Kav Yehova Shighe U Ú Yesen Ônov Ou Yô
Kav Yehova Shighe U Ú Yesen Ônov Ou Yô
“Ka hanma wan man Ter A de kôôm nana?”—MBAHEBERU 12:7.
1, 2. Hii nan mbamaren ka ve ya ican u yesen mbayev vev ainge?
MKER ugen u yange i gba ken tar u Japan ken anyom a a kar kpuaa la tese ér, ken nongo u í pine ve kwagh la, vegher môm jimin nenge ér iliam i hen atô u mbamaren a ônov vev la ngi sha ikyo ga yum shi ve kaa ér mbamaren mba meren a ônov ka ganden ikyaa inya. Ken mker ugen u i gba ken tar shon la yô, mba ve lumun ér sha mimi yô, ve fa u hoghol iyol a ônov vev ga la war kuman vegher jimin ken mba i pine ve kwagh la. Imba ieren ne ngi hen ior mba sha Ityoughkitaregh tseegh ga. Pipaabaver i i yer ér The Toronto Star la kaa ér: “Taver mbamaren mba ken Canada kpishi u fan shin vea lu mbamaren mba fan ityesen i uôn yô.” Han han kpa ka taver mbamaren u yesen ônov vev doo doo.
2 Hii nan ve i eren mbamaren ican u yesen ônov veve? Ityôkyaa i vesen yô, ka sha er se lu ken “ayange a masejime” man “ashighe a ican” yô. (2 Timoteu 3:1) Heela tseegh ga, Bibilo kaa ér “mhen u ishima i or ka u bo, hii sha iyev mbu nan je.” (Genese 8:21) Shi jighilii je yô, Satan hemba anen mbayevikyaior vanger cii, ngu keren mba ve ban a mkav la sha u una kôr ve “er begha u tan kume nahan.” (1 Peteru 5:8) Sha mimi yô, Mbakristu mba ve lu mbamaren mba ve kange ishima u yesen ônov vev “sha mkôôm man kwaghwan u Ter” yô, mbamtaver ka ve cinge sha ave kpishi je. (Mbaefese 6:4) A er nan ve mbamaren vea wase ônov vev u vesen hingir mbacivir Yehova mba ve vie, mba vea fatyô u “paven kwagh u dedoo a kwagh u bo”?—Mbaheberu 5:14.
3. Hii nan ve ityesen i mbamaren man gbendatesen i lu akaa a hange hange sha u yesen mbayev sha inja voughlo?
3 Or u fan kwagh Tor Solomon yange kaa ér: “Lanegh kange wanye ken ishima.” (Anzaakaa 13:1; 22:15) Aluer ka u mbayev vea kera lu a lanegh kura sha ishima ga yô, gba u mbamaren vev vea kôôm ve sha dooshima. Kpa ka hanma shighe cii imba mkôôm la i doon mbayevikyaior ga. Je yô, ka a̱ lu nyi nyi or nana̱ wa ve kwagh kpa ishima i doo ve ker ga. Sha nahan yô, gba u mbamaren vea hen vea fa er vea “tese wanye gbenda u nana za yô.” (Anzaakaa 22:6) Aluer mbayev kôr imba ityesen la yô, ia fatyô u nan ve uma. (Anzaakaa 4:13) Nenge ase i doo u mbamaren vea kav kwagh u a lu ken myese u yesen mbayev la sha wono!
Ikyav i Kwagh u A Lu Tsaha Yô
4. Ikyav i hiihii i ishemberti i i yer ken Bibilo ér “tsaha” la kanyi?
4 Er mbamaren mbagenev ve cian ér i̱ de kaan ér ve mbá nzughur a ônov vev—sha iyol man ken mkaan man ken ishima ga yô—ve tsua ave sha mkôôm u kôôm ônov vev la sha. Doo u se lu a imba mcie la ga. Mnger u i nger ishemberti i “tsaha” la ken Bibilo yô, i̱ tese mnzughul u nzughul a anye shin eren tswam a nan ga. Ishemberti i ken zwa Grika i̱ í gem ér “tsaha” la ikyav na i hiihii yô, hemba kan kwaghwan man ityesen man mkôôm, man ashighe agenegh yô, ka i lu gbidiv mbu sha dooshima kpaa.
5. Hii nen ve i lu a inja u timen sha gbenda u Yehova a eren a ior nav laa?
5 Mne u Yehova Aôndo a ne imba tsaha la ka ikyav i vough i se dondo yô. Er apostoli Paulu ngur karen Yehova sha ter u nan lu orumace yô, a nger wener: “Ka hanma wan man Ter A de kôôm nana? . . . Se lu a uter asev mba ken iyol, . . . Ve yô, ve lu kôôm se sha anyangem kpeghee er ve nenge i doo yô, kpa Un yô, ka sha u ma i kpe se iyol sha u ma se lu a kwar sha mtsegh Na” la. (Mbaheberu 12:7-10) Een, Yehova tsahan ior nav ka lu sha ci u vea lu icighan shi vea lu wang yô. Se fatyô u henen akaa kpishi sha gbaa u tsahan ônov la sha u timen sha gbenda u Yehova yange tsaase ior nav la.—Duteronomi 32:4; Mateu 7:11; Mbaefese 5:1.
Dooshima—Ka Kwagh u Mgbeghan Or
6. Hii nan ve alaghga a lu mbamaren kwagh u ican u kaven Yehova sha dooshima na laa?
6 Apostoli Yohane yange kaa ér: “Aôndo ka dooshima.” Sha nahan yô, hanma shighe cii ka i lu dooshima a mgbegha Yehova ve a tesen ityesen na ye. (1 Yohane 4:8; Anzaakaa 3:11, 12) Kwagh ne ka u tesen ér mbamaren mba ônov vev ve doo ve ishima tsung yô, á heghem ve u kaven Yehova sha gbaa ne ha? Ka nahan kpee ga. Dooshima u Aôndo ka u sha tindi. Orfantakerada u timen ken zwa Grika ugen kaa ér imba dooshima ne “i̱ zough vea isharen i sha marami ne kpee ga.” Aôndo kpenen ashe a kpen ikyôr a na ga. Hanma shighe cii keren kwagh u a hembe doon sha ci u ior nav yô.—Yesaia 30:20; 48:17.
7, 8. (a) Ka ikyav i dooshima u sha tindi u nyi nahan Yehova a tese ken ieren na a ior nav laa? (b) Mbamaren vea kav Yehova sha u wasen ônov vev u keren u lun a tahav mbu dondon atindiakaa a Bibilo nena?
7 Time ase sha dooshima u yange Yehova tese Mbaiserael la. Mose yange pase mdoo u ikyurior i Iserael i yange i lu a̱ taver angahar ga la i̱ doo Yehova ishima la doo doo. I nger ér: “Er iguve ka i mgbegha iya i i, i purugh sha ônov mba i, i samber a akper a i, i ngohol ve, i tôô ve sha akper a i nahan, ka TER tseegh, A hemen [Yakob] ye, ma aôndo ugen lu a na imôngo ga.” (Duteronomi 32:9, 11, 12) Ngôguve ka una tesen ônov nav u purugh yô, a ‘mgbegha iya na,’ a gbidyen akper na faa faa shi á peer á kpaa, á taver mbayev nav asema sha u ve̱ mough ve̱ pulugh yô. Ônov mba inyonov mbara vea va tsuwen a̱ undun iya, í ashighe kpishi ka i lu sha vande u taven sha geng la yô, ngô la a “purugh sha” ônov mbara. Ashe a̱ va nyian ikyôr sha inja i wan na u̱ fia fia ne una shoghur inya yô, ngô la maa a pulugh a kar shin kpase, maa a tôô ‘un sha akper a na.’ Kape yange Yehova ver ishima sha ikyurior i Iserael i i̱ lu forototo la sha dooshima je la. Yange na ior mbara Tindi u Mose. (Pasalmi 78:5-7) Aôndo maa sule iyol kura ikyurior la, kegh a kegh iyol sha u aluer kwaghbo tser ve yô una yima ve .
8 Mbakristu mba ve lu mbamaren yô, vea dondo ikyav i dooshima u Yehova la nena? Hiihii yô, gba u vea tese ônov vev akaawan man atindi a a lu ken Mkaanem ma Aôndo la. (Duteronomi 6:4-9) Ishimaveren yô, ka u wasen agumaior la u tsuan akaa a a zough sha akaawan a Bibilo yô. Mbamaren mba lun a dooshima ka vea eren nahan yô, i lu u tesen ér mba purugh ônov vev sha ken mlu je la, vea lu nengen e̱r ve kuran akaawan a ve hen la yô. Mbayev vea nguren vesen shi á nguren pasen ve tuhwan kure kure zan zan vea karen tilen sha tseeneke ve yô, mbamaren mba ve ver ishima sha ônov vev yô, vea wa iyol vea kegh a kegh u ‘pulugh karen shin’ ‘tôôn ônov vev sha akper’ hanma shighe u kwaghbo a tser ve yô. Kanyi imba kwaghbo?
9. Ka kwaghbo u nyi nahan i gbe u mbamaren vea hemba lun tsevaa shamini? Tese ikyav.
9 Yehova Aôndo yange ta Mbaiserael icin sha kwagh u una tser ve aluer mba a uijende mba bov yô. (Numeri 25:1-18; Esera 10:10-14) Ainge kpa u zenden vea ior mba ikyoov ga la ka kwaghbo. (1 Mbakorinte 15:33) Mbamaren mba ve lu Mbakristu yô ve̱ kav Yehova sha gbaa ne. Kwagh u wanyenomso ugen hii u kôron wankwase u lun anyom 15, u i yilan ér Lisa la sha ishima, man kwagh u ken jijingi man anza a dedoo gba wannomso la ishima e̱r yange gba tsombor u wankwase la nahan ga. Lisa kaa wener: “Yange mbamaren av nenge e̱r inja yam gema fese nahan maa hii u zan ve iyol. Ashighe agen yange ve kôôm mo, ashighe agen di yô, ve nam ishimataver sha mhôôn.” Yange ve tema vea Lisa imôngo, ve wa ishima ve kegh ato a na, nahan ve wase un u hemban kwagh u yange ve nenge lu zayol na u vesen la—ka msar u yange sar un u mbakwav na ve̱ lumun un je la. *
De Kondon Iliam Ga
10. Ka sha nyi gbenda yange Yehova ver ikyav i dedoo sha u lamen a Mbaiserael?
10 U mbamaren ve̱ kôr cio u tsaase ônov vev yô, a gba u vea nôngo tsung vea kondon iliam a ônov vev ga. Shin er Yehova a fe kwagh u a lu se ken ishima tsembelee nahan kpa, á taver se ishima ér se̱ lamen a na. (1 Kroniku 28:9) E̱r yange Yehova ne Mbaiserael Tindi been kera cii yô, a ver Mbalevi ér ve̱ tesen ve, shi a tindi uprofeti ér ve̱ lam a ve i̱ kuma ve shi ve̱ kôôm ve kpaa. Shi yange tese e̱r un we iyol un kegh a kegh u ungwan mbamsen vev nahan.—2 Kroniku 17:7-9; Pasalmi 65:2; Yesaia 1:1-3, 18-20; Yeremia 25:4; Mbagalatia 3:22-24.
11. (a) Mbamaren vea taver ônov vev asema u lamen doo doo nena? (b) Hii nan i doo u mbamaren vea ver ato doo doo zum u ve lamen vea ônov veve?
11 Mbamaren vea fatyô u kaven Yehova zum u ve lu lamen a ônov vev la nena? Kwagh u hiihii yô, vea ker shighe u teman a ve imôngo kpee. Shi mbamaren ve̱ palegh u lamen a shinshima shio, heen a hee ônov vev, inja er, “Ka cii kwagh u or a yav ga nee? Ú na je yô, m hen mer ka ma kwagh”; “Ka ityumbulugh je la”; “Kanyi igen ú ver ishima wer ma ú ere? Ú ngu anye u cuku di tsô.” (Anzaakaa 12:18) U mbamaren mba fan kwagh vea taver ônov vev asema sha u ve̱ de kondon iliam ga yô, vea nôngo vea keghen ato doo doo. Mbamaren mba ve kenger ônov vev ashe ashe zum u ve lu iyev la yô, ve di kpaa ônov vev vea kenger ve ashe ashe zum u vea gande yô. Hanma shighe cii Yehova we iyol keghen a kegh u veren ato a ior nav. A bugh ato na a kegh a kegh u ungwan mba ve gem hen a na ken msen a iyol hiden a mi ijime la.—Pasalmi 91:15; Yeremia 29:12; Luka 11:9-13.
12. Ka anza a nyi nahan mbamaren vea lu a mi ve a heghem ônov vev u kporom hen a ve?
12 Shi time sha igbenda i ityom i Aôndo i genegh i i ne i heghem ior nav u kporom a na a mciem iyol shio la. U tesen ikyav yô Tor Davidi u tar u Iserael u tsuaa la yange er isholibo i vesen sha u eren idya vea Batesheba la. Er Davidi lu orumace u yinan yô, a er asorabo agenegh a vesen ken uma na. Nahan kpa, mayange gba uwer u kporom hen Yehova keren mde u asorabo man mkôôm ga. Erdoo u Aôndo man mhôônom nam ma zungwen mara yange ma na ican kera er Davidi u hiden hen Yehova ga je ka u kperan ga. (Pasalmi 103:8) Aluer mbamaren mba tesen anza a Aôndo e̱r mhôônom ma kôron man ma zungwen yô, vea fatyô u wasen sha er mbayev vea tsume je kpa iliam ia kondo her atô ve ga yô.—Pasalmi 103:13; Malaki 3:17.
De Keren Ngegh Ngegh Ga
13. U keren ngegh ngegh ga la wa nyi kere?
13 Zum u mbamaren ve keghen ato a ônov vev yô, a gba u vea ker ngegh ngegh ga, shi vea tese “kwaghfan u a dugh Sha” la. (Yakobu 3:17) Apostoli Paulu yange nger wener: “Ior cii ve̱ fa ishimawan yen doo doo.” (Mbafilipi 4:5) U keren ngegh ngegh ga la kanyi? Môm ken mbampase mba i ne sha ishemberti i ken zwa Grika i í gem ér ‘ker ngegh ngegh ga’ la yô ér, ka u kera “hanger ér saa i̱ dondo kwagh u i nger kpôghôô la ga.” Mbamaren vea nguren suen ityesen i tesen anza a dedoo man a ken jijingi la yô, vea ker ngegh ngegh ga nena?
14. Yehova yange tese ngegh ngegh ga zum u a lu eren kwagh a Loti la nena?
14 Yehova ver ikyav i dedoo sha gbaa u keren ngegh ngegh ga la. (Pasalmi 10:17) Zum u a kaa a Loti ér a̱ due vea tsombor na ve̱ undu gar u Sodom, u lù u a tim un kera la yô, Loti gba eren “zô zô.” Er ortyom u Yehova kaa a Loti ken masejime ér a̱ yem sha iwo a̱ za war yô, Loti kaa ér: “M fatyô u yevese za waren sha uwo la ga . . . Shi nenge, gar [u Soar] ne ngu heen ikua ikua u yevese za waren ker, ka u kiriki je. Yô, shi de, m̱ za ker, ka u kiriki tsô gaa?” Yange Yehova gema er nan sha kwagh ne? A kaa ér: “Yô, sha kwagh ne kpaa, M rumun we ve, Me tim gar u u kaa la ga.” (Genese 19:16-21, 30) Yange Yehova wa iyol kegh a kegh u rumun u eren sha kwagh u Loti sôn la. Een, gba u mbamaren vea var ken atindiakaa a Yehova Aôndo a we ken Bibilo, Mkaanem nam la. Nahan cii kpa, alaghga a fatyô u eren sha ishima i mbayev, aluer u eren nahan la a lu u peren tindi u Bibilo ga yô.
15, 16. Ka ityesen i nyi mbamaren vea fatyô u zuan a mi ken injakwagh i í lu ken Yesaia 28:24, 25 laa?
15 U keren ngegh ngegh ga la kua u wan ishima i mbayev ago sha u ve kegh a kegh iyol u ngohol kwaghwan kpaa. Yesaia yange tôô Yehova kar sha orsule sha injakwagh nahan wener: “Ortsôghol ka nan zer tsôghol gbem sha u lôôn ivoro? Ka nan zer vuul hemben akpen a inyaagh gbeme? Zum u nana vande saren a vaanaa, nan kera hamber nee, man nan ta ishwa, man nan lôô alakema sha nongo nongo man shair hen ijiir i i ver la, man shi agase kpaa sha kpe u u gaa?”—Yesaia 28:24, 25.
16 Yehova ‘tsôghol gbem sha u lôôn ivor’ shi “zer vuul hemben akpen a inyaagh” kpaa. Sha nahan yô, ka a sôr asema a ior nav cii man a mase tsahan ve ye. Aluer mbamaren mba kôôm ônov vev yô, vea “vuul” asema a mbayev vev nena? Ter ugen yange kav Yehova zum u a lu kôôm wan na u nomso u a lu anyom anyiin yô. Zum u wan na u nomso la ta wanye ugen u̱ lu ikyua a ve sambe yô, ter la wa ishima kegh ato a wan na sha u ungwan iyol palegh na la. Ter la gba sha mi gba ôron wan la ican i yange wan ugen ya sha ikyev i wan di ugen u wan ifer yô, kwaghôron ne lu inja je er ter la lu “vuul” ishima i wan na nahan. Wan la ongo kwagh la cii za been yô, sôô un ken ishima a kaa wener, i̱ tsaha wan u wan ifer la kpee. Imba ‘mvuul’ la yange i wa ishima i wannomso la ago shi hemba heghem un u̱ nengen e̱r u tan anye u a we ndor a na sambe la i lu ifer shi i lu shami ga yô.—2 Samuel 12:1-14.
17. Ka ityesen i sha kwagh u mkôôm u mbamaren i nyi i tese ken Yesaia 28:26-29 laa?
17 Shi Yesaia yange tôô Yehova kar sha vegher u tom sule ugenegh—ka u gbidyen iyiagh je la. Orsule ka nan yar tom a ikyav mbi tomov kposo kposo sha u gbidyen iyiagh a mi sha er akor a uyia la a taver a za kighir la. Ka i gbidye ishwa i i taver agongol ga la sha gbo, nee di sha aga, kpa sam uyia u u taver akor yô ka i shoghul a shoghul shin lu. Nahan kpa, sam uyia u ú taver akor la je kpa nan shoghul ú ishoghul i nana hembe a hembe ú ga. Kape Yehova kpa a eren je la, ka una soo u dughun nyityô kwagh i i doo ga ken ior nav yô, ka a musan gbenda u a eren kwagh la sha mlu u kwagh shon a lu la. Ngu tswam tswam ga, shi kighir or kpaa ga. (Yesaia 28:26-29) Mbayev mbagenev yô, mbamaren ka vea dugh ve ashe tseegh kpa ve sula, nahan í gba u kera eren ma kwagh ugen ga. Mbagenev yô gba u a zeren umbur ve gbem, shi mbagenev di yô, gba u a tsughur ishigh sha a ve. Mbamaren mba ve lu a shinshima yô, vea kôôm mbayev vev a mlu u wanye la shin ishima.
Na Kwaghôron u hen Tsombor A̱ Lu Saan Saan
18. Mbamaren vea fatyô u keren shighe u henen Bibilo vea tsombor ve nena?
18 Akaa a a lu ken igbenda i tesen mbayev kwagh yô, ka Bibilo i henen hen tsombor hanma shighe la man mtim u timen ken Ruamabera hanma iyange la. Kwaghhenen u hen tsombor hembe wasen zum u i henen un hanma shighe yô. Aluer i gba den di tsô ér a̱ umbur yô, í umbur di je ve, shin a̱ kende ken ishima yô, á hen yô, a̱ nôngo nan kpa imba kwaghhenen la ia luun tsule tsu tsule. Nahan a gba u mbamaren vea ‘wa ian ve ikyo’ sha er vea yaren tom a i sha u henen kwagh yô. (Mbaefese 5:15-17) U keren ian i ia gba a doo hen hanmaor cii la ka kwagh u kiriki ga. Orya ugen yange kav wener e̱r yange mbayev mba ngur vesen yô, akaa a yange ve wa ave u eren la na hemba taver u kohol mba hen tsombor cii ijiir i môm. Nahan kpa hanma aikighe u mkombo u tiônnongo una gba cii yô, tsombor la cii ú zua i bee. Nahan maa ter la ver aikighe la sha er tsombor ua henen kwagh hen shighe la yô. Kwagh ne yange wase. Hegen mbayev mba utar mbara cii ve hingir mba civir Yehova mba i er ve batisema yô.
19. Mbamaren vea kav Yehova zum u ve henen kwagh vea tsombor la nena?
19 Nahan cii kpa u gban di henen ma takerada u ú har sha Ruamabera la za been la tseegh yô, kuma ga. Yange Yehova lu tesen Mbaiserael mba ve hide ken tar ve la sha ikyev i upristi, mba ve ‘ôron’ ior Atindi, ve pasen a ‘wanger wanger, ve pasen inja i a kpaa, sha u ior ve̱ kav kwaghôron la yô.’ (Nehemia 8:8) Ter ugen lu u yange wase ônov nav utaankaruhar cii sha u kwagh u Yehova a̱ doo ve ishima yô. Shighe u kwaghhenen u hen tsombor la una zurum yô a nyôr ken iyou a za wa ago, nahan á gema a kwaghhenen la sha u a̱ zua sha ugbayol mba hanma wan na cii yô. Yange na kwaghhenen la doo ônov nav kpishi. Wan na ugen u hegen a lu igyandenor la, kaa wener: “Kwaghhenen la yange a hôm kpishi. Yange sea gbidyen bol ken tembe kpa a̱ va yila se ér se̱ va á hen kwaghhenen u hen tsombor la yô, se gema bol wase se ver kera wase je se yevese se nyôr ken iyou sha u henen kwagh. Yange i lu aikighe u hemban saan iyol ken sati cii.”
20. Ka mbamzeyol mbagenev mba nyi mba alaghga vea due ken myese u yesen mbayev la i gbe u se time sha mini?
20 Orpasalmi seer kaan wener: “Nenge, ônov mba nomso ka dyako u TER A ne yô, man kwagh u a dugh ken sagh kpaa ka injar i A ne yô.” (Pasalmi 127:3) U tesen mbayev ka tom u yan shighe shi ka i gba u nôngon tsung, kpa aluer ú er nahan sha inja yô, mbayev ou vea zua a uma u tsôron. Kwagh la una lu iyua i vesen je a zua ga! Yô, se kav nen ase Yehova zum u se tesen ônov asev yô. Nahan cii kpa, shin er i ne mbamaren tom ér ve̱ “yese [mbayev vev] sha mkôôm man kwaghwan u Ter” nahan kpa, ka u tesen ér vea kôr ityesen la kpee ga. (Mbaefese 6:4) Ka a̱ ver ishima sha wanye nan nan kpa, ashighe agenegh nan hemba ato nan de u civir Yehova. Nahan nena? Ka itinekwagh i a time sha mi ken kwaghhenen u a dondo ne je la.
[Footnote]
^ Alaghga akaa a yange e̱r á í nger ken kwaghngeren ne man u̱ una dondo la cii yange er ken ityar i aeren a uter a ker a kaha a ken tar wou yô. Kpa nôngo u nengen a kwaghwan u a lu ker la, nahan tôô kar sha mlu u hen ningir wou la.
Mlumun Wou Kanyi?
• Mbamaren vea fatyô u kaven dooshima u Yehova u i pase ken Duteronomi 32:11, 12 la nena?
• Kanyi kwagh ú hen ken gbenda u yange Yehova lamen a Mbaiserael la?
• Mkegh u yange Yehova kegh ato a zamber u Loti la tese se nyi kwagha?
• Ka ityesen i kôôm mbayev i nyi ú zough a mi ken Yesaia 28:24-29 la?
[Study Questions]
[Picture on page 20]
Mose yange tôô ityesen i Yehova lu tesen ior nav la kar sha kwagh u iguve a ônov nav
[Pictures on page 21]
Gba u mbamaren vea ver shighe u lun vea ônov vev
[Picture on page 23]
“Yange i lu aikighe u hemban saan iyol ken sati cii”