ atô u iwer i inyiin i hiihii i shin takerada i ke’ inyom i 1999 la, afishi a nengen sha gbaatom a ke’ tar u Netherlands ngohol ikyatakerada i pinen ian i lun pania u kèkè la hemba i yange i tindi sha iaven shon i môm ke’ inyom i i kar la kwa nyiin. Tar u Ghana na ibaver ér: “Er yange mbá ngur nan ingyegh ki hegh ki ahwa a pania la yô, iyenge i ior mba ve lu pania la zer seer a seer gbem.” Ke’ inyom i tom i 1999 la, ingyegh ki pania tar sha won cii nyôr iorov 738,343—lù ikyav i kpilighyol i tesen ‘ishimatseen i eren kwagh u dedoo’ je la.—Titu 2:14.
7. Yehova ver tom u mbacivir un ve eren sha ishimatseen la doo doo nena?
7 Yehova ver tom u i er sha gbashima ne doo doo kpa? Een. Yange kaa sha ikyev i Yesaia ér: “Kende ashe, kenger hanma ian, nenge; ve cii mba kohol mba van her a we; ônov ou mba nomso mba moughon ken ica, van her a we, ônov ou mba kasev kpaa, mba van a ve sha ihan.” (Yesaia 60:4) ‘Ônov mba nomso’ man “mba kasev” mba i kohol ve, i tsegh ve la, mbá eren Aôndo tom a ishima i môm her. Man hegen yô, mbá kohol iyôngo igen i Yesu la, ngi zuan he’ ihian i asande a ônov mba Yehova “mba nomso” man “mba kasev” mba i shigh ve mkurem la ke’ ityar 234 man acile a zegemnger.
“Hanma Tom u Dedoo”
8. Ka ‘ityom i dedoo’ i nyi Mbashiada mba Yehova ve eren taveraa?
8 Mbakristu mba aa tom u pasen loho u dedoo u Tartor shi wasen ior mba i sar ve la sha u ve̱ hingir mbahenen yô. Kpa i wa ve “agoyol sha ci u hanma tom u dedoo.” (2 Timoteu 3:17, ka se se nger i yier ye.) Sha nahan yô, mbá veren ishima sha tsombor ve sha dooshima shi mbá eren a mbavannya dedoo shi mbá za sôron mbauangev kpaa. (1 Timoteu 5:8; Mbaheberu 13:16) Mbagenev na ayol a ve mbá maan Ayou a Tartor—man tom ungula kpa ngu eren shiada. E̱r i màà imba iyou la i bee ke’ tar u Togo yô, agbughuraior agenegh a ke’ côôci i mba haleluya soo u fan e̱r i hii ve Mbashiada mba Yehova ve fetyô u maan ayou a ve ayol a ve, kpa côôci yô, i̱ za gohon a goho ior sha u ve̱ va maa i̱ kwagh yô! Tar u Togo kaa ér mmaa u maan Ayou a Tartor a lun gbondomoo la gba ulum sha ishigh ki ior mba ve lu he’ ikyasen la je yô, ior mbagenev ka ve nôngo ér vea za tsôr uya shin vea za tsenga maan uya ikyua ape í ver ishima u za maan Ayou a Tartor la.
9. Aahe ka una e̱r nahan Mbashiada mba Yehova ka ve er nena?
9 Ashighe agenegh yô, ka i gba u a er tom u dedoo ugenegh. Ke’ ityar igenegh kpishi yange uaahe e̱r ke’ inyom i tom i i kar la, man ior mba yange ve hii aren he’ ajiir a kwagh er la yô í lu Mbashiada mba Yehova. U tesen ikyav yô, Ijeverahumbe i i yer ér Mitch la i̱ vihi veghertar u vesen u tar u Honduras je falegh gba. Fese nahan, afishi a nengen sha gbaatom a ke’ tar la tsua kômatii u nengen sha kwagh u aburabur sha u a̱ zá mba ikyaa tser ve la a ikyáv mbi nan myôhôryol yô. Mbashiada mba ke’ tar u Honduras man ityar igenegh kpishi er iyua sha akondo man kwaghyan man icimbiv mbi menan man akaa a kuren ugbayol agenegh kpaa. Kômatii u Kwaghmaan u he’ Haregh la yar tom a eev vev mbu fan la ve hide ve maa ayough la. Ica i gbe ga yô, i wase anmgbianev asev mba ikyaa e̱r ve la u̱ hiden hiin ityom ve i sha ayange ayange la. Ke’ tar u Ecuador di yô, yange Mbashiada mba Yehova za yima anmgbianev vev zum u mngerem sar avenge va vihi uyaav mbagenev yô. Zum u ikpuror ugenegh u eren tom gomoti nenge e̱r ve bee a zayol la wang nahan yô, a kaa ér: “Meá lu aa nongoior ne nahan ma m er kwagh ma í cier iyol! Gba u ambaaior e̱r ne nahan ma a lu hanma ijiir sha tar cii.” Ityom ingira nahan ngi ve a iwuese sha iti i Yehova Aôndo shi ka ikyav i mcivir u se “civir Aôndo [mcivir u á lú] a inja sha akaa cii” la.—1 Timoteu 4:8.
Mba “Purugh Er Ibeenegh Nahan”
10. Shin er ingyegh i mba i shigh ve mkurem la ki panden a pande nahan kpaa, hii nan i hemban pasen a pase iti i Yehova?
10 Hegen yô, Yehova pine ér: “Ka unô ne, ve purugh er ibeenegh nahan, man ve ve er mkungum hen ahura a ma nahana? Ityar i hen kpezegemnger ia keghem, utso mba Tarshishi kpaa vea hemen sha u tôôn ônov ou mba ken ica van a ve . . . Ior mba ken iniongo igen vea maa ugirgar ou, man utor vev vea er u tom.” (Yesaia 60:8-10) Mba yange ve hii ngohol “iwanger” i Yehova a te la yô, lù “ônov” nav, Mbakristu mba i shigh ve mkurem la. U dondon yô lù “ior mba ken iniongo igen,” zegeikpelaior i̱ i̱ wasen anmgbianev vev mbà í shigh ve mkurem mbara sha mimi shi i̱ dondon iniezwa i ve ne sha kwagh u loho u dedoo u pasen kpaa la. Sha nahan yô, shin er iyenge i ve mba i shigh ve mkurem la í lu panden a pande nahan kpa, mbá hemban yôôn iti i Yehova sha tar e̱r i gbe je i lu a̱ yôô ga yô.
11. (a) Kanyi i ze hemen hereghe, man kanyi yange i er ke’ inyom i 1999 laa? (b) Ka ityar i nyi i lu a ingyegh ki mba eren batisema ki gbe avee? (Nenge ngeren u i cagh sha peeji 27 zan zan 30 la.)
11 Kwagh u a gem a er yô, ior umiliôn imôngo mbá van iuu di vough “er mkungum hen ahura a ma” nahan, mbá va zuan a ijiir i yeren ke’ tiônnongo u Kristu. Hanma inyom cii ior udubu uderi imôngo ka ve seer a seer, man i bugh gbenda sha ci u mba ve lu van a va mbara. Yesaia kaa ér: “Ihindagar you kpaa ia luun ivegher gbem, á wuhen i tugh shin tetan kpaa ga, sha u i̱ va u a akaa a injaa a akuraior” yô. (Yesaia 60:11) Inyom i i kar la i e̱r iorov 323,439 batisema sha u i lu ikyav i mtsegh u ve tsegha ayol a ve sha ci u Yehova la, kpa ngu a̱ wuhe ihinda la ve ga. “Akaa a injaa a akuraior” la nga van a va her tsô, ka ior mba ve kohol ve hingir zegeikpelaior je la. (Hagai 2:7) Ma or u i sar nan ka undun ime cii a hure nan kera ga. (Yohane 12:46) Amba ne cii mayange ma ve gbihi iwuese i ve lu a mi sha iwanger la ga!
U Cian Tôvacan Ga
12. Ior mba ime i doo ve ishima mbara soo u pirin iwanger nena?
12 Mba ime i doo ve ishima yô, ve kôr iwanger i Yehova ihyom. (Yohane 3:19) Mbagenev je yô, gema nôngo ér vea pir a pir iwanger la kera jim. Ú ngu wer kwagh ne va abu ga. Yesu, u a lu “iwanger i mimi i i wanger hanma or” la je kpa yange i naha un tar shi i hendan a na kpaa. Ke’ masejime yô, ior mba he’ ityô na wua un. (Yohane 1:9) Ke’ mlu u derianyom u sha 20 la cii, Mbashiada mba Yehova kpa kape i naha ve tar shi i wuhe ve ke’ gaadi shi i yàngè tom ve shi i wua ve, sha er ve lù tan iwanger i Yehova sha gbashima yum je la. Ke’ anyom a a sember karen ne, mbaihomov hingir u kpurun mbaaie sha iyol i mba ve te iwanger i Aôndo la sha u yaren tom a igbenda i samber a abaver. Mbagenev soo ér ior ve̱ na jighjigh ér Mbashiada mba Yehova ka ior mbabov nahan i̱ tagher ve tom shin i̱ yange ve. Mbaahendanev mban kôr cio kpa?
13. Er i pasen akaa a mimi sha kwagh u tom wase ne sha igbenda i samber a abaver sha kwaghfan nahan, kanyi i dugh kereghe?
13 Ei. He’ ape ka a̱ gba a̱ doo yô, Mbashiada mba Yehova ve za sha ajiir a samber a abaver la ve za pase kwagh u a lu u mimi la wang. Sha nahan yô, i samber a iti i Yehova wuee ke’ upipa mba tôôn abaver man umagazin kua redio man televishen kpaa. Kwagh ne na loho u dedoo u pasen ume atam a dedoo kpishi. U̱ tesen ikyav yô, iaven igenegh i í eren sha TV ke’ tar u Denmark time sha itinekwagh i i kaa ér “Ityôkyaa i i hii ve jighjigh u nan u ior i Denmark a lu ndôhôr a ndôhôr la.” Í lôhô Mbashiada mba Yehova kua mbagenev kpaa i gba tôvon sha itinekwagh ne. Ke’ masejime yô, kwase ugenegh u yange nenge iaven la kaa ér: “Yange í gba fan mba ve lu a jijingi u Aôndo mbara wang je.” Tsô maa i hii u henen Bibilo a na je.
14. Ica a gba ga tsô kwagh a hemba mbaahendanev vea mase kaven nyi?
14 Mbashiada mba Yehova fa je ér ior kpishi shin tar ne vea hendan a ve. (Yohane 17:14) Nahan cii kpaa kwaghôron u profeti u Yesaia la ne ve mtaver. Kwaghôron la kaa ér: “Ônov mba ior mba ve er u ican yô, vea va her a we agurenu; man mba ve laha u cii, vea shalegh inya hen akevangahar a ou; vea yila u er: Gar u TER, Shion u Icighan u Iserael.” (Yesaia 60:14) Ica a gba ga tsô kwagh a hemba mbaahendanev vea mase kaven e̱r í lu Aôndo iyol na ve lu nôngon ityav a na nahan. Tsô ka anti je naná hemba imba utya laa?
15. Mbashiada mba Yehova ka ve “ma atumba a akuraior” nena, man kwagh ne tese ikyav ke’ tom ve u ityesenegh man u ivangel la nena?
15 Yehova shi seer eren ityendezwa ér: “Mo Me gema u, ú hingir kwagh u engem zan zan gbem . . . Ú ma atumba a akuraior, man shi ú ambe atumba a utor man ú fa er Mo TER, M lu Oryiman wou” ye. (Yesaia 60:15, 16) Een, Yehova ka Oryiman u ior nav. Aluer ve suur sha ana yô, vea lu “zan zan gbem.” Shi vea “ma atumba a akuraior,” vea lu yaren tom a akaa a i er la sha u van a mzehemen ke’ mcivir u mimi. U tesen ikyav yô, myar u yaren tom a kômputa mba i er sha iwavaren man mbaanar mbà lamen a mi la wase u gberen Iyoukura ke’ ijô 121 man Awake! di ke’ ijô 62. Í e̱r gbenda u ngeren kwagh a mi ke’ kômputa ugenegh jighilii sha u u̱ wase u geman New World Translation ke’ ijô igenegh i he, man imba mgem ne va a iember kpishi je. Zum u i due a Ruamabera u Mbakristu u ken Zwa Grika la ke’ Zwa Croatia ke’ inyom i 1999 yô, ior kpishi haa mliam ma iemberegh ashe. Anmgbian ugenegh u been iyol kaa ér: “M kegh Bibilo ne hegen ica i gba. Hegen yô, me mase kpen bem bem tsô!” New World Translation jimin cii shin avegher a na samber hegen hemba miliôn 100 ke’ ijô 34.
Atindi a Tseng a Mlu u Wang
16, 17. (a) Shin er i lu kwagh u ican nahan kpa hii nan i lu hange hange u kuran atindi a a tav tseng a Yehova a we sha kwagh u mlu u wang laa? (b) Kanyi yange i̱ er i̱ i̱ tese ikyav ér agumaior aa fatyô u palegh ihôngor i tar nee?
16 Yesu lù kaa ér: “Hanma or u nan eren kwaghbo yô, ka iwanger je nan vende ye.” (Yohane 3:20) Kpa sha vegher ugenegh yô, mba ve lu ke’ iwanger la yô, atindi a tseng, a Yehova a we sha kwagh u mlu u wang la doo ve ishima. Yehova kaa sha zwa u Yesaia ér: “Ior ou cii vea hingir mbaperapera.” (Yesaia 60:21a) U̱ lun a inja i perapera ke’ tar u u mgbough a dang u ijimbagh man aie u eren man hua kua iyolmoron ne ka kwagh u kiriki ga. U̱ tesen ikyav yô, igbenda inyar ngee ke’ ityar igenegh nahan kera taver u shin henen kpìí sha kwagh u inyaregh ki keren la ga. Nahan cii kpa, Paulu ta icin ér: “Mba i sar ve pe lun mbanyarev yô, ka ve gba ken imeen man ken to u hônon man ken asaren kposo kposo a gbilinigh man a vihin. Ka a mire a ior ken mtim man ken msaaishe” kpaa. (1 Timoteu 6:9) Ka or a̱ uve ityough ke’ kpenga u eren je nana̱ gema a̱ hunde ishima a akaa a a hembe lun a inja, amba er mtemimôngo u Mbakristu man icighan tomshiren man anza a dedoo man ityom i he’ tsombor u nan kpaa yô, í lu kwagh u vihin kpishi!
17 Mba a fatyô u hemban taver ve u lun a anza a perapera je yô, ka agumaior, sha ci u mbakwav ve kpishi nyôr iyol ke’ icimbiv mbibov mbi menan man dang u ijimbagh kpaa. Wannomso ugenegh ke’ tar u Suriname u̱ doon or za lam a wanyekwase u anyom 14 ér a̱ yav a na. Wanyekwase la venda, gema pase ér Bibilo yàngè ér aluer or a e̱r ivese ga yô nana̱ de eren imbakwagh la ga. Mbayevkasev mbagenev mba sha makeranta gba sen un ibumegh shi tuur un ke’ ijime ér a̱ gema ishima na, ve kaa a na ér ka saren a sar hanma wanyekwase u yaven a wannomso la. Nahan cii kpa gumkwase ne venda inyigh i môm. Sati mba karen kpuaa yô, í kar wannomso la akaa maa i zua un a bo anyigôr u i yer ér HIV la nahan a kera lù dedoo ga kpoghuloo je. Saan wanyekwase la iyol e̱r un ongo tindi u Yehova a we ér i̱ ‘nyagh idya i eren’ la nahan. (Aerenakaa 15:28, 29) Mbashiada mba Yehova mbá te uwegh vanger a agumaior a a lu a ve imôngo, a a til dông sha kwagh u vough la. Jighjigh u nan ve, man u mbamaren vev la cii ‘ve a icivir’ sha iti i Yehova Aôndo—shi ne ngi gbe kpam kpaa.—Yesaia 60:21b.
Yehova Na Mseer
18. (a) Ka zegekwagh u nyi Yehova a er sha ci u ior nava? (b) Ka akav a nyi a lu a tesen ér mvese una za a za hemen ciili, man kanyi ishimaveren i engem i keghen mba ve lú ken iwanger laa?
18 Een, Yehova te iwanger sha ior nav shi veren ve doo doo shi hemen ve gbenda shi taver ve kpaa. Ke’ derianyom u sha 20 la, ve nenge a m-iv u mkaanem ma Yesaia a nger nahan la, ér: “U kiriki una hingir kweior, man u hemban ndahar una hingir ikurior i ageegh; Mo TER, Me er kwagh ne fefa zum u shighe á kuma yô.” (Yesaia 60:22) Ke’ inyom i 1919 la, ve lu di asande kpuaa tseegh tsô, kpa kera kera tsô “U Kiriki” vese hemba a hemba “Kweior” jim. Man mkur u imba mvese la ngu a̱ kuma ga! Inyom i i kar la iorov 14,088,751 za iniongo i umbur ku u Yesu la. Mbagenev ke’ a ve kpishi lu Mbashiada tsevaa ga. Saan se iyol kpishi e̱r yange ve za iniongo i i lu a inja ne nahan, man se mbá lôhôn ve ser ve̱ za hemen u zan ape iwanger i lu la. Yehova ngu zan hemen u tan iwanger, ngí mondon sha ior nav her. Gbenda u nyôron ke’ nongoior na ngu ivegher her. Yô, ior cii ve̱ kange ishima u lun ke’ iwanger i Yehova la her. Kwagh la ka iveren her a vese hegen kpishi! Man ke’ hemen yô, a lu kwagh u doon kpishi shighe u akaa a i gbe a gba cii aa wuese Yehova shi aa ember ke’ icivir i iengem na la!—Mpase 5:13, 14.
[Mbampin Mba Ngeren u Henen]
[Ufoto mba sha peeji 26 la]
Ior tsehe mba van ke’ nongo u Yehova her iuu
[Foto u sha peeji 31 la]
Saan se iyol e̱r Yehova a bugh hunda a ver ivegher sha ci u ior mba iwanger i doo ve ishima la yô
Ú Fatyô u Pasen Kpa?
• Ka unô iengem i Yehova i lu mondon sha a ve ke’ ayange a masejime nee?
• Kanyi i tese ér ishimatseen i ior mba Yehova la ngi a̱ ndôhôr ga?
• Ka ityom i dedoo i nyi Mbashiada mba Yehova ve uv ityough erene?
• Shin er ahendan a bo a lu taveraa nahan kpaa, kanyi se lu a vangertiôr ser ia ere?