Ibaver I Mba Yôôn Tartor

Tar u Latvia Wongor Loho u Dedoo

BIBILO tese wang je ér ka ishima i Aôndo u “ior cii ve̱ war ve̱ ar sha mfe u fan mimi la.” (1 Timoteu 2:4) Ior mba ve ker cio u ungwan loho u dedoo ga anyom a kar imôngo la mba ungwan ú hegen! Di er sha avegher a taregh agen kpa i lu nahan, ior mba ken tar u Latvia mba ganden man mba kiriki kua ambaaior agen wue wue cii mba wongor loho ne di er u̱vàndè-èrèn mba i nger shin heen ne ve tese nahan.

• Ken gar ugen u a lu sha ityoughkitaregh ki Latvia i yer ér Rēzekne la, ngô ugen vea wan na u kwase pine kwase ugen sha godobi gbenda. Kwase u lu môm ken Mbashiada mba Yehova ne tesen ve gbenda been cii yô, shi lôhô ve ér ve̱ va mkombo u Mbashiada la.

Er ngô man wan cii kwagh u kwaghaôndo zaan ve zwa yum yô, maa ve lumun u zan mkombo shon. Mba ngur yemen yô, ve zua zwa ér aluer ve za man ve nenge a kwagh u shin yô, vea due fese je vea yem. Nahan cii kpa, mkombo la doo je yô, kwagh u duen yemen la hungur ve a hungur kuaa. Nahan ve lumun ér i̱ hen Bibilo a ve, shi mba ze mkombo nduuruu kpaa. Iwer ngi karen di ityar tseegh tsô maa ve pase e̱r i sar ve ka duen tom kwaghpasen nahan shi ve lu veren ashe keghen shighe u á va er ve batisema la kpaa.

• Ken gar ugen u shin ityôtar i tar u Latvia la, Orshiada ugen zua a kwase u been iyol, lu anyom 85 í yilan un ér Anna, lu a gbashima tsung shi lumun u̱ i̱ hen Bibilo a na kpaa. Wan na u kwase man mba hen tsombor na mbagenev gema hendan a na tsung. Kpa Anna lumun ér ahendan la shin iyolbeen na shin mlu na u kor kor la a̱ yange un u̱ zan hemen a Bibilo na i henen ga.

Iyange igen yô, Anna pase wan na u kwase la ér mba za eren un batisema. Wan u Anna u kwase la gema kaa a na ér: “Aluer ú er batisema yô, me za gbihi ú ken iyaagh ki i nengen sha mbaganden la.” Kpa m-anger ne tagher Anna ti kwagh ga. E̱r yange taver un iyol ga yum yô, nahan í za er un batisema hen ya na.

Wan u Anna u kwase gema er nan sha kwagh ne? Yange va gema ishima na, de yôr a yôr ngô na iwer zum u á er batisema kera yô. Nahan a pine ngô na ér, “Hegen u ú er batisema ne yô ka ú iyol nena?” Anna gema kaa ér nyi? A kaa ér: “Kam iyol er wanikyundan nahan!”

• Ken uwer u Disemba 1998 la, Mbashiada mbakasev uhar zua a tsofonshoja u tar u ngise lu Soviet Union la. Er yange na Orgbanakaa jighjigh yô, nahan a lumun ér i̱ hen Bibilo a na, kwase na kpa nyôr nongo a na ken masejime. Ve cii ve yem hemen leva leva, nahan ica gbe ga yô, ve cii ve hingir mbapasenkwagh mba ve lu a̱ e̱r batisema ga yô. Fam ngu hurugh ngu gbe yô, maa un u ngise lu orshoja ne maa er batisema. Mdoo u akaa a ken jijingi a doo or ne vea kwase na ishima la ka kwagh u taver hanma or ken tiônnongo cii ishima. Heela tseegh ga, yange ve ùvè ityough ken tom u geman iyou igenegh hingir Iyough i Tartor i dedoo la.