Tsuaa la Se Lu Ugbaseela—Kpa Hegen yô, Se Hingir Iyôngo!

Shighe u mo man Sakina se lu mbayevkasev la, se dondo ya. Sakina kehe indi shi lu a agee kpaa, kpa mo yô, m gba zun shi m lu vende vende. Hanma shighe cii yô, se gbaan anyiman, kpa iyange igen yô, se nôngo num kpoghuloo. Hii sha iyange la je, se kera lamen ayol a ase ga, ishughun kpaa se kera sughun ayol a ase ga. Ken masejime yô, se va mough twev, hanmaor yem gbenda u nan se kera fa pe orgen lu ga.

Ka kom ken inyom i 1994 yô, m hii Bibilo i henen vea Mbashiada mba Yehova, aeren a am maa hii u geman kure kure. Er anyom kar anyiin zum u m za sema mkohol u iyange môm u i zua ken Bujumbura, ken tar u Burundi la yô, kpiligh mo iyol er m nenge a Sakina yô. Yange saan mo iyol er un kpa va yô, kpa ishughun yase gema lu kusususu. Shighe ze deghôô yô, kpiligh mo iyol er m mnenge lu môm ken mba i lu eren ve batisema sha iyange shon la yô! Un kpaa gema ishima tsung je. Kera lu kwase u hanma shighe yange se zer nôngon num shi zôhôn zwa kpii la ga. Yange i lu kwagh u kpilighyol u nengen er a tese ikyav ken igbar sha u tseghan iyol na sha ci u Aôndo sha u eren batisema nahan!

Yange duen shin mnger yô, m yevese m va kuve un shi m lam a na ken to ivarvase mer: “Ú umbur er yange se nôngo num la kpa?” Á gema a kaa wener: “Een, m umbur, kpa kwagh la kar kera je ve. Hegen, m hingir or u he.”

Saan se cii iyol er se zou a mimi u Bibilo u a kange se shi a gem aeren a ase a sha inja i gbaseela la se hingir iyôngo i i lu sha ikyev i Orkuranilev u Tamen Yehova Aôndo nahan. Sha kpôô yô, mimi u Bibilo geman uuma mba iorov.