Ka Han Ú Zua a Bemshima?

Mbamkposo mba kpishi he’ atô u shighe wase ne kua u Thoreau u se vande ôron kwagh na ke’ kwaghngeren u a kar la. Kwagh u a hembe kahan kposo je yô ka er kwaghwan u a lu sha er ú kar ve ú zua a bemshima la a te jar nyian yô. Mbahenen kwagh sha gbaa u mhen u or kua mbangeren ityakerada i wasen ior—kua mbangeren akaa ke’ upipa mbà nán abaver kpaa—mba nan mbamhen vev. Alaghga kwaghwan ve la una lu a iwasen sha anshighe kpuaa; kpa u zuan a iwasen i tsan gbem yô, gba u se ker kwagh u a hembe heela yô. Kape ior mba se er kwagh ve ke’ kwaghngeren u a kar la yange ve mase kaven je la.

ANTÔNIO man Marcos man Gerson man Vania kua Marcelo cii yange ve vese sha ajiir kposo kposo shi mbamzeyol kpa ve lu a mi atô kposo kposo. Kpa ve lu a akaa atar a yange lu kwagh môm yô. Kwagh u hiihii yô, shighe lu u ve cii yange ve ‘lu a ishimaverenkeghen ga shi ve lu a Aôndo shin tar kpaa ga yô.’ (Mbaefese 2:12) U sha uhar yô, yange sar ve u zuan a bemshima. Man u sha u tar yô, ve cii ve zua a bemshima u yange ve soo la zum u ve lumun u henen Bibilo vea Mbashiada mba Yehova yô. Er mba gbe zan hemen yô, ve kav e̱r kwagh ve a gbe Aôndo ishima yô. Sha mimi yô, er Paulu ôr a mba ke’ Atene sha ayange na la nahan, Aôndo ngu “ica a  hanmô wase ga.” (Aerenakaa 17:27) U kwagh ne kuman we sha mimi la ka kwagh u vesen u una wase ú u zuan a bemshima yô.

Hii Nan Bem A Yen Yum Nahana?

Bibilo na se atôakaa a vesen ahar a a ne ve bem a ban ke’ tar yô—a̱ lu bemshima shin a̱ lu bem u he’ atô u ior kpaa. Í pase ityôkyaa i hiihii la ke’ Yeremia 10:23 nahan ér: “Gbenda u or ngu sha ikev i nan ga; or u zenden la, mvershigh u iaven i angahar a nan ngu sha ikev i nan ga.” Kwaghfan shin mkav u or kuma u naná hemen iyol i nan a iwasen shio ga, man iwasen i i lu í tseegh i lu i injaa la gema due ka he’ Aôndo. Uumace mba ve undu gbenda u Aôndo la mayange vea zua a bem u tsan gbem ga. Shi ityôkyaa i sha uhar i i ne ve bem a ze ihyen yum la ngi ke’ kwaghôron u apostoli Yohane a kaa nahan la, ér: “Tar cii ngu sha ikev i Orbo.” (1 Yohane 5:19) Dugh hemen u Aôndo sha yô, hanma shighe cii or u i nengen a na ga kpa nan lu jim jim—shi nan lu a tahav kpoghuloo la—“orbo” Satan, una vihi iniôngon i orumace nan nôngon sha u zuan a bem la.

Sha ci u atôakaa a ahar ne yô—inja na yô er ior kpishi ve undu gbenda u Aôndo shi er Satan a lu eren tahav shin tar yô—maa kwagh tser tsombor u uumace cii. Apostoli Paulu yange pase wang nahan ér: “Akaa a i gbe a sha won cii la nga kinen imôngo nga toghor zan zan hegen.” (Mbaromanu 8:22) Ka an nana nyiman kwaghôron ne? Ke’ ityar i í lu yôughyôugh kua í ibanave i̱ kohol í cii, mbamzeyol mba he’ tsombor kua ifer man ijirôron i mimi ga man u kwagh u mbagenev vihin mbagenev ishima man ishimanyian i sha kwagh u inyar man ihyom i mbavia a mbavia kua ikyuior a ikyuior igen man mkighir man iangev kua akaa agen kpishi kohol yàngè ior u zuan a bemshima.

Ape A Zua a Bemshima Yô

Zum u Antônio man Marcos man Gerson man Vania kua Marcelo ve hen Bibilo, Mkaanem ma Aôndo yô, ve hen akaa á yange sôr uuma vev yô. Ve kav ér iyange igen sev a hungwa a av yô, mlu u tar ne una gema kposo. Kwagh ne gban kan di ishimaverenkeghen i gbilinigh i henen ér yange sev a av hanma kwagh una hingir vough tsô ga. Ka vangertiôr u a lu a imaagh ki mimi jim jim u ve fe dedoo ér Aôndo ngu a awashima sha ci u uumace man aluer ve er sha ishima na yô, hegen je kpaa vea fatyô u zuan a iveren sha awashima shon yô. Akaa a yange ve hen ke’ Bibilo la cii ve yar tom a á ke’ uuma vev, nahan akaa hingir u lun ve guda. Ve zua a msaanyol man bem je hemba er yange ve hen ér a lu la.

Antônio kera ngu eren ayôôso shi gban num u mbatomov la ga. A fa e̱r mbamgem mba i ve a mi sha amba a igbenda la ve yen shi ve lu sha anshighe kpuaa tseegh yô. Or u ngise hemen mbatomov ne hén kwagh u Tartor u Aôndo. Ka Tartor shon u ior umiliôn imôngo ka ve sônon ke’ msen zum u ka vea kimbir Msen u Ter Wase (shin, Ter Wase u A lu sha) la ve ve kaan a Aôndo ér: “Tartor Wou u̱ va” la je la. (Mateu 6:10a) Antônio hen fa e̱r Tartor u Aôndo u lu gomoti u a lu sha jim jim u̱ una va uumace a bem u mimi yô.

Marcos hen u yaren tom a kwaghwan u dedoo u i we ke’ Bibilo sha kwagh u ivesegh la. Sha nahan yô, or u ngise lu or patii ne hide zua vea kwase na mba saan saan hegen. Un kpaa ngu veren ishima keghen shighe u á shi ikyua kyua u Tartor u Aôndo ua va kar a tar u hua u ú soo iyol i ú tseegh ne kera ve, una gema a ver ú hemban doon sha ityough ki ú la. Hemba ngun a mkav tsembelee sha ishember i i ter ke’ Msen u Ter wase nahan ér: “I̱ er ishima You shin tar kpaa vough er i eren i Sha nahan” la. (Mateu 6:10b) Shighe u á nguren eren ishima i Aôndo shin tar yô, uumace vea hii u zuan a mkpeyol u ve lu a̱ vande zuan a mi sha won ga yô.

Gerson di ye? Kera ka ormbaiv man or u azende azende ga. Uma u wanye u ngise luun sha godobi ne hingir u lun a inja hegen sha ci u ngu yaren tom a tahav nav sha u wasen mbagenev u  zuan a bemshima. Er se nenge ke’ u̱vàndè-èrèn mban ne nahan, Bibilo i henen man u eren tom sha akaawan a i̱ la una fatyô u geman uma u or hingir u sha inja.

Bemshima ke’ Tar u Mzeyol

Or u ngise u i fe un tseer tseer ér ngu uwegh ke’ m-er u eren akaa sha u ivin ishima i Aôndo yô ka Yesu Kristu. Zum u ior ka vea henen Bibilo vea Mbashiada mba Yehova yô, ve fa kwagh na kpishi. He’ tugh mbu i mar un la mbatyomov mba Aôndo wa atsam a nan Aôndo icivir, ve kaa ér: “I̱ wuese Aôndo Sha, shin tar yô, bem a̱ lu sha ior mba i doon Un a ve la.” (Luka 2:14) Zum u Yesu vese yô, hemba gban un ishima u sôron uuma mbaiorov. Yange kav mlu u yange lu ve ke’ asema la nahan a tese er mhôônom ma ker un a mba ibanave man mbauangev kpishi yô. Nahan u zuan sha kwaghôron u mbatyomov la vough yô, yange pande va mbaasemaleghlegh a bemshima. A kaa a mbadondon nav ke’ mkur u tom na nahan ér: “M ngu veren ne bem, M ngu nan ne bem Wam; M ngu nan ne, kpa ka er tar u ne nahan ga. Asema a̱ de kera te ne kwe ga, man shi de kera cie nen kpaa ga.”—Yohane 14:27.

Yesu yange hemba di or u keren gbenda u uumace ve̱ tema ke’ mkpeyol tseegh la. Yange tôô iyol na kar sha orkuranilev, shi a gema a kàr mbadondon un mba lun asema leghlegh la sha iyôngo zum u akaa nahan la, ér: “M va sha u ve̱ zua a uma, ve̱ zua a mi wuee je. Mo M ngu Orkuranilev u dedoo; orkuranilev u dedoo ka A gbihi uma na sha ci u iyôngo.” (Yohane 10:10, 11) Een, Yesu na uma na sha ci u iyôngo na, un ti ngu er mbahemenev mba ainge kpishi mba ka ve ver ayol a ve ke’ hemen hiihii la nahan ga.

Se er nan ve se zua a iwasen sha kwagh u yange Yesu er laa? Ior kpishi fa mkaanem ma í kaa ér: “Gadia tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron” la. (Yohane 3:16) U or nana̱ na Yesu jighjigh yô, gba u nana vande lun a mfe sha kwagh na kua Ter na Yehova kpaa. Mfe u fan Aôndo kua Yesu Kristu la una fatyô u van a mlu u kangenaa vea Yehova Aôndo, mlu shon u una wase se u zuan a bem u ke’ ishima la.

Yesu yange kaa ér: “Iyôngo Yam ngi ongo imo Yam, Mo kpaa M fa i, ngi dondon sha a Mo kpaa. Mo M ne i uma u tsôron, ia tim mayange ga, ma or kpaa nana tsuwem i sha ikev je ga.” (Yohane 10:27, 28) Ungwa ase mkaanem ma kundunyol shi surun ishima man sha wono! Sha mimi yô, Yesu yange ôr má ka zurum anyom dubu uhar hegen, kpa má a tahav heregh di vough er yange má lu a mi sha shighe la nahan. Mayange i̱ de hungur we e̱r Yesu Kristu a lu uma her man hegen a lu hemen, a lu Tor u Aôndo a ker sha u a̱ hemen Tartor u sha la ga. Di vough er yange lu shighe u lu zenden shin tar anyom a kar kpishi la nahan, hegen kpa kwagh gban un a mba asemaleghlegh mba i sar ve pe zuan a bem u ke’ ishima la. Heela tseegh ga, hegen je kpa ngu Orkuranilev u iyôngo na her. Aluer se dondo un yô, una wase se u zuan a bemshima kua vangertiôr u se lu a mi u nengen a shighe u bem una mgbough la—ka shighe u ipila man ityav man ifer cii vea kera lu ga je la.

Ka se zua a mbamtsera sha u fan shi nan jighjigh ser Yehova una wase se ken Yesu la. Ú umbur Vania u yange i undu un a ityom i taver kpishi shighe u lu wanye kwase cuku ve hen ér Aôndo hungur a na la kpa? Hegen yô, Vania fa e̱r Aôndo a gbihi un ga yô. A kaa wener: “M kav e̱r Aôndo a lu kpôô kpôô á lu a mbamlu mba dedoo yô. Dooshima na yange ná un u tindin Wan na shin tar sha u a̱ va na se uma yô. Kwagh ne ka kwagh u hange hange u i gbe u ior vea fa yô.”

Marcelo er shiada ér mlu na vea Aôndo ka u mimi. Or u yange shi sha uiniongo mba zan tseegh ne kaa ér: “Ashighe kpishi agumaior ka a fa kwagh u vea er ga nahan ve hingir u vihin ayol a ve. Mbagen ve hingir u menan icimbiv mbi bov er mo kpa yange m menan nahan. Sarem pe  mbagenev kpishi ma ve zough a iveren sha u henen mimi u Aôndo man Wan na di er mo kpa m zough a mi nahan.”

Sha u henen Bibilo kure kure yô, Vania kua Marcelo hii u nán Aôndo jighjigh taveraa, shi lun a vangertiôr sha iyol i Aôndo ka a wa a kegh a kegh u wasen ve sha u been a mbamzeyol vev la kpaa. Aluer se er kwagh u ve kpa yange ve er la yô—ka u henen Bibilo shi yaren tom a kwagh u i̱ kaa je la—nahan se zua a bemshima u vesen vough er ve kpa yange ve zua a mi nahan. Ishimataver i apostoli Paulu na la ia lu a iwasen he’ a we. Yange wa kwagh nahan ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye.”—Mbafilipi 4:6, 7.

U Zuan a Bem u Mimi Ainge

Yesu Kristu ngu hemen ior mba kwagh u mimi a sar ve la zan a ve sha gbenda u zan ke’ uma u tsôron ke’ paradiso u shin tar la. Er a lu yemen a ve he’ mciviraôndo u wang nahan, mba zuan a bem u a lu kwagh môm a u Bibilo i̱ pase kwagh na ér: “Ior Av vea tema ken ijiir i bem man ken uya mba taver man ken ajiir a memen a yôhôr iyol” la. (Yesaia 32:18) Man kwagh ne hira ka di mafo u bem u vea va ember ke’ hemen la tsô. I nger nahan ér: “Mbaasemaleghlegh yô, vea ya dyako u tar, á saan ve iyol sha mngee u bem. Mbaperapera vea ya dyako u tar, vea lu ken u gbem.”—Pasalmi 37:11, 29.

Nahan, se fatyô u zuan a bemshima ainge kpa? Een. Bee heela kera yô, se fa ser ke’ hemen yô, Aôndo una na uumace mba ve cie un la iveren i bem imba i í gbe je ve lu a̱ vande zuan a mi ga yô. Nahan, hii nan ve ú pin un ke’ msen wer a̱ na ú bem ga? Aluer ú ngu a mbamzeyol mba yangen we bem yô, er msen ier i Tor Davidi yange er la nahan, wer: “Atsan a ken ishima yam seer a seer; dughum ken mbamzeyol av. Nenge ican yam man mtoghor wam, dem asorabo am cii.” (Pasalmi 25:17, 18) Fa wer Aôndo ongo amba a msen a ngara nahan. Nalegh uwegh nagh ne mba ve keren bem a ishima ve i môm la cii. I taver se ishima sha dooshima nahan ér: “TER ngu ikua ikua a mba ve yer Un cii, mba ve yer Un sha mimi la cii. Una na mba ve cie un la kwagh u a sar ve yô, man shi Una ungwa mliam vem, Una yima ve kpaa.”—Pasalmi 145:18, 19.

[Blurb on page 5]

Kwaghfan shin mkav u or kuma u naná hemen iyol i nan a iwasen shio ga, man iwasen i i lu i tseegh i lu i injaa la gema due ka he’ Aôndo

[Blurb on page 6]

Mfe u Aôndo kua Yesu Kristu la una fatyô u van a mlu u kangenaa vea Yehova Aôndo, mlu shon u una wase se u zuan a bem u ke’ ishima la

[Picture on page 7]

U dondon kwaghwan u Bibilo la ne uma u he’ tsombor lu ke’ bem