Iember I I Lu Sha Ci U Mba Ve Zenden Ken Iwanger La
Iember I I Lu Sha Ci U Mba Ve Zenden Ken Iwanger La
“Va sé zende nen ken iwanger i TER.”—Yesaia 2:5.
1, 2. (a) Iwanger ngi a inja nan je? (b) Hii nan ve icin i i te ér ime ia cir tar cii la i lu í sha beer ga?
YEHOVA ka Imbor i iwanger. Bibilo ôr kwagh na ér ka un “A ne iwanger sha ci u iwanger i atetan, man mzende u uwer man asan sha ci u iwanger i utu” ye. (Yeremia 31:35; Pasalmi 8:3) Ka Un a gbe iyange yase ne ye, ka i i̱ lu anar u yeghen ibugh ibugh, u̱ dughun zegeutaha sagher sagher tsendan sha won cii ye, man mbugenev ka mbu lu iwanger mbugenev di i lu mtsee. Anivur iwanger u a dugh sha iyange a va nyer avese la tseegh kpa waren uma shin tar ne. Aluer iwanger i iyange ngi ga yô, se fatyô u lun ga. Tar ua lu ijiir i lun a uma sha mi shio.
2 E̱r se lu a kwagh ne ken ishima nahan yô, se fatyô u kaven mkehem ma kwagh u profeti Yesaia a ôr la. A kaa ér: “Nenge, ime ia cir tar, man angôghime kpaa una cir akuraior.” (Yesaia 60:2) Kpa ú ngu wer ime ne ka i wan kpôô kpôô ne ga. Yesaia yange soo u kaan ér yange sev a hungwa a av iyange man uwer man asan aa kera ta iwanger ga ze. (Pasalmi 89:36, 37; 136:7-9) Kpa lu ôron lu kwagh u ime i ken jijingi. Kpa ime i ken jijingi ka i kuugh je. Shighe a va zaan dôôr yô, se kera fatyô u lun uma a iwanger i ken jijingi shio ga, di vough er iwanger i kpôô kpôô ne kpa se fatyô u lun uma a í shio ga nahan.—Luka 1:79.
3. Sha kwaghôron u Yesaia a kaa la yô, kanyi kwagh i gbe u Mbakristu vea ere?
3 Er kwagh a lu nahan yô, ka kwagh u hange hange u timen sha mkaanem ma Yesaia mara, shin er yange ma hii ivin sha Yuda u tsuaa la nahan kpa, shi ma ivin ainge sha gbenda u vesen. Een, ime i ken jijingi wa cir tar ne mgbigh mgbigh. Er imba iaven i bo ne i lu nahan yô, iwanger i ken jijingi ka kwagh u hange hange. Ka nahan ve i gbe u Mbakristu vea wa ikyo a kwagh u Yesu yange kaa ér: “Iwanger yen i̱ wanger sha ishigh ki iorough” la ye. (Mateu 5:16) Mbakristu mba jighjigh vea fatyô u tan iwanger ken ime la sha er vea na mbaasemaleghlegh ian i va zuan a uma yô.—Yohane 8:12.
Ashighe a Ime Wa ken Iserael La
4. Ka hanma shighe yange mkaanem ma profeti ma Yesaia mara ivi, kpa kanyi mlu yange i vande lun sha ayange a na laa?
4 Mkaanem ma Yesaia ôr kwagh u ime cirin tar la yange ma hii ivin shighe u Yuda hingir ice shi i yem a ior nav ken Babilon la. Nahan cii kpa, er shighe la lu a̱ va ga la je kpa ikyurior la lu ken ime i ken jijingi cou cou sha ayange a Yesaia la, lu kwagh u yange mgbegha un ve taver ior mba hen tar na ishima nahan la, ér: “We ya u Yakob, va sé zende nen ken iwanger i TER.”—Yesaia 2:5; 5:20.
5, 6. Kanyi akaa yange na ime wa sha ayange a Yesaia la?
5 Yange Yesaia ôr kwaghôron u profeti ken Yuda “sha ayange a Ushia man Yotam man Ahashi kua Hisekia, utor mba Mbayuda” la. (Yesaia 1:1) Yange lu shighe u ayôôso a patii gba man atseregh a kwaghaôndo lu man ijir i ôron sha anyighe kua u kighir mbaatsanev kpaa la. Shin sha ayange a utor mba jighjigh er Yotam nahan lu hemen la je kpa, atse a mbaaôndo mbaaiev lu sha ityouv mbi agunguv her tseer tseer. Sha ikyev i hemen u utor mba banen a jighjigh la je yô, yange í hemba gban a gba kera cii. U tesen ikyav yô, iferor Tor Ahashi yange er kwagh za kar uwegh inya. Yange tôô ônov nav sôr akombo, na aôndo u Moleki naagh a mi. Kwagh la yange lu ime kpôô!—2 Utor 15:32-34; 16:2-4.
6 Mlu u tar la cii kpa lu dimii. Tar u Moabi man Edom man Filitia tile lu bamen Yuda sha akur a tar na. Hen shighe ne tartor u Iserael u ken imbusutarimese la, shin er ú lu̱ anmgbian na u sha marami nahan kpa, ú hingir orihyom u ken igbar. Shi tar u Shiria ú ú lu̱ ca kpuaa vegher u ken imbusutarimese la kpa lu suen num a Yuda. Shi kwagh u hemba cier iyol je yô, lu tar u Ashiria u wan ifer, ú yange ú ver ishima ú lu keghen a kegh hanma ian i í dugh cii sha u ua samber a tahav mbu ú la. Zum u Yesaia lu ôron kwaghôron u profeti la, Ashiria hemba Iserael ityav, shì shí kpuaa yange ma tim Yuda kera. Hen shighe gen la, Ashiria hemba hanma gar u taver u ken Yuda cii ityav mase shin Yerusalem tseegh.—Yesaia 1:7, 8; 36:1.
7. Ka gbenda u nyi yange Iserael man Yuda tsua u dondono, man yange Yehova gema er nena?
7 Akaa ne cii yange er Iserael man Yuda, ior mba Aôndo er ikyuryan a ve la sha ci u ve kera ta ikyaa a na ga yum. Yange “ve undu igbenda i perapera, sha u zenden ken akaa a imegh” di er mba i er kwagh ve ken takerada u Anzaakaa la nahan. (Anzaakaa 2:13) Nahan kpa, shin er ishima vihi Yehova a ior nav nahan kpaa, á ta ve kera jimin cii ga. Kpa a gema a tindi Yesaia man uprofeti mbagenev sha u ve̱ ta iwanger i ken jijingi sha ci u antior u nan lu ken ikyurior la u̱ yange nan lu keren u civir Yehova sha mimi her yô. Iwanger i uprofeti mban yange lu tan la lu i injaa je zua ga. Yange lu í nan uma jim.
Ashighe a Imegh Ainge
8, 9. Ka akaa a nyi a ne ime i cir tar aingee?
8 Mlu u yange akaa lu sha ayange a Yesaia la war ngun kwagh môm a mlu u akaa a lu ainge ne. Hen shighe wase ne, mbahemenev mba orumace gema ijime a Yehova man u̱ a ver un Tor la, ka Yesu Kristu je la. (Pasalmi 2:2, 3) Mbahemenev mba Mbakristu Mbaaiev tsume a iyôngo ve. Amba a mbahemenev la nga sengen ér ve mba civir Aôndo, kpa sha mimi yô, kpishi ken a ve mba kenden a mbaaôndo mba tar ne sha—ka u soon tar u or hemban u mbagenev man u nyôôso iyol i utya man shagba man mbaduenati je la—u̱ tesen atesen a mbafanaôndoga la je yô, kera ka u teren a ter ga.
9 Ukwaghaôndo mba Mbakristu Mbaaiev mbá nôngon ityav sha ajiir wue wue man ayôôso a ken iniongoior a a timin ikweior la, kua akaa a cieryol agenegh kpaa. Heela tseegh ga, u̱ ucôôci kpishi ma ve lu tilen sha anza a haren sha Bibilo la yô, ka vea kenger aeren a idyaa er ijimba i eren man u nomso yaven a nomso la ashe ashe, ga yô ve suen a sue á jighilii. Sha er i vende atindiakaa a Bibilo ne yô, iyôngo i Mbakristu Mbaaiev ngi er ior mba ngise orpasalmi ôr kwagh ve la nahan, ér: “Ve fa kwagh ga, mkav tsô kpaa, ve kav ga, mba zenden wue wue ken ime je.” (Pasalmi 82:5) Sha mimi yô, Mbakristu Mbaaiev mba ken angôghime, er Yuda u tsuaa la nahan.—Mpase 8:12.
10. Iwanger ngi te ken ime ainge nena, man mbaasemaleghlegh mba zough a iwasen nena?
10 Yehova ngu tan iwanger sha ci u mbaasemaleghlegh ken imba ime i i̱ we nahan ne. Ngu yaren tom a “wanakiriki u jighjigh man u fan kwagh” mba ve lu mbatomov nav shin tar ne sha u eren kwagh ne, man ve mban mba ‘tan iwanger er asan a wanger nahan.’ (Mateu 24:45; Mbafilipi 2:16) Nongo u wanakiriki la ngu tan iwanger i ken jijingi i i har sha Bibilo, Mkaanem ma Aôndo yô, man “iyôngo igen” í í lu ior umiliôn imôngo la mba suen ve. (Yohane 10:16) Iwanger ne ngi nan mbaasemaleghlegh ishimaverenkeghen ken tar u angôghime a cir ken ú ne shi ngi wasen ve u yan ikyar a Aôndo shi ngi wasen ve u palegh agbegh a ken jijingi kpaa. Ka í njaa shi ngi ne uma kpaa.
“Me Wuese Iti You”
11. Kanyi mkaan yange Yehova na sha ayange a Yesaia laa?
11 Sha ayange a imegh a hen shighe u Yesaia la man sha ayange a ngise ime hemba wan cii zum u Mbababilon kura ikyurior i Yehova yem a ve uikyangen la, ka gbendatesen u nyi yange Yehova lu tesene? Dugh mtese u tesen anza a dedoo la kera je kpa, yange tsenga vande tesen ken igbar wanger wanger e̱r una iv mbaawashima nav sha kwagh u ior nav yô. Nenge ase akaaôron a profeti a kpilighyol a a lu ken Yesaia ityough 25 zan zan 27 la. Mkaanem ma i nger ken ityouv mbin ne tese e̱r yange Yehova kuren akaa sha ayange la shi er ainge kpa a kuren á yô.
12. Ka mkaanem ma duen ken ishima ma nyi yange Yesaia ôrô?
12 Hiihii yô, Yesaia yôô nahan ér: “TERE, ka We, U lu Aôndo wam ye; me kende U sha, me wuese iti You.” Iwuese ne shì due a ishima i môm tsôô! Kpa kanyi yange i̱ mgbegha profeti ne ve e̱r imba msen ngini? I tese ityôkyaa i vesen la ken vegher u sha uhar u kwaghôron u ivur shon ne. I nger her nahan ér: “Gadia [we Yehova] U er akaakpilighyol, ka mbamhen mba tsuaa je, sha mimi kua jighjigh.”—Yesaia 25:1.
13. (a) Kanyi yange Yesaia kav ve i̱ nyôôso iwuese i yange lu a mi hen Yehova laa? (b) Se fatyô u henen sha ikyav i tesen i Yesaia la nena?
13 Sha ayange a Yesaia la nahan Yehova vande eren akaa a kpilighyol sha ci u Iserael, man i nger akaa ne shin kwaghngeren. Ikyav tese ér yange Yesaia hoghol iyol a akaangeren ne. U tesen ikyav yô, yange fa er Yehova due a ior nav ken kpan kera ken Igipiti shi yima ve sha iyugh i ikyumutya i Farao hen Zegemnger u Nyian la yô. Shi yange fa e̱r Yehova hemen ior nav due a ve ken taaikyôngo va nyôr a ve ken Tar u Ityendezwa nahan. (Pasalmi 136:1, 10-26) Ambaakaa a yange vande eren ne tese ér Yehova Aôndo ka u mimi man u jighjigh kpaa. “Mbamhen” nav—mbaawashima nav cii—mba bundu ga. Kwaghfan u vough u yange i na ne yange nyôôso Yesaia sha u a̱ za hemen u zenden ken iwanger yô. Sha nahan yô, yange lu ikyav i dedoo i̱ se dondo yô. Aluer se sule iyol se time ken Mkaanem ma Aôndo ma i nger la shi se er sha mi ken uuma asev yô, se kpa se kôr cio u lun ken iwanger la her.—Pasalmi 119:105; 2 Mbakorinte 4:6.
I Tìm Gar Kera
14. Kanyi kwagh i tsengeôron sha kwagh u gara, man a̱ shi nan kpa yange lu nyi gara?
14 Ikyav i kwaghwan u Aôndo ngi ken Yesaia 25:2 ape i nger nahan la, ér: “U gema gar u tamen hingir tihi u alôgh, gar u taveraa hingir ice; garutya u ior mba tar ugen hingir er ka gar ga yô, á kera maa un mayange ga.” Kanyi gar nee? Alaghga yange Yesaia lu ôron kwaghôron u profeti teren Babilon. Sha jighilii yô, yange shighe va u̱ gar u Babilon gema hingir tihi u alôgh yô.
15. Ka “zegegar” u nyi a lu ainge, man kanyi ia er unu?
15 Gar u yange Yesaia ôr kwagh ter un la ngu a ikyar ainge kpa? Een. Takerada u Mpase ôr kwagh u “zegegar u a lu a tahav sha utor mba shin tar yô.” (Mpase 17:18) Zegegar la ka “Zegebabilon,” tartor u kwaghaôndo u aiegh u samber sha tar cii la. (Mpase 17:5) Nyian ne, ka Mbakristu Mbaaiev ve lu vegher u vesen u Zegebabilon ye, ve mba mbahemenev vev ve hemen gbenda u̱ hendan a tom u pasen kwagh u Tartor ú ior mba Yehova ve pasen la. (Mateu 24:14) Er Babilon u tsuaa la kpa lu nahan, kape Zegebabilon kpa ica a gba ga tsô a tim un kera, una kera tsa sha won a mough mayange ga je la.
16, 17. Mbaihomov mba Yehova wuese un tsuaa man ainge nena?
16 Kanyi kwagh igen Yesaia a tsengeôron sha kwagh u “gar u taveraa” nee? Er Yesaia ngur ôron kwagh a Yehova yô, a kaa ér: “Ikurior i taver agee ia civir We, gar u akuraior a cier iyol kpaa una cia U.” (Yesaia 25:3) A er nan ve gar u wan tswam, “gar u akuraior a cier iyol” ne una na Yehova iciviri? Umbur kwagh u yange er tor u hemban cii u hemen Babilon la, ka Nebukadinesar je la. Er yange kwagh kar a na igbekera na kpa i̱ due ken igbar cii yô, kwagh gande un á pase mhembe u Yehova man tahav Nav mbu ageegh la sha zwa na. (Daniel 4:34, 35) Yehova ka una er tahav nav yô, mbaihomov nav je kpaa kwagh a gande ve ve lumun tahav nav mbu ageev mbura, shin er ka i lu sha ishima ve ga nahan kpaa.
17 Mase zan yange i kighir Zegebabilon ér a̱ lumun ityom i Yehova i ageegh kpa? Een. Zum u ityav mbi tar sha won cii mbi hiihii la, mbacivir Yehova mba i shigh ve mkurem la ve lu pasen kwagh ken ican. Ken inyom i 1918 la, ve yem shir ken jijingi zum u i kôr mbahemen Watch Tower Society i za wuhe ken purusu la. Tom u pasen kwagh gungur môm la war been kera. Tsô, ken inyom i 1919 la, Yehova Aôndo sagh ve ken uikyangen kera sha ikyev i jijingi na, maa ve yem eren sha tindi u i we ér i̱ pase loho u dedoo i̱ tser tar cii la. (Marku 13:10) Akaa ne cii yange i tsengaôron á ken takerada u Mpase la, kua e̱r yange lu mbaihomov vev iyol la kpaa. Yange “cier ve iyol, ve gba civir Aôndo u Sha.” (Mpase 11:3, 7, 11-13) Ú ngu wer ve cii yange ve gema asema ga, kpa i kighir ve u kaven tom u ageegh u Yehova hen shighe la, di vough er Yesaia vande tsenganôron nahan.
“Ijiir i Waren i Mbaatsanev”
18, 19. (a) Hii nan ve mbaahendanev ve fetyô u vihin mtil sha mimi u ior i Yehova ga? (b) ‘A va kighir icam i uiperambaiorov la’ nena?
18 Er Yesaia gema gba ôron kwagh u ieren i Yehova a mba ve zenden ken iwanger na sha dooshima la yô, a kaa a Yehova ér: “U hingir ijiir i waren i mbaatsanev, ijiir i waren i oribanave ken ican i nan, ijiir i yeren uraahumbe man mure u yeren oo, gadia kumetan u uiperambaiorov ngu er uraahumbe u tan sha kpekpe yô. Er mtsee ken iombortar nahan, kape U yange ayôôso a ior mba tar ugen la; er mtsee a hide ijime sha mure u ibeen nahan, kape á hide a icam i mhembe i uiperambaiorov ijime la.”—Yesaia 25:4, 5.
19 Hii ken inyom i 1919 la je tsô, uipirambaiorov nôngo kwagh kpoghuloo ér vea vihi mtil sha mimi u mbacivir sha mimi mbara, kpa ve kôr cio ga. Sha ci u nyi? Ka sha ci u Yehova ngu garutya u ior nav man ijiir ve i yeren kpaa. Ka a na mure u yôhôr iyol sha u ior nav ve̱ war mtsee u tôvacan yô, shi ka a tile e̱r kpekpe u uraahumbe ú ahendan ú te sha mi kpa a tenger ga nahan. Se mba se zenden ken iwanger i Aôndo yô, se mba veren ashe vangertiôr keghen shighe u ‘a va kighir icam i uiperambaiorov la.’ Een, torough se iyol u keghen iyange i mbaihyomov mba Yehova vea kera lu ga la.
20, 21. Ka iwer i nyi Yehova a yere, man ken tar u he yô, iwer la ia va wa nyi man nyi kere?
20 Yehova eren kwagh ka hembe u kuran a kura mbacivir un di tsô la. Kur ugbayol vev er a lu Ter ve u lun a dooshima yô. Yange waren ior nav dugh a ve sha ikyev i Zegebabilon kera ken inyom i 1919 yô, a ver ve kwaghyan u mhembe sha ishi, lu kwaghyan u ken jijingi u den ishar. Yange i tsengaôron kwagh ne ken Yesaia 25:6, ape i nger nahan la, ér: “Sha uwo ne Ter u akum a Sha Una yôr akuraior cii iwer sha akaa a wan ahôm, iwer i sha wain u a tse a akase na, sha akaa a ahômough a a mgbough a mshiam, sha wain u tse u i kase un dedoo yô.” Se mba a iveren kpishi e̱r se lu a ci ken kwaghyan la yô! (Mateu 4:4) Sha mimi yô, “tebur u Ter” iv a kwaghyan u dedoo sha mi shir zungur zungur. (1 Mbakorinte 10:21) Hanma kwagh u á tsa sha won kwagh a gba se sha mi ken jijingi cii se mba zough a mi sha ikyev i “wanakiriki u jighjigh man u fan kwagh” la.
21 Shi kwagh ngu sha iniongo i Aôndo a yer ne hemba nahan. Iniongo i ken jijingi i̱ se ye hegen ne i̱ umbur se mdumbur u kwaghyan a va dumbur ken tar u he u Aôndo a tende zwa u van a ú la. Hen zum la, “iwer [i] sha akaa a wan ahôm” la ia wa kwaghyan u iyolough u̱ una de ishar la ker. Ijen i iyolough shin i ken jijingi kpaa ia kôr ma or môm ga. Kwagh la una lu myôhôryol u vesen hen mba doon se ishima mba ve ye ican hegen sha ci u m-iv u “ikav” i m-ande u Yesu u i tsengakaan ér “ijen ia gba” la je zua ga! (Mateu 24:3, 7) Mkaanem ma orpasalmi a nger la ka ma surun ishima hen ave kpishi je. Yange kaa ér: “Iyiav mbi̱ ngee shin tar sha ityouv mbi iwoov je kpaa, asagher a mbi a̱ hingir war war.”—Pasalmi 72:16.
22, 23. (a) Kanyi “ikondo i civir” shin “ikondo i yisan” á va kar a mi kera, man á er kwagh ne nena? (b) Á ‘pahar ilyahan sha iyol i Yehova man ior nav’ kera nena?
22 Yô, ver ase ato sha ityendezwa i hemban kpilighyol ne. Er Yesaia ngur karen ishoribo man ku sha “ikondo i civir” shin “ikondo i yisan” yô, a kaa ér: “Sha uwo ne [Yehova] Una vihi ikondo i civir kera, i i cir sha ior cii la, kua ikondo i yisan i i samber i sha akuraior cii la.” (Yesaia 25:7) Hen ase sha kwagh ne yôô! Isholibo man ku, akaa a a shile sha uumace inja er ka bologo u tagher or iôôn ne cii aa kera lu ga. Iyange i á va a mluainja u naagh ku Yesu ku ipaan kura sha uumace mba ungwan tindi mbara vindi vindi la i̱ sar se je zua ga!—Mpase 21:3, 4.
23 Er profeti u i na un kwaghôron ér a̱ ôr la ngur tesen uwegh sha shighe u iengem ne yô, a na se ishimasurun ér: “[Aôndo] Una tim ku sha won kera; Ter AÔNDO Una ese mliam sha ishiv mbi iorov cii, man shi Una hide a ilyahan sha ior Nav kera sha won cii; gadia ka TER je, A er kwagh ne ye.” (Yesaia 25:8) Ma or nana kera kpe ku u akaa a sha gbaaôndo ga, shin nana vaa sha ci u or u doon nan ishima saa kera kpaa ga. Kwagh la a lu mgem u lun iveren kpishi je! Heela tseegh ga, á kera shi ungwa iheen man aie u eren u Aôndo man mbacivir un ve zer wan ishima a mi ica i gbe yum ne ga. Hii nan ve akaa ne aa kera lu ga? Ka sha ci u Yehova una wuhe itine i á la kera—ka Satan Diabolo, ter u aie je la, a vor u Satan sha mi jimin cii.—Yohane 8:44.
24. Ior mba ve zenden ken iwanger mbara vea gema a er nan sha ityom i ageegh i Yehova a er sha ci ve laa?
24 Er ior mba ve zenden ken iwanger mbara ka vea gbidyen kwar sha m-ande u tahav mbu Yehova mbura yô, ishima i kende ve ker ve yôô ér: “Nenge, ngun ka Aôndo wase u se lu veren ashe Na ser, A̱ va yima se je ne; ka TER je u se lu veren ashe Na; sé lu nen saan saan, sé ember nen myom Na.” (Yesaia 25:9) Ica a gba ga tsô uumace mba perapera vea lu a ityôkyaa i ember. A kar a ime la kera cii, man iwanger i Yehova ia mondo sha mbajighjigh gbem sha won á kera bee ga. Ma ishimaverenkeghen igen hemba ngin a iengem a nginii? Mayange je ga!
Ú Fatyô u Pasen Kpa?
• Hii nan ve i lu hange hange u zenden ken iwangere?
• Hii nan ve yange Yesaia wuese iti i Yehova?
• Hii nan ve mbaihomov vea fatyô u vihin jighjigh u nan u ior mba Aôndo ga?
• Ka averen a vesen a nyi a keghen ior mba ve zenden ken iwanger laa?
[Study Questions]
[Picture on pages 22, 23]
Ior mba hen ityô i Yuda yange ve naan Moleki naagh sha uôn
[Pictures on page 25]
Mfe u Yesaia fa ityom i ageegh i Yehova la mgbegha un u wuese iti i Yehova
[Picture on page 26]
Iwanger i Yehova ia mondo sha mbaperapera gbem sha won