‘Haa Nen Ishima I Wan Iyol’

“Haa nen mhôônom ma kôron tsung iyol, man shi . . . ishima i wan” kpaa.—MBAKOLOSE 3:12.

1. Tese ikyav i dedoo i ishimawan.

 ORGEN ngu hen atô u imbusutariyan man ityôtar i tar u France, mba yer iti na ér Régis, un yange hingir Orshiada u Yehova, i er un batisema ken inyom i 1952 la. Kwase na nôngo kwagh gema ijime gema ikyum je anyom kar imôngo wener una tagher un a̱ de civir Yehova ga. Yange a nôngo ér una pev un akaver a matoo sha er ngula una fatyô u zan mbamkombo ga yô, je yô, iyange igen ne, nom na ngur pasen loho u Bibilo la yemen sha ihinda ihinda yô, a dondo un ken ijime kpiligh kpiligh lu nahan un tar er ngula lu lamen vea mbayaav sha kwagh u loho u dedoo u Tartor yô. Shin er ahendan lu a Régis kpii nahan kpaa, a lu wan ishima her. Nahan Régis ngu  ikyav i dedoo i Mbakristu cii vea dondo yô, sha ci u Yehova soo ér mbacivir un cii ve̱ waan ishima a mbagenev.

2. Ikyav i ishemberti i ken zwa Grika i í gem ér “ishimawan” la kpôô kpôô yô ér nyi, man i̱ tese nyi kwagha?

² Ishemberti i ken zwa Grika i̱ í gem ér “ishimawan” la ikyav i i kpôô kpôô yô ka “ilihen i jijingi.” Bibilo i ken zwa Buter i i yer ér New World Translation la i̱ gema iti ne kwa pue ér “ishimawan,” kwa tar di ér “u lun a ishima,” man kwa môm di ér “u yinan ishima ga.” Ishemberti i ken zwa Heberu man i ken zwa Grika i í gem ér “ishimawan” la cii ngi a ikyav i u yinan ishima ga man u gban den kera tsô kua u nyoon ishima fefa ga la ker.

3. Mnenge u Mbakristu sha kwagh u ishimawan kaha kposo a u Mbagrika mba ken derianyom u hiihii la nena?

³ Ngise ishimawan lu inja i dedoo hen Mbagrika mba ken derianyom u hiihii la ga. Mbafankwagh tsula mba yange i yilan ve ér mba Setoika la yô, yaren tsô kpa yange ve yaren tom a ishember la mayange ga. Sha kwagh u orgen u timen sha akaa a Bibilo, William Barclay a pase yô, ishimawan “i gema i kaha kposo a kwagh u a lu injadedoo hen Mbagrika la,” hen a ve yô, ka u or “vendan ibumegh sha iyol i nan sha u a tuhwa nan yô, nana cir zwa ga shin a̱ vihi nan iyol yô, nana gba teman a tema ga la i lu kwagh ye.” Yange kaa ér: “Hen Mbagrika yô, nomor yange i lu or u nan de akaa cii nan har ishima sha iyev i oron la. Hen Mbakristu yô, nomor ka or u naná lu a lu a ian i oron iyev je kpa nana venda u eren nahan yô.” Alaghga yange Mbagrika tôô ishimawan ér ka ikyav i or u wan teregh, kpa sha gbaa ne kpaa, er i vanden lun sha akaa agenegh nahan, “ibumegh ki Aôndo hemba kwaghfan u ior man isheer i Aôndo hemba agee a ior.”—1 Mbakorinte 1:25.

Ikyav i Tesen i Ishimawan i Kristu La

4, 5. Ka ikyav i kpilighyol i ishimawan i nyi yange Yesu tesee?

⁴ Kristu Yesu ver ikyav i ishimawan i doon kpishi, man ka Yehova Aôndo tseegh a hembe un ishimawan ye. Zum u yange i kighir Yesu tsung yô, a tese iyolkôrontsaha i kpilighyol. Yange i tsengaôron kwagh na ér: “I er Un ican je, nahan kpaa A rumun er i̱ hee Un, zwa tsô kpaa A bugh ga; er waniyôngo u i ze a mi sha u za sôngon yô, man er iyôngo ka i lu ving sha ishigh ki mbatôndon i aive nahan, kape A bugh zwa Na ga la.”—Yesaia 53:7.

⁵ Myen u mayange Yesu yina ishima ga sha ayange a tom na u shin tar cii la lu kwagh u kpilighyol je zua ga! Yange wa ishima a mbampin mba sha atseregh mba mbaihyomov nav lu pinen un la kua ityuhwanev mbi mbaahendanev mbira kpaa. (Mateu 22:15-46; 1 Peteru 2:23) Shin er yange mbahenen nav lu zeren zôhôn zwa sha kwagh u or u nan lu orvesen hen atô ve la nahan kpa a wa ishima a ve. (Marku 9:33-37; 10:35-45; Luka 22:24-27) Shi yange lu iyolkôrontsaha i vesen je yange Yesu tese hen tugh mbu i nenge mker sha a na zum u Peteru man Yohane gba mnyam, shin er á kaa a ve ér “kuran nen” la nahan je kpaa ye!—Mateu 26:36-41.

6. Paulu yange zua a mtsera ken ishimawan i Yesu la nena, man kwagh ne tese se nyi?

⁶ Zum u Yesu kpe shi nder shin mbakpenev kera la kpa shi a lu zan hemen a ishimawan na her. Hemban je yô, lu apostoli Paulu fa kwagh ne tsung ye, gadia yange vande lun or u tôvon Mbakristu a ican. Paulu yange nger wener: “Kwaghôron ne ka u jighjigh, a kuma u rumun un a ishima i môm er Kristu Yesu va shin tar sha u yiman mbaasorabo, man ken ve yô, ka mo m hembe ye. Ka nahan man i zungwem mhôônom ye, ka sha u Yesu Una tese ishimawan Na cii ken mo u m hembe ne, i̱ hingir mbagenev ikav mba vea mase va nan Un jighjigh sha u zuan a uma u tsôron yô.” (1 Timoteu 1:15, 16) Aluer ka nyi je yange sea vande eren kpaa, aluer se har jighjigh u nan wase sha Yesu yô, una wa ishima a vese—kpa, den yô una de veren ashe a vese ér se̱ “er aeren a a kom mgemshima la” ga. (Aerenakaa 26:20; Mbaromanu 2:4) Ilyoho i yange Kristu tindi hen iniongo i Kristu i itiankarihiar i ken Ashia u Kiriki la tese ér shin er a we ishima nahan kpaa, a ver ishima ér or a̱ sôr igbenda i nan.—Mpase, ityough 2 man 3.

Ityamegh ki Jijingi

7. Ka mzough u nyi a lu hen atô u ishimawan man icighan jijingi?

⁷ Ken ityough ki sha utaan ki washika u Paulu  tindi a mi hen Mbagalatia la, a tese mkposo u aeren a iyolough man ityamegh ki jijingi la. (Mbagalatia 5:19-23) Er ishimawan i lu môm ken aeren a Yehova yô, inja ne hii ka hen a na shi ngi ken ityamegh ki jijingi la kpaa. (Ekesodu 34:6, 7) Sha jighilii yô, Paulu nger ishimawan ngi kwagh u sha unyiin ken ati a ityamegh ki jijingi la, imôngo a “dooshima man msaanyol man bem man . . . mlu u dedoo man jighjigh man ishima i legh legh man u kôron iyol tsaha.” (Mbagalatia 5:22, 23) Sha nahan yô, zum u mbacivir Aôndo ka vea waan ishima iwe i Aôndo la yô, ve eren kwagh ne sha tahav mbu icighan jijingi.

8. Kanyi ia wase se u lun a ityamegh ki jijingi kua ishimawan kere?

⁸ Kpa kwagh ne ka u tesen ér Yehova kighir or a jijingi na ga. Saa se lumun a ishima yase ser a̱ er tom ken a vese. (2 Mbakorinte 3:17; Mbaefese 4:30) Se na jijingi ian ser a̱ er tom ken uuma asev sha u umen atam a na ken hanma kwagh u se eren cii. Er Paulu ter aeren a iyolough man ityamegh ki jijingi bee kera yô, a seer kaan wener: “Aluer se lu uma sha Jijingi yô, shi sé zenden nen sha Jijingi kpaa. I̱ de tsughun ne ga, mba nahan Aôndo tar ga. Kwagh u or nan lee yô, shi ka un je nana sunda ye. Gadia or u nana lôô ken iyol i nan yô, ka di ken iyol i nan nana sunda kwagh u hôôn ye, kpa u nana lôô ken Jijingi yô, shi ka di sha Jijingi nana sunda uma u tsôron ye.” (Mbagalatia 5:25; 6:7, 8) Aluer ka u se fatyô u lun a ishimawan yô, a gba u shi se lu a atam a jijingi agenegh a icighan jijingi a um ken Mbakristu la.

“Dooshima We Ishima”

9. Kanyi alaghga yange i na Paulu kaa a Mbakorinte ér, “dooshima we ishima”?

⁹ Paulu yange tese wener mzough u vesen ngu hen atô u dooshima man ishimawan zum u a kaa nahan la, wener: “Dooshima we ishima.” (1 Mbakorinte 13:4) Orgen u timen sha akaa a Bibilo, Albert Barnes due a mhen wener, Paulu yange kindigh ôron kwagh ne sha ci u ahendan man ihom i yange i lu ken tiônnongo u Kristu u ken Korinte la. (1 Mbakorinte 1:11, 12) Yange Barnes kaa wener: “Ishemberti i í nger heen ér [ishimawan] ne i̱ hendan a ikyôr nômbon: man u ôron kwagh sha ishimanyoon shin lun ishima bogh a or shin vihin ishima kpaa. I̱ tese ikyav i or KIGHIR AVE VANGER GBEM zum u i eren nan ican shin i hii nan iyongo yô.” Dooshima man ishimawan shi mba seer u nan tiônnongo u Kristu bem.

10. (a) Ka sha nyi gbenda nahan man dooshima a wasen se u wan ishima, man kanyi kwaghwan apostoli Paulu a we sha gbaa ne? (b) Kanyi kwagh orgen u timen sha akaa a ken Bibilo a er sha kwagh u ishimawan man erdoo u Aôndo? (Nenge ngeren u shin kpe la.)

¹⁰ “Dooshima we ishima, lu sar sar. Dooshima . . . keren kwagh na iyol na tsô ga, nyoon ishima ga.” Nahan, dooshima wasen se u wan ishima sha igbendaakaa kpishi. * (1 Mbakorinte 13:4, 5)  Dooshima wasen se u wan ishima a ayol a ase shi wasen se u umbur ser se cii se yina shi se mba gbe kpaa. Wasen se u wan orgen ikyo shi den or a isholibo kpaa. Apostoli Paulu taver se ishima ér, zenden “zende u u kom sha myer u i yila ne la, a iyolgengese ga, man a ishima i legh legh, man a ishima i wan kpaa, kundu nen asema a ayol a en sha dooshima. Nôngon nen tsung u kuran mzough u ken Jijingi sha mkange u bem.”—Mbaefese 4:1-3.

11. Hii nan ve i hembe doon u Mbakristu mba hen ma ijiir vea waan ishima?

¹¹ Mbakristu mba hen ma ningir tar, shin a̱ lù hen tiônnongo shin a̱ lu shin iyaagh ki Betel shin iyaagh ki mbamishen shin a̱ lu mba maan akaa shin a̱ lu ken imakeranta kpaa, ka vea waan ishima ayol a ve yô, bem man msaanyol a lu hen atô ve. Er mbamlu mba iorov ve lu kposo kposo shi akaa a sha ishima ve kpa a lu kposo kposo shi ve due sha ajiir wue wue man kwagh u ve nenge ér ka icivir-or man mkpeyol kpa a lu kposo kposo yô, akaa a nan ishimanyoon ka a duen sha ashighe ashighe. Kape ken icombor kpa i lu je la. U nyoon ishima fefa ga la ka kwagh u injaa. (Anzaakaa 14:29; 15:18; 19:11) Kwagh gba sha ishimawan—ka mkighir u kighir ave vanger, veren ashe keghen ér guda ngu va van ken hemen je la.—Mbaromanu 15:1-6.

U Nyoon Ishima Fefa Ga la Wasen Se u Wan Ishima

12. Hii nan ve ishimawan i̱ lu kwagh u hange hange hen shighe u i vemben oro?

¹² U nyoon ishima fefa ga la wasen se u wan ishima a akaa a vemben or, aa a zeren a or kpii i lu inja er aa bee ga, shin iwasen ia lu fese ga la. Kape kwagh u Régis, u i vande teren kwagh na la kpa i lu je la. Kwase na yange zer hendan a iniôngon na i civir Yehova la je anyom kar imôngo. Nahan kpa, iyange igen sev hungwa av yô, kwase na va hen ana a mliam ashe va kaa a na ér: “M fa ka mimi je ne. Wasem. M soo u henen Bibilo.” Ken masejime yô, i er un batisema a hingir Kwaseshiada. Régis kaa wener: “Kwagh ne tese ér Yehova ver anyom a yange m nôngo kwagh kpoghuloo shi m kighir ave vanger, m wa ishima tsung la doo doo.” Yange zua a injar sha ishimawan na la.

13. Kanyi yange i wase Paulu u yinan ishima ga, man ikyav na la ia fatyô u wasen se u wan ishima nena?

¹³ Hide ken derianyom u sha hiihii S.W. la, apostoli Paulu lu or u tesen ikyav i dedoo sha gbaa u ishimawan la. (2 Mbakorinte 6:3-10; 1 Timoteu 1:16) Zum u yange shi kpuaa u Paulu una kpe shighe u a lu wan Timoteu, ikyar na i kiriki kwagh la yô, a kaa a na ér Mbakristu ci ca cii vea tagher a ameen. Paulu tese ikyav sha iyol na shi due a mhen sha u teren anza a hange hange a i gbe u Mbakristu vea lu a a ve vea lu a ishimawan yô. Yange nger kwagh wener: “We u lu a mo mangeraa sha ityesen man ieren yam man ishimaveren yam man jighjigh u nan man ishima i wan man dooshima man ishima i taver man mtev u sha ican man atsan a a tserem ken Antioki man Ikonium man Lisetera. Mbamtev mba sha ican ne cii m wa ishima sha mi, man ve cii, Ter yimam sha mi. Man mba i sar ve pe zenden sha mciviraôndo ken Kristu Yesu cii, á tôv ve a ican.” (2 Timoteu 3:10-12; Aerenakaa 13:49-51; 14:19-22) U̱ se cii se̱ yina ishima ga yô, gba  u se lu a jighjigh u nan man dooshima man ishimawan.

Haa Ishimawan Iyol

14. Kanyi akaa Paulu yange tôô aeren a Aôndo e̱r ishimawan nahan kar sha a, man ka kwaghwan u nyi yange wa Mbakristu mba ken Kolose?

¹⁴ Apostoli Paulu yange kar ishimawan man aeren a Aôndo agenegh sha ikyondo i i gbe u Orkristu naná ér aeren a tsuaa a a lu a “tseor” la kera nana gema nana haa i̱ iyol yô. (Mbakolose 3:5-10) Yange nger wener: “Nahan yô, haa nen mhôônom ma kôron tsung iyol, man shi ieren i dedoo man iyol i gengese ga, man ishima i legh legh man ishima i wan er uicuwan mba Aôndo mba ve lu uicighanmbaiorov mba doon ishima nahan. Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la. Kwagh u a hembe cii yô, haa nen dooshima iyol, ka kwagh u maghen mlu u vough je la.”—Mbakolose 3:12-14.

15. Mbakristu ka vea ‘haa’ ishimawan man anza a Aôndo agen ‘iyol’ nahan kanyi ka i ere?

¹⁵ Zum u mba ken tiônnongo ka ‘vea haa’ mhôônom ma kôron tsung iyol man erdoo man iyol i gengese ga man ishima i legh legh man ishima i wan man dooshima yô, ka ve fatyô u been a mbamzeyol shi ve zaan hemen ken mcivir u civir Yehova gungur môm la. Hemban cii je yô, ka Mbakristu mba ve lu mbakuran mbara je vea hemba wan ishima ye. Alaghga ashighe aa lu aa i gbe u vea kôôm ma Orkristu ugen yô, kpa igbenda ngi kpishi i a fatyô u eren kwagh ne yô. Paulu yange pase inja i hemban doon zum u a nger Timoteu kwagh nahan la, wener: “Kôôm, yangen, waan kwagh, sha ishima i wan tsung man sha ityesen kpaa.” (2 Timoteu 4:2) Een, gba u hanma shighe cii yô, a eren a iyôngo i Yehova a ishima i wan man iciviryolough man sha ue kpaa.—Mateu 7:12; 11:28; Aerenakaa 20:28, 29; Mbaromanu 12:10.

“Waan Nen Ishima a Ior Cii”

16. Aluer se mba ‘wan ishima a ior cii’ yô, kanyi alaghga ia va kere?

¹⁶ Er Yehova a we ishima a orumace yô, kwagh la gema hingir tindi hen a vese sha er se kpa se “waan . . . ishima a ior cii” yô. (1 Mbatesalonika 5:14) Ikyav i kwagh ne yô, ka u wan ishima a mba hen tsombor wase mba ve lu Mbashiada ga la kua mbawanndor a vese man mba se eren tom a ve imôngo kua mba se henen makeranta a ve imôngo mbara kpaa. Ashighe kpishi Mbashiada ka ve hemba ishe i bo i mba ve lu sha tom môm a ve shin ve ze makeranta a ve imôngo ka ve shi kenger ve la man u dughun ve asôngo shin u hendan a ve la, kwagen je yô, kwagh ne ka a er anyom a kar imôngo je. (Mbakolose 4:5, 6) Apostoli Peteru yange nger wener: “Zende wen u hen atôatyev u̱ lu wanger wanger, sha u aluer mba lamen sha a ven er ka mbaaferev yô, ve̱ nenge aeren a en a dedoo man ve̱ civir Aôndo sha iyange i Una va sôron ne la.”—1 Peteru 2:12.

17. Se kav dooshima man ishimawan i Yehova la nena, man hii nan i gbe u se er nahana?

¹⁷ Alaghga ishimawan i Yehova la ia na ior umiliôn imôngo uma u tsôron. (2 Peteru 3:9, 15)  Aluer se kav dooshima u Yehova man ishimawan na la yô, se za hemen u pasen loho u dedoo u Tartor u Aôndo ne a ishima i yinan shio, shi se lu tesen mbagenev u wan ayol a ve sha ikyev i hemen u Tartor u Kristu la kpaa. (Mateu 28:18-20; Marku 13:10) Aluer se de kwaghpasen yô, a lu inja er se mba tulen ishimawan i Yehova la hiden a mi ijime nahan, se kera kav awashima u i̱, u í lu u zan a ior ken mgemshima la ga.—Mbaromanu 2:4.

18. Ka msen u nyi yange Paulu sôn sha ci u Mbakolose?

¹⁸ Ken washika u Paulu nger hen Mbakristu mba ken Kolose, ken Ashia u Kiriki la, a kaa wener: “Sha ci u nahan yô, hii sha iyange i se ungwa kwagh la je se kera mem u eren msen man shi u zamber sha ci wen ga, ser, ma i iv ne a mfe u fan ishima Na sha kwaghfan cii man mkav u ken jijingi kpaa, sha u ne̱ zende zende u u kom Ter, ne̱ doon Un ken akaa cii, ne̱ umen atam ken hanma tom u dedoo, shi ne̱ vesen ken kwaghfan u Aôndo, i̱ taver ne sha agee cii sha inja i agee a iengem Na la sha u taver ishima man shi u wan ishima saan saan kpaa.”—Mbakolose 1:9-11.

19, 20. (a) A er nan ve se de u nengen ser ishimawan i Yehova i i̱ lu zan hemen her ne ka di ikyaren tsô ga? (b) Aluer se mba wan ishima yô, ka mbamtsera mba nyi vea va kere?

¹⁹ Mwe u Yehova a zeren wan ishima shin a kighir ave vanger la, a fatyô u lun ikyaren hen a vese ga aluer se ‘iv a mfe u fan ishima Na sha kwaghfan’ yô, man ishima na shon yô, ka u “ior cii ve̱ war ve̱ ar sha mfe u fan mimi la.” (1 Timoteu 2:4) Se za hemen u “umen atam ken hanma tom u dedoo,” hemban je yô, tom u pasen “Loho u Dedoo u tartor ne” la. (Mateu 24:14) Aluer se za hemen u eren kwagh ne sha mimi yô, Yehova una “taver [se] sha agee cii” sha er a wase se u “taver ishima man shi u wan ishima saan saan kpaa” yô. Aluer se mba eren nahan yô, se lu ‘zenden zende u u kom sha myer u i yila se la’ yô, nahan se zua a bem u a dugh ken mfe u fan ser ieren yase ngi “doon Un ken akaa cii” yô.

²⁰ Yô, se kav nen er ishimawan i Yehova i lu kwaghfan nahan. A wa i̱ ka sha ci u myom wase man u mba ve ongo kwaghpasen man ityesen yase la kpaa. (1 Timoteu 4:16) U umen ityamegh ki jijingi e̱r—dooshima man erdoo man mlu u dedoo man ishima i legh legh man u kôron iyol tsaha nahan la—una wase se u wan ishima saan saan. Se hemba lun ken bem a ior mba hen tsombor wase kua shi anmgbianev asev mbanomso man mbakasev ken tiônnongo kpaa. Shi ishimawan ia wase se u kera yinan ishima a mba se eren tom a ve imôngo shin mba se ze makeranta a ve imôngo mbara ga. Shi ishimawan yase ia lu a awashima, ka awashima u wasen mbaasorabo man u nan Yehova, Aôndo u ishimawan la icivir je la.

[Footnote]

Ú Fatyô u Pasen Kpa?

• Ka sha nyi gbenda Kristu a lu ikyav i tesen i dedoo i or u wan ishima?

• Kanyi ia wase se u lun a ishimawana?

• Ishimawan i wasen mba hen tsombor man Mbakristu mba ve lu hen ma ijiir la kua mbatamen nena?

• U se wan ishima la una va se a mtsera kua mbagenev kpaa nena?

[Study Questions]

[Picture on page 27]

Zum u mtaver shile sha Yesu la je kpa, a wa ishima a mbahenen nav

[Picture on page 28]

I wa Mbakristu mba ve lu mbakuran la kwagh ér ve̱ tese ikyav i dedoo i wan ishima la hen anmgbianev vev

[Picture on page 29]

Aluer se dondo dooshima man ishimawan i Yehova yô, se za hemen u pasen loho u dedoo her

[Picture on page 30]

Paulu yange er msen wener Mbakristu ve̱ ‘waan ishima saan saan’