Mbampin mba Mbaôron Takerada Ne Ve Pin La

Yobu yange ya ican tsa kuma shighe nena nahana?

Ior mbagenev hen ér yange Yobu ya ican anyom imôngo, kpa takerada u Yobu la tese imba ican i yan gbem nahan ne ga.

Ken vegher u hiihii u ican i yan i Yobu la, msaa u ior nav man ikyav nav saa la, ka inja er yange akaa ne cii er je ngôôr ga nahan. I nger her ér: “Tsô iyange igen er ônov [mba Yobu] mba nomso man mba kasev ve lu yan kwagh man man wain hen ya u anngô ve u tamen yô.” (Ka se se nger i yier ye.) Loho zer aren a Yoho lugh lugh ér akaa na nga timin—ibua na man ujaki nav man iyôngo na man urakumi man mbatomov mba ve lu nengen sha ilev mbila cii. Ikyav tese ér, kwagh ne yange eren ka been a bee ga nahan maa shi Yobu ungwa ku u ônov nav mba nomso man mbakasev mba yange “ve lu yan kwagh man man wain hen ya u anngô ve u tamen” la. Ka inja er kwagh ne cii yange er sha iyange i môm nahan.—Yobu 1:13-19.

Alaghga tsô vegher u sha uhar u ican i yan i Yobu la yange hemba shin gbem. Satan yange za hen Yehova za kaa a na wener aluer i er Yobu ican—i bende a iyol na jighilii yô—una kera tile sha mimi ga. Tsô maa i “haa Yobu avav a nyoon, hii shin akevangahar a na je, ar sha ihaghtyou na.” Msamber u angev mbun samber un iyol la alaghga yange shighe una pande a kar. Shi, a̱ shi nan kpa yange a pande a ngôôr cii ve mba yange ve senge ér ve mba akar a Yobu la za ungwa “akaa ne cii” ve, ve mough ve gba van ye.—Yobu 2:3-11.

Elifasa yange lu ken Teman ken tar u Edom, Sofar gema lu hen atô u imbusutarimese man ityôtar i tar u Arabia la, nahan ajiir a ve yange gba ica a Ushi, u lu ijiir i Yobu, u̱ alaghga yange lu vegher u ken imbusutarimese i tar u Arabia la ga. Nahan cii kpa, Bildadi di gema lu Orshuhi, man i kav ér ior mban yange ve tema sha kpe u Uferati. Aluer yange Bildadi lu hen ya na hen shighe la yô, alaghga yange a tsa a kuma usati imôngo shin iwer imôngo cii ve una za ungwa agwa u mlu u Yobu cii ve una kôr gbenda yemen zende ken Ushi ye. Kpa alaghga mba utar mban cii yange vea lu ikyua hen shighe u ican hii a Yobu la. A̱ lu nan kpa, zum u yange akar a Yobu a atar ne nga va nyer yô, “ve shar inya a na imôngo kuma ayange ataankarahar kua aime di ataankarahar” a u lamen shio.—Yobu 2:12, 13.

Vegher u masetyô u ican i yan i Yobu la maa dondo, ka mnger u ngeren vegher ne vighe vighe la a iv ityouv kpishi ken takerada la ye. Ior mba utar mba yange ve senge ér ve mba akar a na la ve lu sendegh kwagh a na, man Yobu di kpa ashighe kpishi a lu nan ve mbamlumun. Ken masejime yô, gumor Elihu kende wa ve kwagh, shi Yehova kôôm Yobu sha aôndo.—Yobu 32:1-6; 38:1; 40:1-6; 42:1.

Nahan alaghga ican i yan i Yobu man mkur u i̱ cii yange á lu ken atô u iwer kpuaa tseegh, alaghga a yina inyom jimin. Alaghga ú fatyô u fan ken iyol you e̱r ka i lu inja er ican i yan ia tsa sha won ia bee ga nahan yô. Nahan cii kpaa, se umbur nen ser ka a̱ lu nan kpa i va bee keng, kape i̱ Yobu kpa ngise i̱ bee je la. Aluer ican i se ye la ia lihe nan nan kpaa, se umbur nen ishuen i Aôndo i í tese ken mkaanem ma i ne i nger nahan ne, ér: “Gadia ancan u peesa u sha anshighe kpeghee ne ngu sôron se a sôr iengem i tsôron i vesen i ganden cii.” (2 Mbakorinte 4:17) Apostoli Peteru yange nger wener: “Zum u ne ya ican sha anyangem kpeghee kera yô, Aôndo u mhôôn cii u A yila ne u zan ken iengem i tsôron ken Kristu, Un iyol Na Una sôr mlu wen Una suwe ne, Una taver ne man shi Una tim ne né lu dông kpaa.”—1 Peteru 5:10.