Na Mba I Ne Ve Tahav Sha A We La Icivir
Na Mba I Ne Ve Tahav Sha A We La Icivir
“Waan nen ior cii iko, anmgbianev ve̱ doo ne ishima, cian nen Aôndo, waan nen tor iko.”—1 PETERU 2:17.
1, 2. Ior mba nengen mbautahav nyian nena? Ka sha ci u nyi?
NGÔ ugen toor iyol nahan ér: “Mbayev hingir a ian i eren hanma kwagh sha ishima ve. Mba kera cie mbamaren ga.” Ngeren ugen u varen sha mato kaa ér: “Kaa Tahav Imbwase.” Angan ka di akaa ahar tseegh a a tese mlu u we kpa ú kera lan a lan er a dumbur nyian ga yô. Ilyahan i lahan mbamaren man atica man mbatôôn ior ityom man mbatomov mba gomoti la dumbur tar sha won cii.
2 Alaghga mbagenev vea yoghul akende vea gema a kaa ér, ‘Mba ve lu sha iaven i utaha la ve kuma u me na ve icivir ga.’ Ashighe agenegh yô, kwaghôron la ka a taver u tunan. Se mbá zeren ungwan abaver a kwagh u agbughuraior a ngohol ingyatu a ke’ gomoti man mbahuav mbatôôn ior ityom man atica a a fe tom ve ga kua mbamaren mba ve nzughur a ônov vev la cii. Kpa kwagh u a gem a doo yô, ka Mbakristu kpuaa tseegh ve nengen mba i we ve tahav sha ikyev ke’ tiônnongo mbara sha imba gbenda ne ye.—Mateu 24:45-47.
3, 4. Hii nan ve i doo u Mbakristu vea na ior mba ve lu a tahav sha ikyev la iciviri?
3 E̱r se lu Mbakristu yô, se mba a “ityôkyaa i vesen” (NW ) i i hii ve i gbe hange hange u se na mbautahav icivir yô. Apostoli Paulu yange wa Mbakristu kwagh ér ve̱ “ungwan imo i tahav mbu [ve] lu mbu sha ikev la, gadia ma tahav mbu ga, saa mbu mbu dugh her Aôndo la, mbu mbu lu her ne kpaa, ka Aôndo je A ver ye.” (Mbaromanu 13:1, 2, 5; 1 Peteru 2:13-15) Paulu shi yange tese ityôkyaa i kuman ke’ ato, i i hii ve i gbe u á ungwa imo i mba he’ tsombor mba ve lu a tahav sha ikyev la nahan ér: “Ne kasev, ungwan nen imo i noov enev er i doo ken Ter yô. Ne ônov kpaa ungwan nen imo i mbamaren enev ken akaa cii, gadia ka kwagh u doon Ter je ne.” (Mbakolose 3:18, 20) Mbatamen mba ke’ tiônnongo kuma u se na ve icivir sha ci u ‘Icighan jijingi ver ve mbakuran, sha u ve̱ koso nongo u Aôndo yô.’ (Aerenakaa 20:28) Se mba ungwan imo i uumace mba ve lu mbautahav la sha ci u nan Yehova icivir. Kpa kera cii je, ka u̱ nan tahav mbu Yehova icivir la i lu kwagh u hiihii ke’ uuma asev ye.—Aerenakaa 5:29.
4 De se kôr tahav mbu Yehova á lu a mi mbu hemban cii la se lu a mi ke’ ishima, nahan se time sha akav a ior mba ngise ve venda u nan ior mba i wa ve tahav sha ikyev icivir la man mba yange ve na ve icivir la kpaa.
Icihi Ngi Ve a Icur i Kuran Sha
5. Ka ilyahan i nyi ngise Mikal laha Davidi, man kwagh la yange za nena?
5 Se tôv sha kwagh u tsegh ku Tor Davidi yô, se fatyô u fan e̱r Yehova a nengen ior mba ve kenger mba Aôndo a ne ve tahav kpenenene la yô. Zum u Davidi va nyôr a areki u ikyuryan la ke’ Yerusalem yô, kwase na Mikal “ta ashe hen ianiyoughough za nenge tor Davidi lu tsuwen vinen amar sha ishigh ki TER; tsô a laha un ken ishima na.” Mikal yange mà fa e̱r David lù or u hemen he’ tsombor tseegh ga kpa shi lù tor u tar la yô. Nahan cii kpa a kende a ôr ishima na sha u wan un asôngo nahan ér: “Tor u Iserael ngu a icivir sha ashe a ior nyian tsôô, er a er akondo kera sha ashe a ikpan i ukase i mbayev nav, vough er gbilinor u lun a kunya ga ka nan gba saghen ikondo nahan!” Sha ci u nahan yô, mayange Mikal mar wan ga.—2 Samuel 6:14-23.
6. Yehova yange nenge ilyahan i Koraki lù laha mba Un tsegh ve la nena?
6 Or u yange nan tese ikyav i vihin gban kera sha u kera civir hemen u Aôndo a ver la ga yô lù Koraki. E̱r yange lu ke’ ipaven i Mbakohati yô, yange lu a ian i civirigh i eren Yehova tom ke’ tabernakel je zua ga! Kpa kuma un ga, a gba hunan Mose man Aron, ve mba Aôndo tsegha ve sha u ve̱ hemen ior i Iserael la. Koraki kohol vea mbahemenev mbagenev mba ke’ Iserael va nándè a Mose man Aron ve kaa ér: “Ior cii ka uicighanmbaiorov, hanma or kpaa; TER ngu a ve; man ka nyi ne kenden ayol a en sha je er ne hemba ior i TER cii nahana?” Yehova yange nenge ieren i Koraki man i mbadondon un mbara nena? Yange Aôndo tôô ieren ve la ér ka ilyahan i lahan un Yehova jighilii. E̱r Koraki man mbahemenev ityough 250 mbara mba nengen e̱r ior mba ve ta ikyaa a ve mbara cii inya aver zwa mena ve kera ka been yô, usu due sha hen Yehova va tim un man ior nav cii kera.—Numeri 16:1-3, 28-35.
7. “Uihembanmbaapostoli” mbara yange ve lu a ma ityôkyaa i lahan tahav mbu Paulu laa?
7 Ior mbagenev yange ve lu ke’ tiônnongo u Mbakristu u ke’ derianyom u hiihii la mba yange ve lahan tahav mbu hemen u Aôndo yô. “Uihembanmbaapostoli” mba ngise ve lu ke’ tiônnongo u ke’ Korinte mbara ve lahan Paulu. Ve puu iliam na, ve kaa er: “U nengen a na sha ashe yô, ka iurenor, kwaghôron na kpaa ka u ikoogh ga.” (2 Mbakorinte 10:10; 11:5) Í luun er Paulu yange una fe kwaghôron shin una fe ga kpaa, yange kuma icivir sha er lù apostoli yô. Kpa sha mimi yô, kwaghôron u Paulu yange lu u ikyoogh gaa? Kwaghôron u ke’ igbar u yange na í nger ke’ Bibilo la tese e̱r yange lu or u lamen hondo hondo yô. Nenge ase yô, iliam i Paulu lam a Herode Agripa u sha II, un u yange fa “akpelanakaa a a lu hen Mbayuda cii” la, a lam a na kpuaa tseegh tsô maa kwaghôron la na tor la gema kaa ér: “Sha ankwaghôron wou u kpuaa ne tsô, ka u ka geman mo, m̱ hingir Orkristu!” (Aerenakaa 13:15-43; 17:22-34; 26:1-28) Nahan kpa uihembanmbaapostoli mba ke’ Korinte mbativ puu un ér kwaghôron na ka u ikyoogh ga! Yange Yehova nenge ieren ve la nena? Ke’ loho u yange i tindi he’ mbatamen mba ke’ tiônnongo u Efese la, Yesu Kristu wuese mba ve venda u dondon ior mba yange ‘ve yilan ayol a ve er ve mba mbaapostoli, kpa lu nahan ga la.’—Mpase 2:2.
Na Ve Icivir Shin er Ve Yen Nahan Kpaa
8. Davidi yange tese ér un na tahav mbu Yehova na Saulu la icivir nena?
8 Ior mba ke’ Bibilo kpishi mba yange ve lu ikyav sha u nan mba i ne ve tahav mbara icivir, shin er yange mbautahav mbara ve nzughur a tahav vev shin ve yar tom a mbu sha inja ga nahan kpaa. Davidi yange lu imba ikyav i dedoo la. Tor Saulu, u yange Davidi shiren un la, gema gba Davidi iyuhwe sha ci u igwaakaa i yange er la, nahan a gba keren gbenda u wuan un. (1 Samuel 18:8-12; 19:9-11; 23:26) Nahan cii kpa, shin er Davidi zua a ian i wuan Saulu kwa imôngo nahan kpaa, a gema a kaa ér: “TER A̱ yangem er me er terem kwagh ne ga yô, ka or u TER, u i shigh un mkurem yô.” (1 Samuel 24:3-6; 26:7-13) Yange Davidi fa dedoo e̱r Saulu er kwagh sha inja ga yô, kpa a de er i̱ lu Yehova a ôr un ijir ye. (1 Samuel 24:12, 15; 26:22-24) Yange lam sha iyol i Saulu dang ga shin sha ishigh nagh kpaa ga.
9. (a) Zum u Saulu lu nzughur a Davidi nahan yange lu Davidi nena? (b) Se hii nan ve se fa ser icivir i Davidi yange na Saulu la yange lu i sha ishima i mômô?
9 Yange ishima vihi Davidi zum u i lu nzughul a na laa? Davidi vaa yila Yehova nahan ér: “Mbaaperav . . . mba keren mo a ku.” (Pasalmi 54:3) Yange pase ishima na sha ishigh ki Yehova nahan ér: “Dughum sha ikev i mbaihomov av, Aôndo wam . . . mbaageev kohol iyol u tan num sha a mo, ka sha ci u mkarkpe wam ga, man shi ka sha ci u isholibo yam kpaa ga, TERE, shin er iferkwagh i lu ga kpaa, nahan kpaa, ve gber ayem, ve za wa ago iyol. Nder sha u wasen mo, man shi nenge kpaa!” (Pasalmi 59:1-4) I lu nahan we kpa lù ú ke’ ishima inja e̱r ú er or u nan lu sha iaven i utaha ma kwagh ga tsô nàn gbe nan we ican tsôô? Davidi yange de nan Saulu icivir ga. Saulu kpe kera yô, u̱ Davidi yange ma lu tsuwen ember yô, a gema a dugh a dugh icam i kwelegh nahan ér: “Saulu vea Yonatan ka mbadoonshima man mbasarenior kpaa, sha ayange a ve lu uma la . . . ve hemba ugafa kpaver, shi ve hemba begha agee kpaa. Ne ônkasev mba Iserael vaa nen Saulu.” (2 Samuel 1:23, 24) Shin er Saulu yange nzughur a Davidi nahan kpa ieren i un gema tese sha u nan or u Yehova a tsegh nan icivir la lù i̱ doon ishima i môm!
10. Ka ikyav i dedoo i nyi yange Paulu tese sha u nan tahav mbu Aôndo na mbahemenev mba shin tine la iciviri, man kwagh la yange va a nyi?
10 He’ shighe u Mbakristu ne kpa ior mbá tseer tseer mbà yange ve na mba Aôndo na ve tahav mbara icivir yô. Ikyav i tesen yô, ka Paulu. Yange lumun a kwagh u mbahemenev mba shin tine mba ke’ tiônnongo u Kristu mba sha derianyom u hiihii la yange ve tsua u eren la sha icivir. Kwa u masetyô u Paulu za ke’ Yerusalem la, mbatamen mba shin tine wa un kwagh ér a̱ wanger iyol na sha u tesen mbagenev ér un ngu a kwagh ishima a Tindi u Mose ga. Í lagh ga Paulu yange ma hen ke’ ishima na ér: ‘Zum u yange i lu keren mo a ku la, anmgbianev mban kaa a mo ér m̱ undu Yerusalem. Kwa ne di ve soo er m tese ke’ igbar mer ḿ na Tindi u Mose icivir. Man yô, ḿ vande ngeren Mbagalatia washika mer ve̱ de u kuran akaa a sha Tindi la. Aluer me za ke’ tempel yô, alaghga kwagh u me za er la una nzughur mbagenev kwagh, vea hen ér ḿ ngu za doon ityough a mbara mba ve lu nongo u mbacôngo la.’ Nahan cii kpa ikyav tese ér yange Paulu hen kwagh nahan ga. E̱r yange lù u peren atindi a Mbakristu ga di tsô yô, a na mbatamen mba shin tine mba sha derianyom u hiihii mbara icivir a lumun u eren sha kwaghwan u yange ve wa un la. Fese nahan kwagh u yange er yô, hingir u á yima Paulu sha ikyev i ikpelaior i Mbayuda i toron asema la kera, ke’ masejime yô a tsa ke’ purusu anyom ahar. Kpa ke’ masejime yô, í er ishima i Aôndo. Yange Paulu er shiada sha ishigh ki mbatarev mba ke’ gar u Sesaria, been yô, i kua a na i yem a na ke’ Roma, lù gomoti kimbi injar i ayem na la ye. A za er shiada sha ishigh ki Shisar iyol na.—Aerenakaa 9:26-30; 21:20-26; 23:11; 24:27; Mbagalatia 2:12; 4:9, 10.
Ú Ne Mbagenev Icivir Kpa?
11. Se na mbautahav mbatarev icivir nena?
11 Ú ne mba ve lu sha iaven i utaha la icivir i i lu i̱ ve la kpa? Í wa Mbakristu kwagh ér “kimbi nen hanma or kwagh u a lu u á kimbi nan la . . . or u i lu u á cia nan kpaa, i̱ cia nan.” Sha jighilii yô, u̱ se ungwan imo i ‘tahav mbu se lu mbu sha ikyev’ la ka u tan kpandegh di tseegh tsô ga kpa shi kua u nan mbautahav icivir sha ieren yase man iliam yase kpaa. (Mbaromanu 13:1-7) Aluer se tagher ishigh a mbatomov mba gomoti mba ve vihi tu nahan se er nena? Mbautahav mba ke’ Ipaventar i Chiapas, ke’ tar u Mexico ngohol utsa mba icombor i Mbashiada mba Yehova 57 sha ci u Mbakristu mban nyôr iyol a ior sha u eren uiniongo mba kwaghaôndo ga yum. He’ ape i zua u kulen ikyaa shon la la, Mbashiada mba ve wuha iyol tsembelee mbara, lam kundu kundu man sha icivir kpaa. Shighe karen ka hembe inyom môm nahan yô, í mase kuren ijir la nan ve ishô. Ieren ve la doo ior mba ve lu nengen mbara je yô, mbagenev ken ave kpa soo u hingir Mbashiada mba Yehova!
12. Hii nan ve i lu a inja u kwase a ‘na nom u nan u̱ nan ne jighjigh ga la icivir tsung-nu’?
12 Ú na tahav mbu Aôndo a ver he’ tsombor la icivir nena? E̱r apostoli Peteru pasen ikyav i Yesu lu tese sha u wan ishima a ican la been kera yô, a kaa ér: “Nahan yô, ne kasev di kpaa ungwan nen amo a noov enev sha er aluer mbagenev ken ve, vea lu mbawan kwaghôron u Aôndo iko ga je kpa, á urugh ve sha mlu u kasev vev la, á kera lu sha kwaghôron kpee ga, er ve nengen mlu wen u wang u cian Aôndo la yô.” (1 Peteru 3:1, 2; Mbaefese 5:22-24) Heen ne Peteru pase mlu u i lu a inja u kwase ungwan imo i nom u nan, ‘nán nan icivir tsung’ la var var, shin er alaghga noov mbagenev vea fa eren akaa a aa na vea kuma sha imba icivir la yumuu ga nahan kpaa. Ieren i civirigh i kwase nan eren la alaghga ia urugh nom u nan u̱ nan ne jighjigh ga la naná gema.
13. Kasev vea na noov vev icivir nena?
13 Peteru kpusugh se ke’ avur a ruamabera ne sha u se̱ nenge ikyav i Sara, un u nom na Aberaham yange lu ikyav i jighjigh u nan tseer tseer la. (Mbaromanu 4:16, 17; Mbagalatia 3:6-9; 1 Peteru 3:6) Nahan kasev mba ve lu a noov mba nan jighjigh di yô ve̱ de kera naan noov vev icivir inie i mba ve lu a noov mba nan jighjigh ga mbara kpa ve ne mba vev la ga he? Aluer wea gba zwa môm vea nomou sha ma kwagh ga di ye? Yesu yange na kwaghwan u a fatyô u̱ civin ker yaren tom sha kwagh ne yô. Yange kaa ér: “Hanma or u nana kighir we er u̱ zende mail môm yô, za a nan zan zan uhar je.” (Mateu 5:41) Ú ne nomou icivir sha u dondon un sha kwagh u a soo u eren la kpa? Aluer ka inja er taver we gande yô, lam sha kwagh la vea na a̱ fa er i lu ú ke’ ishima yô. De gbe tôôn ke’ ishima di tsô wer á fa e̱r i lu ú ke’ ishima la ga. Kpa zum u ú lu pasen un akaa a ú soo la yô, er nahan sha gbenda u icivirigh. Bibilo wa se kwagh nahan ér: “Kwaghôron wen a̱ luun u doon gbem, u i we bar sha mi yô, sha u fa nen er i doo u nea ôr kwagh a hanma or yô.”—Mbakolose 4:6.
14. U̱ nan mbamaren mba orough icivir la wa nyi man nyi kere?
14 Ne mbayev di ye? Mkaanem ma Aôndo wa tindi ér: “Ne ônov, ungwan nen imo i mbamaren enev ken Ter. Gadia ka nahan je i lu vough ye. Civir teru man ngôu, ka tindi u hiihii u ityendezwa i lu sha mi je la.” (Mbaefese 6:1-3) Ver ishima fa wer i gber m-ongo u ungwan imo i mbamaren ou la igber i môm a ‘u civir teru man ngôu la.’ Ishemberti i ke’ Zwa Grika i̱ i gem ér “civir” la ngi a ikyav i “kwagh u taver ishe” shin u “wan ishe kwagh” la ker. Sha nahan yô, u ungwan imo i mbamaren la ka di u gban dondon atindi a ve we la a imor ishima tsô, á alaghga a lu ú inja er nga sha ityôkyaa ga la ga. Aôndo soo er u̱ tôô mbamaren ou ve̱ lu ú kpam môm ga shi mhemen u ve hemen we gbenda la kpa a̱ lu ú kwagh u injaa.—Anzaakaa 15:5.
15. Aluer mbayev nenge ér mbamaren vev tsume je kpa, vea na ve icivir her nena?
15 Aluer mbamaren ou er kwagh u a ne í lu inja er icivir you i nan ve la ia pande di ye? Nôngo u nengen mlu u akaa sha mnenge u ve kpa ve nengen akaa shon la. Ka ve ve “mar u” shi ve nengen sha awe ye gaa? (Anzaakaa 23:22) Kera ka dooshima u ve lu a mi sha a we la a mgbegha ve ye gaa? (Mbaheberu 12:7-11) Lam a mbamaren ou sha icivir, pase ve er ishima you i lu ker la a ishima i legh legh. Aluer vea gema a er sha ishima you ga je kpaa, de lamen sha a ve dang ga. (Anzaakaa 24:29) Umbur er yange Davidi lu nan Saulu icivir her shin er tor la kaha de u dondon kwaghwan u Aôndo nahan je kpaa yô. Sôn Yehova a̱ wase ú u̱ nengen sha mlu wou u ke’ ishima la. Davidi lu kaa ér: “Pase nen asema a en sha ishigh Nagh; Aôndo ka ijiir yase i yeren je.”—Pasalmi 62:8; Ukwelegh 3:25-27.
Na Mba Ve Hemen la Icivir
16. Kanyi kwagh se fatyô u henen ke’ ikyav i mbatesen mbaaiev kua i mbatyomov laa?
16 Ka icighan jijingi a tsegh mbatamen mba ke’ tiônnongo ye, nahan cii kpa ve mba ior mba ve yen yô, nahan vea fatyô u tsumen. (Pasalmi 130:3; Orpasenkwagh 7:20; Aerenakaa 20:28; Yakobu 3:2) Sha ci u nahan yô, alaghga kwagh u mbatamen una kuma ior mbagenev ke’ tiônnongo ga. Aluer ka se inja er i er kwagh ke’ tiônnongo shami ga, shin a war a war lun se inja nahan kpa se er nena? Nenge ase mkposo u a lu her atô u mbatesen mbaaiev mba sha derianyom u hiihii la man mbatyomov la: “Ve cihi kwagh, ve wa apera, u tuhwan mba ve engem mbara kpaa ka cier ve iyol ga. Mbatyomov mba Shaav yô, shin er ve hembe ve iyoltaver man agee nahan kpaa, mba za senden ve ityough a Ter sha ilyahan ga [ve e̱r nahan ga sha u nan Yehova icivir, NW ].” (2 Peteru 2:10-13) Shin er mbatesen mbaaiev yange ve laha “mba ve engem mbara”—ka mbatamen mba yange i na ve tahav ke’ tiônnongo u Kristu u ke’ derianyom u sha hiihii la je la—nahan kpa mbatyomov mbativ yô, ve kera lam sha mbatesen mbaaiev mba ve lu van a mpav he’ anmgbianev la dang ga. E̱r mbatyomov ve hembe uumace agee shi ve hembe eren kwagh sha mimi a uumace yô, yange ve hemba fan kwagh u lù zan hemen ke’ tiônnongo yô. Nahan cii kpa, ve wa ijirôron la sha ikyev i Aôndo “sha u nan Yehova icivir.”—Mbaheberu 2:6, 7; Yuda 9.
17. Jighjigh u nan wou bende a iniôngon i ú lu nôngon a zayol u ú hen wer mbatamen er shami ga la nena?
17 Aluer i er kwagh sha gbenda u i gbe u ma i er la ga je kpaa, se kera na Yesu Kristu jighjigh ser ka un a lu Ityough ki umagh, kì ki hemen tiônnongo u Kristu ye gaa? Á kera fa kwagh u a lu zan hemen ke’ nongo na u ú lu sha tar wuee cii ne gaa? Se kera na gbenda u á kuren akaa la icivir shi se kav ser ngu a tahav mbu kôôm akaa ga zee? Sha kpôô yô, ‘se mba nyi di je u se ôron orwanndor a vese ijiri?’ (Yakobu 4:12; 1 Mbakorinte 11:3; Mbakolose 1:18) Hii nan ve ú kera ze a akaa a nyian we ishima la cii he’ Yehova ke’ msen wou u eren la ga?
18, 19. Aluer ú hen wer ma ortamen e̱r kwagh shami ga nahan, ú er nena?
18 Sha er or nan yen yum yô, mbamtaver shin mbamzeyol vea fatyô u duen. Alaghga je yô ashighe agen aa lu a ma ortamen naná er isholibo, man kwagh la una za mbagenev iyol yô. Aluer torough se iyol se kundu ishima ga se gba eren kwagh gaagh kpa kwagh a sôr a gema kposo ga. Alaghga kwagh la una na zayol shon una hemba vihin a vihi cii. Ior mba ve lu a mkav u ke’ jijingi yô, vea kegh Yehova ér a̱ va sôr akaa a̱ hingir jighilii, shi a̱ va na nyityô mtsaha i á nenge ér i doo un la sha shighe u a soo la cii.—2 Timoteu 3:16; Mbaheberu 12:7-11.
19 Kpa aluer ishima gema vihi ú sha ma kwagh di ye? U̱ gban lamen a mbagenev sha kwagh shon la yô, hii nan ú kera kpera ikyua a mbatamen sha icivir wer ve̱ wase ú ga? De gbe puun a puu akaa ga, kpa pase er kwagh la a bende a we yô. Hanma shighe cii ‘mhôônom ma kôron’ we a ve, nahan pase ve kwagh u ke’ ishima you la sha icivir. (1 Peteru 3:8) De dughun ve asôngo ga, kpa gema har sha mvie ve u sha inja i Mbakristu la. Lu a iwuese sha nyityo ishimataver i ke’ Ruamabera i vea na ú kundu kundu la cii. Aluer ka inja er gba u á sôr akaa agen kpa, lu a vangertiôr wer Yehova una hemen mbatamen sha u ve̱ er kwagh u a lu u dedoo shi a lu u shami kpaa yô.—Mbagalatia 6:10; 2 Mbatesalonika 3:13.
20. Kanyi kwagh i lu u̱ se time shami ke’ kwaghhenen u a dondo nee?
20 Nahan cii kpa vegher ugen ngu u i gbe u a nenge shami sha gbaa u nan mbautahav icivir ne yô. Ior mba i ne ve tahav mbara di yô, vea kera naan mba i we ve sha ikyev mbara icivir gaa? De se time nen sha kwagh ne ke’ kwaghhenen u a dondo ne.
Ú Na Mlumun Wer Nyi?
• Ka ityôkyaa i dedoo i nyi se lu a mi u̱ nan mba ve lu a tahav la iciviri?
• Yehova man Yesu nenge mba ve ne ior mba Aôndo a we ve tahav sha ikyev icivir ga mbara nena?
• Ka unô yange ve tese akav a dedoo sha u nan mba yange i wa ve tahav sha ikyev mbara iciviri?
• Aluer ka inja er ma or u lun a tahav sha a vese nan er kwagh shami ga nahan se er nena?
[Study Questions]
[Picture on page 8]
Ngise Sara naan tahav mbu Aberaham icivir man saan un iyol kpaa
[Picture on page 9]
Yange Mikal kera na tahav mbu Davidi mbu lun orhemen he’ tsombor shi lun tor la icivir ga
[Picture on page 11]
“TER A̱ yangem er me er terem kwagh ne ga yô, ka or u TER, u i shigh un mkurem yô”
[Picture on page 12]
Hii nan ve ú kera ze a akaa a nyian we ishima la cii he’ Yehova ke’ msen wou u eren la ga?