Er ICÔGHOR Tser Kasev Mbagenev Uhar Yô

SANDRA ka kwasecôghor u a lu ken tar u Australia yô. Shighe u yange nom na kpe ken anyom a karen la, kwagh u hii eren Sandra yô, yange dura un iyol. A kaa ér: “Mkav u yange m mase kaven mer nomom u̱ shi lu huror wam u hemban doom mo ishima ne saa kera la, yange huram iyol kondo kpulo. Sha mimi yô, m kera umbur er yange m hii ve m mough sha iyoughci m va nyôr ken ya la ga, shi kwagh u yange m mase eren sha iyange la cii kpa m fa ga. Ken atô u usati mba ve kar kpuaa la, mciem am gema hingir mnyoon u iyolough u zeren nyoon mo kpii.”

Sandra ngu a huror na u i yer ér Elaine yô, ngu kwasecôghor kuma anyom ataratar. Yange Elaine ya ican a nom na David kuma iwer ataratar cii ve ngula mase kpen ku u kyansa ye. Yange zungwe ngee je yô, a kera nenge kera ga kuma anshighe kpuaa. Anyom nga karen ahar yô, a zungur a gba ken igbar. Ortwer na zua un a ikyav i uange ga. Nahan cii kpa, kwagh u a zua a mi yô, Elaine kusu ijungwen na shin ishima gbang gbang, nahan a kaa a na ér a̱ yem ken ya a̱ za nôngo kpoghuloo a̱ vaa. Elaine lumun nahan wener: “Yange ica gba cii man m mase va nôngon hemban ijungwen yam la ye.” Shi a seer kaan ér yange una lu tswen yô, un “nyôr ken iyou i yaven la, un za wa ityough shin akondo a David la.”

Een, ku u or u ú vese nan, nan doo ú ishima la ka u na or nan er akaa wue wue, sha ci u icôghor i kwase lun la hemba di u nan kera lun a nom ga la. U tesen ikyav yô, ashighe agen yange i lu Sandra ken ishima inja er un kera fa imba kwase i un lu jim ga nahan. Yange hingir hen tembe kera lu a or ijime u nôngon kwagh na ga di er kwagh u kasev mba ve sember hingir icôghor ainge mbara kpa a lu nahan. Sandra umbur nahan ér: “Er yange nomom vanden tsuan u eren akaa kera hoghor mo, kpa ḿ gba va hingir tswen kpoo yô maa gba u me gba tsuan u eren akaa shon iyol yam. Yange mnyam nundem. M vôr shi iyol kpa i kpem. Yange í taver u fan kwagh u i gbe u me er la je i zua ga.”

Imbakwagh i yange i tser Sandra man Elaine ne ngi kimbir eren hanma iyange tar sha won cii. Angev man uaikyôr man ityav man sôngoior u ken akuraior, man pila i eren atô kposo kposo ngi nan iyenge i kasev mba côgholov ngi hemban ngeen a ngee cii. * Kpishi ken kasev mban mba gbe yan ican kusususu a u bughun zwa shio tsô, ve fa kwagh u vea er ga. Kanyi kwagh ahuraior man anmgbianev vea er sha u wasen kasev mba icôghor i lu a̱ hoghol ve ga ve nôngon a nôngo a mi laa? Kwaghhenen u a dondo ne ngu a mbamhen mba wasen mba i dugh a mi yô.

[Footnote]