E̱r Yehova A Hemen Se Gbenda la
E̱r Yehova A Hemen Se Gbenda la
“Hemen mo sha gbenda u shambe shambe.”—PASALMI 27:11.
1, 2. (a) Yehova ngu hemen ior nav gbenda nyian nena? (b) Aluer ka u se zua a mtsera ke’ mbamkombo tsemberee yô, kanyi i gbe u se ere?
YEHOVA ka Imbor i iwanger man mimi kpaa, di er se vande henen ke’ kwaghngeren u a vande a ngun la nahan. Mkaanem nam ma wanger gbenda u shambe shambe u se ze shami la. Yehova hèmén se sha u tesen se igbenda na. (Pasalmi 119:105) Di vough er orpasalmi kpa ngise er nahan, se kpa se mbá lumun gbendatesen u Aôndo a tesen se la a iwuese shi se mbá eren msen nahan ser: “TERE, tesem gbenda Wou, hemen mo sha gbenda u shambe shambe kpaa, sha ci u mbaihomov av.”—Pasalmi 27:11.
2 Gbenda môm u Yehova a we se kwagh nyian yô ka sha ikyev i mbamkombo mba Mbakristu mbara. Se mba zough a mtsera sha iyua i i ne sha dooshima ne tsember tsember sha u̱ (1) zan mbamkombo mbara hanma shighe shin (2) keghen ato a kwaghôron u i lu ôron la zulee shin (3) sasen a sase wan zwa sha avegher a i we mbaungwan kpa ker la? Heela tseegh ga, zum u ka a̱ wa se akaa a aa wase se u lun sha “gbenda u shambe shambe” ne nahan ka se ngohol akaawan la a iwuese kpa?
Mze u̱ Ú Ze Mkombo la Ngu a Inja Nena?
3. Kwase ugen u shiren tom hanma shighe cii yange yese inja i dedoo i zan mbamkombo hanma shighe la nena?
3 Mbapasen kwagh u Tartor mbagenev kpishi hii u zan mbamkombo zum u ve lu iyev la je. Kwase ugenegh u shiren tom hanma shighe u̱ ke’ Mbashiada mba Yehova umbur nahan ér: “Shighe u mo man anmgbianev av mbakasev yange se lu vesen a vese ke’ kwavanyom u 1930 la, se pinen a pine mbamaren asev shin a̱ gba u se za mkombo ga. Yange se gba fan je ser se mbá zan saa di sea lu dedoo ga tseegh. Tsombor wase bunden mbamkombo ga cii.” Anmgbian wase u kwase ne ngu a̱ “bunde van” he’ ijiir i civir Yehova ga, di vough er Ana, un u̱ lu profeti u kwase la kpa yange bunden ga nahan.—Luka 2:36, 37.
4-6. (a) Hii nan ve mbapasen kwagh u Tartor mbagenev ve bundu mbamkombo? (b) Hii nan i hingir sha ha u zan mbamkombo?
4 Ú ngu môm ke’ mba ve ze mbamkombo mba Mbakristu hanma shighe laa, shin ú ze tsere-tse-tsere? Mbakristu mba yange ve henen ér ve mbá eren ka doon sha gbaa ne je kpa ve hide ve sôr ve nenge. Ve nger iyange i hanma mkombo u ve ze ke’ usati mba ve tsough kpuaa ve ver yô. Tsô mba ngur gbidyen kwar sha kwaghngeren u ve nger la yô, gema kpiligh ve iyol a ingyegh ki mbamkombo mba ve ze ga yô.
5 Kpa alaghga or a kaa ér, ‘Ka kwagh u kpilighyol u za̱ kaan ga, akaa tsule ior ainge je ka u̱ a de taver ve u̱ zan mbamkombo hanma shighe ga.’ Sha mimi yô, kape ashighe a se lu ker ne a lu a taver je la. Kpa shi ka cii la ga, ka u̱ mtaver la una za a za hemen a bunde ga. (2 Timoteu 3:13) Nahan kpa kera ka er kwagh ne a lu nahan ne ve i hembe hingir sha ha u zan mbamkombo hanma shighe ye gaa? Aluer ka u se zer yan kwaghyan u dedoo u ke’ jijingi kpìí sha u zuan a agee ga yô, se fatyô u lun a ishimaverenkeghen i wan ishima a mkighir u tar u ainge ne ú ve a mi sha a vese ne ga. Kanyi tyo, aluer se kera mba zuan imôngo ndúúrúú ga yô, á fatyô u meen se sha u se̱ gbihi “gbenda u orperapera” la kpum kpum! (Anzaakaa 4:18) Sha mimi yô, zum u se za hidi he’ ya sha iyange i i tum se iyol nahan, alaghga se fatyô u lun a ishima shimi i̱ zan mkombo ga. Aluer se vôr kpa se taver ishima se za yô, se zua a mtsera iyol yase shi se taver mba ve lu Mbakristu a vese imôngo mbara ishima ke’ Iyou i Tartor kpaa.
6 Mbaheberu 10:25 na ityôkyaa igen i hange hange i i ne ve i gbe u se zaan mbamkombo nduur nduur yô. Apostoli Paulu taver Mbakristu ishima he’ ivur la ér ve̱ kohol imôngo, ‘ve seer eren nahan sha er vé nenge iyange la i̱ lu mgbôghom yô.’ Een, mayange i̱ de hungur se u fan e̱r “iyange i Aôndo” i lu kporom ikyua ikyua ga. (2 Peteru 3:12) Aluer se kure ikyaa ser mkur u tar u ngun ne ngù ica hiinii yô, alaghga se hingir u den ser asaren a ase a̱ kar a̱ himbir akaa a ke’ jijingi a a lu hange hange la, amba er mkombo u zan nahan. Tsô, er Yesu vande tan icin nahan, ‘iyange la ia fatyô u va bulun se a bur er kwaghhônon nahan.’—Luka 21:34.
Lú Or u Ungwan Kwagh Saan a Mi
7. Hii nan i lu kwagh u injaa u mbayev veren ato ke’ mbamkombo?
7 U gban zan mbamkombo di tseegh tsô yô, kuma ga. Gba u se sule iyol se ver ato se ungwa kwagh u i ôron la. (Anzaakaa 7:24) Kwagh ne kua mbayev asev kpa ker. Zum u wanye nan ze makeranta yô, ka i ver ishima er nana̱ kegh ato a tica u nan la, shin aluer itinekwagh i i tesen la doo wanye la ishima ga shin a̱ lu inja er í gande mkav u nan je kpaa. Tica la fa je ér aluer wanye la nôngo u keghen ato yô, a̱ bunde kera kera kpa naná zua a mtsera kpuaa ke’ kwagh u i lu tesen la kpee. Sha nahan yô, kera doo u̱ mbayev mba ve kom makeranta mbara vea kegh ato sha kwagh u i lu wan ke’ mbamkombo mba tiônnongo la gaa, shin ka u gban den ve di tsô ér mkombo á hiin a hii nahan maa vè gba mnyama? U ôron kwagh haan mbabov kera yô, akaa a injaa a lun a mimi agen kpishi a ke’ Ruamabera nga “ican u kaven.” (2 Peteru 3:16) Kpa mayange se hule mfe u wanye nan lu a mi u kaven kwagh la kera ga. Aôndo ti hur kera ga. Yange wa mbacivir un mba ve lu iyev la kwagh sha ashighe a Bibilo la ér ‘ve̱ ungwa, ve̱ hen ve̱ cian Yehova, shi ve̱ ver ishima ve̱ waan akaaôron a tindi ne cii ikyo,’ man agenegh taver u mbayev vea kav je ka u henen a hen ga. (Duteronomi 31:12; tôô kar sha Levitiku 18:1-30.) Nyian yô Yehova kera soo ér mbayev ve eren nahan ga he?
8. Kanyi kwagh mbamaren mbagenev ka ve er u̱ wasen ônov vev sha u ve̱ kegh ato ke’ mbamkombo?
8 Mbamaren mba ve lu Mbakristu kav ér mbamgbe mba ke’ jijingi mba ônov vev mbara mba panden mbá kur ve sha kwagh u ve ongo ke’ mbamkombo la. Sha nahan yô, mbamaren mbagenev ka ve sôr ian ve ver ér mbayev vev ve̱ tôndo icin i mnya cii man vea mase zan mbamkombo ye, sha er vea za nyôr ke’ Iyou i Tartor kundu kundu shi vea wa iyol u henen kwagh kpaa yô. Mbamaren mbagenev di yô, alaghga vea pande shighe u ônov vev ve nengen televishen he’ aikighe u i lu u a za mkombo la sha kwaghfan shin vea yange a yange kuaa. (Mbaefese 5:15, 16) Shi amba a mbamaren ne nga panden akaa a danen or la, mba gem mba taver ônov vev asema u keghen ato shi henen kwagh sha anyom a ve a kom vough kua tahav vev la kpaa.—Anzaakaa 8:32.
9. Kanyi ia wase se u lun a mfe u keghen ato a kwaghôrono?
9 Zum u Yesu kaa ér: “Ver nen ishima sha m-ongo u ne ongo” la, lù ôron kwagh ne a mbaganden. (Luka 8:18) Sha ayange ne yô, kape i heghem u ôron a ôr je la, kpa u eren yô ka hegh ga. U̱ ôron kwagh sha mimi yô, u̱ keghen ato zulee ungwan kwagh ka zegetom, kpa or a fatyô u yesen a yese mfe u ungwan kwagh la ke’ a nan. Ú nguren ungwan kwaghôron u a har sha Bibilo shin gbaa mkombo ugen yô, nôngo u̱ paven asemaakaa la veren kposo kposo. Ver ishima kegh a kegh kwagh u i lu u̱ or u nan kwaghôron la naná kende a ôr la. Ker atôakaa a ú yar tom a a ke’ kwaghpasen shin ke’ uma wou yô. Á nguren teren asemberakaa yô, hiden timen sha á ke’ ishima you e̱r kwaghôron a lu zan hemen la je. Shirin ngeren akaa shin inya tiônôô.
10, 11. Mbamaren mbagenev wase mbayev vev u hemban ungwan kwagh doo doo nena, man ka igbenda i nyi ú nenge wer ia wasa?
10 Mbá hiin u henen inja i dedoo i ungwan kwagh doo doo la iyev je. Shighe u mbayev mba ve lu a kuma makeranta ga mbara ka vea lu a̱ fa u ôron man u ngeren ga la je tsô maa mbamaren mbagenev ve taver ve ishima ér ve̱ “ngeren akaa” a ve ongo ke’ mbamkombo la shin inya. Ve nger ikyav sha kwatakerada zum u i yer ati a í fe a dedoo amba er “Yehova” man “Yesu” shin “Tartor” nahan la. Aluer i er nahan yô, mbayev vea hen u veren ishima ungwan kwagh u i er sha tsèmbé u nan kwaghôron la.
11 Mbayev mba ve gande je kpa ashighe agenegh ka i gba u a taver ve ishima ér ve̱ kegh ato. E̱r i za̱ mkohol u vesen u Mbakristu man orgenegh u lun ityough sha tsombor na nenge e̱r ishima yem wan na u nomso u lu anyom 11 la sha akaa agenegh yô, a gema Bibilo a na wanakiriki la ér or u nan kwaghôron la una yilan ityouv mbi ruamabera yô ngura a̱ bughun. Ter shon, u̱ un kpa lu shirin ngeren akaa shin inya la lu kuran nengen ér wan na kôr Bibilo ke’ uwe. Nahan wan la hemba kpen iyol dondon akaaôron a sha aaven a mkohol la paase paase.
I̱ Ungwa Ú Imo
12, 13. Hii nan i lu hange hange u zuan akenge imôngo wan atsam a tiônnongo?
12 Ngise Tor Davidi wa icam ér: “Me ningir sha atse a Ou a nanden nagh sha mi . . . TERE; sha er me er, á ungwa imo i ishughun yô.” (Pasalmi 26:6, 7) Mbamkombo mba Mbashiada mba Yehova ka aaven a doon tsung a se pase jighjigh wase u nan la genger genger yô. Gbenda môm u se er kwagh ne yô, ka u bughun zwa wan atsam ke’ tiônnongo. Kwagh ne ka vegher u injaa u mcivir wase je la, kpa aluer se ver ishima ga yô, una kera gba se kwagh ga.
13 Mbayev mbagenev mba ve lu a fa u ôron takerada ga yô ka ve kôr asemberakaa a ke’ atsam a i gbe u a va wa ke’ hanma sati la ke’ ityo. Ka i saan ve iyol u wan atsam vea mbaganden kpôô. Nahan cii kpa, mbayev ka vea nguren ganden yô, uwer u gba gban ve u zuan akenge imôngo wan atsam a Tartor. Mbaganden mbagenev kpa iyol ka i kpe ve u̱ wan atsam ke’ mbamkombo. Nahan kpa atsam a wan ka gbaa u mcivir wase, di er tom u kwaghpasen kpa u lun vegher u mcivir wase nahan. (Mbaefese 5:19) Se mbá nenge sha afatyô wase cii sha u wuese Yehova ke’ tom u kwaghpasen. Nahan sea doo akenge shin sea doo ga kpa, se kera nôngo se wuese un sha u genger wan atsam a wuese un a ishima i môm gaa?—Mbaheberu 13:15.
14. Hii nan i gbe u se ver ishima u vanden wan ago a kwaghhenen u se henen ke’ mbamkombo mba tiônnongo la tsuaa?
14 Shi se mba ne Aôndo iwuese sha mkaanem ma maan a maa, ma se ne zum u i lehe mbaungwan kwaghôron ér ve wa zwa ke’ mkombo la. Kwagh ne na gba u á vande kohol iyol. Mbá gbe henen sha akaa a Aôndo a a ze shimi la kôvora tsô ga. Apostoli Paulu u yange henen Ruamabera tsung la kpa lù kav kwagh ne. Yange nger kwagh ér: “Kpash! Mze u ikpelaakaa man mfe man kwaghfan u Aôndo ve za kweng ne!” (Mbaromanu 11:33) Ne mbayaav, gba hange hange u ne wase hanma or u he tsombor wen u̱ timen ke’ kwaghfan u Aôndo e̱r i pase ke’ igbar ke’ Ruamabera nahan. Sôr ian ver a ver zum u tsombor u henen Bibilo la sha u pasen asemberakaa a taver la shi sha u ú wase tsombor wou u̱ kohol iyol i mbamkombo kpaa yô.
15. Ka kwaghwan u nyi una fatyô u wasen or u wan zwa ke’ mbamkombo?
15 Aluer u soo wer ú waan zwa ke’ mkombo puusu puusu yô, hii nan u vande kengese mkaanem ma i lu ú pe ôron la tsuaa ga? Ka u ôron kwagh gôgô la kwagh a gbe shami ga. U̱ ôron ivur Bibilo paase paase shin tsever kwaghôron u a dugh shin ishima you di kpuaa la tseegh kpa kuma. Mbapasen loho mbagenev ka ve kaa a orhemen kwaghhenen la ér a̱ ver mlumun u hiihii u sha ma ikyumhiange igenegh i ve tsough la sha ci ve sha er ian i pasen jighjigh u nan ve ke’ igbar la ia kar ve ga yô.
Mbalanenkwagh Hingir Mbafankwagh
16, 17. Ka kwaghwan u nyi ortamen ugen yange na diakono, man hii nan ve yange kwaghwan la wasa?
16 Mbá zeren umbur se ke’ mbamkombo mba Mbashiada mba Yehova ér se̱ ôron Mkaanem ma Aôndo hanma iyange. U̱ eren nahan la ka a na i kundu we or iyol ishima i môm. Shi kwagh la ka a wase se u tsuwan eren akaa sha inja, shi kôôm mbamshi asev shi wasen se u paregh ameen shi una wase se u hiden sôghul ke’ jijingi aluer se hii u dorugh yemen ke’ kpe je kpaa.—Pasalmi 19:7.
17 Ke’ atôônanongo agenegh kpishi yô, mbatamen mba ve vie ve fe tom tsema tsema mbara ka ve wa iyol ve kegh a kegh u wan or kwagh u a har sha Ruamabera man a zough sha mbamgbe asev yô. Kwagh u i gem i gbe u se di se er yô, ka u se “kese ma” sha u keren kwaghwan ve u á har sha Bibilo la. (Anzaakaa 20:5) Iyange igen gumor u tseen ishima u̱ lun diakon kende pine ortamen ér a na un mbamhen mba vea wase un u̱ hemban lun tiônnongo a inja yô. Ortamen, u yange fa gumor ne dedoo la, gema bugh Bibilo na he’ 1 Timoteu 3:3 he’ ape i kaa er ambaaior a i tsough a ne a̱ luun “inja legh legh” la. A kpe iyol a tese gumor ne igbenda i una kar ve una eren kwagh a ior legh legh yô. Yange ishima vihi anmgbian u lu gumor ne sha er i we un kwagh sha mimi yum yôô? Mayange je ga! Yange kaa ér: “Ortamen ne bugh Bibilo, nahan m kav mer kwaghwan ne due ka he’ Yehova.” Yange diakon la yar tom sha kwaghwan la a iwuese nahan ngu zan hemen tsembelee je.
18. (a) Kanyi yange i wase gumkwase Kristu ugenegh u hendan a imeen ke’ makeranta? (b) Ka avur a Bibilo a nyi ka u umbur zum u ú tagher ishigh a imeene?
18 Shi Mkaanem ma Aôndo ma a fatyô u wasen mbayevikyaior u “yevese asaren a sha inja i mbayevikaior la.” (2 Timoteu 2:22) Gumkwase ugenegh u a lu Orshiada u Yehova u a sember been kôleeji yô yange kôr cio u palegh ameen sha anyom a yange lu henen makeranta la cii. Yange fatyô u eren kwagh ne sha u timen sha avur a Bibilo agenegh shi yaren tom sha a kpaa. Yange a zer henen sha kwaghwan u i nger ke’ Anzaakaa 13:20 ér: “Zende a mbafankwagh imôngo, nahan we kpaa ú hingir orfankwagh” la. Sha nahan yô, a ver ishima a kôr azende vea mba atindiakaa a ke’ Ruamabera lu ve tamen kwagh la tseegh. Yange hen nahan ér: “Ú ngu wer m hemba orgen ga. Aluer m hingir u zenden vea ikpelaior i i lu i vough ga yô, a gba saren mo ka eren mer i doo azende a am, man kwagh la una fatyô u van a kwaghbo.” Shi kwaghwan u Paulu u i nger ke’ 2 Timoteu 1:8 la kpa yange wase un. A nger nahan ér: “Kunya u̱ de ker u u eren shiada sha u pasen Ter wase ga, . . . kpa nyôr nongo sha ican i yan sha ci u Loho u Dedoo.” Nahan a er sha kwaghwan la, hanma shighe u ian a̱ due cii a pase mba ve lu nongo môm a na la kwagh u jighjigh u nan na u a har sha Bibilo la vangertiôr. Hanma shighe u yange a̱ kaa ér a̱ due a va na ibaver sha ishigh ki klase na cii, a tsua itinekwagh i ia na un ian i yeren ker pasen ve kwagh sha kwagh u Tartor u Aôndo sha ayom yô.
19. Hii nan gumor ugenegh yange fatyô u hemban mbamkighir mba tar ne ga, kpa kanyi yange i na un ager a ke’ jijingi?
19 Aluer se mba tsumen undun “gbenda u orperapera” yô, Mkaanem ma Aôndo maa fatyô u kôôm akishiangahar a ase. (Anzaakaa 4:18) Gumor ugenegh u ke’ tar u Afrika yange hen kwagh ne iyol na. Zum u orgenegh u a lu môm ke’ Mbashiada mba Yehova va un inya yô, ngula lumun u henen Bibilo. Kwagh u yange lu henen la doo un, kpa ica i gbe ga yô a ya ikyar a ujende mba bov sha makeranta. Nahan shighe karen yô, a tsume gbenda a yem zan zan a gba ke’ inja uma i eren dang u ijimbagh. A lumun ibo nahan ér: “Yange imo yam i ke’ ishima zer ngaghen mo gbem, tsô m de u zan mbamkombo. Ke’ masejime yô, shi a hide a bugh u zan mbamkombo. Gumor ne pase kwagh ne ke’ igbar nahan ér: “Yange m mase va kaven mer ityôkyaa i vesen i yange i na kwagh ne er yô lù ijen i ke’ jijingi i yange m gba la. Yange m henen kwaghhenen u sha tseeneke la ga. Ka nahan ve yange m fatyô u wan ishima a ameen ga ye. Tsô maa m hii u ôron Iyoukura man Awake! Tegh tegh tsô gbong gbong wam u ke’ jijingi gba hiden mo her shi m kire uma wam kpaa. Kwagh ne gema lu shiada i dedoo he’ mba yange ve nenge mbamgem mba yange m gema la. I erem batisema, nahan hegen yô saan mo yol.” Kanyi yange i na gumor ne agee a hemban myen u yange yina un iyol la? Yange hide zua a agee a na a ke’ jijingi la sha u zeren henen Bibilo sha tseeneke na gbem.
20. Gumor nana fatyô u hendan a num u Satan a te la nena?
20 Ne mbayevikyaior mba ken Kristu, mbá tan num sha aven nyian! Aluer ka u ne hendan a num u Satan ne yô, saa ne yaan kwaghyan u ke’ jijingi nduur nduur. Orpasalmi u̱ ikyav i tese ér un kpa yange lu gumor la kpa kav kwagh ne. Yange sugh Yehova e̱r a ne Mkaanem Nam, sha er ‘wanyekwaor nana fatyô u wanger gbenda u nan yô.’—Pasalmi 119:9.
Hen Ape Aôndo a Hemen Gbenda Cii, Se dondo
21, 22. Hii nan i lu u se gba kuren ikyaa tsô ser gbenda u mimi ne ngu ican yum ga?
21 Yange Yehova hemen ikyurior i Iserael due a ve ke’ tar u Igipiti yem a i̱ ke’ Tar u Ityendezwa. Sha mnenge u orumace yô, gbenda u yange tsua u karen a ve la lù u gban yan ican tan aningir gbilin gbilin tsô. U̱ Yehova yange ma hemen ior nav ma kar a ve sha gbenda u ikyav i tese gbar gbar ér lù u hemban heghem u karen, ú yange per Zegemnger u Mediterenia jighilii la yô, a gema a kar a ve sha gbenda u ke’ taaikyôngo ú yange ú lu ican u̱ zan sha u la. Kpa kwagh ne yange lu erdoo jighilii je Aôndo e̱r a ior nav ye. Shin er gbenda u peren zegemnger la yange u hemba lun kôvora nahan kpa, yange ma u na Mbaiserael ma za asegh sha Mbafiliti mba vihin tu mbara. Nahan er yange Yehova gema kar a ior nav sha gbenda ugenegh yô, a kùrà ve sha u Mbafiliti ve de te sha ave faa yum ga yô.
22 Kape nyian kpa gbenda u Yehova a hemen se ne alaghga kape ua lu inja er ngu ican u karen je la. Hanma sati yô, ka se lu a aan a i ser i ver u eren ityom i ken Kristu amba er mbamkombo mba Mbakristu man kwaghhenen u henen sha tseeneke man tom u kwaghpasen kpaa yô. Alaghga á lu inja er igbenda igenegh hemba heghem nahan. Nahan kpa saa se dondo gbenda u Aôndo a hemen la ve se fatyô u nyôron he’ ijiir i se lu nôngon sha gbashima ser se ar la ye. Sha nahan yô, de se za nen hemen u ngohol kwaghwan u hange hange he’ Yehova shi se lu nen sha “gbenda u shambe shambe” la gbem sha won!—Pasalmi 27:11.
U Fatyô u Pasen Kpa?
• Hii nan i gbe u se zaan mbamkombo mba Mbakristu hanma shighe?
• Kanyi mbamaren vea fatyô u eren sha u wasen ônov vev ve̱ kegh ato ke’ mbamkombo?
• U̱ veren ato ungwan kwagh doo doo la kua nyi man nyi kereghe?
• Kanyi ia wase se u wan zwa ke’ mbamkombo?
[Study Questions]
[Picture on pages 14, 15]
U zan mbamkombo mba Mbakristu la wasen se u lun a iyange i Yehova la ke’ ishima her
[Pictures on page 16]
Igbenda i wuese Yehova ke’ mbamkombo mba Mbakristu ngi wue wue