Aberaham—ka Ikyav I Jighjigh U Nan
Aberaham—ka Ikyav I Jighjigh U Nan
“[Aberaham] lu ter u . . . mba ve ne jighjigh la cii.”—MBAROMANU 4:11.
1, 2. (a) Mbakristu mba mimi mbaainge mba umbur Aberaham nena? (b) Ka sha ci u nyi i yer Aberaham ér ka ‘ter u mba ve ne jighjigh la ciili’?
YANGE lu tertamen u ikyurior i ageegh, shi lu profeti man orkpenga kua orhemen kpaa. Kpa, ken Mbakristu mba ainge cii, i hemba umbur un sha ieren i yange i na ve Yehova Aôndo tôô un ér ka ikyar na la—ka jighjigh na u tenger ga je la. (Yesaia 41:8; Yakobu 2:23) Iti na ér Aberaham, shi i yila un ken Bibilo ér ka “ter u . . . mba ve ne jighjigh la cii.”—Mbaromanu 4:11.
2 Ior mbagen er Abel man Enoki man Noa mba yange ve vande lun cii man Aberaham la yange ve tese jighjigh u nan gaa? Een, kpa ka Aberaham yange i ya ikyuryan a na ér akuraior a sha won cii aa zua a iveren ye. (Genese 22:18) Nahan sha injakwagh yô, a hingir ter u hanma or u nan ne jighjigh ken Vor u ityendezwa la cii. (Mbagalatia 3:8, 9) Nahan a fatyô u tôôn ér Aberaham ka ter wase, sha ci u jighjigh u nan na la ka ikyav i se dondo yô. A fatyô u nengen uma na jimin cii ér ka ikyav i tesen jighjigh u nan, gadia a iv a akaren kpishi kua ameen kpaa. Sha mimi yô, Aberaham lu vanden tesen jighjigh u nan na sha akaren a kiriki agen ica gba cii man a mase va tagher ishigh a kwagh u a fatyô u yilan ér ka ikyaren i hemban cii i karen jighjigh u nan na la ye—ka kwagh u i wa un ér a̱ tôô wan na Isaka a̱ na naagh a mi la je la. (Genese 22:1, 2) Hegen yô, de se time nen sha akaren a jighjigh u nan na agen a hiihii la, nahan se nenge akaa agen a se fatyô u zuan a ityesen ken á yô.
Myer u i Yila Un Ér A̱ Due A̱ Undu Ur La
3. Bibilo ôr se nyi sha kwagh u ijiir i Aberam due her laa?
3 Bibilo hii ôron se kwagh u Aberam (u i mase va yilan un ér Aberaham la) ken Genese 11:26 hen ape i kaa ér: “Tera lu anyom akunduatargber man a mar Aberam man Nahor man Haran” la. Aberam due lu ken tsombor u Shem u yange cian Aôndo la. (Genese 11:10-24) Sha kwagh u Genese 11:31 a kaa yô, Aberam lu vea tsombor na ken “Ur u Mbakaldi,” gar u yôughyôugh u ngise lu hen ityoughkitaregh ki Ifi u Uferati yô. * Nahan, yange vese er or azende a zende u tsan ken atumbe nahan ga, kpa lu or u lun ken gar hen ijiir i yange yôughyôugh man mkpeyol lu kpishi yô. Yange i yamen ikyav mbi ken ityar igen ken ukenti mba ken kasua u Ur la. Uya mba dedoo mba lun a ukpar mba ayoughough 14 mba yange i ishi ve ivue i pupuu shi ve lu a ugôngormbamngerev ker la, ve tange sha akpe a ugodobi vev.
4. (a) Kanyi akaa yange lu ken Ur a nan mbacivir Aôndo u mimi zayolo? (b) Aberam yange er nan ve va hingir u nan Yehova jighjighi?
4 Er Ur lu a uyôughyôughmbaakaav nahan kpaa, gema lu a akaa a zan iyol kpishi hen nyityô or cii u nan lu a ishima i eren Aôndo u mimi tom yô. Lu gar u yange uve ityough ken akombo a civir man ajinge a kwagh u mbaimev cou cou yô. Sha mimi yô, kwagh u yange tile tseegh tseegh ken tar la cii yô lu tempel u taven sha geng u yange i maa i gber angahar a unden sha mi sha u za civir Nanna, aôndo u uweregh la. Ka keng yange a lu kighir Aberam ér a̱ lu a ci ken mcivir u dang ne, alaghga mkighir ne anmgbianev nav je kpa yange ve lu a ve sha mi. Sha kwagh u aeren a uter a Mbayuda agen a ôr yô, Tera, ter u Aberam la yange eren ieev iyol na. (Yosua 24:2, 14, 15) A̱ lu nan kpa, yange Aberam lu or u dondon mcivir u aie la ga. Shem, ter na u tamen u beenyol la lu uma her man ka keng yange pase un mfe na sha kwagh u Aôndo u mimi la. Sha nahan yô, Aberam na Yehova jighjigh, lu Nanna ga!—Mbagalatia 3:6.
Mkar u Karen Jighjigh u Nan
5. Aôndo yange kaa a Aberam ér nyi, shi yange er ityendezwa a na shighe u lu ken Ur her la ér nyi?
5 Yange lu u a va kar jighjigh u nan u Aberam la. Aôndo yange ande hen a na kaa a na ér: “Due ken tar wou man ken ityô you man ken ya u teru, yem ken tar u Me tese u la. Me er u, ú hingir ikurior i vesen, Me ver u doo doo, Me er iti you i̱ za gwa man shi ú lu iveren kpaa. Mba vea ver u doo doo yô, Mo kpaa Me ver ve doo doo; or u nana wa u ifan la, Mo kpaa Me wa nan ifan; ka ken a we je akuraior a sha won cii aa zua a iveren ye.”—Genese 12:1-3; Aerenakaa 7:2, 3.
6. Er nan ve yange lu sha jighjigh u nan tsung man Aberaham undu tar u Ur la?
6 Aberam yange beeyol shi lu a wan ga. A er nan ve a gema un una hingir “ikurior i vesen” jimi? Man tar u yange i kaa ér a̱ due a̱ yem ker la di yô yange ú lu hana? Aôndo pase un hen shighe la ga. Nahan gba u saa Aberam una lu a jighjigh u nan tsung ve una gbihi yôughyôugh man mkpeyol u Ur la ye. Takerada u i yer ér Family, Love and the Bible la ôr kwagh u ashighe a ngise la ér: “Mtsaha u hemban nyoon ken mbamtsaha cii u yange i na or u ken tsombor u̱ nan er kwaghbo u vesen yô yange i lu u zendan nan hen tsombor u nan kera, shi yangen nan u lun ‘or’ u ken tsombor la kpaa. . . . Kape i lu ve ikyo i wan i Aberam a a kperan a tan shio man msuur na u suur sha Aôndo la yange lu kwagh u kpilighyol je la. Yange Aôndo yer un yô, a undu tar na tseegh ga, kpa shi a kua ityô na je kpa sha mi.”
7. Alaghga Mbakristu mba ainge vea tagher a akaren e̱r á Aberam la nahan nena?
7 Mbakristu mba ainge kpa alaghga vea tagher a imba akaren la nahan vough. Er Aberam nahan, alaghga a lu kighir se ér se̱ ver asaren a akaa a taregh ken hemen u akaa a a gbe a biishi a hemen u Aôndo yô. (1 Yohane 2:16) Alaghga ior mba ken tsombor wase mba ve ne jighjigh ga mbara man anmgbianev asev mba i dugh ve ken nongo ne sha mbara kpaa vea lu hendan kwagh a vese, vea nôngo sha u meen se ér se̱ nyôr ken azende a bo. (Mateu 10:34-36; 1 Mbakorinte 5:11-13; 15:33) Nahan Aberam ver se ikyav i dedoo. Yange ver ikyaryan na a Yehova hemba un hanma kwagh cii—kua mlu u kangenaa u ken tsombor la je kpaa. Yange fa jighilii er a hii ve uityendezwa mba Aôndo vea iv ga, shi shighe u vea iv kpa fa ga shin ijiir i vea iv her kpaa ga. Nahan cii kpaa yange lumun u nan uma na cii sha uityendezwa mban. Nenge ishimataver i dedoo i kwagh ne a lu a mi hen a vese ainge er se vande veren Tartor hiihii ken uuma asev ne sha wono!—Mateu 6:33.
8. Jighjigh u nan u Aberam la yange bende a ior nav mba ken iyou nena, man kwagh la tese Mbakristu mba ainge nyi kwagha?
8 Ior mba Aberam mba ken iyou mbara di ye? Ikyav tese ér, jighjigh u nan u Aberam man vangertiôr na la yange bende a ve tsung je, sha ci u kwase na Sarai man wan u anmgbian na u lu ancôghol i yilan un ér Loti la cii yange ishima mgbegha ve u dondon myer u Aôndo la, undun Ur. Ken masejime yô Nahor, anmgbian u Aberam man ônov nav mbagenev cii undu Ur ve va tema twev ken Haran henpe yange ve va lu civir Yehova la. (Genese 24:1-4, 10, 31; 27:43; 29:4, 5) Tera ter u Aberam je kpa lumun u dondon wan na! Nahan Bibilo gema gwa na un u yange lu orya la ér ka un yange hemen tsombor la u yemen vegher u ken Kanaan ye. (Genese 11:31) Aluer se pase anmgbianev asev kwagh yô, alaghga se kpaa se zua a mzekera shinii?
9. Kanyi iyolwan yange gba u Aberam una wa sha zende na, man er nan ve alaghga kwagh la yange una lu naagh ku nana?
9 Aberam yange lu a akaa a eren kpishi aa una er cii man una mough zende yô. Yange gba u una tee akaa na man ikyav nav shi una yam utenti man urakumi man kwaghyan man ikyav mbi kwagh a za gba un sha mi la cii. Alaghga yange inyaregh kia saa Aberam sha er yange va hingir u wan ago iyol torough torough yum yô, kpa yange saan un iyol u ungwan imo i Yehova. A̱ shi nan kpa yange lu iyangeikyaa i vesen kpishi shighe u yange i bee ago a wan iyol man mbazendev mba Aberam tile ken won gar u Ur, ver ishigh sha zende la! Mbazendev mban mba been inyuugh ki Ifi u Uferati la yô, ve ver ishigh yemen ken vegher u shin imbusutarimese i ityôtar la. Er ve tsa gbenda usati imôngo shi ve zende ukilomita er 1,000 nahan yô, ve va nyôr hen gar u i yilan ér Haran, u lu ken imbusutarimese i Mesopotamia la, ijiir ne lu ijiir i mbazendev memen her yamen akaa yô.
10, 11. (a) Kanyi kwagh alaghga yange i na ve Aberam pande mem ken Harana? (b) Kanyi ishimataver a fatyô u nan Mbakristu mba ve we mbamaren vev ikyo laa?
10 Aberam yange har afo ken Haran, alaghga yange er kwagh ne lu sha ci u nengen sha ter na Tera u iyolbeen lu num a na la. (Levitiku 19:32) Ainge kpa Mbakristu kpishi mba a ian i civirigh i nengen sha mbamaren vev mba ve beeyol shin ve lu uange la, man mbagen je yô ka ve sôr mlu ve sha er vea zua a ian i eren kwagh ne yô. Zum u i hingir hange hange u vea er kwagh ne nahan yô, amba la a̱ fa ér naagh ku nan sha dooshima kura la “ka kwagh u doon sha ishigh ki Aôndo je.”—1 Timoteu 5:4.
11 Shighe za deghôô je. “Ayange a Tera yô, lu anyom deri uhar kar ataan; Tera maa kpe ken Haran.” Sha mimi yô Aberam yange zungwe sha ku ne tsung je, kpa shighe u mzungu la karen tsô, maa shi a kôr sha zende je. “Aberam lu anyom akunduatargber kar ataan zum u a mough ken Haran la. Aberam mough a kwase na Sarai man Loti wan u anngô na, man inyarev vev mbi ve kohol cii, kua ior mba ve zua a mi ken Haran, ve gba yemen ken tar u Kanaan; ve za nyôr ken tar u Kanaan.”—Genese 11:32; 12:4, 5.
12. Kanyi kwagh yange Aberam eren shighe u lu ken Haran la?
12 Ka kwagh u doon u fan ér Aberam yange ‘kohol inyaregh ken Haran.’ Shin er Aberam yange mough undu ikyav ér mbi saa sha u una undu tar u Ur nahan kpaa, lu ornyar shighe u a va due ken Haran kera la. Kwagh ne yange lu iveren i Aôndo je lu u henen a hen ga. (Orpasenkwagh 5:19) Shin er Aôndo a tendezwa u nan ior nav uyôughyôughmbaakaav ainge ga nahan kpaa, kuren ityendezwa na i á tende u kuren mbamgbe mba ior mba ve ‘undu uya, shin anmgbianev mba nomso shin anmgbianev mbakasev’ sha ci u Tartor la. (Marku 10:29, 30) Shi Aberam yange ‘zua a ior’ kpaa, inja na yô lu ior kpishi mba shiren un tom je la. Ngeren u i yer ér Jerusalem Targum man u i yer ér Chaldee Paraphrase laa kaa ér Aberam yange ‘gema ior hingir mbadondon.’ (Genese 18:19) Jighjigh wou u nan la ne ka ngaghen we ken ishima u lamen a mbawanndor a we man mbakov wou mba hen ijiirtom kua mbakov wou mba ken makeranta kpa? Mayange Aberam yange hide tema inya hungur a tindi u Aôndo ga, kpa yange yar tom a shighe na sha inja ken Haran. Kpa shighe va kuma u una mough twev ken tar la. “Tsô Aberam yem er TER kaa Un nahan.”—Genese 12:4.
Yande Uferati
13. Ka hanma shighe yange Aberam per Ifi u Uferati, man mper ne lu a nyi ikyava?
13 Shi gba u Aberam una mough zende kpee. Er mbazendev nav mba gbihin gar u Haran ken ijime yô, ve ver ishigh shin ityôtar, ve haa zende u kuman ukilomita 90. Alaghga Aberam yange mem sha gbenda hen ape ngise lu ijiir i kasua u Karkemishi hen kpe u Uferati yande la la. Ijiir ne yange lu ihyongo i vesen i mbazendev peren her yô. * Mbazendev mba Aberam yange ve per ifi la sha uwer u sha ume? Kwagh u i nger ken Bibilo la tese ér yange per anyom 430 cii man Mbayuda Due ken Igipiti sha uwer u Nisan 14, 1513 C.S.W. la ye. Ekesodu 12:41 kaa ér: “Tsô anyom deri unyiin man ikundugber nga kar yô, sha iyange la je, akumaior a TER cii due ken tar u Igipiti.” (Ka se se nger i yier ye.) Alaghga tsô, ikuryan i Aberaham la yange i hii sha Nisan 14, 1943 C.S.W., shighe u Aberam hembaato ga per Uferati la.
14. (a) Kanyi kwagh yange Aberam fatyô u nengen a mi sha ashe a jighjigh u nana? (b) Ior mba Aôndo mba ainge hemba mban a iveren a Aberam sha nyi gbenda?
14 Aberam undu gar u lun yôughyôugh la. Nahan kpa a ta ashe a za nenge a “gar u a lu a imagh” la, ka gomoti u perapera u una hemen uumace je la. (Mbaheberu 11:10) Een, er Aberam fa kwagh ne aber aber nahan kpaa, a hii u tan ashe za nengen a gbenda u awashima u Aôndo lu a mi u waren uumace mba ve lu kpen ne. Se mba a iwuese kpishi er ainge yô se zough a iveren kpishi, se hembe lun a mkav sha mbaawashima mba Aôndo la a Aberam nahan. (Anzaakaa 4:18) “Gar” shon, shin mtemtor u Tartor shon u yange Aberam ver ishima lu keghen la, hegen hingir kwagh u mimi—i ver un sha hii ken inyom i 1914 la je. Sha nahan yô, ishima ia mgbegha se u eren aeren a jighjigh u nan shi se suur sha Yehova gaa?
Shir u ken Tar u Ityendezwa la Hii
15, 16. (a) Er nan ve yange gba u saa a lu sha ishimataver tsung man Aberam una fatyô u tan Yehova atse a nanden naagha? (b) Mbakristu mba ainge vea lu a vangertiôr imba i Aberam la nena?
15 Genese 12:5, 6 la kaa a vese ér: “Ve za nyôr ken tar u Kanaan. Tsô Aberam gba zenden ken tar la zan zan za ar hen tembe u Shekem, hen kon u terebin u More.” Yange Shekem lu ukilomita 50 vegher u ken imbusutarimese i Yerusalem la shi lu shin pev u yange inya na doo je yô i ôr kwagh u inya la ér ka “paradiso u icighan tar” la. Nahan je kpa, “sha ayange la Mbakanaan lu ken tar la.” Er Mbakanaan lu ior mba wan dang tsung yô, gba u Aberam una ya ican u kuran tsombor na sha aeren ve a dang la.—Ekesodu 34:11-16.
16 “TER ande hen Aberam” kwa u sha uhar “kaa er: Me na tsombor wou tar ne.” Kwagh la doo ungwana! Kpa yange lu jighjigh u nan tsung u Aberam la na ve ember sha kwagh u lu tsombor na u ken hemen ua va ya la ye. Er lu nahan je kpa, Aberam gema “ta TER u A ande her a na la, atse a nanden nagh sha mi heregh.” (Genese 12:7) Orgen u timen ken Bibilo due a mhen ér: “Mte u yange ta atse ken tar shon la lu gbenda u ngohol tar shon sha ci u ian i un zua a mi u ngohol ú sha ci u jighjigh u nan na la.” U tan imba atse la shi yange lu ieren i tesen ishimataver kpishi. Atse ne lu imba shon i yange i va na zwa ken Tindi u ikyuryan ér i̱ taan je la, yange lu sha awen a gbaaôndo (a yange i kua a kua á ga yô). (Ekesodu 20:24, 25) Mlu u á yange lu kposo a atse a Mbakanaan taan la ica je. Nahan Aberam tese vangertiôr na ken igbar ér un ngu or u civir Yehova, Aôndo u mimi la, shi a tsen iyol na sha ihyom man ipila i sha iyol na je kpaa. Se di ainge ye? Se mbagenev—hemban cii je yô igyumior man i ukase—se mba cie u pasen mbawanndor a vese shin mbakov mba ken makeranta kwaghaôndo sha u ve̱ de fe ér se mba mbacivir Yehova ga shinii? Vangertiôr u Aberam yange tese la a̱ lu ikyav i taver se cii asema sha u tan ave vanger ser se mba mbacivir Yehova!
17. Aberam yange tese ikyav ér un ngu orpasen iti i Aôndo nena, man kwagh ne gema umbur Mbakristu nyi ainge?
17 Hanma ijiir i yange Aberam una kar cii, kwagh u mcivir u Yehova a lu kwagh u hiihii ken uma na. “A mough heregh a yem sha iwo i i lu Betel vegher u sha ityoughkitaregh la, a za tim tenti na her; Betel lu un vegher u shin ityôtar, Ai gema lu un vegher u sha ityoughkitaregh; keregh la, a ta TER atse a nanden nagh sha mi, a yila sha iti i TER.” (Genese 12:8) Inja i ishember i ken zwa Heberu i i gem ér “yila sha iti” la a fatyô u shi lun “yôô (pase) iti” kpaa. Sha mimi yô, Aberam yange yôô iti i Yehova a vangertiôr ken Mbakanaan mba ve wa ndor a na la. (Genese 14:22-24) Kwagh ne umbur se tom u se lu a mi u lun a ci er se fetyô cii ken mpase u “pasen iti Na ken igbar” ainge la.—Mbaheberu 13:15; Mbaromanu 10:10.
18. Aberam yange lu a ior mba ken Kanaan mbara nena?
18 Aberam yange shi hen ma ijiir i môm shighe lihe ga. “Aberam gba zenden veren ishigh ken Imbusutariyan”—vegher u waren uman inya kpuo kpuo u ken imbusutariyan i iwo i Yuda la. (Genese 12:9) Sha twev mbu Aberam lu teman a ya na cii lu ngôôr her ga, shi hanma ijiir i vea tema yô ve tesen ér ve mbá mbà civir Yehova, ve “pase gbar gbar er ve lu mbavannya man ushirmbaiorov shin tar yô.” (Mbaheberu 11:13) Hanma shighe cii, ve lu palegh u lun kangenaa a mbawanndor a ve mba ve civir akombo la. Mbakristu mba ainge kpa saa vea lu “ior i tar ne ga” nahan vough. (Yohane 17:16) Er se eren kwagh a mbawanndor a vese man mba eren tom a vese imôngo sha icivir man sha kwaghfan nahan cii kpa, se mba sulaa sha er se wa ayol ase ken ma ieren i ia tese mlu u tar u ú lu paleghaa a Aôndo ne ga yô.—Mbaefese 2:2, 3.
19. (a) Er nan ve uma u azende azende la yange una lu kwagh u ican kpishi hen Aberam man Sarai? (b) Ka atsan agen a nyi yange lu van Aberam inyaa?
19 I̱ de hungur se er u hoghol a uma u azende azende la yange lu kwagh u ican kpishi hen Aberam man Sarai nahan ga. Yange ve zuan a kwaghyan ve ken ikyumuile ve, lu ken ma kenti u dedoo ken Ur ve yamen kwaghyan ga; ve tsaan ken utenti, lu ken ma ya u i maa tsembelee ga. (Mbaheberu 11:9) Aberam yange lu a tom u eren kpishi ken uma na; lu a tom u nengen sha ikyumuile na man mbayev mba ve eren un tom la kpaa. Sarai kpa lu a tom u kasev mba sha shighe na ve eren ken tar la la: yange i lu masa u kaan man u kaan bredi man mou u tan man akondo a tumen kpaa. (Genese 18:6, 7; 2 Utor 23:7; Anzaakaa 31:19; Esekiel 13:18) Kpa akaren a he lu van a va ikyua ikyua. Lu u ica a gba ga tsô Aberam man ya na vea tagher a kwagh u una ver uuma vev sha zongo yô! Jighjigh u nan u Aberam la una kuma u hendan a kwagh ne kpa?
[Footnotes]
^ Shin er hegen Uferati a kuwan a senen i kom ukilomita 16 sha vegher u sha ityoughkitaregh ki ice i ngise Ur lu la nahan kpa, ikyav tese ér sha ashighe a tsuaa la yô ifi la kuwan vegher u shin ityôtar i gar la. Nahan ken masejime yô, lu u a fatyô u kaan ér Aberam due “yande Ifi [u Uferati] keera.”—Yosua 24:3.
^ Ken masejime, uderimbaanyomov mba karen yô, Tor u Ashiria Ashurnasirpal II per Uferati ikyua ikyua a Karkemishi sha agingir a ikyon a yange i tar i kor la. Aluer Aberam kpa yange una tar agingir a ikyon una kor iyol na ve vea per sha á, shin un man mbazendev nav yange vea hungwa mnger kpaa, Bibilo kera pase ga.
Ú Ver Ishima Kpa?
• Er nan ve i yer Aberam ér ka ‘ter u mba nan jighjigh ciili’?
• Er nan ve yange gba u saa a lu sha jighjigh u nan man Aberam una undu tar u Ur u Mbakaldi laa?
• Aberam yange tese ér mcivir u Yehova ka kwagh u hiihii ken uma na nena?
[Study Questions]
[Map on page 6]
ZENDE U ABERAHAM
Ur
Haran
Karkemishi
KANAAN
Zegemnger u Tamen
[Credit Line]
I har sha foto u taregh u i lu Pictorial Archive (Near Eastern History) Est. man Survey of Israel a lu a ian i eren la
[Picture on page 5]
Lu sha jighjigh u nan tsung man Aberam undu uma u mkpeyol u yange lu ken Ur la ye
[Picture on page 8]
Mtse u Aberam man ya na lu tsan ken utenti la, yange “pase gbar gbar er ve lu mbavannya man ushirmbaiorov shin tar” yô