Mbampin mba Mbaôron Takerada Ne Ve Pin La

Mbakolose 1:16 ôr kwagh u Wan u Aôndo nahan ér, “akaa ne cii ka sha a Na i gbe a ye shi ka sha ci Na kpaa.” Ka sha nyi gbenda i gbe akaa cii “sha ci” u Wan u Aôndo, Yesu Kristu?

Yehova yange yar tom a Wan na u môm môm la, ngula lu vea Aôndo er or u fan tom nahan sha u gban akaa agen, inja na yô, ka akaa cii dugh Yesu iyol na kera je la. (Anzaakaa 8:27-30; Yohane 1:3) Nahan kuma vough e̱r Wan yange zua a iember ken ityom la nahan, ka nahan ve i kaa ér i gba akaa ne “sha ci “ na ye.

Se fa tsô ser uumace mba ve lu mbamaren la ka ve kegh u zuan a mkunduyol ken tom u ve er la—ka ônov vev mba nomso man mbakasev je la—man mba zough a mkunduyol shon kpaa. Ka nahan ve injakwagh i ken Bibilo i er kwagh u “wan u doon [ter u] nan” ishima la ye. (Anzaakaa 3:12; 29:17) Yehova Aôndo kpa kape yange zua a iember ken ior nav Iserael zum u ve lu jighjigh hen a na je la. (Pasalmi 44:3; 119:108; 147:11) Shi zough a iember ken mte u ior ve te ikyaa a na zan zan i kar nyôron hen shighe wase ne kpaa.—Anzaakaa 12:22; Mbaheberu 10:38.

Nahan yange lu shami e̱r yange Aôndo na ortom na, Yesu, sha u a̱ zua a iember ken ityom i ave na nahan. Sha mimi yô, Anzaakaa 8:31 kaa ér yange Wan ‘lu a iember ken tar Na u sha won cii, shi doo un a ônov mba iorov tsung je.’ Ka nahan man Mbakolose 1:16 a kaa ér: “Akaa ne cii ka sha a Na i gbe a ye shi ka sha ci Na kpaa” ye.—Ka se se nger i yier ye.