U Shiren Tom Vea Orkuran Imôngo

“Nenge, Tere! Ka sha gôgôyou u taven u kuran sha mi ka m tile, m shi her didi; man sha ijiir yam i kuran, ka m tile, m lu heregh kuran hanma tugh” ye.—YESAIA 21:8.

1. Ka uityendezwa mbavesen mba nyi Yehova a hurugh a lu shiada iyol na?

 YEHOVA ka Or u Hemban u lun a Awashima. Ortyom u yange hemba ato ve hingir Satan Diabolo la una e̱r nan kpa una fatyô u yangen awashima Na u vesen la ga. Ka mwe u a we ishima ér una va tsegha iti Na shi una ver Tartor u engem u ua hemen sha tar u paradiso je la. (Mateu 6:9, 10) Sha ikyev i hemen u ngula yô, mimi je a ver uumace doo doo. Aôndo “Una tim ku sha won kera; Ter AÔNDO Una ese mliam sha ishiv mbi iorov cii.” Uumace mba i saan ve iyol shi ve lu ke’ mzough la vea ember bem man mtem u dedoo gbem sha won. (Yesaia 25:8; 65:17-25) Ka Yehova iyol na shi a hurugh a lu orshiada u uityendezwa mbavesen mban ye!

2. Ka ushiada mba ve lu uumace mba nyi Yehova a lu a mini?

² Nahan cii kpa, Orgbanakaa u Vesen shi ngu a mbashiada mba ve lu uumace yô. Sha ashighe a Mbakristu lu a lu ga la, hii sha Abel je tsô, “ikpela i mbashiada i vesen” ndera gban ayem a ishimawan ne, man ashighe kpishi je yô, yange i lu shighe u mbamtaver mba vesen ve lu yô. Aeren a ve a doon tsung la hingir akav a taver Mbakristu mbajighjigh ishima nyian. Ka Kristu Yesu je a lu ikyav i orshiada u taver ishima u hembancii ye. (Mbaheberu 11:1–12:2) Sha ikyav i tesen yô, umbur kwaghôron na u masetyô u paregh iyol u yange ôr sha ishigh ki Pontiu Pilatu la. Yesu kaa ér: “Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye.” (Yohane 18:37) Hii ke’ inyom i 33 S.W. la zan zan kar aren ke’ inyom i 2000 S.W. ne, Mbakristu mba tseen asema zer dondon ikyav i Yesu la, shi ve za hemen u eren shiada, “ôron uzegembaakaav mba Aôndo” sha ishimataver je.—Aerenakaa 2:11.

Mpav u Babilon a Pav ker Ver Ver La

3. Satan hendan a shiada i í eren Yehova man ishima na la nena?

³ Ken udubumbaanyomov mba ve kar la, icôr Orihyom, Satan Diabolo ndera keren igbenda i ifer sha u nzughur a shiada i mimi i̱ mbashiada mba Aôndo ve eren la. E̱r ‘zegedarakon . . . , u a lu tseiyô la’ a lu “ter u aie” yô, ngu “tsughun tar cii.” Mayange ngu gban uwer u nôngon ityav a mba ve “kor atindi a Aôndo” la ga, hemban je yô sha ayange a masejime ne.—Yohane8:44; Mpase 12:9, 17.

4. Zegebabilon ngise hii nena?

⁴ Er Mngerem ma Deemee ma sha ayange a Noa la va kar kera yô, Satan kende a Nimrodi sha, a hingir “ortato u ageegh sha ishigh ki TER” tsa hegen kuma anyom 4,000. (Genese 10:9, 10) Babilon (Babel), gar u Nimrodi u hemban cii la gema hingir ijiirtamen i kwaghaôndo u azôv. Yehova nzughur zwa u ior mba ve lu maan gôgôyou u taven u Babel la yô, ior mbara sambe sha tar wuee, man ve lu yemen a ukwaghaôndo vev mbaaiev mbara kpaa. Nahan Babilon hingir imbor i tartor u kwaghaôndo u aie ú sha tar cii, í yila ú ke’ takerada u Mpase ér Zegebabilon. Takerada la pase mtim u a va tim tsegar u̱ civir mbaaôndo la.—Mpase 17:5; 18:21.

Ikyurior i I Lu Mbashiada La

5. Ka ikyurior i nyi ngise Yehova ver í ér i lu mbaeren un shiada, kpa hii nan yange na ian ér i yem a i uikyangene?

⁵ Er ayange a Nimrodi kar kera kuma e̱r anyom 500 nahan yô, Yehova zom ônov mba orjighjigh Aberaham cii kohol hingir ikyuior i  Iserael sha u ve̱ lu mba eren Un shiada sha tar yô. (Yesaia 43:10, 12) Ior mbagenev kpishi ke’ ikyurior la civir Yehova sha mimi. Nahan kpa, udubumbaanyomov mba ngur karen yô, atesen a aiegh a ke’ akuraior a yange wa ndor a Iserael la gba hôngor ve, nahan ior mba Yehova ya ikyur a ve ne gema ijime a na ve hingir u civir mbaaôndo mbaaiev. Sha nahan yô, e̱r ka kom ke’ inyom i 607 C.S.W. yô, akumautya a Babilon, a yange Tor Nebukadinesar hemen a gbenda la, va tìm Yerusalem kua tempel na shi kura Mbayuda kpishi yem a ave uikyangen ke’ Babilon.

6. Ka loho u dedoo u nyi or u Yehova a ver un kura u i tsengaôron kwagh na la a pasene, man kwagh ne iv hanma shighe?

⁶ Kwagh la na kwaghaôndo u aiegh yar kwan je zua ga! Nahan cii kpa, hementor u Babilon la tsa gbem ga. E̱r shi anyom kuma 200 cii man iyange i kyàá kuma yô, Yehova vande wan tindi ér: “Za, za ver orkuran, nana̱ pase kwagh u nan nenge yô.” Kanyi loho yange lu u̱ orkuran ne una yôô? Ka ú ne: “Babilon gba, a gba ve, ieev mbi gban a gba mbi mbaaôndo vev cii, i hembe mbi shin inya je.” (Yesaia 21:6, 9) Kera kera tsô, ka kom ke’ inyom i̱ 539 C.S.W. yô, kwaghyôôn u profeti la maa iv. Ikyumen Babilon yôhôr, ica i gbe ga yô, ior mba Aôndo ya ikyur a ve la hide he’ inya i tar ve.

7. (a) Ka ityesen i nyi Mbayuda yange hen sha tsaha u Yehova na ve laa? (b) Ka akaahônon a nyi yange Mbayuda gba ker zum u ve za shir ve hide la, man kanyi yange i due kere?

⁷ Yange kwagh kar a Mbayuda bunde pe vea hide a civir akombo shin vea e̱r kwaghaôndo u ahir. Nahan cii kpa, anyom nga ngur karen yô, ve hide ve gba ke’ akaahônon agenegh. Mbagenev lù kwaghfan u tar u Grika mee ve ye. Mbagenev di hingir u tan ave vanger a aeren a uter je hemba Mkaanem ma Aôndo kpaa. Mbagenev di yô, lù kwagh u hemban soon tar ve la mee ve ye. (Marku 7:13; Aerenakaa 5:37) Zum u i mar Yesu la nahan, ikyurior la vande geman ijime a mcivir u wang kera kpaa. Shin e̱r yange Mbayuda mbagenev agbenger agbenger vengese loho u dedoo u Yesu pase la nahan kpaa, ikyurior la jimin cii yô, i̱ venda un nahan Aôndo di kpaa venda i̱. (Yohane 1:9-12; Aerenakaa 2:36) Iserael kera lu mbaeren Aôndo shiada ga, man ke’ inyom i 70 S.W. yô, shi i kimbir timin Yerusalem man tempel na, kwa ne yô, lù sha ikyev i ikyumutya i Mbaromanu la.—Mateu 21:43.

8. Ka unô ngise ve hingir Mbashiada mba Yehova, man kwaghwan u Paulu wa mbashiada mbara lù u sha shighe vough nena?

⁸ Man e̱r akaa lù eren zan ave la je maa í mar ikyurior i Mbakristu, ka “Iserael u Aôndo” je la, shi lù ikyurior i he ne i̱ hingir u eren shiada sha ci u Aôndo hen akuraior ye. (Mbagalatia 6:16) Tsô Satan ker gbenda fese ér una hôngor ikyurior i he i̱ ke’ jijingi ne. E̱r derianyom u sha hiihii la zurum u been yô, i hii u nengen a avindir a mpav ke’ atôônanongo. (Mpase 2:6, 14, 20) Kwaghwan u Paulu la lu sha shighe vough. Yange wa kwagh a kaa ér: “Ver nen ishima, or nana̱ de ker ne yemen a ven sha kwaghfan shin sha atseregh a gbilinigh ga. Akaa ne ka sha inja i ukaaer mba ior la, shi ka sha inja i ujijingi mba taregh mba hiihii, kera ka sha inja i Kristu a lu ga.”—Mbakolose 2:8.

9. Di er Paulu vande tan icin nahan, ka akaa a nyi yange er zan zan Mbakristu Mbaaiev kar duene?

⁹ Shighe ze deghôô yô, kwaghfan u tar u Grika man mbamhen mba ukwaghaôndo mba Babilon hôngor a kwaghaôndo u ior kpishi mbà yange ve senge ér mbá Mbakristu la, shi ke’ masejime yô, kape amba a “kwaghfan” e̱r ityesen i tesen ér akaa cii gbaduen tsô la, kua ityesen i puunakaa la kpaa yange hôngor a kwaghaôndo u ior kpishi mba ve senge ér mbá Mbakristu je la. Lù di vough e̱r ngise Paulu tsengakaan nahan, ér: “Gadia m fa, me mough kera yô, ugbaseela mba vihin asema vea va nyôr her  a ven, vea de u eren ikumuile ican ga. Man her atô wen je kpaa ior vea mough, vea gba ôron akaa a geseghaa, sha u vea urugh mbahenen ken ijime ve yô.” (Aerenakaa 20:29, 30) Ka sha ci u ityôkyaa i vendan mimi ne man Mbakristu Mbaaiev due ye.

10. Ka akaa a nyi yange er u tesen ér lù ior cii lumun mcivir u hôngorough u Mbakristu Mbaaiev la ga?

¹⁰ Ior mba ve ker ave sha mcivir u wang sha mimi yô, gba u vea “nôngon . . . ityav tsung sha kwagh u jighjigh u nan u i na sha ikev i uicighanmbaiorov inie i môm la.” (Yuda 3) Mà shighe ngu u á de u eren shiada sha kwagh u mcivir u wang shi Yehova kpa á de u̱ eren un shiada sha tar yôô? Ei. E̱r shighe a zurum u timin or u hemban ato Satan man ityom na la cii yô, ikyav tese ke’ igbar ér ka hanma or cii nan ne iyol i nan sha ikyev i mcivir u vendan mimi, imba i í eren ke’ Mbakristu Mbaaiev la ga. Ke’ vegher u masetyô u dubuanyom u sha 19 la, i ver nongo u mbahenen Bibilo sha mimi ke’ gar u Pittsburgh, Pennsylvania ke’ tar u U.S.A. la. Lù ve je ve kohol imôngo ve hingir imaagh ki nongo u mbashiada mba Aôndo mba ainge mban ye. Mbakristu mban lu tesen ior avindir a a lu ke’ Ruamabera, a a tese ér mkur u tar u ainge ne mgbôghom la. Kera kera tsô, ka va kom ke’ inyom i 1914 la yô, ‘mkur’ u tar ne hii vough e̱r Bibilo tsengaôron nahan, man kwagh ne tese ikyav sha ityav mbi tar cii mbi yange i nôngo la. (Mateu 24:3, 7) Ikyav tese gbar gbar ér yange mba ker ke’ inyom la tsô maa i zenda Satan sha kera, un vea ikpela azôv na cii. E̱r derianyom u sha 20 la lù iv a mbamzeyol yum la gema ka ikyav i tesen wang ér Satan ngu eren tom taveraa shi ka m-iv u ikyav i tesen mlu u Yesu a lu ke’ agee a Tartor u sha la kpaa.—Mateu, ityough 24 man 25; Marku, ityough 13; Luka, ityough 21; Mpase 12:10, 12.

11. Kanyi Satan yange nôngo u erene, kpa yange kwagh hemba un nena?

¹¹ Ke’ uwer u Jun ke’ inyom i 1918 la, Satan nôngo kwagh gema ijime gema ikyum ér una èsè mbahenen Bibilo mbara kera, ve mba he’ shighe la nahan ve lu pasen kwagh ke’ ikpentar kpishi la. Shi yange ker gbenda u tìmín imaagh vegh ki yange ve wa sha ikyev i tindi, í yilan ér Watch Tower Bible and Tract Society la kpaa. Yange i wuhe agbughuraior a Society, i wa ve aie iyol ér mbá hendan aa tar ve, di e̱r Yesu kpa ngise i sende un nahan. (Luka 23:2) Kpa ka kom ke’ inyom i 1919 yô, í dugh agbughuraior ne, nahan ve zua a ian i zan hemen a tomshiren ve. Ke’ masejime yô, í va mase pasen ve tuhwan.

“Orkuran” u Yengen Kera Vie Vie

12. Ka unô ve lu nongo u Yehova a ver ú kura, u lu “orkuran” laa, man kanyi ieren ve lu a mini?

¹² Sha nahan yô, e̱r “shighe u mkur” hii yô, Yehova shi lu a orkuran u tilen kura, lu kpusugh ior ér ve̱ ver ishima sha m-iv u mbaawashima Nav mbara. (Daniel 12:4; 2 Timoteu 3:1) Zan zan nyian kpa nongo u i ver ú kura la—ka Mbakristu mba i shigh ve mkurem, Iserael u Aôndo je la—mba eren tom ve inja vough e̱r ngise Yesaia pase tom u orkuran u sha inja i profeti nan eren la nahan, ér: “Nana̱ tim ato, nana̱ ver ishima dedoo. Tsô u a nenge la ngor ikenge [e̱r begha nahan NW ] er: Nenge, Tere! Ka sha gôgôyou u taven u kuran sha mi ka m tile, m shi her didi; man sha ijiir yam i kuran, ka m tile, m lu heregh kuran hanma tugh” ye. (Yesaia 21:7, 8) Orkuran ne eren asenge aa tom kura na ga!

13. (a) Or u Yehova a ver un kura la yôô loho u nyi? (b) Hii nan ve a fatyô u kaan ér Zegebabilon yôhôrô?

¹³ Kanyi orkuran ne a nenge a mini? Or u Yehova a ver un kura ne, ka nongo na u mbashiada je la, gema yôô ér: “Babilon gba, a gba ve, ieev mbi gban a gba mbi mbaaôndo vev cii, i [Yehova] hembe mbi shin inya je.” (Yesaia 21:9) He’ zum ne yô, e̱r Ityav mbi Tar cii Mbi sha I mbira bee yô, gema lù Zegebabilon, tartor u kwaghaôndo u aie u sha tar cii la menger sha mlu u tahav nav mbu shagba la cir inya ye. (Yeremia 50:1-3; Mpase 14:8) Man kape i gbe u kwagh á lu kpaa je la! Ityav mbi ngise i yilan ér Zege Utya la hii lù ke’ Mbakristu Mbaaiev, ape yange mbahemen mbaadua mba sha avegher ahar a ityangeutya la cii lù kenden atôndo a zegeusu sha u taver agumaior a ve asema ér a̱ yem ityav la. Nenge kwagh u kunya sha wono! Ka kom ke’ inyom i 1919 yô, Zegebabilon kera fatyô u yangen Mbahenen Bibilo mba i gem yilan ve hegen ér Mbashiada mba Yehova ne u duen ke’ iaven i hôron tom la, geman wan tom u pasen kwagh tar sha won cii ave la ga, man hegen kpaa ngu zan hemen her. (Mateu 24:14) Kwagh la ka ikyav i myôhôl u Zegebabilon, di vough e̱r ngise i pase Iserael i tuhwa ke’ derianyom u sha ataratar C.S.W. la ve, lù ikyav i mtim u Babilon u tsuaa la nahan.

14. Ka magazin u nyi nongo u Yehova a ver ú kura la u hembe yaren tom a mini, man Yehova ver myar u í yar tom a mi la doo doo nena?

¹⁴ Nongo u kuran la ngu shi eren tom u ú a ishimatseen man isharen i taveraa i̱ eren kwagh u  vough kpaa. Mbahenen Bibilo mbara hii u gberen magazin ne ke’ uwer u Julai 1879, man shighe la í yilan un ér Zion’s Watch Tower and Herald of Christ’s Presence [Iyoukura i Shion man Myer u Yôôn Mlu-Her u Kristu.] Hii ke’ inyom i 1879 zan zan va ar ke’ uwer u Disemba 15, 1938 la je, hanma mgber u magazin la cii í nger sha igbende na i̱ sha ishi la ér “Orkuran, tugh za nana?—Yesaia 21:11.” * Iyoukura zer tilen kura sha mimi, i̱ kura akaaeren a tar ne man ikyav i profeti i̱ akaa ne á tesen la kuma hegen anyom 120. (2 Timoteu 3:1-5, 13) Nongo u Aôndo a ver ú kura la man “iyôngo igen” i i lu ahuraior a ve la cii yar tom a magazin ne kpoghuloo sha u pasen orumace ér mpaase u i gbe u a va paase ahon sha hementor u Yehova kera sha ikyev i Tartor u Kristu la mgbôghom ve. (Yohane 10:16) Yehova ver anar u eren shiada ne doo doo kpa? Yange i hii u gberen Iyoukura ke’ inyom i 1879 la, lu ukôpi 6,000 tseegh, kpa kwa ne yô, a seer samber tar sha won cii hemba ukôpi 22,000,000 ke’ ijô 132 man—121 ke’ ijô ne mbá gberen sha shighe môm kaveraa. Nahan ka kwagh u sha inja vough e̱r magazin u kwaghaôndo u hemban samber sha tar cii ne i lu u̱ kenden a iti i Yehova, Aôndo u mimi sha nahan!

M-èsè u Èsén Kure Kure

15. Ka mwanger u nyi yange lu zan hemen cii man inyom i 1914 mase hiini?

¹⁵ Ke’ atô u anyom a yange shi kuma 40 cii man hemen u Kristu u sha la hii ke’ inyom i 1914 la, Mbahenen Bibilo vande wanger ayol a ve sha ikyev i atesen kpishi a Mbakristu Mbaaiev a a dugh ke’ Bibilo ga la. Atesen anza e̱r u̱ eren anikyundanev batisema man ityesen i uma kpen ga la man í pugatori man í ican i yan ke’ igyamusu kua í Aôndo u Mbautar la nahan. Kpa shighe pande kar cii ve i mase been a mbamhen mba kpeegh mbara kera cii ye. U tesen ikyav yô, ke’ kwavanyom u 1920 la Mbahenen Bibilo kpishi yange ve zer kwamegh sha ikyondo, kú lu a ikyav i terankon man idyertor shami, shi ve ember Kirimishi shi ve kuran ayange a memen a mbafanaôndoga la kpaa. Nahan cii kpa, cii man mcivir a̱ lu u wang yô, gba u saa á ta hanma ivulugh ki akombough cii kera. Saa ka Icighan Bibilo, Mkaanem ma Aôndo tseegh ma a lu imaagh ki jighjigh u nan u Mbakristu kua gbenda u uma ve kpaa ye. (Yesaia 8:19, 20; Mbaromanu 15:4) Ka kwagh u shami ga aluer or seer kwagh sha Mkaanem ma Aôndo shin nan pande kwagh ke’ ma yô.—Duteronomi 4:2; Mpase 22:18, 19.

16, 17. (a) Ka mbamhen mbaaiev mba nyi yange nongo u kuran la lu a mi upuembaanyomov kar imôngo? (b) Kanyi i̱ lu mpase u a hembe lun u sha inja, u̱ i pase “atse” man “iwen” i ken “Igipiti” laa?

¹⁶ Ikyav i môm ne ia tese e̱r tindi ne a lu a inja yô. Yange C. T. Russell gber takerada ke’ inyom i 1886, ú yange i va hingir u yilan ér The Divine Plan of the Ages yô. I cagh ngeren ugenegh ke’ takerada ne u̱ tesen ér ikyov i orumace zua kpi vea Zegegyungu u Àhòr-Áhor u ke’ Igipiti la. Yange i hen ér anar u i úmbúr Farao Khufu a mi ne ngise lu ícé i yange i ôr kwagh i ter í ke’ Yesaia 19:19, 20 je la, ér: “Sha iyange la atse a TER a nanden nagh sha mi aa lu ken atô u tar u Igipiti, man iwen i i tim i sha, sha u umbur TER ia lu sha ikighir i u. Á hingir ikav kua shiada u TER u akum a Sha ken tar u Igipiti.” Kanyi mzough i̱ lu he’ atô u igyungu i àhòr áhor ne vea Bibilo? U tesen ikyav yô, yange i hen ér iniembe i ahia agenegh a ke’ Zegegyungu i Àhòr-Áhor la tese shighe u “zegecan” i i er kwagh u i̱ ke’ Mateu 24:21 la ia hii yô, man ican la kpa yange í gándè fan kwagh u i̱ yum ga. Mbahenen Bibilo mbagenev ùvè ityough u karen iniembe i igyungu i àhòr-áhor la sha u vea nôngo a fa iyange i vea lu yemen sha yô!

¹⁷ I zer nan kwagh u í yilan ér ka Bibilo i ke’ Iwen la icivir upuembaanyomov kar hegen imôngo, zan zan Iyoukura i uwer u Novemba 15 man Disemba 1, 1928 la va mase pasen wang ér kwagh  gba Yehova sha iceiwen i umbur kwagh a mi i̱ ngise ufarao mbafanaôndoga maa á akav a azôv sha mi a kpehen ishor i akaa a sha kwavaôndo a mi la, sha u una er shiada i kwagh u yange i nger ke’ Bibilo ga. Kpa i gema i nenge ér kwaghôron u profeti u Yesaia la ngu a ikyav i ke’ jijingi. Ikyav tese ke’ Mpase 11:8 ér, “Igipiti” tile sha ityough ki tar u Satan. “Atse a TER a nanden nagh” la di gema umbur se iniaav mbi doon mbì Mbakristu mba i shigh ve mkurem ve lu nan zum u ve lu shir shin tar la. (Mbaromanu 12:1; Mbaheberu 13:15, 16) Iwen i i tim i “sha ikighir i [Igipiti]” la tese uwegh sha tiônnongo u Mbakristu mba i shigh ve mkurem, ve lu “ityôgh man imagh ki mimi a suur sha mi” mba ve lu shiada ke’ “Igipiti” la, ka tar u ve sôôn undun ú ne je la.—1 Timoteu 3:15.

18. (a) Yehova za hemen u wanger akaa sha ci u mbahenen Bibilo sha mimi mbara nena? (b) Aluer taver Orkristu u kaven iwanger i i te sha ma ivur Ruamabera yô, kanyi i̱ lu ieren i hemban lun sha mfe i i gbe u nana ere?

¹⁸ E̱r anyom nga ngur karen yô, Yehova za hemen u seer nan se iwanger sha kwagh u mimi, kua u seer kaven kwaghôron na u profeti kpaa. (Anzaakaa 4:18) Ke’ anyom a a sember karen ne, i taver se ishima ér se̱ seer nengen sha kwagh u kov u i lu u̱ ua kar kera ga tsô mkur una kuma la, man injakwagh i iyôngo man ivo man kwagh u ndôhôrshima la kua shighe u kwagh shon una tile he’ icighanjiir la, man ikyuryan i he la man mgem u sha iengem man mpase u sha mnenge u sha kwagh u tempel u ke’ takerada u Esekiel la, kua akaa agenegh kpaa. Ashighe agenegh yô, alaghga a taver u kaven mbampase mba i hidi i seer tan iwanger sha mi ne, kpa shighe ka una karen tsô ityôkyaa i i hii ve i pase ve nahan la i gba wanger. Aluer wanger Orkristu er i hii ve i pase ma ivur ruamabera ke’ gbenda u he ga yô, nan e̱r kwagh u dedoo aluer nan hide a iyol ijime nan kimbir mkaanem ma profeti Mika a kaa la yô, ér: “Kpa mo yô, me ver ashe hen TER, me kegh Aôndo u myom wam.”—Mika 7:7.

19. Asande a mba i shigh ve mkurem la man iyongo igen i i lu ahuraior a ve la taver ishima ke’ ayange a masejime ne e̱r ka begha nahan nena?

 ¹⁹ Umbur wer orkuran la “ngor ikenge [e̱r begha nahan NW ] er: Nenge, Tere! Ka sha gôgôyou u taven u kuran sha mi ka m tile, m shi her didi; man sha ijiir yam i kuran, ka m tile, m lu heregh kuran hanma tugh” ye. (Yesaia 21:8) Asande a mba i shigh ve mkurem la taver ishima sha inja i begha sha u ponon kwaghaôndo mbaaiev shi tesen ior gbenda u vea kera lu ke’ uikyangen ga yô. (Mpase 18:2-5) E̱r ve lu “wanakiriki u jighjigh man u fan kwagh” yô, ve gber Bibilo man umagazin kua ityakerada igenegh ke’ ijô imôngo—ka u nan “kwaghyan sha ashighe ashighe” je la. (Mateu 24:45) Ve kar ve hemen tom u kohol “zegeikpelaior . . . ken hanma ikurior man hanma nongo man hanma nongoior man hanma zwa kpaa” la. Ve mban kpa i wanger ve sha awambe a Yesu a nan iwom la shi mba a ishima i begha sha m-er u ve ‘eren Aôndo icighantom ken tempel Na tugh man tetan kpaa la.’ (Mpase 7:9, 14, 15) Ka atam a nyi Mbashiada mba Yehova mba i tsegh ve, ve shi asange her ne kua zegeikpelaior i i lu ahuraior a ve ne ve umu? Kwaghngeren wase u a dondo ne una ôr kwagh ne.

[Ngeren mba shin kpe]

[Mbampin Mba Ngeren u Henen]

[Foto u sha peeji 18 la]

“Tere! Ka sha gôgôyou u taven u kuran sha mi ka m tile, m shi her didi” ye

Baver We Kpa?

• Ka mbashiada mba nyi Yehova a ndera lun a mi anyom anyomo?

• Zegebabilon ngise hii nena?

• Hii nan ve yange Yehova na ian ér i̱ tim Yerusalem, gartamen u̱ ikyurior i mbashiada nav la ke’ inyom i 607 C.S.W.? man ke’ inyom i̱ 70 S.W. laa?

• Nongo u Yehova a ver ú kura la man ahuraior a ve cii ve tese inja jijingi i nyi?

[Ufoto mba sha peeji 21 la]

Nongo u Yehova a ver ú kura la ngu tôôn ityom i ú uwer uwer ga