Mbashiada Mba Yehova—Mba Yemen Hemen Vangertiôr!

Ibaver I̱ Mkombo U Sha Inyom

SHA ayange a ahon a gban man akperan a tan á ngee yum ne, Mbashiada mba Yehova tile tseer tseer sha er ve lu Mbakristu mba tilen dông tenger ga yô. Yange i pase kwagh ne ken igbar zum u i zua mkombo u sha inyom u Watch Tower Bible and Tract Society of Pennsylvania ken Jersey City, New Jersey, Assembly Hall u Mbashiada mba Yehova sha iyange i Sati, Oktoba 7, 2000 la. *

Orkyôn John E. Barr, u a lu môm ken Mbahemenev mba Shin Tine mba Mbashiada mba Yehova la, yange kaa ken mkaanem nam ma bughun mtem la nahan wener: “Ken atô u ior mba ve lu shin tar ingyegh ubiliôn imôngo la cii, ka se se fe shi se ne jighjigh ser, Kristu Yesu u a lu Wan u Yehova u doon un ishima tsung la, tema tor hegen sha, ngu hemen hen atô u mbaihyomov nav ye.” Abaver a doon ungwan ataratar á yange i na ken avegher kposo kposo sha tar la yange tese ikyav i kwagh ne gbar gbar.

U Hemban Kwagh u Mbaimev sha Mimi u Bibilo ken Haiti

Kwagh u mbaimev ta ijar ken tar u Haiti. John Norman, u a lu orhemen u Kômatii u Nengen sha Branci ken tar shon la pase wener: “Kera cii yô, ior mba sôron akombo sha u kuran ayol a ve.” Orakombo ugen yange hii u gban ahon ken ishima na zum u aaikyôr tôndo un nguhar yô. Lan un ishima a pine a ishima na nahan ér, ‘A er nan ve imba kwagh ne ia erem, aluer ujijingi mba kuran mo yôô?’ Yange Mbashiada mba Yehova tese or ne mimi, ve wase un u osough sha ikyev i mbaimev kera, di er ior mbagenev kpishi kpa ve wase ve nahan. Kwagh u tesen ikyav ér mseer ngu van a va ken tar u Haiti yô, sha iyange i Aipor 19, 2000 la, ior va iniongo i M-umbur u umbur ku u Kristu la hemba ingyegh ki mbapasen kwagh u Tartor mba ken tar la kwa nyiin.

Ishima i Tseen ken Zege Haregh u ken Korea La

Ken tar u Korea yô, Mbashiada mba Yehova 40 ken deri cii ka mba eren tom u pasen loho hanma shighe la. Milton Hamilton, u á lu orhemen u Kômatii u Nengen sha Branci shon la kaa ér: “Er se lu a ikyum i mbayôôn loho ne yô, ka se pase kwagh se tser haregh wase u á lu a ior ker i hembe miliôn 47 la kwa môm ken hanma uwer.” Mvese u ken atôônanongo a i lamen iliam i sha ave la hemba duen tseer tseer cii. Ken ningir ugen u i lamen iliam i sha ave la yô, mba henen Bibilo a ior ken uya vev kuma iorov 800. Aluer i kar kwar vough yô, ingyegh kin ka kwaghhenen môm sha ityough ki orpasenkwagh môm je la. Kwagh ka a er i vihi yô, mba kôron agumaior agenegh á á lu anmgbianev asev wan ken gaadi sha ci u mtil ve u ve til paleghaa la. Nahan kpa, mba eren a Mbakristu mbajighjigh mban doo doo, shi ashighe kpishi ka i na ve ityom i í gbe u saa a lu or jighjigh nana er í yô.

 U Nengen sha Mbamgbe mba Mvese A Lu Van a Mi ken Mexico La

Ken uwer u Agusutu 2000 la, mbayôôn Tartor ken tar u Mexico na ibaver i tomshiren ve lu ingyeghior 533,665. Ior yange za iniongo i M-umbur u umbur ku la hemba ingyegh kin kwa tar je. Robert Tracy, orhemen u Kômatii u Nengen sha Branci la kaa ér: “Awashima u se lu a mi ken inyom ne yô ka u ma se seer maan Ayou a Tartor 240 yô.” Shi a seer wener: “Nahan cii kpa, gba se u ma se zough a mi ma i hembe nahan.”

Agumaior á á lu Mbashiada mba Yehova ken Mexico mba ikyav i tesen i dedoo kpen kpen. Pristi u Mbakatoliko yange ôr kwagh u gumor ugen nahan wener: “Sarem pe mà ḿ lu a or môm tseegh u lun er un nahan ken mbadondon av. Kwagh u ior mban doom sha ci u ishimataver i̱ ve taver dông la man myar u ve yaren tom a Bibilo tsema tsema la kpaa. Ka ve paa Aôndo iyol, kua shighe u i anger uuma vev je kpa.”

U Tilen sha Mimi hen Atô u Ayôôso A ken Sierra Leone

Hii ken Aipor u 1991, zum u ityav hii ken Sierra Leone la je, i wua ior shin i vihi ior ayol shin i gba ve awan udubu udubu. Bill Cowan u á lu orhemen u Kômatii u Nengen sha Branci la kaa wener: “Ityav man mtaver u akaa kaa kwagh a ior je zua ga. Ior kpishi mba ngise kwagh gbaan ve sha loho wase ga kpa hegen mba keghen ato sha gbashima je. Kwa kimbir kimbir ior kpishi ka ve gba karen a ishima tsô ve va nyôr mkombo ve u hiihii ken Ayou a Tartor ase, ma or kpa nan lôhô ve ga. Ashighe kpishi ior ka ve kohol anmgbianev asev sha godobi maa ve sôn ér ma i hen Bibilo a ve.” Shin er mzeyol u ken tar u Sierra Leone la á lu zan hemen her kpii nahan kpa, tom u pasen kwagh u Tartor yô ngu umen atam her.

Tom ú Maan Kwagh Mgbeghaa ú Shin South Africa

Kwagh gba sha u ma i zough a Ayou a Tartor udubu imôngo hen haregh u afishi a branci u shin South Africa á nengen sha mi la. Í hila maa ayou uderi imôngo kera kpaa. John Kikot, u a lu ken Kômatii u Nengen sha Branci shon la kaa wener: “U anmgbianev asev ma ve kumban ken mbaate shin ma ve teman shin atine a ikyon, er ngise ve eren la nahan yô, hegen ve hingir u kumban ken ajiir a á kom vough, shi teman sha akaa a teman a injaa kpaa. Shin er Ayou a Tartor ne kpishi í ndera á kperegh kperegh ga nahan kpa, ashighe kpishi ka á tile tsendee a lu ayou a hemban doonashe hen ajiir a i maa á la. Sha ajiir agenegh je yô, i kav ér yange a̱ maan Iyou i Tartor a̱ kuren, a̱ moughon a̱ kôron ken inyom igen yô, tiônnongo la maa a seer ingyegh i hemba ave a tse kwa har je.”

Kwe ú Mbashiada ú He u ken Ukraine

Ken inyom i tom i̱ 2000 la, tar ne zua a mseer u mbapasenkwagh kuma iorov 112,720. Iorov mba hemban ingyegh 50,000 ken atô u mban ne cii hen mimi u Bibilo ken atô u anyom a ataan a karen la. John Didur, orhemen u Kômatii u Nengen sha Branci la kaa nahan wener: “Sha mimi yô, Yehova ver kov u he u mbayevikyaior mba ve lu Mbashiada sha u ve̱ yôôn iti na yô!” A seer wener: “Ken atô u anyom ahar a karen ne, se na magazin ken won hemba miliôn 50, man ingyegh kin ki kwagh môm a iyengeior i ken tar ne jimin cii. Aluer i kar kwar vough yô, hanma uwer se mba zough a uwashika mba hembe dubu hen ior mba lun a gbashima mba ka ve nger u pinen ér i̱ seer tan ve iwanger yô.”

Avegher Agenegh a Kpilighyol a Tom Ne

Yange Daniel Sydlik, u a lu môm ken Mbahemenev mba Shin Tine la na kwaghôron u doon kpishi. Kwaghngeren u í nger sha itinekwagh i í kaa ér “Gbenda u Mbahemenev mba Shin Tine Ve Kaha a Mbamzough Mba sha Tindi Mbagenev La,” u i nger ken magazin ne la, a har sha kwaghôron u injaa shon u yange na la.

Theodore Jaracz, u a lu môm ken Mbahemenev mba Shin Tine la, yange na kwaghôron u kôron ken ishima sha itinekwagh i í kaa ér “Mbá Vérén Mbakuran man Udiakon sha Hemen u Aôndo” la. Môm ken akaangeren á á dugh ken magazin ne har sha itinekwagh shon.

Shi hen mkombo u sha inyom shon, David Splane, u un kpa á lu môm ken Mbahemenev mba Shin Tine la, yange na kwaghôron u sagher ken ishima sha ivur i sha inyom i ken inyom i 2001 ne. Itinekwagh shon yô ér: ‘Tile Lu Vough De Kera Tenger Ga sha u Eren Ishima i Aôndo Cii.’ (Mbakolose 4:12) Mbashiada mba Yehova tar sha won cii ve nyima tsombo u eren nahan, er ve lu zan hemen u pasen loho u dedoo ú Tartor u Aôndo ken mimi sha tar cii la.—Mateu 24:14.

[Footnote]