Iveren I Yehova Ngi Ve Se A Inyaregh

“Iveren i TER ngi ve a inyaregh, tom u nyoonyol seer ma kwagh sha i ga.”—Anzaakaa 10:22.

1, 2. Er nan ve msaanyol a biishi a yôughyôugh u lun a mi ga?

 IOR kpishi ainge hemba haren asema sha uyôughyôughmbaakaav. Kpa mba zough a msaanyol ken uyôughyôughmbaakaav mban kpa? Pipa i tôôn abaver i ken tar u Australia i i yer ér The Australian Women’s Weekly la kaa ér: “Me fatyô u umbur shighe u asema a ze ior iyol shimi sha kwagh u mlu ve u ken hemen er ainge nahan ga.” I̱ seer ér: “Kwagh ne tsume gande. Yange i kaa a vese ér mlu u inyar u tar u Australia doo je zua ga, shi i gbe je uma ngu a̱ doo yum er a doo hegen nahan ga. . . . Nahan kpa asema nga yinan a yina ior hanma ijiir ken tar ne her tsô. Ka nomso man kasev cii inja e̱r kwagh ngu saan ve ken uma nahan, kpa kwagh shon yô mba fantyô u kaven un ga.” Kwagh u Ruamabera a kaa ér ka akaa a se ombo la aa na se msaanyol shin uma ga la ka kwagh u mimi vough!—Orpasenkwagh 5:10; Luka 12:15.

² Bibilo tese ér ka iveren i Aôndo i ne msaanyol u hemban cii ye. Sha gbaa ne yô, Anzaakaa 10:22 kaa ér: “Iveren i TER ngi ve a inyaregh, tom u nyoonyol seer ma kwagh sha i ga.” Ashighe kpishi uyôughyôughmbaakaav mba ombon sha hua mbara mba ve a iyolnyoon. Kwaghwan u apostoli Paulu wa la kôr sha mi vough, a kaa ér: “Mba i sar ve pe lun mbanyarev yô, ka ve gba ken imeen man ken to u hônon man ken asaren kposo  kposo a gbilinigh man a vihin. Ka a mire a ior ken mtim man ken msaaishe. Gadia mishe u hanma inja i kwaghbo cii yô, ka inyaregh ki saren. Mbagenev yô, ki hange ve nahan ve tsume ve undu jighjigh u nan, ve kuma ayol a ve sha atsan atô kposo kposo.”—1 Timoteu 6:9, 10.

3. Hii nan ve i meen mbacivir Aôndo jimi?

³ Kpa sha vegher ugenegh yô, averen nga kohol ior mba ve “ver ato sha imo i TER, Aôndo” la a iyolnyoon shio. (Duteronomi 28:2) Nahan kpa, alaghga mbagen vea pine ér, ‘Aluer mba seer mnyoon sha iveren i Yehova ga yô, hii nan ve ican ka i̱ er mbacivir Aôndo nahana?’ Bibilo pase se ér Aôndo ngu a na ian ér i̱ mee se, kpa ameen nga dugh hen Satan kua tar na u ifer man iyol yase i i yen ne. (Genese 6:5; Duteronomi 32:4, 5; Yohane 15:19; Yakobu 1:14, 15) Yehova ka imbor i “hanma nagh ku dedoo man hanma iwua i vough.” (Yakobu 1:17) Nahan, mayange averen na nga ne mnyoon ga. Yô, de se time nen sha uiyua mba Aôndo mba vough mbara.

Mkaanem ma Aôndo —Ka Iyua i Injaa Kpishi

4. Ka iveren man iyua i gbilinigh i nyi ior mba Yehova ve zough a mi ken “shighe u mkur” nee?

⁴ Kwaghôron u profeti u Daniel la yange tsengaôron kwagh u “shighe u mkur” ér: “Mfe kpaa una seer.” Nahan kpa yange seer kwagh sha mkaanem man wener: “Mbaaferev yô, vea er aferakaa; mô môm ken mbaaferev nana kav ga; kpa mba ve lu a kwaghfan yô, vea kav.” (Daniel 12:4, 10) Ungwa imba kwagh la! I pase Mkaanem ma Aôndo—ma ma lu kwaghôron u profeti jim jim la—sha imba kwaghfan u Aôndo je yô, mbaaferev vea fatyô u kaven kwagh shon ga, kpa ior mba Yehova yô vea kav. Wan u Aôndo er msen wener: “M ngu sughun We, Tere, Ter u Sha man tar, sha er U yer mbafankwagh man mbakavenkwagh akaa ne, kpa U gem U pase anikundanev a yô.” (Luka 10:21) Nenge iveren i se lu a mi sha u zuan a iyua i injaa i Bibilo, Mkaanem ma Aôndo a ne i nger ne, shi se lu ken atô u mba Yehova a ne ve mkav u ken jijingi ne sha wono!—1 Mbakorinte 1:21, 27, 28; 2:14, 15.

5. Kwaghfan kanyi, man se er nan ve se zua a mini?

⁵ Luun er ka “kwaghfan u a dugh Sha” ga yô, ma se lu a mkav u ken jijingi ga kuaa. (Yakobu 3:17) Kwaghfan ka tahav mbu yaren tom a mfe man mkav sha u kuren mbamzeyol shi palegh shin yangen kwaghbo shin kuren mbaawashima shin wan or kwagh sha inja. Se mba zough a kwaghfan u Aôndo nena? I nger ken Anzaakaa 2:6 ér: “TER ne kwaghfan, mfe kua mkav mba dugh ken zwa Na.” Een, Yehova una ver se iveren sha kwaghfan aluer se gba uwer u sônon un ga yô, di er yange na Tor Solomon “ishima i fan kwagh man i kaven kwagh” nahan. (1 Utor 3:11, 12; Yakobu 1:5-8) U zuan a kwaghfan yô, saa se kpaa se veren ato a Yehova sha u timen ken Mkaanem nam shi yaren tom a ma hanma shighe.

6. Er nena ve i lu gbenda u kwaghfan u yaren tom a atindi a Aôndo ken uuma asev kua akaawan a na?

⁶ Se zua a akav a injaa a kwaghfan u Aôndo ken atindi man akaawan a á lu ken Bibilo la. Nga wasen se sha hanma gbenda cii—sha iyol man ken mhen man ken mlu man ken jijingi kpaa. Orpasalmi wa icam sha mi vough nahan ér: “Atindi a TER nga vough je, nga hir, nga taver uma her; mpase u TER ka u jighjigh, ka a na orlanenkwagh nan hingir orfankwagh. Uinezwa mba TER ka  mba vough je, mba ne iember ken ishima; tindi u TER ngu wang je, ngu a wanger or ashe. Mcie u cian Aôndo ka kwagh u wang, u lun gbem; akaaôron a jirigh a TER ka a mimi je, ka a perapera cii; ka kwagh u saren, hemba zenaria, een, hemba zenaria u dedoo.”—Pasalmi 19:7-10; 119:72.

7. Kanyi ka i er mba ve we atindi a Aôndo a perapera ikyo ga laa?

⁷ Kpa sha vegher ugenegh yô, mba ve we atindi a Aôndo a perapera ikyo ga la mba zough a msaanyol man mlu u ken uikyangen ga u ve keren la ga. Ica ka i gba ga tsô, ve kav er i nahan Aôndo tar ga, kwagh u or lee la i lu un je shi nan sondo yô. (Mbagalatia 6:7) Ior kpishi mba ve we atindi a Bibilo ikyo ga la, mba sundan injar i iyav mbu wan sha àr man iangev mbi ndôhôrshima kua akaa a ve er í var ve, a á panden ve agee ken iyol la nahan. Saa vea gema uuma vev, ga yô ieren la ia yem a ve ken ku, man alaghga je yô a lu mtim u sha ikyev i Aôndo.—Mateu 7:13, 14.

8. Saan ior mba Mkaanem ma Aôndo ma doo ve ishima la iyol ér nyi?

⁸ Nahan kpa, mba Mkaanem ma Aôndo ma doo ve ishima shi ve yaren tom a ma la yô, averen a vesen aa kohol ve hegen man ken hemen kpaa. Mhen u ve henen ér tindi u Aôndo pase ve tuhwa la ngu shami vough, man mba a msaanyol u mimi kpaa, shi mba keghen shighe u a va pase ve sha ikyev i isholibo man zayol mba vihin tsung mbara a tuhwa yô. (Mbaromanu 8:20, 21; Yakobu 1:25) Ishimaverenkeghen ne ia bunde ga sha ci u i̱ har sha iyua i hemban doon ishima i Aôndo a ne orumace yô—ka naagh ku ipaan ku Yesu Kristu, Wan na u ishima ishima, je la. (Mateu 20:28; Yohane 3:16; Mbaromanu 6:23) Imba iyua i doon tsung ne yange i tese mimi u mze u dooshima u Aôndo a lu a mi sha uumace la shi i na averen a lun a ikighir ga sha ci u anti or u nan veren ato a Yehova yô.—Mbaromanu 8:32.

Se Mba a Iwuese sha Icighan Jijingi U Í Ne Se Iyua Ne

9, 10. Se mba zuan a iwasen sha iyua i icighan jijingi u Yehova a ne se la nena? Tese ikyav.

⁹ Iyua i doon ishima i Aôndo igen i í doo u se lu a iwuese sha mi yô ka icighan jijingi na. Sha iyange i Pentekosti u 33 S.W. la, apostoli Peteru wa ikpelaior mba ve lu ken Yerusalem sha shighe shon la kwagh kaa ér: “Gema nen asema, i̱ er hanmô wen batisema ken iti i Yesu Kristu sha mde u asorabo a en, tsô né ngohol Icighan Jijingi iwua je.” (Aerenakaa 2:38) Ainge kpa mbacivir Yehova mba ve eren ishima na man ve sen un icighan jijingi yô, ne ve. (Luka 11:9-13) Ngise la icighan jijingi u Aôndo—tahav mbu shon mbu hemban sha won ne—shin tahav mbu tomov nav la—yange mbu na nomso man kasev mbajighjigh tahav, kua Mbakristu mba tsuaa mbara cii. (Sekaria 4:6; Aerenakaa 4:31) Se kpa mbu a fatyô u eren a vese nahan vough, shin er alaghga se tagher a ahendan a taver shin atsan er se lu ior mba Yehova nahan je kpaa.—Yoel 2:28, 29.

¹⁰ Nenge ikyav sha Laurel, u yange gba akpiti je kuma anyom 37 shi u ôôn je kpa mase shin sha iwasen i anar u wasen un na ve ôôn la. * Shin er kwagh ne lu kwagh u ican kpishi nahan kpa, yange er Aôndo tom zan zan kar kpen. Anyom nga ngur karen yô, averen a Yehova va kohol Laurel kpishi je. Ikyav i tesen yô, yange kôr cio u wasen ior mbagenev 17 u fan mfe u vough u mimi u ken Bibilo la, shin er yange á tema shin ikyekye i nan un iôôn la tugh kaka sev puaa nahan kpaa! Kwagh na la umbur se mkaanem ma apostoli Paulu yange kaa nahan la, ér: “Ka shighe u m lu isheer la je m gem m taver ye.” (2 Mbakorinte 12:10) Een, ka sha tahav asev man agee ase se lu zuan a mzehemen ken tom u pasen kwagh ne ga, kpa ka sha iwasen i icighan jijingi u Aôndo, u a ne  mba ve veren ato sha imo na la.—Yesaia 40:29-31.

11. Ka anza a nyi jijingi u Aôndo a um ken mba ve haa “orhe” iyol laa?

¹¹ Aluer se ver ato a Aôndo sha mimi yô, jijingi na una ume atam ken avese inja er dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha nahan. (Mbagalatia 5:22, 23) “Ityamegh ki Jijingi” kin ka “orhe” u Mbakristu ka ve haa iyol a kar a tile sha ityough ki asaren a hua man aeren a been inyamtoho a alaghga ngise ve eren la je la. (Mbaefese 4:20-24; Yesaia 11:6-9) Dooshima neer ken atam ne cii man ka kwagh u a “maghen mlu u vough je la.”—Mbakolose 3:14.

Dooshima u Mbakristu—Ka Iyua i Dedoo

12. Yange Tabita man Mbakristu mbagen mba sha derianyom u hiihii la tese dooshima nena?

¹² Dooshima u Mbakristu ka iyua igen i Yehova a ne yô—i̱ doo se ishima kpen kpen. Ka kwaghwan a hemen i̱ ye, kpa ngi a ishoon or kpishi i ka i udugh mbananjighjigh i va a ve ikyua je i gema i hemba dooshima u anmgbianev mba sha iyol yô. (Yohane 15:12, 13; 1 Peteru 1:22) Ikyav i tesen yô, nenge Tabita, kwase Kristu u dedoo u sha derianyom u hiihii la. “Kwase la lu a aeren a dedoo kpishi, man iwua i nan kpaa,” hemban cii je yô hen kasev mba côgholov mba ken tiônnongo la. (Aerenakaa 9:36) Alaghga kasev mban yange vea lu a anmgbianev mba sha iyol, kpa Tabita yange soo u eren kwagh u una fatyô u wasen shi taver ve ishima yô. (1 Yohane 3:18) Tabita yange ver ikyav i dedoo kpen kpen! Dooshima u anmgbianev yange mgbegha Priseka man Akula sha u ‘veren mon ve’ sha ci u Paulu. Dooshima shi mgbegha Epafera man Luka man Onesiferu kua mbagenev u wasen apostoli shighe u i wuhe un ken gaadi ken Roma la. (Mbaromanu 16:3, 4; 2 Timoteu 1:16; 4:11; Filemon 23, 24) Een, ainge Mbakristu mba lun nahan la mba a ‘doo ishima ayol a ve,’ man ka iveren i Aôndo a ne i kaven mbahenen mba Yesu mba mimi je la.—Yohane 13:34, 35.

13. Se hii nan ve se tese ser se mba a iwuese tsung sha mzough u a lu hen atô u anmgbianev Mbakristu tar sha won cii ne?

¹³ Dooshima u a lu ken tiônnongo u Kristu la doo ú ishima kpen kpen kpa? Mzough u anmgbianev tar sha won cii ve zough ken jijingi, a  samber a tser tar ne doo ú kpa? Akaa ne nga ne mkom shi ka uiyua mba yôughyôugh mba ve dugh sha yô. Se tese ser akaa ne gba se ishima nena? A lu sha mcivir u se civir Aôndo sha u zan mbamkombo mba Mbakristu, shi tesen dooshima man atam a jijingi u Aôndo agen la.—Mbafilipi 1:9; Mbaheberu 10:24, 25.

‘Ior Mba I Ne Ve Lu Uiyua La’

14. Kanyi i gbe u Orkristu nana er aluer ka u nana lu ortamen shin diakon yô?

¹⁴ Mbakristu mba nomso mba i sar ve u eren mbacivir a ve imôngo tom sha iaven i mbatamen man udiakon la mba a awashima u dedoo. (1 Timoteu 3:1, 8) Kwagh u anmgbian nana er ve nana kuma sha ian i civirigh ne yô, saa nana taver ken jijingi, shi nan lu a kwaghfan u ken Ruamabera kpishi shi nan lu a ishimatseen sha tom kwaghpasen kpaa. (Aerenakaa 18:24; 1 Timoteu 4:15; 2 Timoteu 4:5) Saa nana tese iyol i hiden a mi jime shi nana lu iyol wang shi nana lu a ishimawan, gadia iveren i Aôndo ngi kohol ior mba gengese iyol man mba moron iyol man mba sendegh sha akaa ga. (Anzaakaa 11:2; Mbaheberu 6:15; 3 Yohane 9, 10) Aluer ka or u a vese kwase yô, a̱ lu orhemen tsombor sha dooshima u a fetyô u hemen ya na tsembelee yô. (1 Timoteu 3:4, 5, 12) Er yôughyôugh u ken jijingi a gbe imbaor la ishima yum yô, nahan averen a Yehova aa kohol nan di je.—Mateu 6:19-21.

15, 16. Ka unô ve tese ér ve mba ‘ior mba i ne ve lu uiyua la’? Tese akav.

¹⁵ Shighe u mba ve eren tom u mbatamen ken tiônnongo ka vea nôngo kwagh sha u lun mbaivangeli man mbakuran man mbatesen yô, ka ve na se ityôkyaa wanger wanger i lun a iwuese sha ‘ior mba i ne ve lu uiyua’ la. (Mbaefese 4:8, 11) Alaghga ior mba ve zough a mtsera sha tom ve u sha dooshima la vea tese iwuese ve hanma shighe ga, kpa Yehova nengen hanma kwagh u mbatamen mba mimi mban ve eren la cii. Una hungur a dooshima u ve tese sha iti na sha u eren ior nav tom la ga.—1 Timoteu 5:17; Mbaheberu 6:10.

¹⁶ Nenge ikyav i ortamen ugen u eren tom taveraa u yange za sôr wankwase Kristu u gba u a pav un ityough a sôr un twer ken mhir la. Kwase u yange kôr ikyar vea tsombor la nger wener, “yange lu a mhôônom ma zungwen tsung, shi tese ikyo i wan kua dooshima. Yange pine ian i eren msen hen Yehova vea vese. Er lu eren msen yô, ter [un ka Orshiada u Yehova ga] la lu vaan sôngor, man hanma or u yange nan lu ken kpoyou u ken iyouci la cii mliam haa nan ashe. Msen u ortamen la yange kundu iyol kpen kpen, shi er Yehova tindi un sha imba shighe la vough nahan lu kwagh u dedoo kpôô!” Kwaseshiada ugen u lu uange yô ôr kwagh u mbatamen mba yange ve za un inya nahan wener: “Shighe u yange ve va hen gambe wam ken vegher u i veren mbauangev mba i hembe tumen ve iyol la yô, yange m fa hen shighe la je mer nyityô kwagh i i̱ mase eren cii kpa, me fatyô u wan ishima a mi. Iyol taver mo shi kundum iyol kpaa.” Ma or nan ngu u nana fatyô u yamen imba ikyo i wan i sha dooshima ne kpa? Mayange ga! Ka iyua i Aôndo, i a ne sha ikyev i tiônnongo u Kristu yô.—Yesaia 32:1, 2.

 Iyua i Tom u Kwaghpasen

17, 18. (a) Ka nyi iyua i tom Yehova a ne ior nav ci ca ciili? (b) Ka iwasen i nyi Aôndo a ne sha er se fatyô u kuren tom wasa?

¹⁷ Icivir i a na ma orumace ve ia fatyô u hemban m-er u eren Yehova, Uhembansha la tom yô, ngi ga. (Yesaia 43:10; 2 Mbakorinte 4:7; 1 Peteru 2:9) Nahan kpa, ian i civirigh i lun a ci ken tom u kwaghpasen la ngi sha ci u hanmaor cii—a̱ lu gumor shin organden shin nomsoor shin kwase—u nan lu a isharen sha mimi u eren Aôndo tom kpaa. Ú ngu eren tom a iyua i injaa ne kpa? Alaghga mbagenev mba eren nahan ga sha ci u ve hen ér ve yina, kpa umbur wer Yehova ne mba ve eren un tom la icighan jijingi, u ka a wase ape alaghga se yen cii la.—Yeremia 1:6-8; 20:11.

¹⁸ Yehova wa tom u pasen kwagh u Tartor ne sha ikyev i mbacivir un mba ve hiden a iyol ijime la, ka sha ikyev i mba ve gem ve gengese iyol shi ve suur sha tahav vev la ga. (1 Mbakorinte 1:20, 26-29) Ior mba hiden a iyol ijime shi lun inja wang yô ka ve kav mbamyina vev nahan ve suur sha iwasen i Aôndo ken tom ve u pasen kwagh la. Shi ka ve wuese iwasen i ken jijingi i ve zough a mi sha ikyev i “orkuranya u jighjigh” la kpaa.—Luka 12:42-44; Anzaakaa 22:4.

Uma u Msaanyol ken Tsombor —Ka Iyua i Dedoo

19. Ka akaa a nyi a wasen u yesen mbayeve?

¹⁹ Ka Aôndo a ne iyua i ivesegh man uma u msaanyol ken tsombor ye. (Rutu 1:9; Mbaefese 3:14, 15) Mbayev kpaa ka “dyako u TER A ne” u injaa, u a ve aa iember hen mbamaren mba ka ve tese ve aeren a Aôndo doo doo yô. (Pasalmi 127:3) Aluer ú ngu ormaren yô, za hemen u ungwan imo i Yehova her sha u tesen mbayev ou mbakiriki Mkaanem nam. Mba ve eren nahan yô ve fa tsô ér Yehova una sue ve shi una na ve averen kpishi.—Anzaakaa 3:5, 6; 22:6; Mbaefese 6:1-4.

20. Kanyi alaghga ia wase mbamaren mbà mbayev vev ve gem ijime a mcivir u mimi laa?

²⁰ Iniôngon i mbamaren mba cian Aôndo ka ve nôngo cii kpa, alaghga mbayev vev mbagenev vea ganden yô, vea tsuwa u geman ijime a mcivir u mimi la. (Genese 26:34, 35) Kwagh ne una fatyô u van mbamaren a zayol ken ishima kpishi je. (Anzaakaa 17:21, 25) Nahan kpa, u ma ve hundu ishima kera la yô, alaghga a lu kwagh u wasen ve kpishi u umbur injakwagh i yange Yesu ôr sha kwagh u wan u lu undu ter na la. Shin er wan la yange undu ya yem zendan asaren a taregh nahan kpa, ken masejime yô a hide hen ya u ter na, man ter na ngohol un a iember man dooshima kpaa. (Luka 15:11-32) Ma nyityô kwagh i alaghga ia er cii kpa, mbamaren mba ve lu Mbakristu mba mimi yô, ve fa dedoo ér Yehova lan kwagh u a lu ga, nahan una wa ikyo a ve sha dooshima, shi una kende a ve sha keng a bunde ga.—Pasalmi 145:14.

21. Se ver ato a ana jimi, man ka sha ci u nyi?

²¹ Sha nahan yô, de se asange asange cii se fa nen kwagh u mimi je a lu hange hange ken uuma asev la. Se mba zendan uyôughyôughmbaakaav mba ngeen kpishi mba alaghga vea va se a mnyoon tseegh ga a kua tsombor wase kpa shami laa? Shin se mba zendan ka “nagh ku dedoo man hanma iwua i vough” i i dugh “hen Ter u iwanger” laa? (Yakobu 1:17) Satan, “ter u aie” la soo ér se̱ ya ican u zuan a uyôughyôughmbaakaav nahan se̱ de kera zough a msaanyol man uma ga cii. (Yohane 8:44; Luka 12:15) Nahan kpa, kwagh wase gba Yehova ishima kpishi. (Yesaia 48:17, 18) Yô, de se za nen hemen u veren ato hen Ter wase u doon ishima shi hanma shighe yô ‘i̱ saan se iyol’ ken a na. (Pasalmi 37:4) Aluer se dondo imba gbenda la yô, uiyua mba Yehova mba injaav man averen a na a a ngee wuee ne aa na se lu a inyaregh—man mnyoon cuku kpa una lu sha mi ga.

[Footnote]

Baver We Kpa?

• Ka hana a zua a msaanyol u hemban cii laa?

• Ka uiyua mbagenev mba nyi Yehova a ne ior nava?

• Er nan ve tom u kwaghpasen la ú lu iyua?

• Er mbamaren ve lu yesen mbayev vev nahan, kanyi vea er sha u zuan a iveren i Aôndo?

[Study Questions]

[Picture on page 14]

Ú tesen iwuese sha Mkaanem ma Aôndo a ne i nger, ma a ne se iyua la kpa?

[Picture on page 15]

Er mbamlu mba taver lu kpishi nahan kpa, yange Laurel Nisbet er Aôndo tom a ishimatseen je

[Pictures on page 16]

I fa Mbakristu mba ainge tsembelee sha aeren a ve a dooshima la di er Tabita kpa yange i fa un nahan

[Picture on page 17]

Mbatamen mba ken Kristu ka ve wa ikyo a mbacivir a ve imôngo sha dooshima