Er Nan Icivir i Nan Mbautahav I Ban Yum Nahana?

“Yange sev a hungwa a av yô, á tsúà mhendan u i hendan aa tahav mbu kwaghaôndo mbu i ver la man mbu taregh man mbu tyôô kua mbu pativ kpaa, kwagh u̱ a hingir u tseren tar cii ne, ér ka kwagh u hemban cii u yange er ke’ pueanyom u a kar la je la.”

PUEANYOM shon u yange hii ke’ inyom i 1960, u kwase u fankwagh tsura u timen sha akaa a mbayiase Hannah Arendt a er kwagh na heen ne, á kar hegen kuma anyom akunduahar. Ilyahan i lahan mbautahav ngi taver nyian hemban a hemba ave a tse cii.

U tesen ikyav yô, pipaabaver i i yer ér The Times i ke’ London la i sember kaan nahan ér: “Mbamaren mbagenev ka ve venda u lumun ér tica nan ngu aa tahav sha wan ve, nahan ka a̱ nôngon ér a tsaha wan ve yô, maa i kera doo ve ga.” Ashighe kpishi ka a̱ tsaha mbayev sha makeranta yô, mbamaren vev ve mough ve za, i lu u vea za ta a ta kume tsô ga, kpa i lu u vea za er atica la ayôôso.

I ôr kwagh u orshua u Mzough u Mbahemen Atica a ke’ Britain yange ôr nahan la, ér: “Ior mbá kaan ér, ‘m ngu a ian,’ a u ma ve lu kaan ér ‘ityom ne ka i yam yô.’ ” Dugh mtese u mbamaren mbagenev ve kera tesen ônov vev u nan mbautahav icivir ga la kera je kpa, shi mbagenev mba kôôm mbayev vev mbakiriki ga—shi ka ve venda ér mbagenev kpa ve̱ de kôôm ve ga. Ka i de mbayev mba ve kaan ér ka “ian” ve la u lahan tahav mbu mbamaren vev man mbu atica a ve kpaa, man kwagh u ka a va ker yô kera ka u henen a hen ga—kwase u ngeren abaver Margarette Driscoll a kera kaa ga yô, kwagh la ve a “kov u ainge u ú ne mbautahav icivir cuku kpaa ga shi ú fe mkposo u kwagh u dedoo a u bo kpuaa tseegh yô.”

Magazin u tôôn abaver u i yer ér Times la nger pase iyolkpen i agumaior kpishi a ke’ tar u Russia la ke’ ngeren u sha itinekwagh i i kaa ér “Lost Generation” (Kov u Ú Saa La) sha u kimbir kwagh u tswa orgen u kuhwan kwagh u lamen gbém gbém yange ôr yô, ér: “A er nan je ve or u i mar nan shin tar ú kwagh môm kpa a tse ga, shi kwagh môm kpa a ze sha tindi ga ne ve, nana haa iyol inya he’ tyôô?” Ortimen sha aeren a ior Mikhail Topalov kpa lumun a mnenge ne. A kaa ér: “Mbayev mban bume a bume ga. Ve nenge gomoti tsugh mbamaren vev, ve nenge inyaregh ki mbamaren vev kpa saa shi ityom kpa i de ve. Se fatyô u veren ishima ser ve̱ na mbautahav icivirii?”

Nahan cii kpa, aluer se kure ikyaa ser ka kov u ainge ne tseegh ú tee ishima ve sha mbautahav kera yô, a lu shami ga. Nyian, ior mbaganden man mbakiriki cii mba suur sha mbautahav ga, mbagenev je yô kôr ve a kôr ihyom kuaa. Inja na yô ka u kaan ér ma tahav mbu á suur sha mbu je kpa mbu ga shinii? Ka a eren tahav mbu i pase ikyav i mbu ér ka “agee shin ian i kôôm kwagh shin ôron ijir shin yangen aeren a mbagenev” la sha inja yô, mbu lu a inja. Mbu a fatyô u wasen ior asange asange kua ityô jimin cii kpaa. Kwaghngeren u a dondo ne una time sha er i hii ve kwagh ne a lu nahan la.