Dondo Nongo U Yehova Kpiligh Kpiligh
Dondo Nongo U Yehova Kpiligh Kpiligh
Aôndo u bem . . . A̱ na ne sha u né lu vough sha hanma kwagh u doon cii sha u eren ishima Na.”—MBAHEBERU 13:20, 21.
1. Ingyeghior i sha tar cii ngi nena, man i ôr ingyeghior la sha ikpen i ukwaghaôndo nena?
INGYEGHIOR i sha tar cii nyôr ubiliôn ataratar ken inyom i 1999 la! Takerada u i yer ér The World Almanac la pase se ér ken atô u ingyegh kin ne, Mbamusulumi mba ker iorov 1,165,000,000; Mbaroman Katoliko mba 1,030,000,000 man Mbahindu mba 762,000,000; Mbabuddha di mba 354,000,000; man Mbaprotestanti mba ingyegh 316,000,000; mba i yer ér Orthodox la di gema mba iorov 214,000,000.
2. Ka nyi kwagh a fatyô u ôron sha mlu u ukwaghaôndo ve lu ainge ne?
2 Sha mpav u ukwaghaôndo ve pav wue wue yum, man anzughul á lu zan hemen ainge ne nahan, a fatyô u kaan ér ior umiliôn imôngo mban mba eren sha ishima i Aôndo voughloo? Ei, “gadia Aôndo ka u nzughul nzughul ga, kpa ka u bem.” (1 Mbakorinte 14:33) Kpa gema di sha vegher u mzough u anmgbianev mbacivir Yehova sha won cii la ye? (1 Peteru 2:17) U tôvon sha mi vighe vighe la tese ér ‘Aôndo u bem na ve sha u ve̱ lu vough sha hanma kwagh u doon cii sha u eren ishima Na.’—Mbaheberu 13:20, 21.
3. Ka nyi yange i er ken Yerusalem ken Pentekosti u 33 S.W. la, man lu sha ci u nyi?
3 Nahan kpa, ingyeghior í í kohol imôngo a Mbashiada mba Yehova la ia fatyô u lun gbenda u tesen ér Aôndo ngu a ve ga; shi kwagh gba Aôndo sha ingyeghior kpaa ga. Yange tsua Mbaiserael sha ci u ve ‘hemba ngeen’ a akuraior agen yum ga. Jim yô, yange ve “hemba gban ijime” ken a ve cii. (Duteronomi 7:7) Kpa lu sha ci u jighjigh u nan u Iserael yange ban a mi la yange na ve Yehova musan mhôônom nam mara ken Pentekosti u sha 33 S.W. la gema ver sha tiônnongo u he u a lu a mbahenen mba Yesu Kristu la ye. Yange i tsegha ve sha icighan jijingi u Yehova maa ve yem pasen mimi u Aôndo man Kristu a ishima i tseen.—Aerenakaa 2:41, 42.
Lu̱ Yemen Hemen Hemen
4. Er nan ve ú fatyô u kaan wer tiônnongo u Mbakristu yange lu yemen hemen hemene?
4 Ken derianyom u hiihii la tiônnongo u Mbakristu lu bughun ajiir a he yemen a yem hemen shi lu geman ior hingir mbahenen, shi lu zuan a mkav u ishima i Aôndo man mbaawashima nav kpishi kpaa. Mbakristu mba tsuaa mbara lu dondon iwanger i i lu̱ zan hemen u tan man í lu̱ pasen ken uwashika mba Aôndo na sha u i̱ nger la. Msôr u mbaapostoli lu za sôron ve la na ve ishimataver u kuren tom ve vindi vindi. Akaa ne cii i nger sha ci wase ken Ruamabera u Mbakristu u ken Zwa Grika la.—Aerenakaa 10:21, 22; 13:46, 47; 2 Timoteu 1:13; 4:5; Mbaheberu 6:1-3; 2 Peteru 3:17, 18.
5. Er nan ve nongo u Aôndo ú lu lun a mzehemen ainge, man er nan i doo u se dondo ú?
5 Er Mbakristu mba tsuaa mbara yange lu nahan, Mbashiada mba Yehova mba sha ayange ne kpa yange mhii ve lu cukuu tsô. (Sekaria 4:8-10) Hii sha shighe u derianyom u sha 19 la za u been nahan je tsô, ikyav tese wang ér jijingi u Aôndo ngu sha nongoior na. Sha ci u ka sha tahav mbu uumace se suur ga, kpa ka lun sha hemen u icighan jijingi, ka nahan ve se lu zan hemen u vesen ken mkav wase u kaven Ruamabera man ken m-er u eren ishima i Aôndo ye. (Sekaria 4:6) Hegen u se lu ken “ayange a masejime” ne yô, gba keng u se dondo nongo u Yehova u ú lu yemen hemen hemen ne kpiligh kpiligh. (2 Timoteu 3:1-5) U eren nahan la una wase se u lun a ishimaverenkeghen yase her shi lun a ci ken shiada u í eren sha kwagh u Tartor u Aôndo a ver la, cii man mkur una va tim tar ungun ne ye.—Mateu 24:3-14.
6, 7. Se nenge sha avegher atar a nyi a nongoior u Yehova u zough a mzehemene?
6 Ior mbá a vese imôngo mba yange ve hii kohol a nongo u Yehova ken kwavanyom u 1920, man u 1930, man u 1940 la kpaa yô. Ken anyom a tsuaa la, ka an or ken atô wase je yange mà nan hen ér imba mvese u kpilighyol man mzehemen u nongo ne una za hemen zan zan a nyôr ken mhii u dubuanyom u he nee? Hen ase sha akaa a vesen a a er sha ayange ase ainge ne yôô! Sha mimi yô, u hiden gbidyen kwar sha akaa a Yehova a lu eren sha ikyev i nongoior na u á ser a ver sha hemen na ne ka kwagh u wasen ken jijingi.
7 Yange i saan Davidi u tsuaa la iyol tsung zum u una hen sha ityom i Yehova i kpilighyol la yô. A kaa ér: “Er i sarem u pasen ve, ôron kwagh ve nahan kpaa, ve ngee gande u ôron.” (Pasalmi 40:5) Se kpa myen la ngu a vese, sha u ôron aeren a vesen man a kuman civir a Yehova ken ayange ase ne been ga la. Nahan kpa, de se nenge sha avegher atar a nongoior u Yehova u ze hemen yô: (1) ve zua a iwanger i ken jijingi i vesen kure kure, (2) ve hemba fan tom u eren man u samber a ú wuee, kua (3) mgem u sha shighe vough u ken hemen ú nongo ne.
Se Mba a Iwuese sha Iwanger i ken Jijingi
8. Sha u zuan sha kwagh u Anzaakaa 4:18 a ôr la yô, ka nyi kwagh iwanger i ken jijingi i wase se u kaven sha kwagh u Tartoro?
8 Anzaakaa 4:18 la gba mimi vough sha kwagh u iwanger i ken jijingi i í vesen kure kure la. A kaa ér: “Gbenda u orperapera ngu er iwanger i sha use nahan, ngi seer a seer zan hemen zan zan mkende u iyange sha sha tembe la.” Se mba a iwuese kpishi sha iwanger i ken jijingi i i lu tan se kure kure ne! Yange i ta iwanger sha kwagh u Tartor u Aôndo ken mkohol u vesen u ken gar u Cedar Point, Ohio ken inyom i 1919 la. Yehova yaren tom a Tartor na sha u tseghan iti na shi paan hementor na iyol kpaa. Sha mimi yô, iwanger i ken jijingi wase se u kaven ér hii ken Genese zan zan kure ken Mpase, Bibilo er shiada sha kwagh u awashima u Yehova a we u va tseghan iti na sha hemen u Tartor u sha ikyev i Wan na la. Ka henpe ishimaverenkeghen i vesen i̱ mba perapera a doo ve ishima la i̱ lu je la.—Mateu 12:18, 21.
9, 10. Ken kwavanyom u 1920 la, kanyi yange i hen sha kwagh u Tartor man iniongo i ihiar i hendan a iyol i í laa, man kwagh ne ngu a iwasen nena?
9 J.F. Rutherfold u lu na kwaghôron u vesen sha mkohol u ken Cedar Point ken inyom i 1922 la yange taver ior mba Aôndo ishima ér: “Yôô nen, yôô nen, yôô nen angwe u Tor man tartor na.” Ken kwaghngeren u itine na lu er “Birth of the Nation,” (Mmar u Ikyurior) u i gber ken Iyoukura [zwa Buter] i uwer u Maaci 1, 1925 la, i ver ishima sha kwagh u mkav u ken jijingi u sha ci u akaaôron a profeti a yange hôn uwegh sha mver u yange i ver Tartor u Aôndo ken inyom i 1914 la. Yange shi i kav ken kwavanyom u 1920 la ér iniongo ngi ihiar í í lu hendan ayol a í yô—ka ú Yehova man ú Satan. Num ngu zan hemen hen atô ve her, kpa saa se dondo nongoior u Yehova kpiligh kpiligh ve, se lu ken vegher u hemban la ye.
10 Imba iwanger i ken jijingi la i wase se nena? Er Tartor u Aôndo ú lu kwagh u tar ne ga, Tor Yesu Kristu kpa a lu or u tar ne ga yô, se kpa se fatyô u lun ior mba ú ga. U se tilen paleghaa a tar la á lu u tesen ér se ta ikyaa a mimi ne. (Yohane 17:16; 18:37) Shighe u ka sea nenge mbamzeyol mba lun kpelegh kpelegh mba ve tsule bo tar ngun ne yô, ka se lu a iwuese kpishi sha er se lu ken vegher u nongo u Satan ne ga yô! Nenge imba er i doo se ave sha u zuan a mkpeyol u ken jijingi ken atô u nongo u Yehova ne sha wono!
11. Ka iti i ken Ruamabera i nyi yange ior mba Aôndo tôô ken inyom i 1931 laa?
11 Ken mkohol u 1931 u yange i zua ken gar u Colombus, Ohio la, yange i yar tom a Yesaia 43:10-12 la sha inja vough. Yange Mbahenen Bibilo tôô iti i lun kposo ne ér Mbashiada mba Yehova. Nenge imba ian i civirigh i vesen i i lu i pasen ior iti i Aôndo sha e̱r mbagen kpa alaghga vea fatyô u waren sha u yilan sha í ne sha wono!—Pasalmi 83:18; Mbaromanu 10:13.
12. Ka iwanger i ken jijingi i nyi yange í ta sha kwagh u zegeikpelaior ken inyom i 1935 laa?
12 Cii man va ar sha kwavanyom u 1930 la yô, ior mba Aôndo kpishi lu a̱ fa kwagh u ishimaveren i uma u ken hemen la wang ga. Mbagenev lu henen kwagh u uma u sha kpa atesen a Bibilo i̱ tese sha kwagh u tar u paradiso la lu doon ve ishima. Ken mkohol u ken gar u Washington, D.C. u ken inyom i 1935 la, lu kwagh u iember kpishi zum u i kav ér ikyumior i vesen shin zegeikpelaior i ken Mpase ityough 7 la ka nongo u lun a ishimaveren i lun shin tar yô. Hii sha shighe la je, mkohol u kohol zegeikpelaior la sa kwan inya ngu hemban yemen a yem hemen cii. Se mba a iwuese er kwagh u zegeikpelaior ne a lu kwaghmyer hen avese ga nahan gaa? Mkohol u mimi je i lu kohol ior akum akum sha ityar i ityar man sha uipaven uipaven kua ijô i ijô ne na se u ndyaren kpase kpase ken mdondo u se lu dondon nongo u Yehova kpiligh kpiligh ne.
13. Ka ikyaa i vesen i nyi yange i ta iwanger sha í sha mkohol u ken gar u St. Louis ken inyom i 1941 laa?
13 Yange i ta iwanger sha ikyaa i vesen i i gbe u mà í lu kwagh u gban uumace ishima la ken mkohol u ken gar u St. Louis, Missouri, ken inyom i 1941 la. Ka mhembe u sha tar cii, shin hementor je la. Ka ikyaa i i gbe u ica a kera gba ga tsô a kure í keng yô, man iyange i vesen man i cieryol i̱ i̱ lu sha ci u eren kwagh ne la ngi van fefa je! Ikyaa igen i shi yange í due a mi won ken inyom i 1941 í zuan sha i̱ ngira yô lu ikyaa i mtil sha mimi, u a ne se ian i tesen mtil wase sha kwagh u hementor u Aôndo la.
14. Kanyi yange i hen sha kwagh u mbatarev mba i ter ken Pasalmi 45:16 ken mkohol u ityar-ityar u ken inyom i 1950 laa?
14 Yange i kav mbatarev mba i er kwagh ve ken Pasalmi 45:16 la jighilii ken mkohol u ityar-ityar u ken inyom i 1950 ken gar u New York City la. Yange lu shighe u saan iyol kpishi zum u Anmgbian Frederick Franz lam sha itinekwagh ne man pase ér mbatarev mba tar u he ne mba ken a vese la. Hii ken mkohol la man mba ve dondo mbara cii, iwanger i ken jijingi zer tan kpishi. (Pasalmi 97:11) Se mba a iwuese sha e̱r gbenda wase u lu “er iwanger i sha use [i i lu] seer a seer zan hemen zan zan mkende u iyange sha sha tembe la” nahan!
U Zan Hemen ken Tom Wase
15, 16. (a) Yange se lu zan hemen ken tom wase ne ken kwavanyom u 1920 man u 1930 la nena? (b) Ka ityakerada i nyi nahan yange i na se zakera ken tom u Mbakristu ken upuembaanyomov mba ve sember karen nee?
15 Gbenda ugen u nongoior u Yehova u ze hemen yô ka sha gbaa u tom wase jim jim—ka u pasen kwagh u Tartor shi geman ior hingir mbahenen je la. (Mateu 28:19, 20; Marku 13:10) U̱ se̱ kôr cio a tom ne yô, nongo ne zer tesen se u fan mluainja u samber a tom wase ne. Yange i taver Mbakristu cii ishima ken 1922 ér ve̱ lu a ci ken tom u kwaghpasen. Yange mase shin ishima i hanma or cii u den sha u iwanger i nan i̱ wanger sha er nana lu a ci iyol i nan sha u eren shiada u kwagh u mimi ne yô. (Mateu 5:14-16) Yange i wa iyol ken inyom i 1927 la u veren iyange i Lahadi sha ci u i̱ lu iyange i eren tom u kwaghpasen yô. Hingir kwagh u ken igbar hii ken Febewari u inyom i 1940 la u nengen a Mbashiada sha ugodobi mba hen ajiir a kasua nan ior Iyoukura man Consolation (u hegen a lu Awake!) la.
16 Yange i due a antakerada u i yer ér Model Study (Kwaghhenen u Lun Ikyav) la ken inyom i 1937 la man ú ôr var var er i doo u hiden za sôron mbagenev sha u tesen ve mimi u ken Bibilo yô. Ken anyom a yange dondo la cii, i puusu ôron kwagh u Bibilo i henen la nduur nduur. Yange i na gbartom ngun ne zakera sha u gberen takerada u i yer ér “Let God Be True” (“Aôndo A̱ Lu u Mimi”) la ken inyom i 1946 man The Truth That Leads to Eternal Life (Mimi u Una Va a Uma u Tsôron La) ken inyom i 1968 la. Hegen ne yô, se mba yaren tom a takerada u Mfe u Una Va a Uma u Tsôron La. U ôron takerada ne ci ca cii la we imaagh ki ken Ruamabera ki taver doo doo sha ci u geman ior hingir mbahenen.
U Zan Hemen A Mbamkôôm Mba Nongo Ne
17. U dondon sha kwagh u Yesaia 60:17 a kaa yô, nongoior u Yehova za hemen nena?
17 Gbenda u sha utar ú nongoior u Yehova u ze hemen yô ka sha gbaa u mbamkôôm mba nongo ne la. Sha kwagh u Yesaia 60:17 a kaa yô, Yehova yange er ityendezwa ér: “Me va a zenaria sha ityough ki togula, shi Me va a azurfa sha ityough ki iyôgh, togula sha ityough ki kon, iyôgh sha ityough ki awen. Me ver bem a̱ lu orkurantar wou man perapera a̱ lu ityoor wou.” Sha u dondon kwaghôron u profeti ne yô, i ker gbenda sha u sôron mba nengen sha tom u kwaghpasen u Tartor ne man mkur u kuran iyôngo ne kpaa.
18, 19. Ka mbamkôôm mba nongo ne mba nyi ve ze hemen ken anyom a karen ne?
18 Yange i tsua orhemen u iertom ken inyom i 1919 la sha hanma tiônnongo u yange una pine ér i̱ sôr un sha ci u tom u kwaghpasen cii. Kwagh ne va a zakera ken tom wase u pasen kwagh ne kpen kpen. Yange i de mtsough u tsuan mbatamen man udiakon sha ishangen la ken inyom i 1932 la, nahan lu shighe u maa se gema jime a igbenda i ishangenegh kpaa je la. Kwagh u vesen ugen u yange er ken inyom i 1938 yô, lu mhii u yange i hii u veren a ver mbaeren tom ken tiônnongo cii sha u zuan kpian sha mserakaa u mver u hemen u Aôndo ken tiônnongo u Kristu u tsuaa la. (Aerenakaa 14:23; 1 Timoteu 4:14) Ken inyom i 1972 la i hii u veren ior sha u ve̱ eren tom u mbakuran man udiakon vough er ambaaior la yange vanden eren ken Mbakristu mba tsuaa la nahan. U ma i lu or môm tseegh ma nan eren tom u orkuran u tiônnongo yô, Mbafilipi 1:1 man avur a ruamabera agen tese ér mba ve kom sha atindiakaa a Ruamabera sha u lun mbakuran la cii ve̱ lu mzough u mbatamen—Aerenakaa 20:28; Mbafilipi 4:11, 12.
19 Ken inyom i 1975 la mserakaa ugen hii sha u ukômatii mba Mbahemenev mba Shin Tine u Mbashiada mba Yehova a̱ nengen sha ityom i nongoior u Aôndo sha tar cii. Yange i ver Kômatii mba Nengen sha Branci sha u nengen sha tom sha uharegh vev vough vough. Hii shighe la je, i hemba veren ishima sha u heghem tom ken ijiir i shin tine la man sha agbar a Watch Tower Society la kpaa sha e̱r ‘á kar á fa akaa a a hembe lun a inja’ la yô. (Mbafilipi 1:9, 10) Ityom i mbakuran mba sha ikyev i Yesu mban ve lu a mi ne kua u hemen ken tom u ivangeli man u tesen ken tiônnongo man u kuran iyôngo i Aôndo tsembelee la kpaa.—1 Timoteu 4:16; Mbaheberu 13:7, 17; 1 Peteru 5:2, 3.
Hemen u Yesu U Tsevaa
20. U zan a nongo u Yehova kôôsôô la tese ér se kav nyi kwagh sha iaven i Yesu a lu sha mi laa?
20 U zan a nongo u Yehova u ú lu zan hemen ne kôôsôô yô gba u se kav tom u Aôndo a ne Yesu Kristu ér a̱ lu “ityough ki nongo” ne la. (Mbaefese 5:22, 23) Kwagh ugen u á kom u veren ishima sha mi yô, ka Yesaia 55:4 hen ape i kaa a vese ér: “Nenge, M ver un Mer, a̱ lu shiada hen ior a̱ lu orhemen man orwan akuraior kwagh” la. Yesu fa u hemen je ka u henen a hen ga. Shi a fa iyôngo na kua aeren a í kpaa. Sha mimi yô, zum u yange sôr atôônanongo a ken Ashia u Kiriki la, kwa taan cii a kaa ér: “M fa aeren a ou.” (Mpase 2:2, 19; 3:1, 8, 15) Yesu shi fa mbamgbe asev vough er Ter na Yehova kpa a fe nahan. Cii man yange Yesu er Msen u lun ikyav la yô, a kaa ér: “Ter wen fa kwagh u a gbe ne je er ne lu a sôn Un ga yô.”—Mateu 6:8-13.
21. Hemen u Yesu due ken igbar ken tiônnongo u Kristu nena?
21 Hemen u Yesu ngu ken igbar nena? Gbenda môm yô ka sha ikyev i mbakuran mba Mbakristu man ‘ior mba i ne ve lu uiyua’ la. (Mbaefese 4:8) Mpase 1:16 tese mbakuran mba i tsegha ve mbara ér mba ken uwegh ku yanegh ku Yesu sha ikyev i hemen na la. Nyian kpa, Yesu tesen gbenda sha kwagh u mserakaa u mbatamen la, aluer ambaaior la aa lu a ishimaveren i yemen sha shin a̱ lu i̱ lun shin tar kpaa. Er i vande pasen ken ngeren u a kar la nahan, ka sha icighan jijingi i veren ve ye, sha u zuan sha atindiakaa a Ruamabera la. (1 Timoteu 3:1-7; Titu 1:5-9) Ken derianyom u hiihii la, kwe u mbaganden mbagenev ken Yerusalem lu mbahemenev mba shin tine mba ve lu nengen sha atôônanongo man tom u kwaghpasen u Tartor jimin cii yô. Ainge kpa ka ikyav la vough i lu dondon ken nongo u Yehova ye.
De Gbe Jime Ga!
22. Mbahemenev mba Shin Tine ka ve na nyi iwasene?
22 I wa akaa a Tartor aa a lu shin tar cii sha ikyev i “wanakiriki u jighjigh man u fan kwagh” u Mbahemenev mba Shin Tine mba Mbashiada mba Yehova ve til sha ityough vev la. (Mateu 24:45-47) Kwagh u a hii gban Mbahemenev mba Shin Tine ishima jighilii yô ka u nán kwaghwan u ken jijingi shi kôôm tiônnongo u Kristu. (Aerenakaa 6:1-6) Zum u aahe u akaa a sha gbaaôndo ka una tser mbacivir a vese imôngo yô, Mbahemenev mba Shin Tine ka ve sôn mzough môm u sha tindi shin mbamzough imôngo sha u ve̱ na myôhôryol shi ve̱ sôr uya man Ayou a Tartor a a vihi la. Ka a̱ er a Mbakristu mbagen sha tswam shin a̱ tôv ve a ican yô, ka i ker igbenda sha u wan ve inya tine ken jijingi. Ka “a lu sha ian i doon ga kpaa,” ka i nôngo tsung sha u tom u kwaghpasen u̱ zaan hemen heregh yô.—2 Timoteu 4:1, 2.
23, 24. Ka a̱ lù nyi akaa je aa ta sha ior mba Yehova kpaa, ka nyi kwagh a gbe uwer u nan ga, man kanyi se kange ishima u erene?
23 Nyityô kwagh ka ia tser ior mba Yehova kpaa, gbe uwer u nan kwaghyan u ken jijingi man gbendatesen u kwagh a gbe sha mi la ga. Shi Aôndo ne mkav man mfe ken anmgbianev mba vian mbara sha u wan ago iyol sha mzehemen man mbamkôôm ken nongo u Aôndo ne. (Duteronomi 34:9; Mbaefese 1:16, 17) Yehova bundu u nan kwagh u kwagh a gbe sha mi sha u eren tom wase u geman ior hingir mbahenen ne ga kua sha u se kure tom wase doo doo sha tar cii la kpaa.—2 Timoteu 4:5.
24 Se mba a vangertiôr wanger wanger ser Yehova una gbihi ior nav mbajighjigh mayange ga; una yima ve sha ikyev i “zegecan” i i lu van ne. (Mpase 7:9-14; Pasalmi 94:14; 2 Peteru 2:9) Se mba a hanma ityôkyaa cii i lun a ishimaveren i yange se lu a mi sha hiihii la zan zan mkur. (Mbaheberu 3:14) Nahan yô, de se kange nen ishima se dondo nen nongo u Yehova kpiligh kpiligh.
Ú Na Mlumun Wer Nyi?
• A er nan ve se kaa ser nongo u Yehova ngu yemen hemen hemene?
• Ka ikyav i nyi i̱ lu i tesen ér ior mba Aôndo mba zough a iwanger i ken jijingi kure kure?
• Mba kôôm akaa ken tom u Mbakristu ne nena?
• Ka mbamkôôm mba sha shighe vough mba nyi nahan yange i kôôm ken mlu u nongo u mbacivir Yehova?
[Study Questions]
[Picture on page 8]
Er Davidi nahan, se kpa se fatyô u umbur ityom i Yehova i kpilighyol la cii ga
[Picture on page 9]
Ior i Aôndo zua a iwasen sha mbamkôôm mba sha shighe vough mba sha mlu u nongo ne la