Mbampase Mba Yehova Doo Ú Ishima Tsung Kpa?
Mbampase Mba Yehova Doo Ú Ishima Tsung Kpa?
“Uma wam kor mbampase Ou, ve doom ishima tsung je!.”—PASALMI 119:167.
1. Ka hanma ijiir jim í hembe ôron kwagh teren mbampase mba Yehova mba umbur akaa mbara?
YEHOVA soo ér ior nav ve̱ lu saan saan. Nahan kpa, cii man se zua a msaanyol u mimi yô, gba u saa se zende sha atindi a Aôndo shi se lu kuran uiniezwa nav kpaa. U̱ kwagh a̱ lu nahan yô, a na se mbampase mba umbur se kwagh. I ter ve ke’ Ruamabera kpur kpur, hemban je yô, ke’ Pasalmi 119, u alaghga yange lu Hesekia gum Wantor u Yuda dugh un la. Icam i dedoo ne hii sha mkaanem man nahan ér: “Mba i saan ve iyol yô, ka mba gbenda ve u lu vough, ve zenden sha tindi u TER la. Mba i saan ve iyol yô, ka mba ve we mbampase Nav iko, ve keren Un a ishima ve cii la.”—Pasalmi 119:1, 2.
2. Mbampase mba Aôndo zua sha msaanyol nena?
2 Se mba ‘zenden sha atindi a Yehova’ sha u zuan a mfe u vough u Mkaanem nam la man sha u eren sha mi ke’ uuma asev kpaa. Nahan kpa er se yen yô, kwagh gba se a mbampase mba vea umbur se kwagh yô. Ishemberti i ke’ zwa Heberu i̱ í gem ér “mbampase” la tese ér Aôndo hiden umbur se atindi a na man uiniezwa nav man akaawan a na man atindiakaa a na man nda nav kpaa. (Mateu 10:18-20) Saa se kuran atindi la keng ve se lu saan saan ye, gadia nga wasen se u kera gban shin agbegh a ke’ jijingi a ka a va a ikyaatseren man ijungwen la ga.
Var a Mbampase mba Yehova
3. U̱ zuan sha kwagh u i nger ke’ Pasalmi 119:60, 61 la yô, kanyi vangertiôr se lu a mini?
3 Mbampase mba Yehova yange kôr orpasalmi iyol, un u yange nger kwagh nahan la, ér: “M er fefa, m ngôôr ga, sha u kuran atindi a Ou. Ikor i mbaaferev kpelegh sha a mo, kpa atindiakaa a Ou hungul mo ga.” (Pasalmi 119:60, 61) Mbampase mba Yehova mba wasen se u hemban tôvacan sha ci u se mba a vangertiôr ser Ter wase u sha una fatyô u tôndon ikyor i yangen se í mbaihyomov ve kperegh se iyol la kera. Shighe a va kuman yô, una pase se sha ikyev i mbamyange mbara una tuhwa sha er se fatyô u eren tom u pasen kwagh u Tartor ne yô.—Marku 13:10.
4. Se wongor mbampase mba Aôndo nena?
4 Ashighe agenegh yô, mbampase mba Yehova mba kôôm se. Yô, hanma shighe cii se lu nen a iwuese sha imba mkôôm la, di er orpasalmi kpa ngise er nahan. Yange kaa a Aôndo ke’ msen u eren nahan ér: ‘Mbampase Ou ka iember yam je . . . Mbampase Ou doom ishima.’ (Pasalmi 119:24, 119) Se mba a mbampase mba Aôndo hemba e̱r ngise orpasalmi lu a mi la. Akaaôron a a lu ke’ Ruamabera u ken zwa Heberu i kom uderi imôngo imôngo, a i shi i va nger ke’ Ruamabera u ken zwa Grika la umbur se akaawan a yange Yehova wa ior nav sha ikyev i Tindi la tseegh ga, kpa shi a umbur se mbaawashima nav mba a we a tiônnongo u Kristu la kpaa. Zum u Aôndo ka una nenge ér doo u una umbur se akaa a a zough sha kwagh u atindi a na yô, ka se lu a iwuese sha imba gbendatesen la. Nahan aluer se ‘var a mbampase mba Yehova’ yô, se palegh asaren a eren isholibo a aa vihi Orgban se ishima shi aa yange se msaanyol la.—Pasalmi 119:31.
5. A hii nan ve mbampase mba Yehova vea doo se ishima tsung-nu?
5 Gba u mbampase mba Yehova vea doo se ishima a kighir nan je? Orpasalmi gber icam ér: “Uma wam kor mbampase Ou, ve doom ishima tsung je!” (Pasalmi 119:167, ka se se nger i yier ye.) Aluer se ngohol mbampase mba Yehova shi se tôô ve sha inja i ka kwaghwan u Ter u kwagh wase a gbe un ishima yô, mbampase nav vea doo se ishima tsung je. (1 Peteru 5:6, 7) Kwagh gba se sha mbampase nav, man se nguren nengen er ve lu se a iwasen nahan yô, mdoo u ve doo se ishima la una seer.
Er I Hii Ve Kwagh a Gbe Se a Mbampase mba Aôndo Yô
6. Ka ityôkyaa igen i nyi nahan i ne ve kwagh a gbe se a mbampase mba Yehova, man kanyi ia wase se u umbur ve?
6 Ityôkyaa i môm i i ne ve kwagh a gbe se a mbampase mba Yehova yô, ka sha ci u kwagh hungur se. Takerada u i yer ér The World Book Encyclopedia la kaa ér: “Kera cii cii yô, shighe ka una nguren karen yô, ior ve hemban hungur a hungur kwagh cii. . . . Alaghga yange kwagh ne er ú, ú fatyô u umbur iti shin ma kwagh ugen u yange hungur we la ga. . . . Imba mmen i kwagh menan or ishima, u á zeren eren puusu puusu ne mba yer ér kwagh guven or. Mbatôvonkwaghfan tôô kwagh ne kar sha mker u keren kwagh u a saa or ke’ iyou i ikyav mbi iv ke’ i̱ í lu ker nzughur nzughur yô. . . . Gbenda u dedoo u veren ishima umbur kwagh yô, ka u zeren henen kwagh u ú hen wer ú fa un via ú la kpii.” U zeren henen kwagh shi kimbir un la una wase se u umbur mbampase mba Aôndo shi eren sha mi sha ci u mkpeyol wase.
7. Hii nan ve kwagh a hembe gban sha mbampase mba Aôndo ainge a ashighe agen ciili?
7 I gbe je ka ainge kwagh a hembe gban se a mbampase mba Yehova ye, sha ci u er orumace nan gbe je ka kwa ne iferkwagh i dumbur í gande ye. Aluer se ver ishima sha mbampase mba Aôndo yô, se zua a mfe u kwagh a gbe sha mi sha u palegh mtsum u tsumen yemen sha igbenda i taregh i ifer la. Orpasalmi kaa ér: “M hemba kaven kwagh a mbatesen av cii, gadia mbampase Ou mbam kwagh u henen sha mi. M hemba kaven kwagh a mbabeenyol, sha ci u m kor uiniezwa Ou yô. M kôvor angahar a am kera sha hanma gbenda u ifer, sha er me kura mkaanem Ou yô.” (Pasalmi 119:99-101) Aluer se mba eren sha mbampase mba Aôndo yô, se palegh “hanma gbenda u ifer” shi se palegh u lun er ikpela i uumace igenegh i̱ ‘mfe ve a we ime, ve lu paleghaa a uma u Aôndo la.’—Mbaefese 4:17-19.
8. A hii nan ve se hemba wan ago kuman u tagher a akaren a karen jighjigh wase u nan laa?
8 Shi kwagh gba sha mbampase mba Aôndo sha ci u mbá taver se sha u se̱ wa ishima a ameen a a tser se he’ “shighe u mkur” ne. (Daniel 12:4) Aluer se kera mba a amba a mbampase angara ga yô, se hingir u ‘ungwan kwagh kpa hungur se fefa.’ (Yakobu 1:25) Kpa aluer se mba henen Ruamabera ikyangegh kua ke’ tiônnongo sha iwasen i ityakerada i i dugh sha ikyev i “wanakiriki u jighjigh man u fan kwagh” la yô, kwagh la una wase se u tagher vanger a ikyaren i karen jighjigh u nan wase la shi hemban kpaa. (Mateu 24:45-47) Zum u ka sea tagher a ikyaren i karen se yô, amba a mbamne mba ke’ jijingi ne ka a wase se u fan kwagh u i gbe u se er kpee ve á doo Yehova yô.
Tom u Vesen u Mbamkombo Asev Mba Zan
9. Ka unô ve lu ‘ior mba i ne ve lu uiyua’ mbara, man mba wasen mba nan jighjigh a ve imôngo nena?
9 Mbá panden mba kur mgbe u kwagh a gbe se a mbampase mba Aôndo la sha mze u zan mbamkombo mba Mbakristu, ape i zough a kwaghwan sha ikyev i anmgbianev mba i tsough ve la. Apostoli Paulu yange nger kwagh ér, zum u Yesu ‘kôndo yem sha yô, A kua a mbakwarev, A yem a ve, man a na ior hingir uiyua kpaa.’ Paulu shi seer nahan ér: “Ka [Kristu] je A ne mbagenev ve̱ lu mbaapostoli, mbagenev yô, ka uprofeti, mbagenev ka mbaivangeli, mbagenev ka mbakuran man mbatesen. Ka sha u nan uicighanmbaiorov ve̱ kuma sha tom u eren, sha u maan iyol i Kristu.” (Mbaefese 4:8, 11, 12) Se mba a iwuese kpishi er ‘ior mba i ne ve lu uiyua’ mban—ka mbatamen mba i tsegh ve je la—ve lu kôôm se sha u se̱ za sha mbampase mba Yehova zum u ka sea zua imôngo sha u civir la nahan!
10. Jiminkwagh u a lu ke’ Mbaheberu 10:24, 25 la yô, kanyi?
10 Iwuese i lun a mi sha mbamne mba Aôndo a ne la ia mgbegha se u zan mbamkombo asev mba utaan mba tiônnongo i̱ lu a mi ke’ hanma sati la. Paulu yange ôr mluainja u zuan imôngo la var var. Yange nger kwagh ér: “Sé wa nen ayol a ase iko, sé taver nen ayol a ase asema u lun a dooshima man aeren a dedoo. Se̱ de bundu nen mbamkohol asev mba aduaav er mbagenev ve eren nahan la ga, kpa sé taver nen asema ayol a ase, i̱ seer eren nahan er ne nenge iyange la i lu mgbôghom yô.”—Mbaheberu 10:24, 25.
11. Hanma mkombo wase u se zough ke’ hanma sati la wasen se nena?
11 Ú ngu a iwuese sha kwagh u mbamkombo asev mban ve eren se ne kpa? Iyoukura i Henen ke’ hanma sati la i̱ taver jighjigh u nan wase, shi i̱ wasen se u eren sha mbampase mba Yehova shi i̱ nyôôso se u hendan a “jijingi u taregh” kpaa. (1 Mbakorinte 2:12; Aerenakaa 15:31) Ke’ Mkombo u ke’ Igbar la di, ior mba nan kwaghôron ka ve har kwaghôron ve la sha Mkaanem ma Aôndo, kua mbampase mba Yehova man “mkaanem ma uma u tsôron” ma doon tsung ma Yesu la kpaa. (Yohane 6:68; 7:46; Mateu 5:1-7:29) Ka i tsaase ityesen yase i fan la ke’ mkombo u Makeranta u Henen Tom u Hemen u Aôndo la. Mkombo u Henen Tomshiren la ngu a inja tsung sha u wasen se u seer fan mpase u se pasen loho u dedoo sha uya uya shi se hidi se za sôron ior shi se henen Bibilo a ve la, kua igbenda igen i kwaghpasen wase kpaa. Iniongo i kiriki i í kohol he’ mkombo u Takerada u Henen he’ Tiônnongo la di ka i lu iaven i vesen i ôron akaa a a lu a mbampase mba Aôndo ker yô.
12, 13. Ior mba Aôndo mba ke’ tar ugen ke’ Ashia mbara tese iwuese ve sha mbamkombo mba Mbakristu nena?
12 U zan mbamkombo mba tiônnongo hanma shighe la umbur se atindi a Aôndo shi wasen se u lun dông ke’ jijingi he’ shighe u utya man mtaver u inyar man akaren agen a karen jighjigh u nan wase kpaa. Mbakristu mbagenev 70 ke’ veghertar u Ashia la yange ve nenge a mluainja u mbamkombo tsung je zum u ve haa toho ve lu za tsan ke’ ikyô i wan mgbigh mgbigh la. Er yange sar ve ka zan hemen u zuan imôngo hanma shighe yô, ve hide he’ gar ve u yange ityav hembe la, ve va mase numun vegher u Iyou i Tartor i yange shi her la, ve za maa ke’ fiaka toho.
13 Shin er ior mba Yehova ve ye ican tsung sha ci u ityav mbi i nôngon anyom anyom ke’ vegher ugen u tar shon la môm môm nahan kpaa, mba civir sha gbashima her. Yange i pine môm ke’ mbatamen mba ke’ tar la ér: “Ka nyi i hembe wasen u zuan anmgbianev imôngo ciili?” Ngula gema kaa ér nyi? A kaa ér: “Ke’ atô u anyom 19 ne jimin cii, shighe u se bunde u zuan mkombo yô, lu ga. Ashighe agen yange a taan ubom yum shin akaa a̱ taver yum yô, anmgbianev mbagenev ve fatyô u zan ape i zough mkombo la ga, kpa shighe môm lu u̱ se zua mkombo ga ze.” Sha mimi yô, anmgbianev asev mbanomso man mbakasev mba doon se ishima mban ve nenge a mluainja u mayange ‘bunden mbamkohol vev mbaaduav ga’ la.
14. Kanyi kwagh se fatyô u henen sha ieren i Ana u yange kav ishigh la?
14 Ngise kwasecôghor u lu anyom 84, i yilan ér Ana la “undun tempel ga.” Sha nahan yô, yange lu her zum u i va a Yesu, wanikyundan u i mar un ica lu a̱ gba ga la. (Luka 2:36-38) Ú kange ishima wer mayange je ú bunde mkombo ga kpa? Ú ngu nôngon sha afatyô wou cii wer ú lu he’ hanma iaven i mkohol asev mba kiriki man mba vesen mbara kpa? Kwaghwan u ke’ jijingi u se zough a mi he’ mbamkombo mban ne se akav a tesen wang ér Ter wase u sha wa ior nav ikyo. (Yesaia 40:11) Shi amba a aaven ne nga samber a iember, shi mze wase la tese iwuese i se lu a mi sha mbampase mba Yehova yô.—Nehemia 8:5-8, 12.
Mbampase mba Yehova Pav Se Ver Kposo
15, 16. U eren sha mbampase mba Yehova la benden a ieren yase nena?
15 U eren sha mbampase mba Aôndo la wasen se u lun paleghaa a tar u ifer ne. U tesen ikyav yô, u ungwan mbampase mba Aôndo la yangen se dang u eren. (Duteronomi 5:18; Anzaakaa 6:29-35; Mbaheberu 13:4) Imeen i meen se sha u se̱ er aie shi se̱ nyighe or shin se̱ ii la cii se fatyô u kighir í sha u dondon mbampase mba Aôndo. (Ekesodu 20:15, 16; Levitiku 19:11; Anzaakaa 30:7-9; Mbaefese 4:25, 28; Mbaheberu 13:18) Shi u eren sha mbampase mba Yehova la yangen se u oron iyev shin wan kwagh ishima a or shin eren angereke sha or kpaa.—Levitiku 19:16, 18; Pasalmi 15:1, 3.
16 Aluer se mba ungwan mbampase mba Aôndo yô se lu icighan, shin á ver se kposo sha ci u tom na. Man u lun paleghaa a tar ne ka kwagh u hange hange kpen kpen! Ke’ msen u Yesu er he’ Yehova he’ tugh mbu masetyô mbu uma na u shin tar la, á zamber sha ci u mbadondon nav nahan ér: “M na ve kwaghôron Wou, kpa tar kôr ve ihom, sha ci u ve lu ior i tar ne ga yô, er Mo kpaa M lu or u tar ne ga nahan. M ngu eren msen Mer: Kura ve shin tar ne kera ga, kpa M ngu sônon Mer kura ve sha ifer. Ve mba ior i tar ne ga, er Mo kpaa M lu or u tar ne ga nahan. Tsegha ve ken mimi, ka kwaghôron Wou je a lu mimi ye.” (Yohane 17:14-17) Se na sha u Mkaanem ma Aôndo ma má pav se ma ver kposo sha ci u icighantom ne mà zer kôron se iyol gbem.
17. Aluer se hule mbampase mba Yehova kera yô, kanyi ia fatyô u erene, nahan se er nena?
17 Er se lu mbacivir Yehova yô, se soo u i̱ lumun se u eren tom na her. Aluer se hule mbampase mba Aôndo kera yô, jijingi u tar ne, u̱ i samber a mi sha iliam man ityakerada man iemberyolough man ieren kpaa ne, una hemba se. Man sha kpôô yô, se soo u lun mba inyaregh ki doo ve ishima ga, shin mbahagher sha akaa man mbagengese iyol man mbalun a ishughun ga man mbalun wang ga man anomaior a bo man mbawan uma ve iko ga man mbamoron ayol a ve man mba iember i iyolough i hembe doon ve a Aôndo la kpaa ga—se hila ter aeren a mba ve lu a Aôndo paleghaa la di kpuaa tsô. (2 Timoteu 3:1-5) Er se nyer ke’ ayange a masejime a tar u ifer ne ica i gbe yô, de se zer eren nen msen Aôndo a̱ wase se sha er se za hemen u dondon mbampase mba Yehova sha er se ‘waan mkaanem nam ikyo’ yô.—Pasalmi 119:9.
18. U̱ eren sha mbampase mba Aôndo la una na se u eren nyi kwagh i dedoo?
18 Mbampase mba Yehova mba eren kwagh ka hembe di u umbur se kwagh u i gbe u se er ga di tseegh tsô la. U eren sha mbampase nav la una na se u eren kwagh u dedoo, shi una mgbegha se u haren sha Yehova a ishima i môm shi una doo se ishima a ishima yase cii man a uma wase cii man a mhen wase cii man a agee a ase cii. (Duteronomi 6:5; Pasalmi 4:5; Anzaakaa 3:5, 6; Mateu 22:37; Marku 12:30) Mbampase mba Yehova mba mgbeghan se u doon a mbawanndor a vese. (Levitiku 19:18; Mateu 22:39) Hemban je yô, se mba tesen mdoo u Aôndo a doo se ishima man orwanndor a vese la sha u eren ishima Na shi samber a “mfe u fan Aôndo” u̱ a ne uma la he’ mbagenev kpaa.—Anzaakaa 2:1-5.
U̱ Eren sha Mbampase mba Yehova la Ka Uma!
19. Se hii nan ve se tese mbagenev e̱r í doo shi í lu a inja u kuran mbampase mba Yehova?
19 Aluer se er sha mbampase mba Yehova shi se wase mbagenev sha u ve kpa ve̱ er nahan yô, se yima ayol a ase kua mba ve ongo a vese la kpaa. (1 Timoteu 4:16) Se er nan ve se tese mbagenev ve̱ fa e̱r u eren sha mbampase mba Yehova la i lu kwagh u wasen u a lu a inja? Ka sha u eren sha atindiakaa a Bibilo ke’ uuma asev ayol a ase. Nahan atôakyaa a̱ lu a “mba i ver ve sha u ve̱ zua a uma u tsôron” mbara vea nenge e̱r gbenda u Mkaanem ma Aôndo ma tese la ú lu ú hemban doon u̱ dondon yô. (Aerenakaa 13:48) Shi vea nenge e̱r ‘mimi je Aôndo a lu ken avese’ yô, nahan ishima ia mgbegha ve u kohol se sha u civir Yehova, Ter Uhembanagee la a vese imôngo.—1 Mbakorinte 14:24, 25.
20, 21. Mbampase mba Aôndo man jijingi na una wase se u eren nyi?
20 Aluer se mba zan hemen u timen ke’ Ruamabera shi eren sha akaa a se henen la shi yaren tom a mbamne mba Yehova mba ke’ jijingi mbara yô, mbampase nav vea doo se ngeegh je. Aluer se er nahan yô, mbampase mban vea wase se u haan “orhe iyol u i gbe un sha inja i Aôndo ken perapera u mimi man mtsegh u mimi” kpaa la. (Mbaefese 4:20-24) Mbampase mba Yehova man icighan jijingi na ia wase se u lun a dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha, ka anzaakaa a a lu kposo a tar ú ú lu sha ikyev i Satan ne je ne! (Mbagalatia 5:22, 23; 1 Yohane 5:19) Sha nahan yô, zum u i umbur se mbampase mba Yehova shighe u se henen kwagh ikyangegh la shin sha ikyev i ma or u nan lu ortamen man ke’ mbamkombo shin mbamkohol mba kiriki shin mba vesen yô, se lu nen a iwuese.
21 Er se lu mba eren sha mbampase mba Yehova yô, zum u ka sea yaan ican sha ci u kwagh u perapera kpaa, se fatyô u ember. (Luka 6:22, 23) Ka se ver ashe a Aôndo ser a̱ yima se zum u akaa a bo a tser se la. Kwagh ne hemba ngun hange hange hegen u akuraior cii a lu kohol sha ci u “ityav mbi iyange i vesen i Aôndo, Uhembanagee” mbi Armagedon ne.—Mpase 16:14-16.
22. Kanyi se kange ishima u eren sha gbaa u mbampase mba Yehova?
22 Aluer ka u se ngohol iyua i sha mhôôn i uma u tsôron yô, a gba u saa mbampase mba Yehova vea doo se ishima tsung shi se eren sha a ve a ishima i môm kpaa. Yô, se lu nen a jijingi u orpasalmi u yange wa icam nahan la, ér: “Mbampase Ou ka mba perapera gbem sha won je; nam mkav, m̱ lu uma.” (Pasalmi 119:144) Nahan yô, se tese nen gbashima u a tese ikyav ke’ mkaanem ma orpasalmi a nger nahan la, ér: “M yila U [Yehova]; yimam m̱ waan mbampase Ou iko.” (Pasalmi 119:146) Een, se tese sha mkaan man sha ieren kpaa ser mbampase mba Yehova doo se ishima tsung je.
Ú Na Mlumun Wer Nyi?
• Orpasalmi yange nenge mbampase mba Yehova nena?
• Hii nan ve kwagh a gbe se sha mbampase mba Aôndo?
• Kanyi tom mbamkombo asev ve eren sha gbaa u mbampase mba Aôndo?
• Mbampase mba Yehova pav se ver kposo a tar ne nena?
[Study Questions]
[Picture on page 25]
Yange mbampase mba Yehova doo orpasalmi ishima tsung je
[Pictures on pages 26, 27]
Ú soo u dondon ikyav i Ana la sha u kangen ishima wer mayange je ú bunde mbamkombo ga kpa?
[Picture on page 28]
U̱ eren sha mbampase mba Yehova la pav se ver kposo se hingir mba wang mba i lumun se u eren tom na yô