Ú Fatyô U Wasen ‘Wan U Undun Ter U Nan’ Nena?
Ú Fatyô U Wasen ‘Wan U Undun Ter U Nan’ Nena?
“Ember, gadia . . . a saa, i shi i zua a na kpaa.”—LUKA 15:32.
1, 2. (a) Mbayevikyaior mbagenev er nena sha kwagh u mimi u Mbakristu? (b) A lu mbamaren man mbayev mba ve lu sha imba iaven ne ken ishima nena?
“M NGU den mimi ne!” Ka kwagh u duran iyol kpen kpen u mbamaren mba cian Aôndo mba ve nôngo ér vea yese ônov vev ken gbenda u Kristu la ve̱ ungwa mkaanem man sha zwa u wanye ve! Mbayevikyaior mbagenev ka ve gba “kuwan karen ihongo” tsô, pasen kpa ve pase mbaawashima vev ga. (Mbaheberu 2:1) Kpishi ken a ve ka ve bee wanye u ken injakwagh i Yesu yange ôr sha kwagh u u yange undu ya u ter na za vihi dyako na ken tar u icaa la.—Luka 15:11-16.
2 Shin er Mbashiada mba Yehova kpishi ve lu a mzeyol ne ga nahan kpaa, hen mba kwagh ne a tser ve yô, ma kwaghôron u una sur ve ishima vé mzungu ve la una bee cica cii je kpa ngu ga. Shi kwagh u á hungur a mi ga yô, ka msaanyol u wan u nan gande ave la iyol i nan kpa ka nan kera lu a mi ga la. Ken vanger u nan yô, imoshima i nan ia lu zan nan iyol. Ken injakwagh i Yesu la, wan u a undu ter na la mase ‘va tilen a ishima,’ nahan kwagh la va ter na a iember. Mbamaren man mbagenev ken tiônnongo vea fatyô u wasen mbayev mba ve undu uter vev la sha u vea ‘tile a ishima’ nena?—Luka 15:17.
Er I Hii Ve Mbagenev Ve Soo u Duen ken Mimi Kera Yô
3. Ka atôakyaa a nyi a ne mbayevikyaior ve undun tiônnongo u Kristu?
3 Mbayevikyaior mbá udubu uderi imôngo mbà i saan ve iyol u civir Yehova ken tiônnongo u Kristu her yô. Nahan kpa, hii nan ve mbagenev ve soo u duene? Alaghga a lu ve inja er kwagh ngu karen ve ken tar nahan. (2 Timoteu 4:10) Shin alaghga vea nenge ér ityôr i iyôngo i ior mba Yehova ve lu ker la tsule ve ngee gande. Imoshima i nan or ibo man isharen i ningir sha a kwase shin nomsoor, shin isharen i ahuraior a or ma á lumun nan, akaa ne aa fatyô u nan wanye u kahan undun ikyumuile i Yehova la. Alaghga wanye nana de u civir Aôndo sha mlu u i lu inja er mbamaren mba eren atseregh shin Mbakristu mbagenev la.
4. Ashighe kpishi kanyi kwagh ka i na mbayev ve kaha ve undu gbenda?
4 Ashighe kpishi ieren i ihyembeato i wanye la ka i lu ikyav i tesen mver u nan vôr ken jijingi la, ka i lu u tesen ikyav i kwagh u a lu nan ken ishima la. (Anzaakaa 15:13; Mateu 12:34) Ka a̱ lu nyi ityôkyaa je ia na ve wanye nana̱ kaha nana̱ undu gbenda kpaa, mise u mzeyol la ka i lu mlu u nan lu a ‘mfe u fan mimi la’ ken ishima i nan ga la. (2 Timoteu 3:7) Ka hange hange u mbayev vea ya ikyaa a Yehova kangenaa, a kera lu u̱ gban di civir un sha cia tsô ga. Kanyi ia wase ve u eren kwagh ne?
Kporom Nen hen Aôndo
5. Kanyi i lu hange hange u wanyekwaor nana er sha u yan ikyar a Aôndo?
5 Apostoli Yakobu yange nger wener: “Kporom nen hen Aôndo” tsô “Un kpaa, Una kporom her a ven.” (Yakobu 4:8) U wanye nana̱ er nahan yô, a gba u á wase nan sha er Mkaanem ma Aôndo maa doo nan yô. (Pasalmi 34:8) Sha hiihii la yô, kwagh u kwagh a gba nan shami yô, a lu “atumba”—ka atesen a Bibilo a hiihii je la. Kpa Mkaanem ma Aôndo maa nguren saren nan kua “kwaghyan u taver” kpaa yô—ka mkaanem ma vian ma ken jijingi je la—nahan ica a kera gba ga je tsô nana via ken jijingi. (Mbaheberu 5:11-14; Pasalmi 1:2) Wanyekwaor ugen u yange lumun ibo wener un uve ityough ken igbenda i taregh cii la hii u kaven mluainja u akaa a ken jijingi. Kanyi yange i wase un ve gema ishima? Yange mba we un kwagh ér a̱ ôr Bibilo jimin cii a̱ bee yô, nahan a lumun maa a var a mi ôron Bibilo hanma shighe je. Een, aluer ka u or a ya ikyar a Yehova kangenaa yô, a gba hange hange u nana ôron Mkaanem ma Aôndo.
6, 7. Mbamaren vea fatyô u wasen mbayev sha u Mkaanem ma Aôndo maa doo ve ishima nena?
6 Ka a inja kpishi u mbamaren ve̱ wase ônov vev sha er Mkaanem ma Aôndo maa doo ve ishima tsung yô! Shin er wanyekwase u lun anyom pue kar a kar ugen yange lu henen kwagh hen tsombor hanma shighe nahan kpa, a hii u yan ikyar a azende a saan ishe. Yange umbur kwaghhenen na u hen tsombor la nahan ér: “Ter wase yange una pine mpin yô, ḿ ôr a ôr mlumun la shin takerada, ishima yam tsô kpa i̱ lu sha kwagh la ga.” Hen mbamaren mbafankwagh yô, u gban di ôron ma ijiir tseren shighe u i henen kwagh hen tsombor la tseegh yô, ka ve de ve tese kwagh sha mfe. (2 Timoteu 4:2) Cii man i̱ saan wanyekwaor iyol a kwaghhenen yô, saa nana tôô ér kwaghhenen la bende a nan jighilii. Hii nan ú pin mbampin mba ahôn-á-hôn sha er nana pase kwagh u a lu nan ken ishima la ga? Taver imba wanye la ishima nana̱ yar tom a kwagh u i henen la sha mlu u nan kpôô kpôô. *
7 Heela tseegh ga, ôr kwaghôron u á har sha Ruamabera la sagher sagher. Aluer a gba sha mi yô, mbayev ve̱ er anumbe sha akaa a yange er i nger ken Bibilo la. Wase ve u nengen ajiir man uikyasen mba tar ú akaa a i timen sha mi la yange er la. U yaren tom a ufoto mba ityarev man ngeren u caghen a cagh la una wase. Een, aluer mbá kenger kwagh u i henen la ken ishima kpuaa tseegh kpa, kwaghhenen u hen tsombor una fatyô u sagher iyol shi kera duen ishima ga. Shi gba u mbamaren kpa vea time sha mlu ve a Yehova la. Ve ayol a ve vea nguren kporom ikyua a Yehova yô, vea fatyô u wasen mbayev vev u ve kpa eren nahan vough.—Duteronomi 6:5-7.
8. Msen wasen or u kporom ikyua a Aôndo nena?
8 Shi msen u eren kpa wasen or u kporom ikyua a Aôndo. Yange ishima gba wanyekwase ugen u poson anyom pue daalaa nahan akperan sha kwagh u gbenda u uma u Mbakristu man azende a na a yange na jighjigh e̱r un nahan ga la. (Yakobu 4:4) Kanyi yange er sha kwagh shono? Yange pase ibo na nahan wener: “Er yange mase lun je lu hiin yam eren msen hen Yehova pasen un e̱r i lum ken ishima je la.” Yange mase kulen ikyaa wener í ungwa msen na zum u yange mase va zuan a ijende na i kwase i una na un jighjigh ken tiônnongo u Kristu yô. Er yange fa wener Yehova ngu kuran un yô, a hii u yan ikyar a Aôndo ikyangegh nagh. Mbamaren vea fatyô u wasen mbayev vev sha u sôron mlu u mbamsen vev la. Zum u mbamaren ve eren msen a tsombor imôngo yô, a gba u vea pase asema a ve ken igbar sha er mbayev vea kav er ikyar i mbamaren vev ve ye a Yehova la i̱ lu i̱ kangenaa yô.
Waan Ishima kpa Tile Dông
9, 10. Kanyi ikyav yange Yehova tese sha gbaa u ishimawan zum u kwagh zua un a Mbaiserael mba ve gande ave laa?
9 Zum u wanyekwaor ka nana̱ hii u kuwan karen ihyongo yô, nan nôngon u dughun iyol i nan veren kposo shi hanma kwa u mbamaren ve nenge u ôron kwagh a nan sha akaa a ken jijingi cii nan venda kera. Mbamaren vea er nan hen imba shighe u taver yum nee? Nenge kwagh u yange Yehova er a ikyurior i Iserael la. Yange wa ishima a ‘ityough ki taver’ ki Mbaiserael je hemba anyom 900 cii man mase den ér ve̱ dondo gbenda ve u ihyembeato la ye. (Ekesodu 34:9; 2 Kroniku 36:17-21; Mbaromanu 10:21) Shin er yange ve lu ‘bamen’ Yehova kpur kpur nahan kpa, “mhôônom kôr Un” a ve. “Acin imôngo je A de ishima Na i vihin, A kera kpoghor iyugh Na cii ga.” (Pasalmi 78:38-42) Yange Aôndo lu a ibo ken ieren na a ve la ga. Mbamaren mba ve lu a dooshima yô, ka ve kav Yehova nahan kwagh a̱ gba wan ve sha iniôngon i ve nôngo u wasen nan la fese ga kpa ve wa ishima.
10 Kpa ikyav i u lun a ishima, shin ishimawan la ka u “yan ican gbem” ga; ishember la i tese ikyav i mvende u or vendan ér e̱r kwagh a vihi nahan kpa mayange nana gba uwer u keghen ér guda ngu va van ga. Yehova tese ikyav i ishimawan. Yange kar a ishima na lu tindin Mbaiserael a mbatyomov nav “tugh man tetan.” Yange “mhôônom lu kôron [Yehova] a ior Nav,” shin er yange ve de ve “se mbatyomov mba Aôndo, ve laha kwaghôron Na, ve nenge sha uprofeti Nav kpenenene” nahan kpaa. (2 Kroniku 36:15, 16) Yange zamber a Mbaiserael, kaa a ve ér: “Shi gema nen, hanmô wen nana̱ undu gbenda u nan u bo” la gà. (Yeremia 25:4, 5) Nahan cii kpa Yehova per atindi a na a ken mlù la ga. Yange i wa Mbaiserael kwagh ér ve̱ “gema” ve̱ dondo Aôndo man igbenda na kpaa.
11. Mbamaren vea fatyô u wan ishima a wanye u nan lu kahan undun gbenda la kpa shi vea haa iyol inya a nan ga nena?
11 Mbamaren vea fatyô u kaven Yehova sha u wan ishima kera torough a torough u gban num a wanye u nan lu kahan undun gbenda la ga. Vea kera gba uwer ga kpa vea kar a ishima ve vea na sha u iliam i̱ de tôndon hen atô ve ga, shin ia vande tôndon je kpa hiden bughun i̱. Shin er i lu u vea var ken atindiakaa a perapera nahan kpaa, vea fatyô u zamber a wanye la “tugh man tetan” sha u nana̱ hide sha gbenda u mimi yô.
Zum u I Dugh Anye u Kiriki Ken Tiônnongo Sha Yô
12. Ka tom u nyi mbamaren ve lu a mi hen anye u nan lu sha ikyev ve kpa i dugh nan ken tiônnongo kera laa?
12 Kpa aluer anye u kiriki u nan lu vea mbamaren mba nanev nana̱ er ma kwaghbo u vesen man nana̱ gema ishima ga nahan a̱ dugh nan ken tiônnongo kera di ye? Er wanye la nan lu sha ikyev i mbamaren mba nanev yô, ka tom ve u tesen nan shi tsahan nan er Mkaanem ma Aôndo ma tese nahan. Á er kwagh ne nena?—Anzaakaa 6:20-22; 29:17.
13. Mbamaren vea nôngo u benden a ishima i ma wan ve u nan tsum gbenda la nena?
13 A fatyô u nán nàn imba ityesen la man imba tsaha la zum u i henen Bibilo a nan ikyangegh yô—man ka iaven i i hembe doon je la. Ormaren nana̱ de kpenen ityough ki taver ki wan la ga kpa nana nôngo u nengen kwagh u a lu wan shon ken ishima la. Angev mbu nanev mbu ken jijingi mbura gba ikyôr nan je? (Anzaakaa 20:5) Nan wa ngun a anshima u legh legh u á ôr kwagh una shi kuma nan kpa? Ka avur a ruamabera a nyi nahan a fatyô u yaren tom a mi tsembelee? Apostoli Paulu na se ishimataver ér: “Mkaanem ma Aôndo ma uma je, ma tem gbilin ga, ma hemba esen a hanma sanker u esen akur ahar cii, ka ma nyôr zan zan ma pav uma a jijingi man shi uijuan a mshiam kpaa, ka ma kar mbamhen kua mbaawashima kpaa.” (Mbaheberu 4:12) Een, mbamaren vea fatyô u eren kwagh hemban di u gban kaan a ônov vev ér ve̱ de kera kimbir eren kwaghbo ga tseegh tsô la. Vea fatyô u nôngon hiin u himen a ve hiden a ve sha mlu u yange ve vande lun sha mi la.
14. Kanyi kwagh i gbe u wanyekwaor u nan er isholibo la nana hii eren sha u hiden a mlu u nan vea Yehova la here, man mbamaren vea wase wan la u eren kwagh ne nena?
14 Gba u wanyekwaor u nan er isholibo la nana hide nana sôr ikyar i yange nan ya a Yehova la. Kwagh u hiihii u i gbe u nana er keng yô, ka u ‘zamber shi geman ishima.’ (Aerenakaa 3:19; Yesaia 55:6, 7) Zum u mbamaren vea nguren wasen mbayev vev ken uyaav vev sha u ve̱ gema asema yô, gba u vea ‘lu mba wan ishima man mba fan ityesen’ i tesen wanye u hendan kwagh la. (2 Timoteu 2:24-26) Gba u vea “kôôm” un sha mnenge u Bibilo la. Ishemberti i ken zwa Grika i í gem ér “kôôm” la shi a fatyô u geman i̱ ér “tese akav a kuman ken ato” kpaa. (Mpase 3:19; Yohane 16:8) Nahan ikyav i u kôôm la wa u tesen akav a kuman wan la sha u nana̱ nenge e̱r gbenda u nan la ú lu ú isholibo la ker. Kpa u ôron kwagh sha mimi yô, u eren nahan la ka hegh ga. Aluer a gba a doo yô, mbamaren vea ôr kwagh u una kôr wanye la sha ishima yô, vea yar tom a hanma gbenda u Ruamabera a lumun a ú shi ú gbe i doo cii sha u nan sha u i̱ kuma wan la yô. Gba u vea wase nan u fan er i gbe u nana ‘kôr kwaghbo ihom man kwagh dedoo a̱ gema a doo nan ishima’ yô. (Amoshi 5:15) Alaghga nana ‘nder nana war to u diabolo’ la.
15. Kanyi tom msen ka a er ken mhidi u hiden a or u nan er isholibo la sha u nana hide a ya ikyar a Yehova?
15 U̱ or a̱ hide a ikyaryan i nan a Yehova la her yô, msen ka kwagh u hange hange. Kpa sha mimi yô, or môm nana de “er msen” sha ci u or u yange nan lu ken tiônnongo u Kristu kpa nan eren isholibo sha igbongor je, a mgemshima shio la ga. (1 Yohane 5:16, 17; Yeremia 7:16-20; Mbaheberu 10:26, 27) Nahan kpa mbamaren vea fatyô u sônon Yehova ér a̱ na ve mfe u nôngon a iaven la. (Yakobu 1:5) Aluer wanyekwaor u i dugh nan ken tiônnongo kera nana tese ikyav i mgemshima kpa nana lu a “vangertiôr sha ishigh ki Aôndo” ga yô, mbamaren mba nanev ve̱ er msen ve̱ sôn ér aluer Aôndo zua a ma kwagh u una de wan la a kwaghbo u nan yô, i̱ er ishima Na. (1 Yohane 3:21) Aluer wanyekwaor ne ngu ungwan amba a msen ne yô, kwagh la una wase nan u fan e̱r Yehova a lu Aôndo u mhôôn yô. *—Ekesodu 34:6, 7; Yakobu 5:16.
16. Se fatyô u wasen mba hen tsombor u ú lu a anye u i dugh nan ken tiônnongo kera la nena?
16 Aluer i dugh wanyekwaor u i er nan batisema kera yô, í ver ishima ér ior mba ken tiônnongo cii ve̱ de ‘zough nongo’ a nan ga. (1 Mbakorinte 5:11; 2 Yohane 10, 11) Alaghga kwagh ne una na nan u ‘tilen a ishima’ nahan hiden ken ityôr i uile i Aôndo, i i kuran ior nav ne. (Luka 15:17) Nana̱ hide shin nana̱ hide ga kpaa, mba ken tiônnongo vea fatyô u taver tsombor u wanyekwaor u i dugh nan ken tiônnongo kera la ishima. Se ker igbenda i tesen ser mba ‘zungwen’ a ve imôngo shi se tese e̱r ‘mhôônom ma ker’ se a ve yô.—1 Peteru 3:8, 9.
Er Mbagenev Vea Fatyô u Wasen La
17. Kanyi kwagh mba ken tiônnongo vea lu a mi ken ishima zum u ve lu nôngon u wasen wan u nan lu kahan undun gbenda laa?
17 Wanyekwaor u i dugh nan ken tiônnongo u Kristu kera ga kpa jighjigh u nan u nan a gem a ver la di ye? Apostoli Paulu yange nger wener: “Aluer ican ngi eren ilyeghegh i môm yô, alegh cii aa lu ken ican la imôngo.” (1 Mbakorinte 12:26) Kwagh u imba wanye la una hii u gban mbagenev ishima. Nahan kpa gba u ior vea er teghelee, sha ci u wanyekwaor u nan goom nan undu gbenda u ken jijingi yô, nana fatyô u benden a mbayevikyaior mbagenev sha gbenda u bo. (Mbagalatia 5:7-9) Mbaganden mbagenev lù ken tiônnongo ugenegh, ve lu a ishima i dedoo i wasen mbayevikyaior mba yange ve vôr ken jijingi yô, nahan ve lôhô mbayev mbara ér ve̱ va vea kuhwa ityogholough mbi yange mbi za gwa la imôngo. Shin er yange mbayev mbara va je ngôôr ga shi ve ember ityogholov mbira nahan kpaa, ve lu nengen kwagh ken ayol a ve nahan ken masejime yô ve tôndo a tôndo angahar ken tiônnongo kuaa. (1 Mbakorinte 15:33; Yuda 22, 23) Kwagh u una fatyô u wasen wan u nan goom nan undu gbenda la yô, ka uiniongo mba gong gong mba iniegbenda i ken jijingi i lu her ga la ga, kpa ka mkombo u una wase nan u lun a isharen sha akaa a ken jijingi yô. *
18. Se fatyô u dondon inja i ter u yange wan na undu un ken injakwagh i Yesu la nena?
18 Aluer wanyekwaor u nan undu tiônnongo la nana̱ za̱ hide nana̱ nyôr ken Iyou i Tartor shin nana̱ za ma mkohol yô, hen er alaghga a lu nan ken ishima la. Se kera tese imba ieren i ngohol or ave ahar i̱ ter u yange wan na undu un ken injakwagh i Yesu la ga ha? (Luka 15:18-20, 25-32) Wanye u lun anyom pue kar a kar u yange undu tiônnongo u Kristu kpa za cin hide va mkohol u vesen yô, kaa wener: “Yange m hen mer hanmaor cii nana kenger injaor yam ne kpenenene, kpa anmgbianev mba nomso man mbakasev kporom va sughum za van. Kwagh la yange bende a ishima yam kpishi je.” Yange hide shi hii u henen Bibilo nahan ken masejime yô, i er un batisema.
De Gbe Uwer Ga
19, 20. Hii nan ve i lu u se lu a mnenge u vough sha kwagh u wanye u nan undu ter u nan laa?
19 U wasen ‘wan u nan undu ter u nan’ la sha u nana̱ ‘tile a ishima i nan’ la ka kwagh u or a wa ishima tsung ve nana er ye, shi ka kwagh u taver hen mbamaren man mbagenev kpaa. Kpa de gbe uwer ga. “Ter ngu eren negh negh sha ityendezwa Na la er mbagenev ve nenge er ngu eren negh negh nahan ga, kpa we ishima a ven, mayange sar Un u mbagenev ve̱ tim ga, kpa ior cii ve̱ gema asema.” (2 Peteru 3:9) Se zua a ishimasurun ken Ruamabera ser Yehova soo ér ior ve̱ gema asema ve̱ war. Je yô, a kar a ishima na a ver gbenda u himen uumace a na. (2 Mbakorinte 5:18, 19) Ishimawan na la i na ior umiliôn imôngo tile a ishima.—Yesaia 2:2, 3.
20 Nahan mbamaren vea kera yar tom a hanma gbenda u Ruamabera a lumun a ú cii sha u wasen anye u nan undu ve la ér nana̱ tile a ishima gaa? Kav Yehova, wa ishima e̱r ú nôngon yue yue wer ú wase wanye wou nana̱ hide nana̱ va kohol Yehova la. Dondo akaawan a Bibilo vighe vighe de shiin uwegh ga, shi nôngo u timen sha anza a Yehova er dooshima man ijirôron sha mimi man mfe nahan, shi er msen a̱ wase ú. Di vough er mbahembanato mba taver ityough tsung je kpa ve wongor myer u Yehova a yilan sha dooshima ér ve̱ hide la nahan, wan wou u a undu ú la una hide ken ityôr i Aôndo i i lu mkor hen ior la.—Luka 15:6, 7.
[Footnotes]
^ Aluer ú soo u seer fan u tesen mbayev doo doo yô, nenge ken Iyoukura i Julai 1, 1999, peeji 19-23 la.
^ Á er amba a msen a i eren sha ci u anye u i dugh nan kera la ken igbar ga, inja er ken tiônnongo nahan, sha ci u alaghga mbagenev vea fa iaven i or u i dugh nan kera la ga.—Nenge Iyoukura [zwa Buter] i Oktoba 15, 1979, peeji 31 la.
^ Aluer ú soo u zuan a akaawan a a lu sha ci u kwagh ne jighilii yô, nenge ken Awake! u Jun 22, 1972, peeji 13-16; Setemba 22, 1996, peeji 21-23 la.
Baver We Kpa?
• Kanyi alaghga ia lu mise u ka u na mbayevikyaior ve undu tiônnongo?
• A fatyô u wasen agumaior u yan ikyar a Yehova ikyangegh vev nena?
• Hii nan i gbe u mbamaren vea waan ishima a wan ve u nan undu ve la kpa vea haan iyol inya a nan ga?
• Mba ken tiônnongo vea fatyô u wasen wanyekwaor u nan undu ter u nan sha u nana̱ hide nena?
[Study Questions]
[Picture on page 26]
U ôron Mkaanem ma Aôndo la ka kwagh u hange hange u yan ikyar i kangenaa a Yehova
[Picture on page 26]
Mbamsen mba mbamaren ve eren a ishima i môm la vea fatyô u wasen mbayev vev u kaven ikyar i mbamaren vev ve ye a Yehova kangenaa la ken ave
[Picture on page 28]
Aluer wan u undun ter u nan nana va ‘tile a ishima’ yô, i̱ ngohol nan
[Picture on page 29]
Nôngon u wasen wan wou yue yue je sha u nana hide hen Yehova yô