Ibaver I Mba Yôôn Tartor

Uma u Sar Sar u He’ Tsombor La Úrúgh Mbagen Ve a Ve he’ Aôndo

YANGE Yehova ver Yosev iveren, na un kwaghfan u kpilighyol man mkav kpaa. (Aerenakaa 7:10) Sha nahan yô, mfe u Yosev la “doo Farao kua mbatomov nav cii.”—Genese 41:37.

Kape nyian kpa i lu vough je la, Yehova ne ior nav mfe man mkav ken Bibilo ve i henen la. (2 Timoteu 3:16, 17) Imba mfe man mkav ne i umen atam a dedoo zum u ka vea ngure yaren tom a kwaghwan u a har sha Bibilo la yô. Anza a ve a dedoo la nga shi ‘doon mba ve nengen a la,’ di vough er akaa a a er ke’ tar u Zimbabwe ne a tese nahan.

• Kwase ugenegh lu a mbawanndor a na mba ve lu Mbashiada mba Yehova yô. Shin er a soo kwagh u Mbashiada ga nahan kpa, gema soo inja ve la, hemban cii je yô ieren ve i he’ tsombor la. Yange nenge er nom ugen vea kwase na ve doo ayol a ve tsembelee shi er mbayev vev kpa lu mba ungwan kwagh nahan. Kwagh u yange hemba kôron un ke’ ishima cii je yô ka er yange nenge kwase la doo nom na ishima kpishi yum la.

Jighjigh u nan u a dumbur ke’ tar u Afrika yô ér, aluer kwase doo nom u nan ishima yum yô, kwase la nan na nom la ìl-shima sha u “kangen” nan. Nahan kwase la kporom ikyua a kwase Shiada ne za pine un ér: “Wea lumun yô, ú shi fatyô u yiman mo a ìl-ishima u ú ne nomou la sha er mo kpaa me doo nomom ishima di vough er ú doo u̱ wou ishima nahan kpa?” Kwase Shiada la gema kaa fese je ér: “Een, wu, kper je me va na ú atetan.”

Kper sev mbu aven yô, anmgbian wase u kwase ne tôô “ìl-ishima” ne za kwase u wan ndor a na ne a mi. Yange lu nyi kwagha? Lu Bibilo kua takerada u i gber i yer ér Mfe u Una Va a Uma u Tsôron La. Er mba timen sha kwaghôron u i nger ke’ takerada u Mfe sha itinekwagh i i kaa ér “U Maan Tsombor u Civir Aôndo” la mba been kera yô, a kaa a kwase la ér: “Ka ìl-ishima’ shon u mo man nomom se ‘kange’ ayol a ase a mi je ne, shi ka ityôkyaa ne í ne ve se doo ayol a ase ishima yum nahan ye.” Maa i hii Bibilo i henen a kwase la, a za hemen zan zan a za ar sha iaven i tseghan iyol na sha ci u Yehova sha u mirin shin mnger.

• Ikpur pania uhar mba yange i tindi ve he’ antiônnongo u kpuaa u lu ikyua kyua a joughtar i imbusutarimese man ityoughkitaregh ki Zimbabwe man Mozambique la yange ve due tom kwaghpasen u sha ihinda-ihinda la ga je kuma sati uhar. Ityôkyaa yô lu nyi? Sha ci u ior lu van ve inya sha u va ungwan kwagh u ve lu ôron la. Môm ke’ pania mban pase er kwagh la yange hii yô, ér: “Yange se haa zende i kuma kilomita 15 hanma sati se za he’ ya u orgen u yange sar un ka fan mimi yô, se za hen Bibilo a na. Yange sea ngure ser se ar he’ ijiir ne i yina se ga. Yange i gba u se hungwa amgbiôr, shi se per ifi u saren avenge u yange a gba se ikyer kyer yô. Kwagh ne yange i lu u se tôô akondo man akôv a ase sha ityou cii ve se gba yemen ke’ mnger ye. Sea peren yande la yô shi se hide se hua akondo ase heregh.

“Gbashima wase ne yange doo ahuraior a or u mimi gba un ishima ne kpishi. Ke’ atô u mba yange ve nenge a kwagh ne yô lu orhemen u nongo u kwaghaôndo u ke’ gar la. A kaa a mbadondon nav ér: ‘Ne soo u lun a ishima i tseen er agumaior a ahar a á lu Mbashiada mba Yehova la gaa? Kwagh môm yangen ve u eren tom ve ga.’ Kper nan yô, mbadondon nav kpishi va he’ ya wase sha u va fan e̱r i hii ve se gbe uwer ga yum la. Heela tseegh ga, ke’ atô u usati mba ve kar uhar la, se lu a mbavannya je yô se kera lu a ian i yôron kpaa ga!”

Môm ke’ mbavannya mba ve va he’ ya u pania mban ke’ shighe u usati mba uhar mban ne yô lu orhemen u kwaghaôndo la. Hen ase ke’ ishima sha imba iember i pania mban yange vea lu a mi shighe u or la lumun ér i henen Bibilo a na ke’ ya na la yôô!