Tindi U Vesen La—Ka Ityesen I Sha Won Cii

“Akaa cii a i sar ne ka ior ve̱ er ne yô, ne kpaa er nen ve di nahan je.”—Mateu 7:12.

 YANGE i ôr mkaanem mara tsa hegen war kuman anyom dubu uhar, man lu Yesu Kristu ôr ma zum u a lu tesen Ityesen na i sha Uwo i i ze gwa yum la ye. Ken uderimbaanyomov mba ve kar hii shighe u i ôr mkaanem mara je, ior ôr akaa shi nger akaa kpishi sha kwagh u mkaanem ma i er ma kperegh kperegh ga ne. U tesen ikyav yô, i wuese ma ér ka “tamen kwagh ken Ruamabera je la,” shi ka “u saven ôron tom u Mbakristu ve lu a mi hen orwanndor a ve je la,” man “tamen tindi u doon tar” kpaa. I fa tindi ne doo doo je yô, ashighe kpishi mba yer un ér Tindi u Vesen.

Kpa kwagh u Tindi u Vesen ne ngu ka ken ityar i i senge ér ka i Mbakristu la tseegh ga. Kwaghaôndo u Mbayuda man u Buddha man mbafankwagh tsula mba ken Grika cii yange ve pase kwagh u tindi u aeren a injaa u aluer i pase a pase or ga kpa nana fa ne sha igbenda wue wue. Kwaghôron u i fe un tsembelee, hemban je yô ken Atô u Ityoughkitaregh yô, ka kwaghôron u Confucius, u mba sha Ityoughkitaregh ve civir un ér ka or u hemban ashe a bughun shi ka ortesen kpaa la. I nger kwagh ne kwa tar ken takerada u sha utar u ken Ityakerada i Inyiin i nongo u Mbakônfushian ú i yer ér Analects la. Yange Kônfushian ngur nan mbahenen nav mbamlumun sha mbampin vev mbara yô, a kaa a ve kwa har nahan ér: “Kwagh u ú soo wer i̱ er a we ga yô, we di kpa de eren a orgen ga.” Sha shighe ugen la, zum u wanyemakeranta na Zigong ta ihagh wener: “Kwagh u m soo mer mbagenev ve̱ er a mo ga yô, mo di kpa m soo u eren a ve nahan ga” yô, ortesen na gema ôr kwagh kondo iyol gbong nahan wener: “Een, kpa ú fatyô u eren kwagh ne ga.”

Aluer or ôr mkaanem man yô, nana nenge e̱r kwaghôron u Kônfushian la i lu u yange Yesu ôr la, kpa u̱ na ne a gem a lu geseghee yô. Mkposo u vesen u a lu ken kwagh ne yô, Tindi u Vesen u yange Yesu tese ér i̱ eren la yange gba u or a kôr cio u eren aeren a dedoo a a lu a iwasen hen mbagenev kpôô kpôô yô. Luun er ior vea lu eren sha mkaanem ma dedoo ma Yesu kaa la yô, ma ve waan mbagenev ikyo shi ma ve wasen ve shi ma ve kuran tindi ne hanma iyange kpaa. Ú hen wer kwagh ne una na tar u ainge ne ua lu ijiir i hemban doonoo? Je ka u henen a hen ga.

Aluer a̱ wa tindi ne a̱ lu sha gbenda u wasen shin a̱ lu geseghee shin a̱ lu sha nyi gbenda je kpa, kwagh u a hembe lun a inja yô, ior mba sha ashighe kposo kposo man ajiir wue wue, mba shi ve lu a mbamlu kposo kposo lumun a Tindi u Vesen ne. Kwagh ne tese di tsô ér kwagh u yange Yesu ôr sha Ityesen na i sha  Uwo la ka u yisan sha won cii, u a bende a uuma mbaiorov sha hanma shighe cii yô.

Pine iyol you wer: ‘A doom u̱ i̱ eren a mo sha icivir shi i̱ eren a mo vough er mbagenev nahan shi i̱ eren a mo sha mimi kpa? A doom u lun ken tar u á kera sangen a sange ior ga, ifer kpa ia lu ga kua ityav kpa ga la kpa? Me soo u lun ken tsombor u hanmaor nana wa ikyo a mbamhen man mkpeyol u mbagenev la kpa?’ Sha kpôô yô, ka anti je nana na mlumun sha mbampin mban ér ei-e? Kwagh u mimi u a gem a lu yô, ka ior kpuaa tseegh ve zough a akaa a dedoo ne ye. Hen ior mbagenev kpishi yô, tômon tsô kpa vea tôm á ga.

Í Nzughur a Tindi u Vesen La

Er i gbe je tsô, i ndera eren tswam a ior, i wa ian i ve lu a mi u eren kwagh sha ishima ve la ikyo ga. Akaa shon ne yô, ka kpenga u teen ikpan ken Afrika la man afo a kuugh a mba Nazi, man u kighir mbayev a tom ican man tìm-ikurior u a lu zan hemen sha ajiir wue wue ne. A fatyô u teren akaa a cieryol ne hemban nahan.

Tar wase u iwavaren i nasera i sa kwan inya ne, ú hemba soon iyol i ú tseegh. Kwagh ka una zua orgen a ugen yô, i lu akaa a nan nenge ér ka ian i nan la tseegh kwagh a gba nan shami ye. (2 Timoteu 3:1-5) Hii nan ve ior kpishi ve gem soon ayol a ve tseegh shi ve vihi tu shi kwagh a gbe ve a or ga shi ve we orgen ikyo ga yum nahana? Kera ka sha ci u, shin er í fe Tindi u Vesen ne wuee nahan kpa, í gema i daa un kera ér á gba iliam ga, shi gban kan di tindi u aduagh tsô la gaa? Kwagh ka a er i vihi yô, ior mba ve senge ér ve na Aôndo jighjigh je kpa kape ve eren je la. Man sha mlu u akaa a lu ne yô, kape ior vea lu hemban wan kwagh ve tseegh ikyo je la.

Nahan, mbampin mba vesen mba i gbe u a time sha mi yô, ka ve ne: U̱ eren sha Tindi u Vesen ne wa nyi man nyi kere? Ma or ngu u nan eren sha mi yôô? Man ma shighe ngu u orumace una va lu eren sha Tindi u Vesen ne kpa? Aluer ú soo u̱ zuan a mbamlumun mba mimi sha mbampin mban yô, ôr ase kwaghngeren u a dondo ne.

[Picture on page 3]

Confucius man mbagenev yange ve tese Tindi u Vesen ne sha igbenda wue wue