Doo u Ú Tôv Ukwaghaôndo Mbagenev Kpa Ú Nengee?

MIGUEL, u hegen a lu Orshiada u Yehova shin Imbusutariyan i Amerika la kaa ér: “Yange m zer zan mbamkombo mba Mbakristu war kuman inyom i môm jimin, man yange i saan mo iyol u pasen mbagenev kwagh u Tartor u Aôndo la kpaa. Nahan kpa m hii u keghen ato ungwan aaven a kwaghaôndo ke’ redio shi kenger mbapasenkwagh mba ke’ televishen kpaa. M lu henen mer aaven ne aa wasem u hemban fan kwagh u ior mba ke’ ukwaghaôndo mbagenev. M mase va kaven mer atesen a ve la nga ke’ Bibilo ga, kpa gema sarem u fan seer.”

Ke’ tar shon môm la je shi Jorge lu tesen mbagenev kwagh u mcivir u mimi a ishima i tseen. Un kpa shighe ugen la a va hingir u ungwan aaven a kwaghaôndo sha redio man sha televishen. Yange á zer kaan ér: “Gba u ú fa kwagh u ior mbagenev ve henen la.” A̱ pine un ér ú fa kwaghbo u mtsen u̱ tsenen iyol you sha atesen a aiegh la una va a mi kpa yô, a na mlumun ér: “Kwagh môm kpa una fatyô u tenger a jighjigh u nan u or u nan fe mimi u Bibilo la ga.” Akaa angan a yange er ne na yô mpin u injaa due nahan ér, Doo u keghen ato a kwagh u mbagenev ve ne un jighjigh laa?

U Kaven Mbakristu mba Mimi

Er Mbaapostoli kpe kera yô, uijebu Mbakristu hii u duen nzughur a mcivir u mimi la kule kule. Er Yesu tsenganengen a kwagh ne yô, a pase gbenda ugen u kaven mkposo u gbaa u Mbakristu u á lu jebu la a Mbakristu mba mimi la. Hiihii yô, a ta icin ér: “Kura nen ayol a en sha uprofeti mba aiev mba ve ve her a ven a akôv a iyôngo iyol, kpa ken atô ve yô, gema ka ugbaseela mba huav je.” Maa a seer nahan ér: “Ka sha atam a ve man né fa ve ye.” (Mateu 7:15-23) Mbadondon Yesu sha mimi mbara mba eren kwagh u á tese la, shi mba ican u kaven  ve sha atam a ve la ga. Di vough er Yesu iyol na kpa yange er nahan, ve kpa ka ve zaan ior inya sha u pasen ve kwagh u Tartor u Aôndo ke’ Ruamabera. Mbá kaven Yesu sha u tilen paleghaa a pati u taregh man ayôôso a mbaior la kpaa. Ve lumun ér Bibilo ka Mkaanem ma Aôndo shi ve na i̱ jighjigh ér ka mimi kpaa. Mba pasen iti i Aôndo sha u ior ve̱ fa yô. Shi er ve nôngon u eren sha dooshima u Aôndo a tese la yô, mba nenge ityav ga. Kpa gema mba eren a ayol a ve er ka anmgbianev nahan.—Luka 4:43; 10:1-9; Yohane 13:34, 35; 17:16, 17, 26.

Sha kwagh u Ruamabera a kaa yô, or a fatyô u kaven “mkposo u orperapera a iferor, man u or u civir Aôndo a or u civir Un ga la.” (Malaki 3:18) Mbaciviraôndo sha mimi ainge mbá ke’ mzough sha mbamhen vev man sha ieren kpaa, di vough er Mbakristu mba sha derianyom u hiihii mbara kpa lu nahan. (Mbaefese 4:4-6) Aluer ú va kaven nongo u Kristu u mimi ne kera yô, kanyi shi ishima ia lu eren we shimi lenge lenge shin a lu saren we ka fan atesen a ukwaghaôndo mbageneve?

Er Teghelee sha Kwagh u Mbatesen Mbaaiev

Bibilo tese ér zum u or nan hen mimi u Bibilo nan bee kera je kpaa, kwaghbo u hôngor iyol a atesen a aiegh la ngu her. Apostoli Paulu yange ta icin ér: “Ver nen ishima, or nana̱ de ker ne yemen a ven sha kwaghfan shin sha atseregh a gbilinigh ga. Akaa ne ka sha inja i ukaaer mba ior la, shi ka sha inja i ujijingi mba taregh mba hiihii, kera ka sha inja i Kristu a lu ga.” (Mbakolose 2:8) Ivur ne pase kwagh ne wanger je zua ga! Mbatesen mbaaiev vea fatyô u lun kwaghbo he’ a we, e̱r ínyámkyumé i i yer i keghen u kôron or za yan nahan.

Sha mimi yô, Paulu yange ver ishima sha atesen a mbagenev kpaa. Yange hii kwaghôron nahan ér: “Ne Mbaatene, m nenge sha hanma gbenda cii, ne mba civir mbaaôndo tsung je, gadia zum u m lu karen, kenger akaa a ne civir a yô, nahan m zua a atse agen a nanden nagh sha mi, i nger kwagh ne sha mi nahan er: Ka sha ci u aôndo u i fe un ga la.” (Aerenakaa 17:22, 23) Kpa yange Paulu zeren ivin kwaghfan u taregh u ior i Grika i fan kwaghôron tsung la ke’ ishima na ga.

U̱ fan mhii u atesen a kwaghaôndo u aiegh ka kwaghgen, shi u ivin a ke’ mhen wou ka di kwaghgen kposo je. * Yehova ver “wanakiriki u jighjigh man u fan kwagh” ér a̱ naan ityesen i i har sha Mkaanem nam yô. (Mateu 4:4; 24:45) Paulu iyol na nger kwagh ér: “Ne fatyô u yan sha tebur u Ter kua sha tebur u ujijingi mba bov la kpaa ga. Shin se mba bamen Ter ser, A̱ er iwuhee?”—1 Mbakorinte 10:20-22.

Alaghga mbatesen mbaaiev mbagenev yange ve vande lun Mbakristu mba mimi, kpa ve undu mimi ve gema ve ngohol iferkwagh. (Yuda 4, 11) Kwagh ne a̱ de kpiligh se iyol ga. Er Yesu er kwagh u “wanakiriki u jighjigh man u fan kwagh,” u̱ a til sha ityough ki nongo u Mbakristu mba i shigh ve mkurem la been kera yô, shi a ôr kwagh u “wanakiriki u bo” la, ka nongo ú ú gbe ijir ú kaan ér “Terem timbir u van yum,” ve ú hii u gbidyen akar a ve a tom je la. (Mateu 24:48, 49) Ashighe kpishi ambaaior ne man mbadondon vev cii ka ve lu a ityesen i wang i i lu i̱ ve ga; cii kwagh u a hangen ve u eren yô, ka u vihin jighjigh u nan u mbagenev la. Apostoli Yohane ôr kwagh ve kaa nahan ér: “Aluer hanma or nana va her a ven man nana va a ityesen ne ga yô, de nyer nen a nan ken ya wen ga, msugh tsô kpaa, de sughun nen nan ga.”—2 Yohane 10; 2 Mbakorinte 11:3, 4, 13-15.

Ior mba ve keren mimi a ishima i môm yô, ka ve time sha kwaghôron u ve ongo sha ijô i ukwaghaôndo wue wue la vie vie. Shighe á karen yô, Aôndo una ver mbaasemaamimi mba ve keren mimi la iveren. Bibilo ôr kwagh u mfe u Aôndo nahan ér: “Aluer wea ker un er azurfa nahan, man wea ker un er akaa a injaa a i yer yô, nahan . . . mfe u fan Aôndo kpaa, ú zua a mi.” (Anzaakaa 2:4, 5) Er Mbakristu mba mimi ka vea zua a mfe shon u fan Aôndo la ke’ Bibilo man sha ikyev i tiônnongo u Kristu la shi vea nengen er Yehova a veren ior mba i hemen ve sha ikyev i mfe shon la doo doo yô, nahan ve kera za hemen u keghen ato sha atesen a ukwaghaôndo mbaaiev la ga.—2 Timoteu 3:14.

[Footnotes]