Ibaver I Mba Yôôn Tartor

Aôndo Ese Un Mliam Kera

IOR mba ve gem uuma vev ve har sha atindi a Yehova man akaawan a na yô, mba zuan a averen ngôgh. Shin er i lu kwagh u kiriki u or geman uma u nan er i gbe u nana er la ga nahan kpa, iwasen gema ngi i wasen or shi taver nan ishima kpaa. (Pasalmi 84:11) Kwagh u yange er ken Imbusutarimese i Ityoughkitaregh ki Asia, í nger shin heen ne tese ikyav i kwagh ne.

Zum u Kwaseshiada ugen ken France lu ken memyol yô, a lam a kwase u lun a kenti ugen u i yilan un iti ér Kim * la sha kwagh u awashima u Yehova a tar ne. Shi a undu Kim a kôpi u takerada u i yer ér Ú Fatyô u Lun Uma Gbem sha won ken Paradiso Shin Tar la. Er Kim ngur bughun takerada la nengen ker yô, a za asegh sha mkaanem ma i nger ér “Una ese ve mliam sha ashe kera cii,” la. (Mpase 21:4) Kim kaa wener: “Ivur ne i kôrom ken ishima kpishi. Er hanma iyange cii yange m luun saan saan ken ijir yam i teen kwagh la shi m luun a ahan zwa nahan, ka an je ve yange ma nan fa ér zum u yange mea hide ken ya mea nyôr u yaven yô, m vaa zan zan m kar yavene?” Kwase ne pase ityô i ijungwen na la wener: “M lu vea nomsoor ugen anyom 18 jimin, man mayange saan mo iyol ga, sha ci u a venda u vôson mo. Yange m soo mer, me kera za hemen u lun ken imba uma ne vea na ga, kpa er m lu vea na ica i gba yô, m lu a ishima shimi i eren kwagh ne ga.”

Er shighe karen deghôô yô, Kim maa lumun ér Kwaseshiada u Yehova ugen u i yilan un ér Linh la a̱ hen Bibilo a na. Kim kaa wener: “Yange sasem iyol u eren sha ityesen i Bibilo la. Ikyav i tesen yô, yange m de u civir uter mbatsev mba ve kpe ve kar kera la, shin er yange kwagh ne na mba hen tsombor wam mough u hendan a mo nahan je kpaa. Shi yange m nôngo mer me er ivese vea ikyarem la sha tindi, kpa venda ér una er nahan ga. Ken shighe u ican ne, Kwaseshiada u ken France la za hemen u tindin mo a ityakerada i i har sha Bibilo la, shi Linh lu nan mo ishimataver kpishi. Ishimawan i anmgbianev mbakasev mban kua m-sue u yange ve suem sha dooshima la wasem u taver ishima zan zan yô, m mase va fan kwagh u lu zan ikyarem la iyol jim jim yô. Yange m va kav mer vande lun a ‘kasev’ u 5 man mbayev 25! Kwagh ne yange nam ishimataver u undun un.

Nahan kpa, u undun iyou i vesen i lun kundu kundu la za tsan ken anyou u hoghuloo la lu kwagh u kiriki ga. Heela tseegh ga, ikyarem i m vande lun vea na la hendan ér m̱ hide m̱ va lu vea na, je yô, lu tan kume ér una nôngo u gban mo iwan sha zar kwagh u hian u i yer ér acid la. Kpa sha iwasen i Yehova yô, m lu a tahav mbu eren kwagh u a lu u vough yô.” Kim za hemen zan zan va mase eren batisema ken uwer u Aipor ken inyom i 1998 la. U seer sha mi yô, Mbashiada mba Yehova hii Bibilo i henen a anmgbianev nav mbakasev uhar man wan na u hemban anyom pue kar a kar la.

Kim kaa wener: “Yange m hen mer uma wam saa a saa ishe je, nahan kpa, ainge ne yô, saan mo iyol shi m kera vaan tugh kpaa ga. Yehova esem mliam sha ashe kera.”

[Footnote]