Zua A Ci Ken Iember I Nan A Na Kwagh La!
Zua A Ci Ken Iember I Nan A Na Kwagh La!
“U nan a na kwagh hembe saan iyol a u ngohol a ngohol kwagh.”—AERENAKAA 20:35.
1. Yehova tese ikyav i iember i nan a na kwagh la nena?
IEMBER i fan mimi man averen a ka a mase van ker la cii ka uiyua mba dedoo mba ve dugh hen Aôndo yô. Ior mba ve va fe Yehova yô, mba a atôakyaa kpishi a ember. Kpa, shin er iember i lu ken mngohol u ngohol iyua nahan kpaa, iember shi ngi ken u nan a na i̱ la kpaa. Yehova ka Ornan “nagh ku dedoo man hanma iwua i vough kpaa” shi un ka “Aôndo u saan saan.” (Yakobu 1:17; 1 Timoteu 1:11, NW ) Ior mba ve keghen ato cii tesen ve ityesen i dedoo shi kwagh u mba a tesen ve la doo un tsung, di vough er ka i doo mbamaren zum u mbayev vev ve er sha ityesen ve nahan.—Anzaakaa 27:11.
2. (a) Kanyi kwagh Yesu yange ôr sha kwagh u mne u nan or kwagha? (b) Ka msaanyol u nyi ka se zua a mi zum u se tese ior mimi u Bibilo yôô?
2 Kape Yesu kpaa, zum u a lu shin tar ne man a nenge ior lu ngohol ityesen na yô, saan un iyol je la. Apostoli Paulu yange ôr kwagh ter Yesu nahan ér: “U nan a na kwagh hembe saan iyol a u ngohol a ngohol kwagh.” (Aerenakaa 20:35) Iember i ka se zua a mi zum u se tese mbagenev mimi u Bibilo la ka gbe lun di mkom u se zough a mi ser se zua a or u nan lumun a jighjigh u nan u kwaghôron wase la tsô ga. Iember yase hemba i̱ ngira ca je, ka iember i fan ser se mba nan ior kwagh u a hembe lun a inja i mimi, u̱ una lu gbem sha won yô. Aluer se mba nan ken jijingi yô, se fatyô u wasen ior sha u ve̱ zua a mtsera ayol a ave hegen man zan zan gbem sha won kpaa.—1 Timoteu 4:8.
Mne u Nan Or Kwagh Ve a Iember
3. (a) Apostoli Paulu man apostoli Yohane yange ve tese iember ve sha mwase u wasen mbagenev ken jijingi la nena? (b) Hii nan ve u̱ tesen mbayev mimi u Bibilo la i lu ieren i dooshima?
3 Een, di vough er i saan Yehova man Yesu iyol u nan uiyua mba ken jijingi nahan, kape Mbakristu kpaa i saan ve iyol je la. Yange saan apostoli Paulu iyol u fan wener un wase mbagenev u henen mimi u Mkaanem ma Aôndo la. Yange nger tiônnongo u ken Tesalonika kwagh wener: “Ka nyi i lu ishimaverenkeghen yase, shin iember yase shin tsar wase u ihagh u sha ityou laa? Kera ka ne je sha ishigh ki Ter wase Yesu sha m-ande Na gaa? Gadia ka ne je, ne lu icivir yase man iember yase kpaa ye.” (1 Mbatesalonika 2:19, 20) Kape apostoli Yohane kpa yange lu ôron kwagh u ônov nav mba ken jijingi ve kaa je la, wener: “Aluer m ungwa mer, mbayev av mba zenden sha mimi yô, kam iember je hemba akaa agen cii.” (3 Yohane 4) Shi hen ase sha iember i ka se zua a mi u wasen mbayev asev kpôô kpôô u hingir mbayev asev mba ken jijingi la! Mbamaren ka vea yese ônov ken “mkôôm man kwaghwan u Ter” yô, ka i lu m-er u sha dooshima je ve eren a ve la. (Mbaefese 6:4) Kwagh la ka a lu ikyav i tesen je ér kwagh gba mbamaren sha mkpeyol u mbayev vev gbem sha won. Zum u ka vea wongor yô, mbamaren ve zua a iember i vesen kua mkom kpaa.
4. Ka kwagh u nyi a er u tesen iember i nan kwagh ken jijingi?
4 Dell ka kwase u nom na a lu Orshiada u Yehova ga yô, kpa un gema ngu pania u eren tom hanma shighe shi ngu a ônov utaan. A kaa wener: “M kav mkaanem ma apostoli Yohane a ôr la tsembelee ken amo sha ci u m ngu a iwuese kpishi er ônov unyiin ken atô u ônov av ve ‘zenden sha mimi’ yô. M fa je mer icombor ka ia zuan imôngo ken mciviraôndo u mimi yô, i lu kwagh u van Yehova a icivir man iengem kpaa, nahan m zua a mkomshima tsung je sha er ḿ nenge a averen na sha iniôngon yam i m nôngon mer me tese mbayev av mimi ne yô. U̱ va lun uma a ikighir shio vea tsombor wam ken Paradiso la ka kwagh u ivin mo a ishimaverenkeghen shi mgbeghan mo u wan ishima shin er mbamtaver man mbamtagher ve lu nahan je kpaa.” Kwagh er vihi yô, yange i dugh môm ken ônov mba Dell mbakasev mbara ken tiônnongo kera sha ci u lu eren kwagh u a kom sha Orkristu ga yô. Nahan cii kpa, Dell nôngo kpoghuloo ér una ure ga. A kaa wener: “M ngu a ishimaverenkeghen mer yange sev a hungwa a av wan wam una hide a iyol ijime una hide hen Yehova sha mimi. Kpa m sugh Aôndo tsung er ônov av kpishi ve ze hemen u eren un tom sha mimi nahan. Iember i m zough a mi ne ka kwagh u nan mo agee tsung je.”—Nehemia 8:10.
U Yan Akar a Lun Gbem sha Won
5. Er se ne ayol a ase ken tom u geman ior hingir mbahenen ne nahan, kanyi kwagh se fe ve i̱ ne se mkomo?
5 Yesu yange tese mbadondon un ér ve̱ gema ior ve̱ hingir mbahenen mba ve lu Mbakristu yô, shi ve̱ tesen ve atindi a Yehova kpaa. (Mateu 28:19, 20) Yehova man Yesu cii ve wase ior u henen gbenda u mimi a iyoltangen shio. Nahan se nguren nan ayol ase ken tom u geman ior hingir mbahenen ne yô, se lu a vangertiôr je ser se mba kaven ikyav i Yehova man i Yesu la, di er Mbakristu mba tsuaa mbara kpa yange ve er nahan. (1 Mbakorinte 11:1) Nahan ka sea luun ken ijoughave vea Aôndo Uhembanagee man Wan na u ishima ishima la yô, uuma asev ve lu a inja jim jim. Nenge er u̱ wan se ken “mbashirentom a Aôndo imôngo” la i lu iveren sha wono! (1 Mbakorinte 3:9) Man er mbatyomov je kpa ve lu a ci ken tom u pasen loho u dedoo ne nahan ka kwagh u kpilighyol ga he?—Mpase 14:6, 7.
6. Se nguren wan uwegh ken mne u nan kwagh ken jijingi yô, ka unô vea lu akar a asa?
6 Sha kpôô yô, aluer se mba eren tom u nan ior kwagh ken jijingi ne yô, se fatyô u lun mbaeren tom vea Aôndo imôngo tseegh ga—kpa shi se fatyô u yan ikyar i tsôron vea na kpaa. Ka sha imba jighjigh u nan ngin man yange i yila Aberaham ér ikyar u Yehova ye. (Yakobu 2:23) Aluer se mba nôngon u eren ishima i Aôndo yô, se kpa se hingir akar a Aôndo. Aluer se er nahan yô, se hingir akar a Yesu kpaa. Yange kaa a mbahenen nav ér: “M kera yila ne Mer ikpan ga, gadia kpan fe kwagh u ter na a eren ga; kpa M yila ne Mer, akar, gadia akaa a M ongo hen Terem cii, M ôr ne a.” (Yohane 15:15) Ior kpishi ka a̱ fa ve ér ve mba akar a or u duen iti shin ma ikpuror yô, i saan ve iyol, kpa se se fatyô u lun akar a iorov uhar mba ve hembe sha won cii yô!
7. (a) Kwase ugen yange zua a ijende jim jim nena? (b) We kpa imba kwagh ne er ú wee?
7 Heela tseegh ga, ka sea wase ior ser ve̱ va fa Aôndo yô, ve kpa ve hingir ahuraior ase, ve na i saan se iyol ishima i môm. Kwase ugenegh ngu ken tar u United States mba yer un ér Joan, yange hii u henen Bibilo a kwase ugen i yilan ngula ér Thelma. Shin er tsombor u Thelma hendan a kwaghhenen na la nahan kpaa, a taver ishima nahan inyom karen i môm yô, i er un batisema. Joan nger wener: “Mlu imôngo wase saa heela tseegh ga; kpa, a gema a vese zan zan a hingir ikyaryan i í shi hegen i kom anyom 35 yô. Se mba zeren zan kwaghpasen imôngo kua mbamkohol mba vesen kpaa. Ken masejime yô, m mough twev m undu ve kuma ukilomita 800 nahan. Kpa, Thelma za hemen u tindin mo a uwashika mba doon ishima shi sagher mo shin ishima kpaa, lu kaan a mo ér un zeren henen kwagh wam gbem shi sughun mo e̱r m lu ijende na shi m lu ikyav i tesen hen a na shi m tese un mimi u ken Bibilo la yô. U lun a imba ijende i ishima shima la ka iyua i dedoo i m zough a mi sha iniôngon yam i m nenge m wase un mer a̱ hen kwagh u Yehova a̱ fa je la.”
8. Ka mnenge u vough u nyi nahan una wase se ken kwaghpasene?
8 Ishimaveren i i̱ lu u zuan a or u nan soo u henen kwagh u mimi la ia fatyô u wasen se u wan ishima shin aluer kwagh a̱ gba ior kpishi mba se zough a ve mbara sha kwagh u Mkaanem ma Yehova cuku tseegh shin una gba ve ga je kpaa. Imba mgbe u kwagh gban ve ga la una fatyô u lun imbwase hen jighjigh wase u nan man ishimawan yase kpaa. Nahan cii kpa, u lun a mnenge u vough la una wase. Orgen u ken tar u Guatemala, u i yer un ér Fausto la kaa ér: “Zum u ka mea eren shiada hen mbagenev yô, m gba henen er a lu kwagh u dedoo aluer or u m lamen a nan ne nana hingir anmgbian yô. Ka m hen a ishima yam mer ken ior mba me lu lamen a ve la, a̱ bunde kera kera kpa or môm di tsô yô nana ngohol mimi u Mkaanem ma Aôndo keng. Mhen la wasem m gba uwer ga shi a vam a iember je zua ga.”
U Koson Akaa a Injaa Sha
9. Yesu yange ôr kwagh u koson akaa a injaa sha la ér nyi, man kanyi se fatyô u fan sha kwagh ne?
9 U geman ior hingir mbahenen la, a̱ lu mbayev asev shin a̱ lu ior mbagenev kpaa, ka tom u hegh ga. Ka ú ya shighe shi i gba u or a wa ishima shi nana gba uwer ga. Kpa umbur wer, ior kpishi mba nôngon kwagh kpoghuloo sha u vea ombo uyôughyôughmbaakaav kpishi, akaa a a ve or a iember ga shi a lu gbem sha won kpaa ga la. Yesu yange kaa a mbaungwan a na wener hemba kan a inja u nôngon zuan a akaa a ken jijingi. Yange kaa ér: “De koson nen akaa a injaa sha ci wen shin tar ne hen ape ivina kua nduran ve vihin kwagh kera, mbaiv kpaa ka ve time ve iin ne ga; kpa koson nen akaa a injaa sha ci wen Sha, ape ivina shin nduran ve vihin kwagh ga, mbaiv kpaa ve iin ga la.” (Mateu 6:19, 20) Aluer ishimaveren yase ngi sha akaa a ken jijingi—akaa shon a á kou tom u hange hange u geman ior hingir mbahenen ker ne yô—se fatyô u zuan a mkomshima sha u fan ser se mba eren ishima i Aôndo shi un kpa una na se mtsera. Apostoli Paulu yange nger kwagh ér: “Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga.”—Mbaheberu 6:10.
10. (a) Hii nan ve yange Yesu koso akaa a injaa a ken jijingii? (b) Yesu yange na mbagenev iyol na nena, man ka mtsera u nyi yange ve zua a mi?
10 Aluer se er tom a ishima i môm sha u geman ior hingir mbahenen yô, se lu ‘koson akaa a injaa sha ci wase Sha,’ di vough er Yesu lu kaa nahan. Kwagh ne ve se a iember i ngohol a ngohol kwagh la. Aluer se naan kwagh a iyoltangen shio yô, se va hingir u lun mbanyarev ayol a ase. Yesu iyol na kpa yange civir Yehova sha mimi kuma anyom udubu udubu. Hen ase sha akaainjaa a yange koso sha la yôô! Nahan cii kpa, Yesu yange ker mtsera na iyol na ga. Apostoli Paulu yange nger kwagh ér: ‘[Yesu] na iyol Na sha ci u asorabo ase, sha u Una dugh se ken tar u ainge u ifer ne kera, sha ishima i Aôndo Ter wase.’ (Mbagalatia 1:4) Yesu yange na a na iyol na a iyoltangen shio tseegh ga kpa shi a na uma na jim kpaa sha u a̱ lu ipaan, sha er mbagenev vea zua a ian i koson akaa a injaa sha yô.
11. Hii nan ve uiyua mba ken jijingi ve hembe lun a inja a mba iyolougho?
11 Aluer se mba tesen ior kwagh u Aôndo yô, se lu wasen ve u nengen e̱r ve kpa vea koso akaa a injaa sha a aa saa ishe mayange ga yô. Ka iyua i vesen i nyi nahan ú fatyô u nana? Aluer ú na ijende you agogo a ken uwe a taver ishe shin mato shin iyou je yô, alaghga ijende you la ia wuese shi a saan i̱ iyol kpaa, man ú zua a iember i nan or kwagh la. Kpa anyom a kar 20 nahan mlu u iyua you la una lu nena? Anyom 200 ye? Man anyom 2,000 di ye? Kpa sha vegher ugenegh yô, aluer ú na iyol you sha u wasen or wer nana̱ civir Yehova yô, nana fatyô u zuan a injar ken iyua la gbem sha won.
U Keren Mba Ve Soo Mimi La
12. Ior mbagenev na ayol a ve u wasen mbagen ken jijingi nena?
12 Ior mba Yehova soo u zuan a ci ken iember i nan or kwagh u ken jijingi la, sha nahan yô, ve yem sha akighir a tar je. Ior udubu imôngo undu uyaav vev man icombor ve mba za eren tom mishen ken ityar i i gbe u vea hen a hen ijô i he man aeren a ityôô a he yô. Mbagenev mough yem twev ken avegher agenegh ken ityar ve hen ape kwagh a gbe sha mbapasen kwagh u Tartor yô. Shi mbagenev hen zwa u ityar igen, nahan mba bughun aan agen a pasenkwagh hen ior mba ve mough twev ken ityar igen ve va tem hen a ve yô. U tesen ikyav yô, nom ugen vea kwase na mba ken New Jersey ken tar u United States of America. Ve nenge sha ônov vev uhar zan zan ve kar vesen, hegen ônov mbara mba eren tom shin ijiir i shin tine i Mbashiada mba Yehova mba sha tar cii la. Er mbá nengen sha ônov vev zan zan mba vesen kera yô, ve di ve hii tom pania u eren nahan ve gba henen zwa u ior i China. Shighe karen ka hembe er anyom atar nahan yô, ve hen Bibilo a ior 74 mba lamen zwa u ior i China mba ve zaan makeranta u ú lu ikyua a ve yô. Ú fatyô u seer tom kwaghpasen wou ken ma gbenda u ú fatyô u zuan a iember ken tom u geman ior hingir mbahenen ne kpa?
13. Aluer ú soo u tom wou u̱ hemba umen atam yô, kanyi kwagh ú ere?
13 Alaghga sar ú ka henen Bibilo a or kpa ú ngu a̱ fatyô u eren nahan ga. Ken ityar igenegh yô, ka i taver u zuan a mba i sar ve u ungwan la. Alaghga ior mba ú zough a ve la kwagh u Bibilo gba ve ishima ga. Aluer ka nahan yô, ú fatyô u teren mhange u i hange ú la ken msen, fan je wer gba Yehova man Yesu Kristu ishima tsung a tom ne man vea hemen we vea za a we hen or u nan lu iyôngo la. Pine ior mba ken tiônnongo wou mba ve hembe fan tom ne shin ve hembe eren ú i ze ve kera la ve̱ wase ú mhen. Er tom sha ityesen i í zough a mi ken mbamkombo mba Mbakristu man mbamhen mba i dugh a mi ker la kpaa. Zua a iwasen ken kwaghwan u mbatamen mba ningir sha man kasev vev ve ne la. U hemban cii je yô, de gbe uwer ga. Orfankwagh ngise nger kwagh ér: “Lôô ivor you pepe, man aikighe kpaa de hiden a uwegh ou ga; gadia u fa i ia doo la ga.” (Orpasenkwagh 11:6) Kpa hegen di yô, umbur mbajighjigh er Noa man Yeremia nahan. Shin er lu ior kpuaa tseegh wongor kwaghpasen ve la nahan kpaa, tom ve ume atam. U hemban cii je yô, yange tom ve la doo Yehova.
U Eren Kwagh u Ú Fetyô Cii
14. Yehova nenge ior mba ve bee iyol ken tom u shiren un la nena?
14 Alaghga tsô mlu wou na ú kera fatyô u eren tom u pasenkwagh ne er ú soo la ga. U tesen ikyav yô, iyolbeen ia fatyô u tulen kwagh u ú fatyô u eren ken tom u eren Yehova ne. Nahan cii kpa, umbur kwagh u ngise or u fan kwagh nger la, wener: “Ivu ka tsar u sha ityou u icivirigh, mba zuan a i sha gbenda u perapera.” (Anzaakaa 16:31) Hen Yehova yô, u or yaren tom a uma u nan cii ken tom na la ka kwagh u doon sha ishigh nagh. Heela tseegh ga, Ruamabera kaa ér: “Zan zan iyol i been kpaa [mo Yehova] Me lu her nahan vough, man zan zan ivu je kpaa, Me tôô ne; ka Mo M lu eren nahan ye, Mo Me tôô, Mo Me kôr, shi Me yima kpaa.” (Yesaia 46:4) Ter wase u sha u dooshima er se ityendezwa wener una nenge sha mba ve te ikyaa a na la shi una sue ve kpaa.
15. Ú na jighjigh wer Yehova kav mbamlu ou kpa? Hii nena?
15 Alaghga ú ngu yan ican a angev shin or u ú vese nan kpa nan ne jighjigh ga la nan ngu hendan a we shin myohom ma ityom i hen tsombor shin ma zayol ugen u taver. Yehova kav mbamyen asev man mbamlu asev kpaa, man se doo un ishima sha mhange u i hange se u civir un la. Kwagh ngu nahan aluer alaghga kwagh u se er la una yina sha u mbagenev ve er la je kpaa. (Mbagalatia 6:4) Yehova fa er se yen yô, nahan tem kwagh hen a vese ka hembe se iyol inya ga. (Pasalmi 147:11) Aluer se er sha afatyô wase cii yô, se lua vangertiôr je ser se mba a inja sha ishigh ki Aôndo shi una hungur a aeren a jighjigh u nan wase la ga.—Luka 21:1-4.
16. Ka ken nyi gbenda man tiônnongo jimin cii a lu a ci ken mgem u geman or hingir orhenen laa?
16 Shi umbur wer, tom u geman ior hingir mbahenen ne ka u eren imôngo. Or môm kpa nan gem or hingir orhenen nan tswen ga, di vough er ibelegh ki uragh i môm tseegh ki ne imendenegh ivesen ga nahan. Sha mimi yô, alaghga a lu Orshiada môm tseegh nana za zua a or u i sar nan shi naná hen Bibilo a or shon ye. Kpa or u he la ka nana vaan ken Iyou i Tartor yô, i lu tiônnongo jimin cii a wase nan u kaven mimi ye. Mdoo u anmgbianev ve doo ayol a ve la ka ikyav i tesen tahav mbu jijingi u Aôndo. (1 Mbakorinte 14:24, 25) Mbayev man agumaior a lun anyom pue kar a kar ka a na akaaôron a doon kpishi u tesen or u he la je ér, agumaior ase nga kposo a a ken tar la. Mbauangev man mba i tum ve iyol man mbabeenyol mba ken tiônnongo mba tesen mbahev mbara kwagh u a lu ishimawan yô. Mdoo u mimi u Bibilo a doo mbahev ishima la ka una gba seer shi vea gba vesen zan sha u i̱ er ve batisema yô, se cii se wa uwegh ken mwase u wasen ve la, aluer anyom ase aa lu nan shin tahav asev a̱ yina nan kpaa. Hanma ihwa i se yar tom a i̱ ken kwaghpasen cii, shi hanma kwa u se hidi se za sôr or cii, shi kwa u se lam a or u i sar nan ken Iyou i Tartor cii á lu inja er ka ma kwagh ga nahan, kpa ka vegher u tom u Yehova a lu eren yô.
17, 18. (a) U seer sha tom u geman ior hingir mbahenen la yô, se fatyô u zuan a iember i nan or kwagh la nena? (b) Aluer se mba a ci ken iember i nan a na or kwagh la yô, ka ana se kavena?
17 Sha mimi yô, dugh u eren tom u injaa u geman ior hingir mbahenen ne kera je kpaa, er se lu Mbakristu yô, se mba lu a ci ken iember i mne u nan a na kwagh la sha igbenda igenegh. Se fatyô u koson kwagh mape sha u geman nan iyua a mi sha u suen mcivir u mimi shi wasen ior mba kwagh a ban ve la. (Luka 16:9; 1 Mbakorinte 16:1, 2) Se fatyô u keren aan a eren a mbagenev doo doo. (Mbaromanu 12:13) Se nôngo tsung se “eren nen akaa a doon a ior cii, kpa jim je yô, ka mbananjighjigh.” (Mbagalatia 6:10) Shi se naan mbagenev kwagh sha igbenda i i lu ican ga kpa i gem i lu a inja yô—a̱ lu washika shin u yilan or sha telefon shin ma iyua shin u wan nan uwegh, shin mkaanem ma taver ishima kpaa.
18 Aluer se mba nan kwagh yô, se lu tesen je ser se mba kaven Ter wase u a lu sha la. Shi se lu tesen dooshima wase u anmgbianev la kpaa, ka kwagh u a ne i fe Mbakristu mba mimi je la. (Yohane 13:35) U umbur akaa ne la una fatyô u wasen se u zuan a iember i nan a na or kwagh la.
Ú Fatyô u Pasen Kpa?
• Yehova man Yesu tese ikyav i nan kwagh ken jijingi la nena?
• Se kôr akar a lun gbem sha won nena?
• Kanyi akaa se e̱r sha alô sha alô ve tom wase ua ume atama?
• Mba ken tiônnongo cii vea fatyô u lun a ci ken iember i nan a na kwagh la nena?
[Study Questions]
[Pictures on page 25]
Zum u mbayev ka vea ungwa ityesen i mbamaren yô, mbamaren ve zua a iember i vesen kua mkomshima kpaa
[Picture on page 27]
Se geman ior sha u ve̱ hingir mbahenen yô, se zua a akar a mimi
[Picture on page 28]
Yehova tôôn or ken iyolbeen i nan la
[Pictures on page 29]
Se mba zough a iember i nan a na or kwagh la sha igbenda i i lu ican ga kpa i gem i lu a inja yô