Guyolough Ndahar, Asema Gema Kehe

ALUER ú ngu ôron ior mba ú fe ve ga kwagh u Tartor u Aôndo man ityaven you gba ve sha ikyooso tseegh nahan, a lu ú nena? Laura una fatyô u ôron we er á lu ú yô. Ngu anyom 33, kpa ityaven na yô, ia ar di sha ikyooso i or daalaa tsô. Un vea anngô na u kwase María, u un di a gem a lu anyom 24 kpa ityaven na i gbe sha ikyooso kpuaa tseegh la, mba ke’ gar u Quito, ke’ kpentar u Ecuador. De ve̱ pase mbamtaver mba ka ve tagher a mi ke’ tom ve u Mbakristu la.

“Ka sea zaan he’ haregh u se pasen kwagh her la shin sea zaan mbamkombo mba Mbakristu yô, se zende i kuma er tiôn kilomita nahan cii ve se mase za nyôron mato ye. Pe mato ka a za hungwa se la kpa shi ka se zende i kuma er tiôn kilomita nahan cii ve se za ar he’ ijiir i se nyôr mato u sha uhar la ye. Kpa kwagh ka a er i vihi yô, aniwaav utaan mba vihin tu tsung mba sha gbenda ne. Se mba cie aniwaav kpishi sha ci u he’ vese yô ka ve kehe je e̱r ka anyinya nahan. Ka se tôô gôgô aga se yer mape cii ve se nyôr mato ye, sha e̱r aluer va hingir kpee shighe u se lu zenden yemen ke’ ya la yô, se anger ve se kar yô.

“Ka i lu se kwagh u ican kpishi u nyôron mato. Ka se tile sha igyungu mcimbi i i lu he’ pe i nyer mato la, sha er se fatyô u unden sha mato a ican i yan shio yô. Deraba mbagenev ka ve tile ikyua a igyungu mcimbi shon, kpa mbagenev di yô mba til her ga. Ka vea tile pe gen yô, u nan hembe taven ke’ atô wase la nan wase ugenegh la nan unde. Cii man se̱ nyôr mato u sha uhar la yô, ka i gba u se per zege gbenda—man kwagh ne ka a er se ican kpishi sha ci u se lihe angahar kera ga. E̱r se gbe zun yum yô, ikpa i wan ityakerada i̱ i̱ yoho yum kpa ka i seer nan se ican. U nôngon ser ikpa la i̱ heghem yô, ka se tôô Bibilo i cuku shi se pande a pande ityakerada i se tôô yô.

“Hii iyev wase je, se uhar cii se mba kusususu kpishi. Mba wan ndor a vese fa je ér u lamen a ior mba se fe ve ga la ka i lu kwagh u cier se iyol kpishi. Sha nahan yô ka vea nenge sea manden ave sha ihinda ve nahan, i kpiligh ve iyol shi i doo ve kpaa, man ashighe kpishi ka ve kegh ato a vese. Kpa he’ ape í fe se dedoo ga yô, ashighe kpishi ior ka ve nenge e̱r se lu mba taven ga la di tseegh; nahan ashighe agen ve kera ver ishima u ungwan loho ne tsember tsember e̱r ma ve ongo la ga. Nahan cii kpa, u fan ser se doo Yehova ishima la taver se ishima u zan hemen aa tom u ivangeli ne. Shi u timen ke’ Anzaakaa 3:5, 6 la kpa ne se ishimataver.”

E̱r Laura man María ve tese ikyav nahan, u den ér mbamshi mba sha iyol ve̱ yange se ga kpa geman taver ishima zan hemen her la ne Aôndo icivir. Apostoli Paulu yange sôn ér ma i dugh un “saa ken iyol” kera, man alaghga kwagh shon yange lu ma angev mbu sha iyol. Kpa Aôndo kaa a na ér: “Mrumun u sha mhôôn Wam kuma u, gadia  agee Am ka a tema hoghom hoghom ken isheer.” Een, gba u saa á kar a iwan i sha iyol yase la kera keng ve se civir Aôndo ga. U haren sha Aôndo a ishima i môm la una wase se u eren kwagh u se fetyô u eren ke’ mlu wase cii. E̱r Paulu yange lu a mnenge ne sha kwagh u ‘saa na u ken iyol’ la yô, á kaa ér: “Ka shighe u m lu isheer la je m gem m taver ye.” (2 Mbakorinte 12:7, 9, 10) Anyom nga karen yô, Paulu shi nger wener: “M ngu a agee a eren akaa cii je ken Un u A taver mo ne.”—Mbafilipi 4:13.

Ainge kpa Aôndo ngu eren akaa a kpilighyol sha ikyev i nomsombaiorov man kasev man mbayev mba kiriki mba ve suur sha a na a ishima i môm yô. Mbagenev ken ave gba awan atô kposo kposo. Shin e̱r ve cii ve lu a ishimaverenkeghen ér Aôndo una va bee ve angev ke’ Tartor u Aôndo nahan kpa, mba keghen ér saa Aôndo a̱ va na ve mpever sha mbamzeyol vev mbara cii ve vea nôngo kwagh sha u civir un ga.

Ú ngu a ma mshi u a ze ú iyol yôô? Yô tavershima! Sha jighjigh u nan wou la yô, we kpa ú fatyô u hingir e̱r Paulu man Laura man María nahan. Á fatyô u ôron kwagh ve, e̱r yange i ôr kwagh u nomsombaiorov man kasev mbajighjigh mba sha ayange a tsuaa la nahan, ér: “I taver ve agee ken isheer.”—Mbaheberu 11:34.

[Picture on page 30]

María

Laura

[Picture on page 31]

María ngu wasen Laura u unden sha mato

[Pictures on page 31]

“Se mba cie aniwaav kpishi sha ci u he’ vese yô ka ve kehe je e̱r ka anyinya nahan”

Shin kpe shiin: Laura man María man mba yange ve henen Bibilo a ve yô