Er Nan Ve I Doo U Ú hen Bibilo?

BILL lu gumor, fa anumbe a eren shi fa takerada shi lu a kwagh ave kpaa. Nahan cii kpa, lu a mkomshima ga. Yange fa ape uma na ver ishigh jighilii ga nahan kwagh la za un iyol. Ngur nôngon ér una zua a awashima ken uma na yô, a kar ukwaghaôndo wue wue, kpa a zua a kwagh u lu keren la ga. Tsô ken inyom i 1991 la, a zua a Mbashiada mba Yehova, mba ve na un takerada ugen ú ú pase kwagh u Bibilo i̱ er sha kwagh u awashima u uma yô. Nahan i sôr ian i ver i henen Bibilo sha er Bill una tôv sha itinekwagh ne kua agen yô.

Bill umbur wener: “Yange se hen kwagh kwa u hiihii la, man er se lu nengen ken Bibilo puusu puusu yô, m fa je mer ka kwagh u yange m lu keren je ne. Mbamlumun mba yange ve lu ken Bibilo la doo gande. Kwaghhenen la been kera yô, m naha gongulo wam m kôndo sha iwo m za due m tile, doom ken ishima gande tsô m gba vaan genger genger. Yange doom kpishi sha ci u ken masejime yô, m zua a mbamlumun sha mbampin av.”

 Nahan cii kpa, ú ngu wer ka hanmaor u nan zough a mimi u Bibilo cii nan vaan mliam má kuan nan a ashe sha ci u iember i nan la ga. Nahan cii kpa u henen za zuan a mbamlumun sha mbampin mba hange hange mba ken uma la ka kwagh u iember hen ior kpishi. Ka i lu ve inja er or u ken injakwagh i Yesu u yange ande sha akaainjaa a i yer ken sule la nahan. Yesu kaa ér: “Sha iember i nan la nan gema nan za tee akaa a nan lu a mi la cii, nan za yam sule la.”—Mateu 13:44.

Kwagh u A Lu Hange Hange sha u Zuan a Uma u Injaa La

Yange Bill hen sha mpin u hange hange ne wener, Awashima u uma jim kanyi? Mbafankwagh tsura man mba been imakeranta i kwaghaôndo man mbatôvonkwaghfan cii nôngo a mpin la udubumbaanyomov kar imôngo. Ior nger ityakerada atihi atihi gande u ôron ingyegh sha u vea nôngo yô vea na mlumun sha mpin ne yô. Iniôngon ve la cii i̱ gba dang, man mbagenev yô ve kule ikyaa kera je ér á fatyô u nan mlumun sha mpin la ga. Nahan cii kpa mlumun ngu. Shin er a lu u vesen nahan kpaa, ngu kperegh kperegh ga. I pase un ken Bibilo. Tamen kwagh u nan sha u or nana lu a uma u ikyoo yô ka un ne: Gba u saa se ya ikyar vea Yehova doo doo, Orgban se u̱ a lu Ter u sha la. Se er kwagh ne nena?

Igbenda i kporom ikyua a Aôndo ngi ihiar i í lu inja er i hendan a iyol i í yô. Ior mba i gbe u vea kporom a na ikyua la gba u vea cia un shi una doo ve ishima kpaa. De se time nen sha avur a ruamabera ahar a suen kwaghôron ne. Ngise ngise la, Tor Solomon sule iyol time sha kwagh u orumace dedoo nahan a nger akaa a yange zua a mi la ken takerada u ken Bibilo u i yer ér Orpasenkwagh la. Ngur kangen kwagh u a nenge la cii ile i môm yô, a kaa ér: “Ngun ka mkur u kwagh, u i vande ungwan la cii: Cia Aôndo, waan atindi Na iko; gadia ngun ka kwagh u ior cii ma ve er je ne.” (Orpasenkwagh 12:13, ka se se nger i yier ye.) Uderimbaanyomov mba karen kera yô, i pine Yesu ér, ken Atindi a i na Mose la cii ka u hana a lu u vesene, yô, a kaa ér: “Ter Aôndo wou A̱ doo u ishima a ishima you cii man a uma wou cii man a mfe wou cii.” (Mateu 22:37, ka se se nger i yier ye.) Kwagh ne ka ú kwagh u lanen ishima er i gbe u se cia Aôndo shi una doo se ishima nahanaa? De se gbidye kwar sha mluainja u mcie u cian or man dooshima man er ve eren tom imôngo sha u or a̱ ya ikyar i dedoo a Aôndo yô.

Kwagh u A Lu Mcie u Cian Aôndo Yô

Aluer ka u Aôndo a̱ lumun a mcivir u se civir un la yô, gba hange hange u se cia un sha icivir. Bibilo kaa ér: “Mcie u cian Aôndo ka mhii u kwaghfan je ra.” (Pasalmi 111:10) Apostoli Paulu yange nger kwagh ér: “Se ember nen er se ngohol tartor u u lu u tenger ga yô, ka nahan man sé er Aôndo tom u u doo Un ye, sha mcieaôndo man iyol i sulen.” (Mbaheberu 12:28) Kape ortyom ugen u yange Yohane nenge a na ken mpase u sha mnenge lu sha kwavaôndo la kpa yange hii loho u dedoo na u pasen la je la, wener: “Cia nen Aôndo, na nen Un icivir.”—Mpase 14:7.

Mcie u cian Aôndo, u a lu hange hange sha u uma wase a̱ lu a inja ne, ka mciem ma cian kwagh gighir gighir ga. Aluer ormbaiv u vihin tu ngu tan kume avese yô, se cia gighir gighir. Kpa mcie u cian Aôndo yô, ka u or civir Orgbanakaa a ihindi i tan nan iyol. Shi ma wa mcie u vough u cian u vihin Aôndo ishima la ker, sha ci u ngu Orjir u Hembancii man Uhembanagee kpaa, shi ngu a tahav man agee a tsahan mba ve hembe un ato la.

Mciem man Dooshima Mba Eren Tom Kwaghmôm

Nahan cii kpa, Yehova soo ér ior ve̱ civir un i̱ lu sha ci u un ta ve ihindi iyol yum ga. Yehova ka Aôndo u dooshima je gande iyol inya. Yange ishima mgbegha apostoli Yohane ker nger wener: “Aôndo ka dooshima je.” (1 Yohane 4:8) Yehova er a orumace sha dooshima je zua ga, nahan a soo ér ior ve̱ wongor sha u un kpa doon ve  ishima. Nahan cii kpa, imba dooshima la i̱ zua vea mcieaôndo nena? Sha jighilii yô, akaa a ahar ne cii zua ikpi i môm. Orpasalmi ngise nger wener: “Kwaghmyer u TER ngu a mba ve cie Un yô, Una tese ve ikyuryan Na.”—Pasalmi 25:14.

Yô hen ase er ishima ka i lu wanye ker shighe u ka nana̱ lu vea ter u nan u taver iyol shi lun a mfe yô. Wanye la ka nan lumun dooshima u ter u nan. Wanye la nana suur sha ter u nan, nana ver ashe a ter la ér a̱ hemen nan, nana lu fan je ér gbenda hemen ne ua va nan a mtsera. Kape i lu vough je la, aluer Yehova doo se ishima shi se mba cian un yô, se dondo gbendatesen na, man kwagh ne una va se a injar. Ver ishima nenge kwagh u Yehova lu ôr sha kwagh u Mbaiserael la, wener: “Ma ve lu ase a imbashima i cian Mo waan atindi Am cii iko gbem la, sha er á kpe ve iyol a ônov vev cii gbem sha won yô.”—Duteronomi 5:29.

Een, mcieaôndo ze a or ken uikyangen ga kpa gem pasen or toho, ve a iyugh ga kpa ka gem ka lu msaanyol. Yesaia tsengaôron kwagh u Yesu ér: “Á doo Un iyol a mcie u cian TER la.” (Yesaia 11:3) Shi orpasalmi yange nger kwagh ér: “Saan or u nan cie TER la iyol, man atindi a Na a doo nan ishima tsung la.”—Pasalmi 112:1.

Nahan ikyav tese wang je ér, aluer se fa Aôndo ga yô, se fatyô u cian un ga, doon kpa una doo se ishima ga. Ka nahan ve i gbe hange hange u henen Bibilo ye. Imba kwaghhenen la i wasen se u kaven mlu u Aôndo shi kaven er u̱ dondon hemen na la i lu kwagh u sha kwaghfan yô. Se kporom ikyua a Aôndo yô, se soo u eren ishima na shi ishima ia mgbegha se u kuran atindi a na, fan ken ishima je ser aa na se mtsera.—1 Yohane 5:3.

Aluer or kav ér nan ngu sha gbenda u vough ken uma u nan yô, ka kwagh u nán nan iember kpishi. Kape Bill u i vande teren kwagh na la kpa i lu je la. A sember kaan ér: “Ken anyom a ataankaranyiin a a kar hii shighe u m hii henen Bibilo la je, ikyaryan yam a Yehova seer a seer. Iember i hiihii i yange i usam ken ishima la seer ken a mo gema hingir gbenda u uma u iember. M zer ngun a vangertiôr ken uma wam gbem. Ayange am iv a ityom i ikyoogh, ka u gban di zenden keren iember gengee ga. Yehova hingir or u jim jim her a mo, shi m fa je mer kwagh wam gba un ishima.”

Ken gbaa kwaghngeren u sha utar u ken mgber ne, u i lu u a hen la, se seer timen nengen e̱r mfe u fan kwagh u Yehova la a ve a iember man mbamtsera hen ior mba ve eren sha mfe shon ken uuma vev yô.

[Blurb on page 5]

inja i u̱ kporom ikyua a Aôndo yô, ka u a̱ doo se ishima shi se cia un kpaa

[Picture on page 6]

Yesu yange lu saan saan ken mcie u cian Yehova la