Á “Taver Ishima zan zan Mkur”

KEN tser u vidio u yange i er ken inyom i 1993, u i tesen mbahev mba shin ijiirtamen i Mbashiada mba Yehova la, Lyman Alexander Swingle pase e̱r i lu un ken ishima a mcivir u civir Yehova la wener: “Kpe a akôv angahar ou ngeghelee!” *

Anmgbian Swingle u lu tsa kuma anyom 90 la er kwagh u yange taver mbagenev ishima ér ve̱ er la vough. Á “taver ishima zan zan mkur.” (Mateu 24:13) Shin er yange lu yan ican i iyolough nahan kpaa, sha iyange i Tomatar, Maaci 7 la, a za mkombo u Mbahemenev mba Shin Tine mba Mbashiada mba Yehova, mbahemenev mba un kpa lu môm ken a ve la. Ka gem sha iyange i Tomahar ken sati ugen la yô, mlu na maa gba a gba kera. Tsô ka kom sha ahwa 4:26 sha use, sha uwer u Maaci 14 yô, ortwer na mase kaan er a kpe.

Lyman Swingle yange hii tom na u eren shin ijiirtamen i Mbashiada mba Yehova mba sha tar cii, i i lu ken Brooklyn, New York la sha uwer u Aipor 5, 1930 la. Yange er tom hen ijiir la war kuman anyom 71. Yange i hii nan Lyman tom hen ijiir i wan ityakerada igbende la, ka been kera yô, shi er tom hen ape gberen ityakerada la, shi yange wasen u eren inki kpaa. Je yô, Anmgbian Swingle yange tsa vea gbaatom u eren inki la kuma anyom 25. Shi yange er tom vea gbartom u shin ijiirtamen u ngeren kwagh la kuma anyom 20. Ken anyom 17 a masetyô a uma na la, a er tom ken Afishi a Tor Ikpa la.

Lyman yange lu orpasen kwagh u Tartor u Aôndo vangertiôr. Ken anyom a hiihii a yange lu ken gar u Brooklyn la, un vea Arthur Worsley u yange tsaan ken iyou vea na la, ve naha môm ken utso mba Mbashiada la ve yem akôndo akôndo shin Ifi u Hudson la hanma shighe. Ve yar tom a mbaanar mba kaan kweng la, ve shi kpurun loho u Tartor hen mba ve tem twev sha kpemnger la usati mba kurun iwa imôngo.

Yange i mar Anmgbian Swingle sha uwer u Novemba 6, 1910, ken gar u Lincoln, hen ningir u Nebraska la, kpa ica gba ga tsô tsombor na cii mough twev yem ken gar u Salt Lake City, ken Utah. Mba nyer ker yô, ken inyom i 1913 la, mbamaren nav hingir Mbahenen Bibilo, er yange i yilan Mbashiada mba Yehova hen shighe la la. Anyom nga ngur karen yô, tsombor u Swingle ngohol mbavannya kpishi mba ve due ken Mbashiada mba shin ijiirtamen i ken Brooklyn ve va naan kwaghôron yô, nahan ior mban bende a uma u Lyman doo doo je. Ken inyom i 1923 la, kom anyom 12 yô, a er batisema sha u tesen ikyav i iyoltseghan i yange tsegha sha ci u Aôndo la.

Er Lyman er tom ken Brooklyn, lu kwav je hemba anyom 26 yô, a va zua a mkunduyol kpishi ken uma na zum u a vôso Crystal Zircher sha uwer u Jun 8, 1956 la. Yange ve gbihin ayol a ve ga, ve zer pasen kwagh imôngo zan zan Crystal kar kpen ken inyom i 1998 la. Ken anyom a a vande karen ken ijime atar cii man Crystal kpe la, yange gba akpiti sombo haa inya je vihi kenger. Mver u yange Lyman ver ishima sha a na use use la lu ikyav i ikyo i wan i yange i kpiligh hanmaor cii iyol yô, hemban je yô hen ior mba yange ve nenge Lyman a tuur Crystal shin ikyekye i mbakpenalegh ve ningir sha, Crystal a naan mbakarengbenda Iyoukura man Awake! la.

Anmgbian Swingle yange lu or u ôron kwagh ku ku ku ga, doo inja nahan mba yange ve fa un cii kwagh na doo ve. Di er ter na man ngô na nahan, un kpa lu a ishimaverenkeghen i i har sha Bibilo, u va lun vea Yesu Kristu ken Tartor u sha la. Se mba a vangertiôr ser a zua a ishimaverenkeghen na la hegen.—1 Mbatesalonika 4:15-18; Mpase 14:13.

[Footnote]

[Picture on page 18]

Anmgbian Swingle yange er tom anyom e̱r 25 nahan ken ijiir i eren inki la

[Picture on page 18]

Lyman man Crystal yange ve gbihin ayol a ve ga