Tile Lu Nen Vough Shi Lu Nen A Ishima I Gbar Gbar Kpaa

“Tom U Doon Ganden Ipuun”

HII ken mhii u kwagh u Mbashiada mba Yehova mba ainge la je tsô môm ken akaaôron a profeti a Yesu Kristu la ndera gban ve ishima. Yesu yange kaa ér: “Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:14) Er inyom i 1914—i̱ i̱ lu mhii u “ayange a masejime” la—lu zurum yô, Mbahenen Bibilo sha mimi mbara hii angwe u yôôn u̱ lu je i lu a̱ vande yôôn ga yô. Lu angwe u nan ior ityesen i haren sha Icighanruamabera a ishima i môm je.—2 Timoteu 3:1.

Er ishimaveren i mbacivir Yehova mban lu u pasen loho u dedoo ne sha u i̱ tser tar yô, ve gba pasen ú sha gbenda u yange u lu ú he man u gbar gbar man u vighe vighe yô. U fan kwagh ne seer yô, de se hide se yem ken shighe u a kar ken ijime la.

Gbenda u He u Pasen Loho u Dedoo

Lu uwer u Janawari ken inyom i 1914 la. Hen ase ken ishima wer ú tema ken haav mbu teman ker ungwan kwaghôron mbù wan ime mbu ken gar u New York City mbura, ú ngu vea iorov 5,000. I gema i ver ú zege senema sha ishi lu tesen ufoto ior lu zenden ker. Or u menden ivu haa koti u gban anu anu va ande hen ape nengen la. Kera yô, ú vande nengen usenema mba ior ve zenden ker víng víng yô, kpa kwa ne yô, or ne lu ôron kwagh ú lu ungwan. Lu hiin you nengen imba iwavaren i he ne je ne, man loho u i lu ôron la kpa lu u kahan kposo. Or u nán kwaghôron la lu Charles Taze Russell, un u lu pesiden u hiihii u Watch Tower Society la, man senema u ú lu nengen la lu “Photo-Drama of Creation” [Foto u Inumbe i Kwagh u Igbetar].

Yange C. T. Russell kav mluainja u senema u ior zenden ker la sha u wasen ior kpishi. Ka va kom ken inyom i 1912 yô, a hii u eren tom u “Photo-Drama of Creation” la. Ken masejime yô, i mase eren senema u ior zenden ker u duen a ufoto mba mondon a mkaanem sha mi, u̱ shin kuman ahwa anigheni la been.

Er yange i er “Photo-Drama of Creation” ér á tesen un ken avegher anyiin yô, ior mba nengen mbara ve hii u nengen ken iaven i igbetar la i va ar ken mlu u orumace zan zan i kar i za nyôr ken mkur u awashima u Yehova Aôndo a we a tar man orumace ken mkur u Anyom Dubu a Mtemtor u Kristu la. Yange lu u anyom aa kar imôngo cii man mbaeren kpenga a anar la vea mase fantyô u eren un ye. Nahan cii kpa ior umiliôn imôngo nenge “Photo-Drama of Creation” la gbilin!

Yange i kuhwa ityogholough mbi dedoo ker kua shi icer i nan kwaghôron i lun par par ne kuma 96 sha ci u “Photo-Drama” la. Yange i kpela akaa a doon kenger sha icer i yange tese senema u tesen akaa a mbayiase a taregh la. Shi yange gba hange hange u a kpela ufoto mba kôngor mbahev uderi imôngo kua mba lun ahuar ahuar kpaa. Yange i ya ican i kpela usenema mbagen mba duen mondon mbara sha ave kule kule. Man yange i zer kpelan kwagh la kimbir kimbir, zan zan i kar kpelan ufoto 20 sha atihi anyiin been.  Nahan i fatyô u tesen inumbe i “Photo-Drama” la ken ugeri mba kuman 80 ken hanma sev mbu yange a̱ ver cii!

Kwagh u Yange Lu Zan Hemen ken Iuv La

Shighe u yange i lu tesen ior senema u “Photo-Drama” la, kanyi yange i̱ lu zan hemen ken iuvu? Kwase u Henen Bibilo ugen u i yilan un ér Alice Hoffman la kaa ér, “Inumbe la yange i hii sha Anmgbian Russell, due hen ape nengen la ityumbuzwaagh na gba tenger maa i hii tser u lamen la . . . tsô kwagh doo se ungwan mkaanem nam mara.”

Er Zola Hoffman ngur ôron kwagh teren ufoto mba yange ve tenger la yô, a kaa ér: “Yange m tema m aver zwa, kwagh kpiligh mo iyol u nengen ufoto mba tesen kwagh u igbetar la. Uimondon mba ityombo lu bughun wasaar sha ashe a ase.”

Or u ityogholouv mbi doo un ishima i yer ér Karl F. Klein u á lu môm ken Mbahemenev mba Shin Tine mba Mbashiada mba Yehova la seer wener: “Hen shighe u yange a̱ tesen ufoto mba shon la shi í lu kuhwan ityogholouv mbi doon ungwan nyôôso sha mi, anza er ityogholouv mbi kuhwan sha gbange mbi i yer ér Narcissus man mbi i yer ér Humoreske la nahan.”

Akaa agen kpa yange er a i hungur a mi ga yô. Clayton J. Woodworth u Kiriki la yange kaa ér: “Ashighe agen yange mbamtsum mba hômon ve er i lan ishima joo. Kwa gen la tser lu gberen icam kaan ér ‘Pulugh a Pulugh Yemen sha Uwo Wou Er Annyon Yô,’ kpa sha ape nengen la yô, de lu zege anyamagurugu u i yilan ér gigantosaurus la lu karen ye, ka inyam i yange i lu cii man Mngerem ma Deemee mase van je la, gba ikyôr ishar dye”!

Dugh “Photo-Drama of Creation,” la kera je kpa yange i lu yaren tom a kwagh u yange i yilan ér “Eureka Drama” [Inumbe i Yaren Kwan] la. (Nenge akwati.) Ugen la yange lu a icer i akaaôron a yange i kura ker la man ityogholough kpaa. Ugen la di lu a ityogholough man ufoto mba nengen ker. Shin er ufoto mba “Eureka Drama” mbara yange lu mba tenger ga nahan kpa, yange za kera kpen kpen zum u yange a̱ tese un sha ajiir a yange ior fa ngeen yum ga la yô.

Ikyagh ki Tomough ki Ageegh ki Eren Shiada

Shighe u inyom i 1914 la lu za been la, i tese ior “Photo-Drama” la kuma iorov 9,000,000 ken tar u North America man Yuropa kua Australia kpaa. Shin er yange Mbahenen Bibilo ngee ga nahan kpa, ve ban a vangertiôr u yôôn loho u dedoo a ikyagh ki tomough ki hegh kin ne ga. Yange ve na uiyua sha inyar saan saan sha u i̱ kimbi sha u zuan a ajiir a dedoo sha u tesen senema mban yô. Nahan “Photo-Drama of Creation” la yange er zegetom u nan ior u fan Mkaanem ma Aôndo man mbaawashima nav kpaa.

Orgen nger C. T. Russell washika kaa nahan ér: “Kwa u yange m hii za nengen Senema wou la lu shighe u uma wam kôr gema je la; shin me kaa mer, lu shighe u mfe wam u fan Bibilo hii u kahan kposo je la.” Kwase ugen di kaa ér: “Yange m war nzughur angahar shin inya kpishi kpa kam inja er ‘Photo-Drama of Creation,’ u yange i tese fam ú ú kar la yange yimam nahan. . . . Hegen yô, m ngu a bem u tar ua fatyô u nan or ga yô, shi a̱ nam inyaregh ki sha tar cii kpa me pav a na ga.”

Demetrius Papageorge un u lu ken mbatomov mba ijiir i shin tine i Society ica i gba la kaa nahan ér: “Aluer ú tôô ingyegh ki Mbahenen Bibilo mba sha ayange la ú kar sha inyaregh ki yange ki vese ga la yô, ú kav e̱r yange ‘Photo-Drama’ la lu tom u doon ganden ipuun yô. Mimi je jijingi u Yehova yange sue ú ken ijime!”

[Box/Pictures on pages 28, 29]

“Eureka Drama” La

Er yange Society er “Photo-Drama” la iwer anigheni ngi been kera yô, i nenge a mluainja u shi eren imba la nahan vough i yilan un ér “Eureka Drama.” Shin er yange i lu zan hemen u tesen “Photo-Drama” sha ugeri mba vesen nahan kpaa, “Eureka” di yô, i lu tesen ior loho shon môm môm la ken agar ningir. Yange i ôr kwagh u vegher ugen u “Eureka Drama” la ér yange “na anmgbianev mbakasev ian í yange ve faan lun a mi ga yô” sha u ve̱ pase kwagh yô. Hii nan ve kwagh lu nahana? Lu sha ci u anikpa u yange i wa un ker la yuhwa kuma er kilogram 14 nahan tseegh. Kpa aluer yange a gba u a tese un ér ior ve̱ nenge yô, i gba u a tôô icer i nan kwaghôron la kpaa.