Bibilo—Ka Takerada U Tesen Or u Lun Uma

“MKAANEM ma Aôndo ma uma je, ma tem gbilin ga, ma hemba esen a hanma sanker u esen akur ahar cii, . . . ka ma kar mbamhen kua mbaawashima kpaa.” (Mbaheberu 4:12) Mpase u i pase kwagh u Mkaanem ma Aôndo má a fatyô u eren ne ka ikyav i tesen ér Bibilo gban kan di takerada u dedoo tseegh tsô ga.

Orgen u ngeren akaa a kwaghaôndo kaa sha inja vough nahan ér: “Loho u i̱ ngu a inja he’ uuma asev di vough er iôôn nahan.” Been yô, a shi a seer wener: “Aluer ú nenge kwagh u isharen i í saren se u ma i bee se angev ainge ne man ú ôr Bibilo a kwagh la shin ishima yô, kwagh u ka a va ker la ka a kpiligh iyol.” Er imenger i yeghen usu wang nahan, kape Bibilo i̱ te iwanger sha akaa a tsumen kpishi man mbamzeyol mba tar u sha ayange ne je la.—Pasalmi 119:105.

Sha mimi yô, kwaghfan u a lu ke’ Bibilo la ngu a tahav mbu maan mbamhen asev shi wasen se u sôron mbamzeyol shi nan sha u uuma asev ve̱ lu guda shi nan se ayom a se fatyô u wan ishima a akaa a se kôr cio u geman á ga la yô. Kpa hemban cii yô, Bibilo wasen se u fan Aôndo shi nan sha u kwagh na a̱ doo se ishima kpaa.

Takerada Ú Ú Ne Awashima Yô

Yehova Aôndo, Orngeren Bibilo la, ‘fa igbenda yase cii.’ A hemba fan mbamgbe asev mba sha iyol man mba ke’ ishima man mba ke’ jijingi mbara cii a vese. (Pasalmi 139:1-3) Nahan a ver ikighir i anza a uumace sha kwaghfan vough. (Mika 6:8) Ka kwagh u ikyoogh u̱ nôngon fan akighir shon man gbendatesen la shi henen u eren tom sha mi kpaa. Orpasalmi kaa ér saan or u ‘atindi a TER a lu kwagh u gban nan ishima’ la iyol. “Hanma kwagh u nan eren kpaa, nana kure un vough.” (Pasalmi 1:1-3) Imba ishimaveren ngila nahan i kuma u se tôv sha i̱.

Tica ugen u yange de tom, í yilan un ér Maurice la zer nan jighjigh ér Bibilo ngi a akaa a mbayiase ker man akaangeren a a lu a inja kpaa yô. Nahan cii kpa, gema wanger un shin ishima sha gbaa u í lu Aôndo a ne í nger i̱ la ga. Er Maurice keghen ato ongo er i hii ve Aôndo a ne uumace Mkaanem nam yô, a time sha akaaôron a profeti a Bibilo wue wue. Un lu gumor u a hen akaa a mbayiase a tsuaa tsuaa la yô, man ngeren mba sha akaa man kwaghfan u sangen yeke man mlu u uikyasen kpaa. A lumun ibo ér yange un bugh ashe sha mnenge na ngee gande u una nenge a akav a a ngee kpishi a suwen mimi u Bibilo la. “Yange m  uve ityough zendan mkpeyol man shagba man msaanyol a ashe ikyusu. Kpa kwagh eren ka vihin yô, ḿ kera fa mdoom man mimi u a lu ke’ takerada u hemban ityakerada cii ne ga.”

Hegen u̱ Maurice a nyer anyom 70 i kar ne yô, a ôr kwagh a iwuese a gber sha kwagh u yange Yesu ande he’ apostoli Toma la nahan ér: “I kôrom ave i za a mi he’ ‘avav a duen awambe’ a a kir akperan a tan ke’ ishima yam kera gbem sha won ve ḿ ne jighjigh a ishima i môm mer Bibilo ka kwagh mimi la.” (Yohane 20:24-29) Di er apostoli Paulu yange kaa vough nahan, Bibilo ponon mbamhen mba ke’ ishima i or, shi i̱ ne uma u or lu a inja kpaa. Mimi je, ka takerada u tesen or u lun uma.

I̱ Ne Uma u A Lu a Zayol la Mtaver

Shi Bibilo i̱ we kwagh u wasen ior u tan aeren a ve a bo la kera kpaa. Yange Daniel kôr cio u den ityu i mán man uiniongo mba eren haan ikyaa inya la kua ikyôhô i man ganden ikyaa la kpaa. (Mbaromanu 13:13; 2 Mbakorinte 7:1; Mbagalatia 5:19-21) Kpa u ôron kwagh haan mbabov kera yô, u tan imba inja la kera, geman haan “orhe” iyol la ka kwagh u i gbe u saa or a nyima tsombo dông ve nana er yô. (Mbaefese 4:22-24) Daniel kaa ér: “Yange taver kpen kpen, sha ci u se yina kpishi.” Nahan cii kpa, yange kôr cio. Hegen yô, Daniel er Mkaanem ma Aôndo hanma iyange, man kwagh la wasen un u kporom ikyua he’ Yehova.

Zum u Daniel lu vesen a vese la, hanma shighe cii lu nan Bibilo icivir—shin er yange ôr i̱ mayange ga nahan kpaa—shi yange eren msen he’ Aôndo hanma tugh kpaa. Nahan cii kpa kwagh ugen lu karen un. Msaanyol kera lu a na ga. Kwagh u vesen yange er ke’ uma na zum u a hii nengen a iti i Aôndo ke’ Bibilo la. (Ekesodu 6:3; Pasalmi 83:18) Hii he’ shighe la je una eren msen yô, a ter sha iti i Yehova la, nahan mbamsen nav hemba hingir sha inja i ngu lamen a or jighilii. A kaa ér: “Yange Yehova hingir or wam u ishima ishima, hegen je kpa ngu huror wam her.”

Shighe u Daniel lu a̱ gba henen Bibilo ga la, mlu na u ke’ hemen lu a iwasen ga. A kaa ér: “Saa or a bugh ashe tsung ve nana nenge er mlu u tar a ze ga. Yange cier mo iyol, nahan m nôngo mer me hunde ishima me eren akaa am nahan kwagh la a̱ karem sha ishima kera.” Kpa i mase tesen un ér Aôndo ngu va veren perapera sha ci u ior cii shin tar u ua lu wang, ape uumace mba ungwan tindi vea fatyô u zuan a bem u tsôron man msaanyol la. (Pasalmi 37:10, 11; Daniel 2:44; Mpase 21:3, 4) Hegen yô, Daniel ngu a ishimaverenkeghen. Mtím u Bibilo tím un ityôugh ki taver dông la wase un u lun a mnenge u vough sha kwagh u uma.

Iwasen i Been a Mbamzeyol mba Shin Ishima

George yange lu anyom ataankarahar zum u ngô na kpe la. Yange i cier un iyol u nyôron yaven sha ci u yange fa ga shin una yav una nder je-o. Maa a ôr kwaghôron u yange Yesu ôr ter ku man mnder u shin mbakpenev, ape i nger nahan la, ér: “Shighe ngu van u mba ve lu shin iwar cii vea ungwa imo [i Yesu], vea due kpaa” yô. Shi mkaanem ma yange Yesu kaa ér: “Mo M ngu mnder man uma kpaa; or u nana nam jighjigh yô, shin nana kpe kpaa, nana lu uma” la kpa, ma kôr un ke’ ishima. (Yohane 5:28, 29; 11:25) Asemberakaa ne yange gba un iliam shi lu á vough man á surun ishima kpaa. George yange kaa ér: “Mimi ne doon a doo ishima tseegh tsô ga kpa shi ka a kôr iyol kpaa.”

Daniel u í vande teren un la kpa yange lu a mciem. Ngô na kôr cio u nengen sha a na un tswen ga, nahan a zer nan un sha ikyev i ior kpii. Hanma shighe yô, í lu un ke’ ishima sha inja i orvanava nahan i sar un ka zuan a mkpeyol u lun he’ tsombor u u lu a dooshima yô. Ke’ masejime yô, a mase zuan a kwagh u yange lu keren la ke’ Bibilo i henen. Daniel va hingir u yan ikyar a tiônnongo u Kristu u Mbashiada mba Yehova nahan a hingir u lun ke’ tsombor u ke’ jijingi, ape  i ngohol un shi kwagh na doo mbagenev ishima yô. Sha mimi yô, Bibilo ngi a inja sha igbenda i kpôô kpôô man i ke’ mhen kpaa.

Umbur wer, Yehova nengen kwagh u a lu ke’ asema ase la shi fe kwagh u se keren la kpaa. Aôndo “karen asema” shi ne “hanma or sha igbenda i nan” kpaa.—Anzaakaa 21:2; Yeremia 17:10.

Kwaghwan u Wasen sha Gbaa u Uma u he’ Tsombor

Hide sha kwagh u mzough imôngo u orumace kpa Bibilo ngi a kwagh u wasen sha mi. George kaa ér: “Akaa a a hembe nan ior hang ke’ ishima yô, ka ambaakaa er kwagh u or vihin ugen ishima man iyongo i zuan ior sha mlan la nahan.” Yange bee a akaa ne nena? A kaa ér: “Ka a̱ lum inja er or hiim yô, ḿ er tom sha kwaghwan u í we ke’ Mateu 5:23, 24 la jighilii, u̱ i kaa ér: ‘Hime a anngôu’ la. U lamen a lam sha kwagh la tseegh kpa wasen. Bem u Aôndo u Bibilo i er kwagh na la maa a va ke’ a mo je. Kwaghwan la wasen. Ka kwagh u a wase tsung yô.”—Mbafilipi 4:6, 7.

Zum u ayôôso a gbe he’ atô u nom vea kwase yô, gba u ve uhar cii vea ‘lu tsev tsev sha u ungwan kwagh kpa vea gema a̱ ngôôr a kwaghôron, shi vea ngôôr a iyugh kpaa.’ (Yakobu 1:19) Imba kwaghwan ne i sôron iliam i̱ hingir vough. George seer nahan wener: “Yange m henen u eren sha kwaghwan u i kaa ér kwase wam a̱ doom ishima shi m̱ eren a na sha icivir la yô, maa m nenge a mkposo fese je. Hemba heghem un u nan mo icivir.” (Mbaefese 5:28-33) Een, Bibilo tesen se er se hii ve se kav mbamyen asev shi se er tom sha mi man er se kôr cio u wan ishima a mbamyen mba mbagenev yô.

Kwaghwan U Una Lu Gbem Yô

Orfankwagh Tor Solomon yange kaa ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.” (Anzaakaa 3:5, 6) Mkaanem man wa kpelegh kpelegh ga shi ka ma zan shimi kpen kpen!

Bibilo ne ieren i dedoo. I̱ wasen mba Aôndo a doo ve ishima la u geman uuma vev sha u ve̱ zua sha ishima na yô, shi i̱ wasen ve u zuan a msaanyol sha u “zenden sha tindi u TER” kpaa. (Pasalmi 119:1) Mbamlu asev vea lù nan kpa, Bibilo ngi a kwaghwan man gbendatesen ú kwagh a gbe se sha mi la. (Yesaia 48:17, 18) Ôron i̱ hanma iyange, timen sha kwagh u ú ôr la, shi eren sha mi kpaa. Ia na ishima you ia wanger wang shi ia ver ú ishima sha akaa a a lu a wang shi a kom kpaa yô. (Mbafilipi 4:8, 9) Ú kera hen a hen u ember uma tseegh ga, kpa shi ú hen u fan Orgbanakaa u á gbe uma la, shi una doo ú ishima kpaa.

Aluer ú dondo imba gbenda ngin yô, Bibilo ia hingir we kwagh u vesen—di er ior umiliôn imôngo kpa i̱ lu he’ a ve nahan—ia kera lu takerada u dedoo di tseegh he’ a we ga. Mimi je ia lu takerada u tesen or u lun uma!

[Picture on page 6]

Bibilo ia fatyô u nyôôso mtsough u ú tsua wer ú palegh anza a bo la

[Picture on page 7]

Bibilo tesen we er ú hii ve ú kporom ikyua a Aôndo yô