Na Ior Cii Ve̱ Nenge Mzehemen wou
Na Ior Cii Ve̱ Nenge Mzehemen wou
“Nôngo sha akaa ne, penda ishima sha mi sha u ior cii vea nenge mzehemen wou yô.”—1 TIMOTEU 4:15.
1. Ityamegh ki konough kia via a kuma u yan nahan ú fa inyô?
HEN ase kwagh u ityamegh ki konough kì kí hemban doon we u yan la ken ishima—a̱ lu mbuee shin a̱ lu mzembe shin a̱ lu mangoo shin ma ityamegh ki konough ki genegh kpaa. Ú fatyô u fan shighe u ki vie ki kom u yan kpa? Ka u teren a ter ga. Ihuma i ki hom fou fou la man mluashe u ki man mleghem u ki cii ka akaa a tesen we ér kwagh u leghem ikyer ngu keghen we je la. Shighe u ú nyem ki ken zwa la je maa alaghga ú ôô foo. Ityamegh kin shi kundu iyolo! Ku, kwagh ne shi nyoho tsôô! Ki na ú iember man msaanyol kpishi je.
2. Mvie u or lu ilian ga nena, man kwagh la ka a bende a mlu imôngo u ior nena?
2 Kwagh u i er sha heen a taver ga kpa a gem a doo ne ngu a ikyar na ken avegher agen a ken uma wase. U tesen ikyav yô, di er mvie u ityamegh ki konough a lu ilian ga nahan, kape mvie u or vian ken jijingi la kpa a tesen ikyav ken igbenda wuee je la. Se mba fe mvie u or zum u se nenge imbaor la i̱ lu a mkav man mfe kua kwaghfan man ambaakaa la yô. (Yobu 32:7-9) Sha mimi yô, ka kwagh u saan iyol kpishi u eren tom imôngo a ambaaior a a tesen ikyav i mbamlu mban ne ken aeren a ve man anza a ve la.—Anzaakaa 13:20.
3. Mpase u Yesu pase ior mba sha ayange a na la tese kwagh u mvie u or nena?
3 Kpa sha vegher ugen yô, alaghga or a vese sha iyol, kpa gbenda u nan ôron kwagh shi nan eren akaa la ua tese ér nan via ken mhen u nan ga, ken jijingi kpaa ga. U tesen ikyav yô, er Yesu Kristu ngur ôron kwagh u kov u hemban ato u sha ayange a na la yô, a kaa ér: “Yohane va, lu yan kwagh ga, lu man kwagh kpaa ga, kpa mba kaan er: Ngu a jijingi u bo. Wan u or va, ye kwagh shi me kwagh, kpa mba kaan er: Nenge, or u kumbul hua sha kwaghyan, man or u eren hua sha msôr.” Shin er ior mbara yange ve vese sha guyolough nahan kpaa, Yesu kaa ér mba eren kwagh er “mbayev” nahan—mayange ve via ga. Nahan a seer kaan wener: “Kpa mfe zua a ishô sha aeren a na.”—Mateu 11:16-19.
4. Ka ken nyi igbenda nahan man or ne ior cii ve fe mzehemen u nan kua mvie u nana?
4 Ken mkaanem ma Yesu mara yô, se fatyô u nengen shin or a̱ lu a mkav u mimi yô—ka ikyav i wang i tesen mvie u or je la—ikyav ia tese ken igbar sha ityom i nan eren la man akaa a a dugh ker la kpaa. Nenge kwagh u yange apostoli Paulu wa Timoteu sha gbaa ne la. Er Paulu ter akaa agen a yange lu u Timoteu una er la cii been yô, a kaa ér: “Nôngo sha akaa ne, penda ishima sha mi sha u ior cii vea nenge mzehemen wou yô.” (1 Timoteu 4:15) Een, mba ‘nengen’ mzehemen u Orkristu nan ze u za vian la wang je. Mvie u Orkristu lu myer ga, lu ken igbar er iwanger i mondon wang nahan. (Mateu 5:14-16) Sha nahan yô, se tôv sha igbenda i vesen ihiar i ia na ior cii vea fa mvie wase yô: (1) u seer kwaghfan, man mkav man mfe; (2) u tesen ikyav i m-um u ityamegh ki jijingi la.
Mzough u ken Jighjigh U Nan Man Mfe
5. Á fatyô u pasen kwagh u a lu mvie la nena?
5 Udikishenali kpishi pase kwagh u a lu mvie la ér ka iaven i ganden kuman kwagh, man i vesen za sendegh shin zan hemen zan zan za kuman sha iaven i í soo la. Er shen i vande teren nahan, ityamegh ki konough ka ki za sendegh shin ki via zum u ki vese ki za bee yô, nahan mluashe u ki man kwavyolough u ki man ihuma i ki man mlu u ki sha nombor cii a za kuma sha er í soo la vough. Sha nahan yô, mvie ngu kwagh môm a mlu u dedoo man mkom shin mlu u vough la je kpaa.—Yesaia 18:5; Mateu 5:45-48; Yakobu 1:4.
6, 7. (a) Kanyi i tese ér sar Yehova u mbacivir un cii ve̱ za hemen ve̱ za ar sha mvie u ken jijingi la? (b) Mvie u ken jijingi ngu kwagh môm a nyi?
6 Sar Yehova Aôndo u ior mba ve civir un cii ve̱ za hemen ve̱ ar sha mlu u vian u ken jijingi la. Sha nahan yô, a na akaa a dedoo ken tiônnongo u Kristu. Apostoli Paulu yange nger Mbakristu mba ken Efese kwagh wener: “Ka Un je A ne mbagenev ve̱ lu mbaapostoli [ye], mbagenev yô, ka uprofeti, mbagenev ka mbaivangeli, mbagenev ka mbakuran man mbatesen. Ka sha u nan uicighanmbaiorov ve̱ kuma sha tom u eren, sha u maan iyol i Kristu, zan zan se cii sé va kuma sha mzough u ken jighjigh u nan, man mfe u fan Wan u Aôndo man sha mlu u igandenor man ikaren i mluyol u m-iv u Kristu la. Ka nahan man sé kera lu mbayev mba ka i daase a ve i yem a ve wue wue sha ahumbe a ityesen, sha atseregh a ior, sha mtsugh u tsughun ior tsumen a ve sha wayo la ga ye.”—Mbaefese 4:11-14.
7 Paulu yange pase ken avur ne wener, ken atôakyaa a yange Aôndo na amba a uiyua ne ken tiônnongo yô, lu sha u se cii se̱ ‘va kuma sha mzough u ken jighjigh u nan man mfe,’ shi se̱ hingir ‘uigyandenmbaiorov’ shi ‘se lu a mluyol u Kristu la’ kpaa. Ka hen zum la tseegh man a kera daase a vese er anikyundanev mba ken jijingi nahan sha mbamhen man atesen a aiegh ga ye. Nahan se nenge a mzough u a lu hen atô u or zan hemen za aren sha mvie u Orkristu la man mkom u kuman sha “mzough u ken jighjigh u nan, man mfe u fan Wan u Aôndo” la. Akaa nga ken kwaghwan u Paulu la a i gbe u se koso ken ishima yase yô.
8. U ‘lun ken mzough a jighjigh u nan man mfe u vough’ la wa nyi kere?
8 Hiihii yô, er i gbe u Orkristu u vian nana lu ken “mzough” yô, a gba u nana lu ityough gondo a mbacivir a nan imôngo mbara ga shi nana lu a ve kangenaa kpaa e̱r kwagh la a bende a jighjigh u nan man mfe di tsô yô. Nan samber a mnenge u nan shin nan hanger sha mi kpaa ga, shi nan kusun mfe u nan kposo nan lun a mi sha kwagh u mkav u Bibilo kpaa ga. Kpa nan lumun mimi u Yehova Aôndo a pase sha ikyev i Wan na Yesu Kristu man “wanakiriki u jighjigh man u fan kwagh” la vangertiôr. Aluer se mba yan kwaghyan u ken jijingi u i lu nan “sha ashighe ashighe” la nduuruu—sha ikyev i ityakerada i Mbakristu man mbamkombo man mbamkohol mba kiriki man mba vesen la yô—se fa je ser se fatyô u lun ken “mzough” a mba ve lu Mbakristu a vese imôngo la ken jighjigh u nan man mfe kpaa.—Mateu 24:45.
9. Pase ikyav i ishemberkwaghôron i̱ “jighjigh u nan” la, e̱r yange Paulu yar tom a mi ken washika na u a tindi a mi hen Mbaefese la.
9 U sha uhar yô, ishemberkwaghôron i “jighjigh u nan” la i̱ tese ka akaa a se Mbakristu se ne a jighjigh la cica cii, ka “igbanger man iniembe man mtav man mze” u á je la. (Mbaefese 3:18; 4:5; Mbakolose 1:23; 2:7) Sha mimi yô, a er nan man Orkristu nana lu ken mzough vea mbananjighjigh a nan imôngo aluer nan na jighjigh shin nan lumun di vegher u “jighjigh u nan” wase la di tseegh yôô? Ikyav i kwagh ne yô, a gba u mfe u se fe atesen a hiihii a Bibilo la tseegh yô una kuma se ga, shin mfe u fan mimi cing la shin mfe u kpuaa la kpaa ga. Kpa guda yô, gba u se yaren tom a mbamne mba Yehova a ne sha ikyev i tiônnongo sha u se timen ken Mkaanem nam tsung la cii. Gba u se nôngo se zua a mfe u vough man mkav u kaven ishima i Aôndo man awashima na la sha er se fetyô la cii. Kwagh ne kua u keren shighe u ôron Bibilo shi henen i̱ kua ityakerada i í har sha Bibilo la kpaa, shi eren msen hen Aôndo sha u a̱ wase se shi a̱ tese se gbenda kpaa, shi zan mbamkombo mba Mbakristu hanma shighe man u wan uwegh ken tom u pasen kwagh u Tartor shi geman ior hingir mbahenen ne kpaa.—Anzaakaa 2:1-5.
10. Ikyav i ishemberkwaghôron i “zan zan se cii sé va kuma,” i̱ í nger ken Mbaefese 4:13 la ér nyi?
10 U sha utar yô, cii man Paulu ôr kwagh u awashima wase u a lu igbar ityar ne yô a nger mkaanem man nahan ér, “zan zan se cii sé va kuma.” Takerada ugen u pasen akaa a ken Bibilo pase ikyav i ishember i “se cii” la ér ka “se cica ga, shin môm môm, asange asange ga, kpa ka kohol jimin cii.” Ken mkaanem magenem yô, gba u hanma wase cii nana nôngo kwagh sha u nana hingir Orkristu u vian vea mzough u anmgbianev sha won cii imôngo. Takerada u i yer ér The Interpreter’s Bible la kaa ér: “U or zan hemen ken jijingi za sondon la ka u or a ar shami sha tseeneke u nan ga, di vough er i gbe u ilyeghegh ki iyolough i môm tseegh kia fatyô u ganden iyol i ki ga saa iyol jimin cii ia za hemen u vesen ken mkpeyol nahan.” Paulu yange umbur Mbakristu mba ken Efese ér yange lu u vea nôngo u kaven mlu u jighjigh u nan “a uicighanmbaiorov imôngo.”—Mbaefese 3:18a.
11. (a) Kanyi kwagh i lu mzehemen u ken jijingi ga? (b) Kanyi i gbe u se er ve se za hemene?
11 Ken mkaanem ma Paulu mara yô, ikyav tese wang nahan ér u or zan hemen ken jijingi la ka u gban di ivin ishima i nan a mfe man takerada u henen kpishi tsô la ga. Orkristu u nan vie la ka u nan ne i kpiligh mbagenev iyol a mfe u nan la ga. Kpa Bibilo gema kaa ér: “Gbenda u orperapera ngu er iwanger i sha use nahan, ngi seer a seer zan hemen zan zan mkende u iyange sha sha tembe la.” (Anzaakaa 4:18) Een, ka “gbenda” la u ‘wanger i seer a seer zan zan’ ye, ka or la iyol i nan ga. Aluer se mba nôngon zan hemen u yemen vea mkav u Mkaanem ma Aôndo u Yehova a ne ior nav man a lu wanger zan a za hemen ne yô, se lu zan hemen hemen ken jijingi. Sha gbaa ne yô, u̱ gban uwer ga la ka u zan hemen, man ka kwagh u i gbe u se cii se er je la.—Pasalmi 97:11; 119:105.
Tese Ikyav i “Ityamegh ki Jijingi” La
12. Hii nan ve i lu hange hange u tesen ikyav i ityamegh ki jijingi la ken mhange u í hange se u zan hemen ken jijingi laa?
12 Shin er u ‘kuman sha mzough u ken jighjigh u nan, man mfe’ la a lu kwagh u hange hange nahan kpaa, shi kape i lu kwagh u hange hange u se tese ikyav i jijingi u Aôndo sha avegher a uma wase cii je la. Sha ci u nyi? Ka sha ci u, er se vande nengen nahan, mvie ka kwagh u ken atô u or shin kwagh u myer ga, kpa ka kwagh u a tesen ikyav ken igbar sha aeren a aa fatyô u lun mbagenev a inja shi maan ve a maa yô. Nahan cii kpa, ú ngu wer mhange u i hange se u zan hemen ken jijingi la ka di u se lu a mluashe u ior ve̱ hen er se gema shin i̱ lun sha atseregh kpaa ga. Kpa, se nguren vesen ken jijingi dondon hemen u jijingi u Aôndo yô, mgem u vesen una lu ken anza ase man aeren ase kpaa. Apostoli Paulu yange kaa ér: “Zende nen sha Jijingi nahan né kera eren sha asaren a iyolough ga.”—Mbagalatia 5:16.
13. Ka mgem u nyi a lu ikyav i tesen mzehemene?
13 Paulu za hemen u dughun “aeren a iyolough” sha ati, a a lu kpishi shi a lu “ken igbar” la. Cii man or ka nan kav mluainja u akaawan a Aôndo yô, uma u nan a lu sha inja i igbenda i taregh man a iv a akaa agen a Paulu ter a sha ati wener: “Ka idya man hôngor man ijimba i eren, man u civir akombo man ahir a eren man ihom i kôron man iyongo i keren man iwuhe man ishima i nyoon man u wan iyol you iko tseegh, man u hendan akaa, man mbampav, man mtôm man ihundugh ki msôrough man ugurgurmbaakaav kua ambaakaa ne cii” la. (Mbagalatia 5:19-21) Kpa ka nana̱ nguren vesen ken jijingi yô, nan gba hemban “aeren a iyolough” a dang ne, nan ta á kera nan gema “ityamegh ki Jijingi” nan ver sha ityough ki á. Mgem u a lun ken igbar ne ka ikyav i wang i tesen ér imbaor la ngi zan hemen u za aren sha mvie u Orkristu je la.—Mbagalatia 5:22.
14. Pase asemberakaa a ahar a i yer ér “aeren a iyolough” man “ityamegh ki Jijingi” la.
14 Se ver ishima se nenge asemberakaa a ahar ne, ka “aeren a iyolough” man “ityamegh ki Jijingi” je la. “Aeren” ka tom u or nan eren yô, shin atam a ieren i or i̱ um la. Sha mkaanem magenem yô, akaa a Paulu yange ter ér ka aeren a iyolough la ka atam a i lu iniôngon i or i sha apera i̱ um la, ga yô i lu myina u or a mgbegha nan u eren akaa la ye. (Mbaromanu 1:24, 28; 7:21-25) Sha vegher ugen yô, ishemberkwaghôron i “ityamegh ki Jijingi” la tese ér anza a i nger la ka atam a iniôngon i í kpenen yilan ér anza a kôôm uma u or shin a nan or hemban doon inja la ga, kpa gema ka iertom i jijingi u Aôndo ken or a ne á ye. Di vough er ka a̱ ver ishima sha kon ve ú ume atam nahan, kape or nana tese ikyav i ityamegh ki jijingi zum u icighan jijingi a eren tom ken uma u nan gbar gbar je la.—Pasalmi 1:1-3.
15. Hii nan ve i lu hange hange u veren ishima sha avegher a “ityamegh ki Jijingi” la ciili?
15 Kwagh ugenegh u i gbe u a nenge sha mi yô, ka ishember i Paulu a nger ér “ityamegh” sha u yisan sha anza a dedoo a a ter la cii la. Jijingi um atam imôngo ér se̱ ker ki ki hembe doon se la se̱ zôr ga. Akaa a Paulu a ter la cii—ka dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha je la—akaa ne cii nga a inja kaveraa, man ka a cii a ne ve or fetyô u hingir u lun a anza a he a Orkristu ye. (Mbaefese 4:24; Mbakolose 3:10) Sha nahan yô, shin er alaghga se kav ser akaa agen ken ambaakaa ne hemba duen tseer tseer ken uma wase sha ci u mlu wase man asaren a ase nahan cii kpa, hemba doon u se ver ishima sha akaa a Paulu a ter la jimin cii. Aluer se er nahan yô, se hemba lun a uma u sha inja i Kristu la ken avese.—1 Peteru 2:12, 21.
16. Kanyi i lu ishimaveren yase ken mhange u i hange se u aren sha mvie u Orkristu la, man se fatyô u eren kwagh ne nena?
16 Ityesen i injaa i se fatyô u zuan a mi ken mkaanem ma Paulu mara yô ér ken mnenge u se nôngon u aren sha mvie u Orkristu la, ishimaveren yase i̱ de lu u̱ gban di zuan a kwaghfan tsung man kwaghhenen di tsô ga, shin u lun a anza a nan or hemban doon inja la ga. Ka u nan jijingi u Aôndo ian i eren tom ken uuma asev gbar gbar. Er mhen wase man aeren ase a dondo hemen u jijingi u Aôndo a za kighir la, ka di pe se via ken jijingi se za kighir je la. Se hii nan ve se er kwagh ne? Gba u se bugh ishima yase man mhen wase sha er jijingi u Aôndo una nyôr ken avese yô. Kwagh ne wa u̱ se zan mbamkombo mba Mbakristu la ker shi wan zwa sha kwaghôron u i ôron ker la kpaa. Shi gba u se timen ken Mkaanem ma Aôndo hanma shighe shi se henen sha ma kpaa, se na akaawan a ker la ian u hemen ieren i se eren a mbagenev la kua akaa a se tsough u eren la kpaa. Nahan, aluer kwagh ngu nahan yô, ior cii vea fa mzehemen wase la wang je a bunde ga.
Za Hemen sha ci u Icivir i Aôndo
17. U zan hemen la zua ityô sha icivir i nan Ter wase u sha la nena?
17 Kwagh u hemban cii yô, u̱ se nan sha u ior cii ve̱ nenge a mzehemen wase la ve a icivir man iwuese, ka lu sha ayol a ase ga, kpa ka i lu hen Ter wase u sha, Yehova, un u a ne se fetyô u vian ken jijingi la. Ken tugh mbu kper nan i wua Yesu la, a kaa a mbahenen nav ér: “Ka kwagh ne a ne Terem icivir ye, ka u ne ume atam kpishi la, man ne hingir mbahenen Av ye.” (Yohane 15:8) Mbahenen mbara yange ve va Yehova a icivir sha ityamegh ki jijingi man sha ityamegh ki tom ve u Tartor la kpaa.—Aerenakaa 11:4, 18; 13:48.
18. (a) Ka tom sunda u nyi i eren ainge a iembere? (b) Ka mbamtaver mba nyi tom ne u ve a mini?
18 Ainge ne, iveren i Yehova ngi sha ior nav er ve lu eren tom sunda u ken jijingi tar sha won cii ne. Ken anyom a a kar hegen imôngo ne, mbahev mba kuman er iorov 300,000 nahan lu tseghan ayol a ve sha ci u Yehova hanma inyom shi tesen ikyav i iyoltseghan ve la sha batisema u eren shin mnger. Kwagh ne ka a na i saan se iyol shi Yehova kpa ishima i saan un shimi je ka u henen a hen ga. (Anzaakaa 27:11) Nahan cii kpa, cii man iember ne i̱ lu i zan hemen shi i̱ lu kwagh u wuese Yehova yô, gba u mbahev mban cii vea lu ‘zenden ken Kristu, vea wa amishe ken a Na shi a maa ve ken a Na, shi á taver jighjigh u nan ve la kpaa.’ (Mbakolose 2:6, 7) Kwagh ne na mtaver u lun igbar i hiar hen ior i Aôndo. Sha vegher ugen yô, aluer i er ú batisema ica ngi a̱ gba ga yô, ú lumun mlu u taver u nôngon sha u ú penda ishima “sha u ior cii vea nenge mzehemen wou” la kpa? Sha vegher ugenegh di yô, aluer ú ngu ken mimi ica i gba yô, ú lumun mlu u taver u tôôn ikyav mbi nengen sha mlu u ken jijingi u mbahev la kpa? Er i lu cii kpa, gba u zan hemen aren sha mlu u vian la je ka u henen a hen ga.—Mbafilipi 3:16; Mbaheberu 6:1.
19. Aluer ú na ior cii fa mzehemen wou yô, ka ian i civirigh man averen a nyi nahan ú zua a mini?
19 Ior mba ve nôngon taveraa ér vea na ior ve̱ nenge mzehemen ve la cii averen a dedoo nga keghen ve ken hemen. Umbur mkaanem ma taver ishima ma Paulu kaa a Timoteu ér a̱ za hemen bee kera cii ve maa ôr ma la. Yange kaa wener: “Ver ishima sha iyol you man ityesen you kpaa, taver ishima sha mi. Aluer ú er nahan yô, ú yima iyol you kua shi mba ve lu ungwan we la kpaa.” (1 Timoteu 4:16) Aluer ú ngu nan sha u ior cii ve̱ nenge a mzehemen wou a uwer gban shio yô, we kpaa ú fatyô u zuan a ian i civirigh i nan iti i Aôndo icivir shi ú zua a averen na la kpaa.
Baver We Kpa?
• Ior cii vea fatyô u nengen mvie u ken jijingi nena?
• Ka mfe man mkav u nyi a tesen mvie u oro?
• M-um u umen “ityamegh ki Jijingi” la ka ikyav i mzehemen u ken jijingi nena?
• Ka mbamtaver mba nyi i gbe u se ngohol er se lu zan hemen u za aren sha mvie laa?
[Study Questions]
[Picture on page 25]
Mvie u kwagh shin mkom na lu ilian ga
[Picture on page 27]
Se mba ze hemen ken jijingi sha u varen a mimi u i pase ken igbar la ityô
[Pictures on page 29]
Msen u eren wasen se u umen “ityamegh ki Jijingi”