Yehova Tesen Se E̱r Se Ôr Ingeegh Ki Ayange Ase Yô
Yehova Tesen Se E̱r Se Ôr Ingeegh Ki Ayange Ase Yô
“Tese se se̱ fa er i doo u ma se ôr ingeegh ki ayange ase sha u sé zua a ishima i fan kwagh yô.”—PASALMI 90:12.
1. Hii nan ve i lu a inja u sônon Yehova ser a̱ tese se er se “ôr ingeegh ki ayange ase”?
YEHOVA AÔNDO ka Orgban se shi ka Un a ne Uma ye. (Pasalmi 36:9; Mpase 4:11) Nahan ma or kpa nan ngu sha ian i nana tese se er se ôr anyom a uma wase sha gbenda u kwaghfan ga. Ka nahan ve orpasalmi yange sôn Aôndo sha inja vough nahan ye, ér: “Tese se se̱ fa er i doo u ma se ôr ingeegh ki ayange ase sha u sé zua a ishima i fan kwagh yô.” (Pasalmi 90:12) Pasalmi u sha 90, hen pe se zough a msen la la kuma u se nenge sha mi vighe vighe. Kpa hiihii yô, de se vande nengen nen sha icighan icam ne kpase ve.
2. (a) Ka an i yer iti i nan ér ka nan nan nger Pasalmi 90, man alaghga ka hanma shighe yange i nger unu? (b) Pasalmi 90 la una bende a mnenge u se nengen uma la nena?
2 Ngeren u nderan mhii u Pasalmi 90 la kaa ér ka “msen u Mose, or u Aôndo.” Er pasalmi ne a er kwagh sha m-kar u uma u orumace karen kera yô, ka inja er yange i nger un sha shighe u yange i due a Mbaiserael ken uikyangen ken Igipiti zum u zende u anyom 40 ken deserti, shighe u ior udubu imôngo kpe man kov u ifer la bee kera la. (Numeri 32:9-13) Er i lu cii kpa, Pasalmi 90 tese ér uma u uumace mba ve yen ne tse ga. Nahan, doo u se yar tom a ayange ase sha kwaghfan.
3. Ka atôakaa a vesen a nyi a lu ken Pasalmi 90?
3 Ken Pasalmi 90, ivur 1 zan zan 6 la dugh uwegh sha Yehova ér ka un a lu ijiir yase i teman sha ikov ikov ye. Ivur 7 zan zan 12 la tese kwagh u i gbe u se er sha u yaren tom a uma wase u tsan anyom kpuaa ne sha gbenda u u lu sha ishima na yô. Man er i pase ken ivur 13 zan zan 17 la nahan, sar se tsung u ma se zough a erdoo u Yehova man iveren na. Sha mimi yô, pasalmi ne tsengaôron akaa a a eren se mbacivir Yehova asange asange la ga. Nahan kpa, gba u se ver ishima se dondo imba ieren i wan ayol a ase sha ikyev i Aôndo er i tese ken msen na ne nahan. Nahan de se time nen sha Pasalmi 90 vighe vighe sha mnenge u ior mba ve ne ayol a ve sha ikyev i Aôndo la.
Yehova—Ka “Ijiir Yase i Teman”
4-6. Yehova ngu “ijiir yase i teman” nena?
4 Orpasalmi hii sha mkaanem man ér: “TERE, ka We je, U lu ijiir yase i teman, sha ikov ikov ye. Er i lu a due a iwo ken igbar ga, man er U lu a gba inya man tar ga, hii sha uicôronmbaashighev je zan zan gbem sha won, U ngu Aôndo.”—Pasalmi 90:1, 2.
5 Hen a vese yô Yehova, “Aôndo u gbem sha won” la, ka ‘ijiir teman’—ka ijiir i yeren i ken jijingi. (Mbaromanu 16:26, NW ) Ishima i ze se iyol ga sha ci u hanma shighe ka a lu her sha u wasen se e̱r “U [a] ongo msen” yô. (Pasalmi 65:2) Er se gem ishimanyian yase cii se ne Ter wase u sha ken Wan na u ishima ishima la yô, nahan ‘bem u Aôndo u a gande hanma mfe wase cii ngu kuran asema a ase man mbamhen asev’ kpaa.—Mbafilipi 4:6, 7; Mateu 6:9; Yohane 14:6, 14.
6 U ôron sha injakwagh yô, se mba a mkor u ken jijingi sha ci u Yehova a lu “ijiir yase i teman” yô. Shi ne “ayou” er ajiir a yeren nahan—alaghga kwagh ne zua sha atôônanongo a ior nav kôôsôô—hen pe mbakuran sha dooshima ka ve wase tsung sha u kuran se la. (Yesaia 26:20; 32:1, 2; Aerenakaa 20:28, 29) Bee kera yô, se mbagen se mba ken icombor i i civir Aôndo ica i gbe yô, shi í kav sha tseeneke u í ér ngu ‘ijiir i teman, sha ikov ikov.’
7. Ka sha nyi gbenda nahan yange iwo ‘due ken igbara,’ man i er tar sha “ican tsung” (NW ) nena?
7 Yehova vande lun cii iwo ‘due ken igbar’ ye, shin er i lu a̱ gba tar sha “ican tsung “ (NW ) la ga nahan kpaa. Sha mnenge u uumace yô, yange gba u saa a nôngo kwagh tsung je ve a gba tar a akaa a a lu shin ú cii, man akaa a i tee ve i er ú la, man ukpelegh kpelegh mbaakaav mba i er ú a mi la cii ye. Man u kaan ér iwo i ‘due ken igbar,’ shi yange i er tar er ka sha “ican tsung” (NW ) la yô, orpasalmi ngu tesen zege icivir sha tom u Yehova er shighe u yange lu gban akaa ne la. Se kpa se lu a imba icivir la kua iwuese sha ityomaveegh i Orgbanakaa la gaa?
Hanma Shighe cii Yehova We Iyol Keghen a Kegh u Wasen Se
8. U kaan ér Yehova ka Aôndo u “hii sha uicôronmbaashighev je zan zan gbem sha won” la inja na ér nyi?
8 Orpasalmi yange wa icam wener: “Hii sha uicôronmbaashighev je zan zan gbem sha won, U ngu Aôndo.” “Gbem sha won” a fatyô u lun akaa a a lu a mkur kpa i pase mtse u a tse i za kighir la ga yô. (Ekesodu 31:16, 17; Mbaheberu 9:15) Ken Pasalmi 90:2 man ajiir agen ken Ruamabera u ken Zwa Heberu la yô, “gbem sha won” inja na ér u “tsôron.” (Orpasenkwagh 1:4) Ka kwagh u se fatyô u kaven ken asema ase er Aôndo ndera lun gbem sha won nahan la ga. Kpa, Yehova ngu a mhii ga shi mkur kpaa una lu a mi ga. (Habaku 1:12) Una zer lun uma gbem shi una zer wan iyol keghen a kegh u wasen se kpaa.
9. Orpasalmi tese ér anyom dubu a mlu uma u uumace la nga kwagh môm a nyi?
9 Yange i mgbegha orpasalmi nahan a tese ér anyom dubu a mlu uma u uumace la nga kwagh môm a anshighe u kpuaa sha mlu u Orgban u tsôron la. Yange ngur ôron kwagh a Aôndo yô, a kaa ér: “Ka U gema or, nan hingir vuulevu; U kaa wer: Hide nen ijime, ne ônov mba iorov! Gadia anyom dubu her a We yô, nga er sev mbu nyenev mbu mbu kar la yô, man er mkorutu môm nahan.” —Pasalmi 90:3, 4.
10. Aôndo ne or “hingir vuulevu” nena?
10 Or ka nan kpe, nahan Aôndo a na “nan hingir vuulevu.” Inja na yô, or ka nan hide hen “vuulevu” er ka ihundu shin inya i i kengese í, shin waarawa nahan. Inja na yô, Yehova kaa ér: ‘Hide yem hen inya i yange i tôô i er u min la.’ (Genese 2:7; 3:19) Kwagh ne ngu sha ityough ki hanma or cii—oragee shin isheeror, orinyar shin icanor kpaa—gadia ma orumace u nan yen ne môm ‘u nana fatyô u paan anngô u nan, nan ngu je ga, shin u nan Aôndo kwagh u á paa nan a mi sha u ma nan lu uma gbem’ kpaa ga. (Pasalmi 49:6-9) Kpa doo se kpishi sha ci u ‘Aôndo na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron’ yô!—Yohane 3:16; Mbaromanu 6:23.
11. Hii nan ve se fatyô u kaan ser kwagh u a lu shighe u gôgônan hen avese la gema ka ivurugh ki shighe hen Aôndo?
11 Mtse u Metusela tsa anyom 969 la je kpa kuma iyange i môm sha ishigh ki Aôndo ga. (Genese 5:27) Anyom dubu her Aôndo nga er sev mbu nyenev mbu mbu kar la nahan—ka iaven i lun di ahwa 24 tsô—zum u ka mbua kar yô. Orpasalmi shi kaa ér anyom dubu nga her Aôndo er shighe u orkuran afo ka a hii mkor u her atôutu la nahan. (Mbaajiriv 7:19) Nahan kwagh u a lu shighe u gôgônan hen a vese la cii gema ka ivurugh ki shighe hen Yehova, Aôndo u gbem sha won la.
12. Aôndo ka a ‘kar a uumace kera’ nena?
12 Uma u orumace u hegen ne lihe kera ga kpishi je, ngu er u Aôndo ti u a lu gbem sha won nahan ga. Orpasalmi kaa ér: “Ka U kar a ve kera er ka sha ikuwanmnger nahan; ve mba er mnyam nahan, pepe yô, ve mba er toho u u menden yô; pepe yô, ka u mende doo doo, u vese, aikighe yô, i tôndo u kera, u use.” (Pasalmi 90:5, 6) Mose yange nenge ku u Mbaiserael dubu imôngo ken taaikyôngo, Aôndo “kar a ve kera” er ka sha ikuwanmnger nahan. I nger vegher u pasalmi la ér: “Ka U kar a ior kera ken mnyam ma kuugh.” (New International Version) Heela tseegh ga, mtse u uumace ngu “er mnyam” ma lihen ga yô—a kar un sha mnyam ma or ngu a yav tugh môm tseegh la.
13. Se mba er “toho u u menden” nahan nena, man gba u kwagh ne una bende a mhen wase nena?
13 Se mba ‘er toho u ka u mende pepe’ kpa aikighe yô mtsee u iyange la a na u kpe kera la nahan. Een, uma wase karen a kar er toho u ú use ken iyange i môm nahan. Sha nahan yô, de se vihi nen kwagh u injaa ne dang dang ga. Kpa, se ker nen gbendatesen u Aôndo, a̱ tese se er se yar tom a anyom ase a a mase shin ken tar ungun ne yô.
Yehova Wasen Se u ‘Ôron Ingeegh ki Ayange Ase’
14, 15. Pasalmi 90:7-9 kure sha Mbaiserael nena?
14 Orpasalmi shi seer ôron kwagh u Aôndo ér: “Se saa ishe sha ishima You i vihin, kondo se iyol sha iyugh You kpaa. U ver aferakaa ase sha ishigh Yough, asorabo ase a ken myer kpaa, U ver a ken iwanger i ishigh Yough. Gadia ayange ase cii nga karen been sha iyugh You, anyom ase nga karen been er ishimashirin nahan.” —Pasalmi 90:7-9.
15 Yange Mbaiserael mba banen a jighjigh mbara ‘saa ishe sha ishima i Aôndo i vihin’ la. Yange “kondo” ve ‘iyol sha iyugh na’ la shin ‘ishimavihin na la i cier ve iyol.’ (New International Version) Ajiraôron a Aôndo yange kôr mbagenev nahan i “tim ve ken ikôngo.” (1 Mbakorinte 10:5) Yange Yehova ‘ver aferakaa ve sha ishigh nagh.’ Yange na ve ibo sha ieren i bo i yange ve er ken igbar la, kpa ‘asorabo ave a ken myer la kpaa’ lu ‘ken iwanger i ishigh nagh.’ (Anzaakaa 15:3) Er yange ishima vihi Aôndo a Mbaiserael yô, ve mba geman asema ga mbara ‘anyom a ve kar bee er ishimashirin nahan.’ Nahan kape se kpa i lu la, uma wase ngôôr ga, ngu di er iôôn i ka se ôô i̱ due i̱ kar sha ityumbujôôgh yase er ishimashirin nahan la.
16. Aluer mbagen mba eren isholibo ken myer yô, kanyi kwagh i doo u̱ vea ere?
16 Aluer mô wase nana eren isholibo ken myer yô, se fatyô u yeren imba ieren la sha ashe a uumace sha anshighe kpuaa tseegh. Kpa akaabo a se eren ken myer la aa lu sha ‘iwanger i ishigh ki Yehova,’ shi aeren ase la aa vihi mlu wase a na kpaa. U se̱ hide ken mlu u lun vea Yehova ikyooso ikyooso yô, gba u se sôn mde u asorabo ase, shi se de u peren atindi, shi se ngohol iwasen i ken jijingi i mbatamen mba ken Kristu la a iwuese. (Anzaakaa 28:13; Yakobu 5:14, 15) Guda nahan a u ‘anyom ase karen been er ishimashirin,’ shi ishimaverenkeghen i lun uma gbem sha won la kpa hingir kwagh u ahen ahen la!
17. Ka mtse u tsan anyom a me a lu sha ci u ior jimin ciili, man anyom ase iv a nyi kwagha?
17 Sha kwagh u mtse u uumace mba ve yen mban ka ve tsa la yô, orpasalmi kaa ér: “Ayange a anyom a ase kuma anyom akunduatargber, man aluer ayol ase aa taver kpishi yô, a kuma akunduanyiin je; nahan kpaa ihagh i a yô, ka zayol man ishima i vihin, gadia nga a kar fefa, se kpaa se kar kera wase.” (Pasalmi 90:10) Mtse u tsan anyom 70 la ka sha ior jimin cii, man shighe u Kalebu lu anyom 85 la, a ter kwagh u agee na a taver la. Mbagen war kahan kposo, anza er Aron (123) man Mose (120) kua Yoshua (110) nahan. (Numeri 33:39; Duteronomi 34:7; Yosua 14:6, 10, 11; 24:29) Kpa kov u banen a jighjigh ú yange ú due ken Igipiti la, ú mba ve kuma anyom 20 man mba ve hemba nahan la yô, ve kpe ken atô u anyom 40. (Numeri 14:29-34) Ainge ne kpa, mtse u ior ve tse ku ken ityar kpishi la ka kwagh môm a anyom a orpasalmi yange na la. Anyom ase iv a “zayol man ishima i vihin.” Ka a kar kera fele, “se kpaa se kar kera wase.”—Yobu 14:1, 2.
18, 19. (a) Ikyav i u ‘ôron ingeegh ki ayange ase sha u sé zua a ishima i fan kwagh’ la ér nyi? (b) U se yaren tom a kwaghfan la una mgbegha se u eren nyi kwagha?
18 Ka been yô, orpasalmi wa icam wener:“Ka an nan fe agee a ishimanyoon Youwe? kua iyugh You i sha inja i mciem ma ma kom u á cia U laa? Tese se se̱ fa er i doo u ma se ôr ingeegh ki ayange ase sha u sé zua a ishima i fan kwagh yô.” (Pasalmi 90:11, 12) Mô wase tsô kpa nan fa agee a ishimanyoon i Aôndo ga shin er iyugh na i lu kpaa ga, nahan kwagh ne a̱ seer mciem ma se cian Yehova sha icivir la. Kwagh la jim je yô, a mgbegha se u pinen un sha u a̱ pase se se̱ “fa er i doo u ma se ôr ingeegh ki ayange ase sha u sé zua a ishima i fan kwagh yô.”
19 Kwaghôron u orpasalmi la ka msen u sônon ér Yehova a̱ tese ior nav er vea yar tom a kwaghfan sha akaa a a gbe ve la man sha u yaren tom a ayange ve aa a mase shin la sha u eren kwagh sha gbenda u Aôndo a soo la. Ishimaveren i tsan anyom 70 la ngi a ishimaverenkeghen i lun a ayange a kuman er 25,500 nahan. Anyom ase aa lu nan je kpa, ‘se fa er kper uma wase una lu ga. Gadia se mba tulugh u ka a due i nenge a mi sha ashe kpeghee maa a shi a sambe kera ne.’ (Yakobu 4:13-15) Er ‘shighe man aikor ve ve sha gbenda wase cii’ yô, nahan se fatyô u ôron anyom a se mase tsan la ga. Nahan de se sôn nen i̱ na se kwaghfan sha er se hendan a ameen shi se er a mbagenev sha inja shi hii hegen je se lu eren Yehova tom sha afatyô wase cii yô—nyian je! (Orpasenkwagh 9:11; Yakobu 1:5-8) Yehova yaren tom a Mkaanem nam man jijingi na man nongo na sha u hemen se. (Mateu 24:45-47; 1 Mbakorinte 2:10; 2 Timoteu 3:16, 17) U yaren tom sha kwaghfan la mgbeghan se u ‘vanden keren Tartor u Aôndo’ shi yaren tom a ayange ase sha gbenda u ua va Yehova a icivir shi ua na un msaanyol yô. (Mateu 6:25-33; Anzaakaa 27:11) Nahan kpa, u civir un a ishima i môm la una bee a mbamzeyol asev cii ga, kpa gem ne se iember i vesen je ka u henen a hen ga.
Averen a Yehova Nga Ne Se Iember
20. (a) ‘Mhôônom ma ker’ Aôndo sha nyi gbenda? (b) Aluer se er kwaghbo tsung kpa se tese ser mimi je se gema ishima yô, Yehova una er a vese nena?
20 A lu kwagh u dedoo kpishi aluer se mba a iember ken uma wase cii yô! Sha gbar ne yô, Mose zamber ér: “TERE, hide, shi nan je? mhôônom ma̱ kôr U a mbayev Ou. Na erdoo Wou [shin, dooshima wou u sha ishima i môm la] a̱ kuma se pepe, sha er sé ember, á saan se iyol sha ayange ase cii yô.” (Pasalmi 90:13, 14) Aôndo eren kwagh ken mtsum ga. Nahan cii kpa, ‘mhôônom ma ker’ un shi ka ‘a de’ iyugh na man u nan mtsaha shighe u mba eren akaabo ve ongo icintan na ve gem anza a ve man aeren a ve yô. (Duteronomi 13:17) Nahan aluer se er kwaghbo tsung kpa se tese mgemshima sha mimi yô, Yehova una ‘na erdoo na una kuma se,’ shi se lu a ityôkyaa i “sé ember” yô. (Pasalmi 32:1-5) Man aluer se dondo gbenda u perapera la yô, erdoo u Aôndo una lu sha avese man a fatyô u “saan se iyol sha ayange ase cii”—een, sha ayange a uma wase cii.
21. Kanyi kwagh alaghga yange Mose lu sônon ken mkaanem ma i nger ken Pasalmi 90:15, 16 laa?
21 Orpasalmi er msen sha gbashima ér: “Na, i̱ saan se iyol er sha ayange a U na se ican la nahan vough, man er anyom a kwaghbo a tser se la nahan. Tom Wou ma u dugh ken igbar hen mbayev Ou, man iengem You kpaa sha ônov vev.” (Pasalmi 90:15, 16) Alaghga Mose yange lu sônon ér Aôndo a̱ ver Mbaiserael doo doo a iember, i̱ zua vough, shin i̱ tsa vough er ayange a ve ya ican man anyom a yange kwaghbo tser ve la nahan. Yange sôn ér “tom” u Aôndo ú veren Mbaiserael doo doo la ma u dugh ken igbar hen mbayev Nav shi iengem Na ma i dugh sha ônov vev shin tsombor ve kpaa. Aluer se mba eren msen sér averen a̱ sen sha uumace mbà ungwan tindi ken tar u he u ityendezwa i Aôndo la yô, a lu shami vough se lu eren ye.—2 Peteru 3:13.
22. Sha kwagh u Pasalmi 90:17 la a kaa yô, se er shami sha u sônon nyi ken msene?
22 Pasalmi 90 kure sha zamber ne ér: “Mdoom ma TER Aôndo wase, ma̱ lu a vese; taver tom u ave ase sha a vese, een, tom u ave ase la, taver u.” (Pasalmi 90:17) Kwaghôron ne tese ér se lu eren shami vough aluer se sôn ser Aôndo a̱ ver iniôngon yase ken tom na la doo doo yô. Er se lu Mbakristu mba i shigh ve mkurem mbara shin akar a ve, mba ve lu “iyôngo igen” la nahan, ka se ember e̱r “mdoom ma TER Aôndo” ma lu sha a vese yô. (Yohane 10:16) Ka i saan se iyol er Aôndo a “taver tom u ave ase” se mbayôôn angwe u Tartor ne sha igbenda igen ne je zua ga!
De Se Za Hemen u Ôron Ayange Ase
23, 24. Se zua a iwasen sha u gbidyen kwar sha Pasalmi 90 la nena?
23 Doo u kwar u gbidyen sha Pasalmi 90 la ua seer msuur wase u se suur sha Yehova u a lu “ijiir yase i teman” la. U gbidyen kwar sha mkaanem ma i nger sha mlu u uma la una na se kav er kwagh a gbe sha gbendatesen u Aôndo sha er se ôr ayange ase yô. Shi aluer se taver ishima se ker kwaghfan u a dugh sha la shi se yar tom a mi yô, se fa je ser se zua a erdoo u Yehova kua iveren na.
24 Yehova una za hemen u tesen se er se ôr ingeegh ki ayange ase yô. Man aluer se lumun ityesen na yô, se fatyô u zan hemen u ôron ingeegh ki ayange ase zan zan gbem sha won. (Yohane 17:3) Aluer ka u se ver uma u tsôron sha ishigh yasegh yô, saa Yehova una lu ijiir yase i yeren. (Yuda 20, 21) Er se va nenge ken ngeren u a dondo ne nahan, i pase ishember ne ken igbar ken mkaanem ma Pasalmi 91 ma má lu ma taver or ishima la.
Ú Na Mlumun Wer Nyi?
• Yehova ka “ijiir yase i teman” nena?
• Hii nan ve se fatyô u kaan ser Yehova we ago iyol u wasen se hanma shighe?
• Yehova wasen se u ‘ôron ingeegh ki ayange ase’ nena?
• Kanyi ka i na ve i “saan se iyol sha ayange ase cii”?
[Study Questions]
[Picture on page 9]
Yehova yange lu Aôndo “er i lu a due a iwo ken igbar ga” la je
[Picture on page 10]
Hen Yehova yô, mtse u Metusela tsa anyom 969 la yange yina iyange i môm
[Pictures on page 12]
Yehova “taver tom u ave ase” la