Ibaver I Mba Yôôn Tartor

U Aren a Ior Mba I Taver u Aren a Ve La

MBASHIADA MBA YEHOVA ka ve nôngo u zan aa loho u Tartor hen hanmaor u ve fetyô u aren a nan cii. Ashighe agen yô, ka i lu sha ican tsung ve i ar a ior mba ve fe lun hen ya ga la ye. (Marku 13:10) Ikpur pania ugen ken tar u South America ôr kwagh u yange er u í nger shin heen ne.

“Yange m mase va kaven mer sev mbu gen mbua av yô, gomna u hen tar la una va sôr gar u yange i tindim tom her vea kwase wam la. Yange m fa tsembelee je mer un kpa ngu môm ken mba i taver u zuan a ve hen ya yô, nahan m nger un washika shi m wa ityakerada i haren sha Bibilo ker kua antakerada u i yer ér Kanyi Aôndo a Soo her Avese? la, kua ú i yer ér Mankind’s Search for God man Mfe u Una Va a Uma u Tsôron la. Washika u yange m nger la pase awashima u hanma takerada ne cii.

“Er yange gbam ishima u fan mnenge na sha ityakerada ne yô, m sôn ian u va teman imôngo a na. Ukasua mba karen kpuaa yô, i nam ian, nahan m tôô kôpi u tser u vidio u i yer ér Jehovah’s Witnesses—The Organization Behind the Name (Mbashiada mba Yehova—Nongo Ú Ú Sugh Iti Ne ken Ijime La). Yange se tema imôngo la kuma er ahwa ahar nahan. Se mba nengen tser u vidio la vea gomna se mba been yô, m pine un kwagh u a hen sha tser shon yô. A kaa wener: ‘Ma nongo ugen ngu shin tar ne er u̱ wen nahan ga. M tôm mer ma m lu a ior er ne nahan ma ve wasem u eren tom u gomoti wam kuren ú doo doo!’ Maa a gema a pinem ér m̱ ôr un shin mea za shin gartamen u tar sha won cii u nongo wase ne yô. Nahan m kaa a na mer, shin er yange lu ishimaveren yam u zan hii shighe u m lu anyom 14 la je nahan kpa, gbenda ngu a̱ duem u zan shin gar wase u tamen u a lu ken Brooklyn, New York la ga. M kaa a na mer ka môm ken akaa a a taver u or a̱ er sha er nan we ken ishima nahan je la. A gema a kenger mo a tamber dông. Tsô a gema a kaa wener un soo ér m̱ zua a gbenda la. Yange er akaa a i gbe u a er sha tindi ve a na se ian la nahan man na se iyua sha u kimbin injar i nyôron girgi!

“Hegen ne, gomna la zough a umagazin mba Iyoukura man Awake! sha hanma shighe cii. Se mba a ishimaverenkeghen ser er shighe a za deghôô yô, se va hii u henen Bibilo a na.”