Hii Nan Ú ne Kwagh U Ú Ne Un Jighjigh La Jighjighi?

I pase ikyav i u nan kwagh jighjigh ér ka u “lumun ér kwagh ka u mimi shin ka u vough shin ngu kpôô kpôô kpaa.” Ingyeren i Tesen Ian i Uumace Sha Won Cii, i Mzough u Ityar Cii a nger la na hanmaor “ian i henen kwagh shin ishima man imoshima man kwaghaôndo kpaa.” Ian la kua u “musan kwaghaôndo u nan man jighjigh u nan u nan kpaa” aluer nan soo u eren nahan yô.

KPA hii nan ve, or á soo u geman kwaghaôndo u nan shin jighjigh u nan u nana? Ior ka ve shi kaan ér: “M ngu a jighjigh u nan wam, man saan mo iyol a mi kpaa.” Ka i lu ior kpishi inja er jighjigh u nan u a lu u̱ shami ga kpa una fatyô u bulan or môm ga nahan. U tesen ikyav yô, or u nan ne jighjigh ér tar ngu vaanaa la ka sha inja i nana vihi iyol ga, shin orgen kpaa ga. Ior mbagenev ka ve kaa ér: “Sé gba lumun nen tsô ser hanmaor eren kwagh sha mnenge u nan, nahan kwagh a̱ kure.” Kpa ka hanma shighe cii u̱ kaan nahan la i lu shami yee? Aluer ikyar u ma ortwer ngi zan hemen u nan jighjigh ér ia fatyô u kôron akom a ior ave been maa karen a kar za̱ karen mbauangev ken iyouci nahan, doo u ortwer la nana lumun di tsô ér hanma or eren kwagh sha ishima i nanaa?

Hide sha kwagh u kwaghaôndo yô, akaa a ngise er la tese ér jighjigh u nan u kpeegh la bula ior je falegh gba. Hen ase sha ubombaakaav mba yange ve er shighe u mbahemenev mba ukwaghaôndo “tuur Mbakristu mba toron asema ken ijime ve e̱r tswam a mhôônom shio” zum u i lu nôngon num u i kpenen yilan ér Icighan Utya hen shighe u i yer ér Ikyov i hen Atô la. Gayô hen sha kwagh u “Mbakristu” mba ainge mba ve “var ufoto mba Iniunkwase shin atô a ugbuuka vev” ve lu nôngon ityav, “di vough er ior mba ngise ve nger ati a uicighanmbaiorov sha ityôugh ki usanker vev la nahan la.” Ior mba toron asema mban cii yange ve hen  ér mba eren kwagh u shami. Nahan cii kpa, ikyav tese gbar gbar ér, e̱r ken inium i ukwaghaôndo cii ka i lu nahan, u ngun kpa yange i lu eren injughulkwagh i vesen je.

Hii nan ve anzughulakaa man ayôôso a ngee yumu? Mlumun u Bibilo i ne yô, ér Satan Diabolo ngu “tsughun tar cii.” (Mpase 12:9; 2 Mbakorinte 4:4; 11:3) Apostoli Paulu kaa ér, vihi kpishi, kpa mbakwaghaôndo kpishi “vea tim” sha ci u Satan una tsugh ve, una er “uivande man akaa a kpilighyol a aiegh.” Paulu kaa ér ambaaior la aa “ngohol dooshima u sha kwagh u mimi u ma ve war sha mi la ga,” sha nahan yô, ‘asema a ve aa tsume aa na kwagh u a lu u aiegh la jighjigh.’ (2 Mbatesalonika 2:9-12) Ú hii nan ve ú pande mver u ashe a ver ikyôr sha inja i ú na kwagh u a lu u mimi ga jighjigh laa? Jighilii je yô, hii nan ve ú ne kwagh u ú ne un jighjigh la jighjighi?

Ú Vese Ú Kohol a Kohol Imba Jighjigh Laa?

Alaghga ú vese ú kohol a kohol jighjigh u tsombor wou u ne la. Kwagh la una fatyô u lun kwagh u dedoo. Aôndo soo ér mbamaren ve̱ tese mbayev vev. (Duteronomi 6:4-9; 11:18-21) U tesen ikyav yô, gumor Timoteu yange zua a mtsera kpishi sha u ungwan ngô na kua ngô u ngô na kpaa. (2 Timoteu 1:5; 3:14, 15) Ruamabera kaa ér ônov ve̱ na kwagh u mbamaren ve ne un jighjigh la icivir. (Anzaakaa 1:8; Mbaefese 6:1) Kpa Orgban we soo ér u̱ gba nan ma kwagh jighjigh tsô wer mbamaren ou kpa na kwagh shon jighjigh yumuu? U henen a ishima ga maa gban nan kwagh u i ne un jighjigh sha ikyov ikyov la jighjigh la a fatyô u lun bo kwagh.—Pasalmi 78:8; Amoshi 2:4.

Kwase u Samaria u yange lam a Yesu Kristu la yange vese kohol a kohol jighjigh u nan u kwaghaôndo u Mbasamaria la ve un kpa lu a imba jighjigh u nan la ye. (Yohane 4:20) Yesu na ian i kwase la lu a mi u nan kwagh u un soo cii jighjigh la icivir, kpa shi a pase kwase shon ér: “Ne mba civir kwagh u ne fe un ga yô.” Kpishi ken akaa a yange ve na a jighjigh la cii lu a ken mtsum, shi yange kaa a na ér gba u una gema jighjigh u nan na la, aluer ka u una civir Aôndo sha ishima i Aôndo—“ken jijingi kua ken mimi” yô. U yange ma ve gba kôron di ave sha jighjigh u nan u ikyav i tese wang je ér yange doo ve ishima la her di tsô yô, gema lu u kwase la vea ior mbagenev vea ‘wa jighjigh u nan la iko,’ u yange Yesu Kristu pase ve la.—Yohane 4:21-24, 39-41; Aerenakaa 6:7.

I Tese Ú a Tese Ve Ú Ne Jighjigh Yee?

Atica man mbafan ityesen kpishi mbà sha agbar a kwaghhenen a zuan a mfe kuma u nan ve icivir. Nahan cii kpa akaa a a vande eren a kar kera la, iv a akav a a tese ér atica a duen ati je kpa yange tsume yô. U tesen ikyav yô, or u tôvon sha akaa a mbayiase, Bertrand Russell yange ôr kwagh u ityakerada ihiar i Orgrika u fan kwagh tsura, Aristotle yange nger sha kwagh u kwaghfan u sangen yeke la nahan ér: “Ken ityakerada na i ihiar la cii taver u zuan a ishemberkwaghôron i môm tseegh i á lumun a mi ken kwaghfan u sangen yeke u ainge ne yô.” Ior mbaainge mba ve tse tom ken agbar a kwaghfan agen je kpa ka ve ôr kwagh i lu shami ga kuaa. Ortôvonkwaghfan u ken tar u Britain, Lord Kelvin yange kaa ken inyom i 1895 la wener, “akaahendan a a yoho i hemba ahumbe cii aa fatyô u pulugh ga.” Sha nahan yô, or u nan bugh ashe yô, nan gbe nan kwagh jighjigh ashe ikyusu di tsô ér ka kwagh u mimi sha ci u ma or u fan kwagh shon tsor tsor nan kaa ér kape kwagh shon a lu la yum ga.—Pasalmi 146:3.

Kape sha kwagh u ityesen i kwaghaôndo kpa i gbe u or a er teghelee je la. Apostoli Paulu yange zua a ityesen tsung sha ikyev i mbatesenev mbaaduav mba ve tese un la, nahan a “nôngo sha ishima i tseen tsung sha akaa a uter [nav] la” je za kar ikyaa inya. Ishimatseen na i sha kwagh u jighjigh u nan u uter nav mbatsev la de gema haa un a haa ken ikyaa. Yange kwagh la na un u “tôvon nongo u Kristu u Aôndo a ican ngegh, . . . nôngo u timin u kera je” kpaa. (Mbagalatia 1:13, 14; Yohane 16:2, 3) U hemban gban kera je yô, Paulu zer ‘tumen angahar sha gbough ku huren ibua a mi la’ kpii, lu vendan akav a tesen a yange ma wase un u̱ nan Yesu Kristu jighjigh la. Ka er yange Yesu iyol na ta Paulu ijar ve a gema jighjigh u nan na ye.—Aerenakaa 9:1-6; 26:14.

Ka Mbaabaver Ve Te Ú Ave Ikyôr Yee?

Alaghga mbaabaver bende a jighjigh u nan wou la tsung je. Saan ior kpishi iyol er i ne mbaabaver ian i ôron kwagh u ve soo u ôron la yô, kwagh la na ve ian i zuan a mkaanem ma a fatyô u yaren tom a ma yô. Nahan cii kpa, akaa a lun a tahav nga kpishi a aa fatyô u benden a mbaabaver, shi a  lu benden a ve hanma shighe yô. Kpishi ken akaa a ka ve ôr la ka i lu mkaanem ma hemban doon vegher ugen ave ma má keghen a kegh iyol i tsumen a mhen wou yô.

Heela tseegh ga, er i hangen mbaabaver u ier kwagh u ve ôron la a̱ doo ior shin a sar ior kpishi yô, ka a̱ lu kwagh u or a ungwa ve una dura nan iyol man kwagh u a we ityô kpe la yô, i za ve zwa je i zua ga. Kwagh u ken anyom a karen kpuaa la lu u a fatyô u ôron shin gberen sha u ior ve̱ ôr ken igbar ga la, ka un a dumbur ainge ye. Mba tan num sha anza a dedoo a i fe cii la kure kure, shi mba haan a kera kpaa. Mba zômon a mbamhen mbaiorov kure kure. Ve hii u nan jighjigh ér ‘kwagh u dedoo ka kwaghbo man kwaghbo di gema ka kwagh u dedoo.’—Yesaia 5:20; 1 Mbakorinte 6:9, 10.

U Zuan a Ishuur i Dedoo i Nan Jighjigh

U haren ishima you sha mbamhen man kwaghfan u ior la ka inja er u maan iyou sha waarawa nahan, ia tsa ga. (Mateu 7:26; 1 Mbakorinte 1:19, 20) Nahan ka sha nyi ú har jighjigh u nan wou vangertiôrô? Er Aôndo a ne ú mkav u kaven kwagh ér we u̱ time sha akaa a a kase ú shin tar ne shi u̱ pine mbampin sha akaa a ken jijingi yô, kera gba iliam u henen ér shi una na gbenda u nan mbamlumun mba vough sha mbampin ou mbara gaa? (1 Yohane 5:20) Een, una er nahan kpee! Nahan kpa, sha akaa a mciviraôndo yô, á er nan ve ú fatyô u fan shin ma kwagh una lu u mimi shin u vough shin una lu kpôô kpôô? Se kera tamber a tamber je ga, se kaa ser, Bibilo, Mkaanem ma Aôndo na ishuen i í lu sha i̱ tseegh man se fatyô u eren kwagh ne yô.—Yohane 17:17; 2 Timoteu 3:16, 17.

Kpa alaghga orgen nana kaa ér: “Tile yôô, ka ior mba ve lu a Bibilo mban shi ve hembe van a anzughulakaa man mtsum ken tar ye gaa?” Sha mimi yô, mbahemen ukwaghaôndo mba ve sengen ér ve mba dondon Bibilo la ve va a anzughulakaa man mbamtsum kpishi je. Kwagh ne ngu nahan ka sha ci u, sha jighilii yô, ve har jighjigh ve u nan la sha Bibilo ga. Apostoli Peteru pase kwagh ve wener ka “mbaprofeti mba aiev” man “mbatesen mba aiev” mba vea nyôr a “ityesen i kahan i dang myer” yô. Peteru kaa ér ityom ve la ia na, “á teren gbenda u mimi ne sha dang.” (2 Peteru 2:1, 2) Peteru shi seer ngeren wener: “Se mba a kwaghôron u profeti u a til dông je. Doo u né wa iko sha mi er ka imenger i i wanger ken ijiir i wan ime nahan, zan zan sev mbu kar aven man ishan i sha use kpaa ia due ia kôndo sha ken asema a en yô.”—2 Peteru 1:19; Pasalmi 119:105.

Bibilo taver se ishima ér se̱ tôô jighjigh u nan wase se̱ kar sha kwagh u i̱ tese la. (1 Yohane 4:1) Ior umiliôn imôngo mbà ve er magazin ne vea fatyô u eren shiada ér u eren nahan la seer nan uuma vev ishimaveren man msôghor kpaa. Nahan, lu er ior mba ken Berea mba ve lu a inja la nahan. ‘Sule iyol time ken Ruamabera ayange ayange’ cii man ú mase tsuan kwagh u ú na un jighjigh ye. (Aerenakaa 17:11) A saan Mbashiada mba Yehova iyol u wasen we u eren kwagh ne. Nahan kpa, ka ishima you u nan kwagh u ú soo u nan un jighjigh la jighjigh. Nahan cii kpa, ka ieren i sha kwaghfan u tôvon nengen sha er jighjigh wou u nan la a̱ de haren i luun sha kwaghfan u orumace man asaren a nan ga, kpa guda yô, i̱ lu sha Mkaanem ma Aôndo a pase ma ma lu mimi la yô.—1 Mbatesalonika 2:13; 5:21.

[Pictures on page 6]

Ú fatyô u haren jighjigh wou u nan sha Bibilo vangertiôr