Mbakristu Mba Mimi Cii Ka Mbaivangeli
Mbakristu Mba Mimi Cii Ka Mbaivangeli
“Wa TER icam, wuese iti Na, pase kwagh u myom Na ayange ayange.”—PASALMI 96:2.
1. Ka loho u dedoo u nyi i gbe u ior vea ungwa, man Mbashiada mba Yehova tese ikyav i dedoo sha u samber a loho ne nena?
SHA mimi yô, shin tar ú uaahe ve eren hanma iyange ne nahan, u fan ér kera shi ica ga tsô ityav man ifer man ijen kua mkighir kpaa vea kar kera er Bibilo i ôr nahan la, ka kwagh u nan ishimasurun kpishi. (Pasalmi 46:9; 72:3, 7, 8, 12, 16) Sha kpôô yô, ka loho u dedoo ú í doo u hanmaor ma nan ongo ne gaa? Mbashiada mba Yehova hen nahan. Í fa ve hanma ijiir cii ér ka mbapasen “loho u dedoo.” (Yesaia 52:7) Sha mimi yô, i tôv Mbashiada kpishi a ican sha ci u gbashima u ve lu a mi u pasen loho u dedoo ne. Kpa kwagh u mkpeyol u ior gba ve ishima tsung. Man Mbashiada tese ishimatseen man ishimawan je gande ôron!
2. Ityôkyaa i môm í í ne ve Mbashiada mba Yehova ve lu a ishimatseen yum nahan yô kanyi?
2 Ishimatseen i Mbashiada mba Yehova ve lu a mi nyian ne, i zua sha i Mbakristu mba sha derianyom u hiihii la. Pipa i tôôn abaver i̱ mba Roman Katoliko i̱ í yer ér L’Osservatore Romano la i̱ ôr sha kwagh u Mbakristu mbara vough nahan ér: “Yange a̱ eren Mbakristu mba hiihii mbara batisema a̱ been je tsô maa, ve tôô ér ka tom ve u samber a Ivangeli. Ikpan yange i samber a Ivangeli ne sha ijô i ior.” Kanyi i̱ ne ve Mbashiada mba Yehova ve lu a ishimatseen imba i Mbakristu mba tsuaa mbara kpa yange ve lu a mi yum laa? Hiihii yô, ka sha ci u loho u dedoo u ve pasen ne due hen Yehova Aôndo iyol na. Ma ityôkyaa i í hembe doon ngi i or a lu a ishimatseen kpa? Kwaghpasen ve ne, ka u vengese mkaanem ma orpasalmi man, ér: “Wa TER icam, wuese iti Na, pase kwagh u myom Na ayange ayange.”—Pasalmi 96:2.
3. (a) Ka ityôkyaa i sha uhar i nyi i ne ve Mbashiada mba Yehova ve lu a ishimatseen yumu? (b) “Myom [u Aôndo]” la wa nyi man nyi kere?
3 Mkaanem ma orpasalmi la shi ma umbur se ityôkyaa i sha uhar í í ne ve Mbashiada mba Yehova ve lu a ishimatseen yum yô. Loho ve la ka loho ú myom. Ior mbagen mba eren tom u twersôron shin tom u sôron mtem u ior shin tom kpenga shin ityom igen sha u vea nôngo i̱ lu uumace mbagenev guda, man uiniôngon mbara nahan kuma iwuese. Nahan kpa, nyityô kwagh i̱ orumace nana fatyô u eren sha ci u orgen cii ngu kpuaa tsô, aluer se tôô se kar sha “myom [u Aôndo]” la yô. Yehova una yima mbaasemaleghlegh ken isholibo man angev man ku kera, sha ikyev i Yesu Kristu. Mba vea zua a mtsera ne vea lu uma gbem sha won! (Yohane 3:16, 36; Mpase 21:3, 4) Nyian ne, myom ngu ken akaa “a kpilighyol” á Mbakristu ka ve umbur shighe u ve lu timen sha mkaanem man yô, ér: “Pase akuraior iengem [i Aôndo], man akaa a Na a kpilighyol kpaa hen ior cii. Gadia TER hemba cii, A kuma iwuese kpishi je, A hemba cier iyol a mbaaôndo mbagenev cii.”—Pasalmi 96:3, 4.
Ikyav i Tesen i Ter La
4-6. (a) Ka ityôkyaa i sha utar i nyi Mbashiada mba Yehova ve lu a ishimatseene? (b) Yesu yange tsee ishima sha tom u kwagh pasen nena?
4 Mbashiada mba Yehova mba a ityôkyaa i sha utar i í ne ve ve lu a ishimatseen yô. Mba dondon ikyav i Yesu Kristu yange ver la. (1 Peteru 2:21) Or u vough ne yange ngohol tom u i na un ér a̱ ‘yôô Loho u Dedoo hen mbaatsanev’ la a ishima na cii. (Yesaia 61:1; Luka 4:17-21) Sha nahan yô, a hingir orivangeli, inja na yô ka or u yôôn loho u dedoo ne je la. Yange zende tser tar u Galilia man u Yudia la cii, lu “ôron Loho u Dedoo u tartor.” (Mateu 4:23) Man er yange fa wener ior kpishi vea ngohol loho u dedoo la yô, a kaa a mbahenen nav ér: “Sunda ngee je, kpa mbasundan yô, mba di kpeghee tsô. Nahan yô, sôn nen Ter u sunda, A̱ tindi mbatomov ken sunda Na.”—Mateu 9:37, 38.
5 Yesu yange tese mbagenev u lun mbaivangeli, di er yange er msen nahan. Ka ze deghôô yô, a tindi mbaapostoli nav ve tseegh, shi a kaa a ve ér: “Za, za ôr nen kwaghaôndo, kaan nen ner: Tartor u Sha mgbôghom ve.” Yange ma hemba lun a inja luun er yange vea er akaa a panden mzeyol u ior u sha ayange la yôô? Shin yange ma ve nyôr pati u eren sha u vea nôngo a bee a ingyatu i yange i dumbur sha shighe shon yum laa? Ei. Kpa Yesu yange gema ver ikyav i vough sha ci u Mbakristu mbaivangeli cii zum u a kaa a ve ér: “Za, za ôr nen kwaghaôndo” la.—Mateu 10:5-7.
6 Ken masejime yô, Yesu shi tindi mbahenen mbagenev ér ve̱ za yôô ér: “Tartor u Aôndo mgbôghom” ve. Yesu yange ember kpishi zum u mbahenen mbara hide va ôr un mzehemen u ve zua a mi ken ivangeli ve la yô. A er msen wener: “M ngu sughun We, Tere, Ter u Sha man tar, sha er U yer mbafankwagh man mbakavenkwagh akaa ne, kpa U gem U pase anikundanev a yô.” (Luka 10:1, 8, 9, 21) Mbahenen mba Yesu, mba ngise ve lu mbakôronishu man mbasulev shi mba eren ityom igenegh kpaa kpoghuloo la, lu u a tôô ve a kar sha mbahemenev mba kwaghaôndo mba ikyurior la yô, vea lu er ka anikundanev nahan. Nahan cii kpa, yange i tese mbahenen mbara u pasen loho u dedoo ú hemban doon cii la.
7. Er Yesu yange kôndo yem sha kera yô, ka hen unô mbahenen nav yange ve hii pasen loho u dedoo nee?
7 Yesu yange kôndon yemen sha cii yô, mbadondon un za hemen u samber a loho u dedoo u myom ne her. (Aerenakaa 2:21, 38-40) Ka unô yange ve hii pasen ve kwagha? Yange ve za hen akuraior a á fe Aôndo ga laa? Ei, yange lu ken tar u Iserael ve hii pasen kwagh ye, hen ior mba ve vande fan Yehova je hemba anyom 1,500 la. Yange ve lu a ian i pasen kwagh ken tar u í lu vanden civir Yehova kera laa? Een. Yesu yange vande kaan a ve wener: “Né lu mbapasen kwagh Wam ken Yerusalem man ken Yudia cii kua Samaria kpaa, zan zan á ar ken ikighir i tar je.” (Aerenakaa 1:8) Yange gba kpee u Iserael una ungwa loho u dedoo ne di vough er ikurior igen nahan.
8. Mbashiada mba Yehova mba dondon ikyav i mbadondon Yesu mba sha derianyom u hiihii la nyian nena?
8 Nyian kpaa, kape Mbashiada mba Yehova ve pasen kwagh sha tar cica cii je la. Mba ken ijoughave á ortyom u yange Yohane nenge a na lu a “Icôronloho u Dedoo u yôôn hen mba ve tem shin tar cii, hen hanma ikurior man hanma nongo man hanma zwa man hanma nongoior” la. (Mpase 14:6) Ken inyom i 2001 la, yange ve er tom ne taveraa ken ityar 235 man avegher kposo kposo, kua ken ityar i i nengen ér ka i Mbakristu la kpaa. Aluer Mbashiada mba Yehova mba pasen kwagh sha ajiir a Mbakristu Mbaaiev ve vande timin ayou a aduagh yô, ka kwagh u shami ve lu eren ga shinii? Mbagen kaa ér ka kwagh u shami ga, man alaghga je yô vea nenge ér imba tom ivangeli la ka “iyôngo i iin.” Nahan cii kpa, Mbashiada mba Yehova umbur mhôônom ma yange Yesu zungwe Mbayuda mba sha ayange na mba yange ve hide a ayol ave ijime la. Er yange ve lu a upristi nahan kpaa, Yesu de a de ga je pase ve loho u dedoo. Yange “mhôônom kôr Un a ve tsung, sha ci u i tumbul a ve, ve sambe wuee er iyôngo i i lu a orkuran i ga nahan.” (Mateu 9:36) Aluer Mbashiada mba Yehova zua a ior mba hiden a ayol ijime mba ve gem ve fe kwagh u Yehova shin Tartor na ga kpa, ve̱ nyume ve loho u dedoo sha ci u ma kwaghaôndo senge ér ior mbara mba sha ikyev na yum he? Aluer se dondo ikyav i tesen i mbaapostoli mba Yesu la yô, se na ikyar ser, ei. Ka u a pase loho u dedoo ne hen “akuraior cii,” a msange shio keng.—Marku 13:10.
Mbakristu mba Tsuaa Mbara Cii Yange Ve Pasen Ivangeli
9. Ka unô ken Tiônnongo u Kristu u sha derianyom u hiihii la yange ve lu uwegh ken tom kwaghpasene?
9 Ka unô yange ve lu uwegh ken tom u kwaghpasen sha derianyom u hiihii laa? Ikyav tese ér Mbakristu cii yange ve lu mbaivangeli. Orngeren W. S. Williams kaa wener: “I er shiada ér Mbakristu mba ken ucôôci i̱ tsuaa la cica cii . . . yange ve lu pasen ivangeli.” Bibilo ôr sha kwagh u akaa a yange er sha iyange i Pentekosti u ken inyom i 33 S.W. la ér: “Ve cii [nomso man kasev] i iv ve a Icighan Jijingi, ve gba ôron kwagh ken ijô igen er Jijingi na ve u ôron yô.” Nomso man kasev man ikyaior man mbabeenyol man kpan kua wan kpaa yange ve lu mbaivangeli. (Aerenakaa 1:14; 2:1, 4, 17, 18; Yoel 2:28, 29; Mbagalatia 3:28) Yange tôvacan ne Mbakristu kpishi mba yevese mba dugh ken Yerusalem kera yô, “ve mba i sambe ve la yô, ve yem han han, ve lu yôôn loho u dedoo.” (Aerenakaa 8:4) “Ve mba i sambe ve la” cii yange ve lu mbaivangeli, i tsua a tsua asande ken ave ga.
10. Cii man i tim msertar u Mbayuda la yô, ka ityom ihiar i nyi yange i er i kuree?
10 Kwagh ne yange lu mimi nahan sha ayange a tsuaa la cii. Yesu yange ôr kwaghôron u profeti wener: “Loho u dedoo u tartor ne yô, á ôr u a tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:14) Ken m-iv u mkaanem mara ken derianyom u hiihii la, yange i pase loho u dedoo i samber a ú wuee cii ve akumautya a Mbaroma mase va timin hemen u kwaghaôndo u Mbayuda man msertar ve la ye. (Mbakolose 1:23) Heela tseegh ga, mbadondon Yesu cii yange ve ungwa tindi u a wa ve la, yange kaa a ve ér: “Nahan yô, za nen, za gema nen akuraior cii a̱ hingir mbahenen, eren nen ve batisema ken iti i Ter man Wan man Icighan Jijingi, tesen nen ve u kuran akaa a M we ne kwagh sha mi cii.” (Mateu 28:19, 20) Mbakristu mba tsuaa mbara yange ve taver mbaasemaleghlegh ishima ér ve̱ na Yesu jighjigh tsô, maa ve de ve ér ve̱ civir Aôndo sha er ve nenge i doo ve la er mbapasenkwagh mbagenev ve eren ainge nahan la ga. Kpa yange ve gema ve tese mbahev mbara ér ve kpa ve̱ hingir mbahenen mba Yesu, shi ve kohol ve ve ver ken atôônanongo shi ve tese ve sha er ve kpa vea pase loho u dedoo vea gema mbagenev di kpa vea hingir mbahenen yô. (Aerenakaa 14:21-23) Ka gbenda u Mbashiada mba Yehova ve dondon nyian je la.
11. Ka unô ve lu a ci ken myee u loho u ú hembe doon cii ne hen uumace nyiana?
11 Mbashiada mba Yehova kpishi yem tom mishen ken ityar igen, mba dondon ikyav i Paulu man Barnaba kua mbagenev mba sha ayange a tsuaa la. Tom ve la va a mtsera hen ior kpishi, gadia ve nyôr iyol eren pati ga, shi ve kaha ve undu tom u i ne ve u pasen loho u dedoo la sha igbenda igenegh kpaa ga. Ve gba dondon dondon tindi u Yesu yange wa ve la je, wener: “Za, za ôr nen kwaghaôndo.” Nahan kpa, ka Mbashiada mba Yehova cii ve lu mbamishen ken ityar igen ga. Ve mbagen kpishi mba eren ityom i sha tôndo sha u keren ime-mnger, shi mbagenev mba zan imakeranta her ave. Mbagenev mba yesen ônov. Kpa Mbashiada mba Yehova cii mba er mbagenev loho u dedoo ú i tese ve ne. Ikyaior man mbabeenyol kua nomso man kasev cii ka ve dondo kwaghwan u Bibilo i nger heen ne a iember, i kaa ér: “Yôô kwaghôron Na wa iyol sha mi keghen a kegh, a lu sha ian i doon, shin a lu sha ian i doon ga kpaa.” (2 Timoteu 4:2) Mba zan hemen “gban uwer ga, sha u tesen man u ôron ken tempel man ken uya er Yesu ka Kristu,” di vough er akar a ve a sha derianyom u hiihii nahan kpa yange er nahan. (Aerenakaa 5:42) Mba yôôn loho u ú hembe doon ne cii hen uumace.
Ka u Tan Ior Ave Ikyôr Ér Ve̱ Gema Ishima Shin Ka u Pasen Ivangeli?
12. U geman ior asema la kanyi, man í gema nengen ieren shon nena?
12 Ainge ne, mbagenev mba kaan ér u geman ior asema la ka kwagh bo. Ngeren u Mzough u Ucôôci sha Tar Cii a nger la je yô ôr kwagh u “isholibo i geman ior asema la.” Ityôkyaa yô ér nyi? Ngeren u í yer ér, Catholic World Report la kaa nahan ér: “Sha ci u ahôn a gban á côôci i í yer ér Orthodox la i̱ zer gban ngeegh la na yô, i gema inja i ishember i ‘geman ior asema’ la hingir u geman ior asema sha mkighir.”
13. Ka akav a nyi nahan a lu a tesen mgem u geman ior asema u a bulan or laa?
13 U geman ior asema la ka kwagh u bulan ioroo? Una fatyô u lun kwagh u bulan ior. Yesu yange kaa wener mgem u mbangeren man Mbafarishi yange ve geman ior asema la yange lu kwagh u bulan mba yange ve gema ve asema la. (Mateu 23:15) Sha kpôô yô, “u geman or ishima sha mkighir” la ka sha mi ga. Ikyav i tesen yô, Josephus, or u timen sha akaa a mbayiase kaa ér yange John Hyrcanus u Maccabee hemba ior i Idumea tahav ve hingir sha ikyev na cii yô a kaa a ve wener, un “na ve ian ér ve̱ lu ken tar ve heregh, aluer i tsôngo ve shi ve lumun u kuran atindi a Mbayuda yô.” Yange lu u aluer ka u ior i Idumea ia lu sha ikyev i hemen u Mbayuda yô, saa vea dondo mciviraôndo u Mbayuda kpa keng je. Mbatimen sha akaa a Mbayiase pase se ér, ken derianyom u sha anigheni S.W. la, Charlemagne hemba ior i Saxon i fanaôndoga i i̱ lu vegher u ken imbusutarimese i tar u Yuropa la ityav, maa a kighir ve sha igyosough ve gema asema. * Kpa mgemshima u ior i Saxon shin u ior i Idumea la yange lu u mimi je kpa? Ikyav i tesen yô, Tor Herode u Idumea—un shon u yange nôngo ér una wua ankyundan Yesu la—yange kuran atindi a Aôndo yange na sha ikyev i Mose la inyô?—Mateu 2:1-18.
14. Mbamishen mbagenev ken Mbakristu Mbaaiev mba ve kighir ior ér ve̱ gema asema nena?
14 Mba gem ior asema sha mkighir nyianaa? A fatyô u kaan ér mbagenev mba gem sha mkighir. I kaa ér mbamishen mbagenev ken Mbakristu Mbaaiev ka ve tindi mba ashe a ver ikyôr inja er vea gema asema la makeranta ken ityar i ken won. Gayô, alaghga vea kighir or u yevese ityav u ijen i ker nan kpoghuloo la nana tema a ungwa kwaghpasen, sha er nana zua a ivulugh ki kwaghwan yô. Sha kwaghôron u yange i due a mi ken inyom i 1992 sha mkohol u Upristi Mbatamen mba kwaghaôndo u i yer ér Orthodox la yô, “ashighe agen ka i gema ior asema sha u meen ve sha inyar, shi kwa gen di i lu sha igyosough.”
15. Sha mkav u i lu a mi ainge sha ishember i or geman orgen ishima la yô, Mbashiada mba Yehova mba gem ior asemaa? Na mpase.
15 U kighir ior ér ve̱ gema kwaghaôndo ve la, ka kwagh u shami ga. Sha mimi yô, Mbashiada mba Yehova mba eren imba kwagh la ga. * Sha nahan yô, mba kighir a kighir ior a mgemshima er i kav ishember la ainge la nahan ga. Kpa, ka ve pase hanma or cii loho u dedoo, di er Mbakristu mba sha derianyom u hiihii la yange ve eren nahan. Or u ka nana̱ kar a ishima i nan nana̱ ungwa ú yô, i lôhô nan ér nana̱ seer zuan a mfe sha u henen Bibilo. Ambaaior a á lu a isharen nahan la cii ka á na jighjigh, man jighjigh u nan ve la ka a har sha mfe u vough u ve zough a mi ken Bibilo la, man sha Aôndo man mbaawashima nav. Sha nahan yô, mba yer sha iti i Aôndo i Yehova la, sha u a̱ yima ve. (Mbaromanu 10:13, 14, 17) Ka ve vea tsua ayol a ve u ngohol loho ne shin vendan u ngohol ú ye. Mba kighir or ga. Luun er vea kighir ior yô, mgemshima ma a lu gbilin kwagh je. Saa mcivir wase la una due ken ishima yase keng ve Aôndo una lumun un ye.—Duteronomi 6:4, 5; 10:12.
Tom Ivangeli u sha Ayange Ne.
16. Tom u ivangeli ú Mbashiada mba Yehova seer sha ayange ase ne nena?
16 Sha ayange ase ne cii, Mbashiada mba Yehova pase loho u dedoo u Tartor ne sha u seer ivin mkaanem ma i nger ken Mateu 24:14 la. Ikyagh ki tomough ki vesen ki ve yaren tom a mi ken ivangeli ve yô, ka magazin u i yer ér Iyoukura la. * Shighe u i hii duen a ngeren u Iyoukura ken inyom i 1879 la, yange i samber a magazin shon kuma ingyegh er 6,000 nahan ken zwa môm tseegh. Kpa ken inyom i 2001 la, er anyom kar je hemba 122 nahan yô, i samber a mi je ar ukôpi 23,042,000 ken ijô 141. Kape tom ivangeli u Mbashiada mba Yehova la kpa ú lu seer kwagh môm a ingyegh kira yemen kpera kpe kpera je la. Tôô ase ahwa a yange lu udubu kpuaa tseegh á yange i pase kwagh sha hanma inyom ken derianyom u sha 19 la kar sha ahwa 1,169,082,225 a yange i er tom u kwaghpasen ken inyom i 2001 la tsô ú nenge. Shi time ase sha iyenge i ior 4,921,702 mba aluer i kar kwar vough yô, yange i tese ve Bibilo gbilin hanma uwer la. Tomshiren ne yange ú lu kpegh ga cii! Man yange lu mbapasenkwagh taveraa mba kuman er iorov 6,117,666 nahan yange ve er tom ne ye.
17. (a) Ka mbaaôndo mbaaiev mba nyiiv nahan i civir nyiana? (b) Aluer or nan lamen nyityô zwa shin nan due ken nyityô tar shin nana̱ lu ornyar shin icanor kpaa, kanyi i gbe u hanma or cii nana fa?
17 Orpasalmi yange kaa ér: “Mbaaôndo mba iorov cii ka agbilinakaa tsô, kpa TER gba Usha.” (Pasalmi 96:5) Ken tar u ainge ú kwagh a fe gban ú sha mciviraôndo yum ga ne, ior gema civir tar ve man ieev mbi tesen ikyav i tar ve man mbaduenati, kua inyaregh jim je kpaa. (Mateu 6:24; Mbaefese 5:5; Mbakolose 3:5) Mahandas K. Gandhi yange kaa wener: “M na jighjigh mer . . . ior i Yuropa nyian mba Mbakristu ken iti tseegh. Sha jighilii yô, ka inyaregh ve civir ye.” Kpa kwagh u a lu jighilii yô, gba u ior vea ungwa loho u dedoo ne hanma ijiir cii. Gba u hanmaor cii nana fa Yehova man mbaawashima nav, nana̱ lamen nyityô zwa shin nana̱ lu or u ken nyityô tar shin nana̱ lu ornyar shin icanor kpaa. Ka ishimaveren yase ser ior cii ma ve vengese mkaanem ma orpasalmi man, ér: “Na nen TER icivir man agee. Na nen TER icivir i i kom sha iti Na yô.” (Pasalmi 96:7, 8) Mbashiada mba Yehova ka ve wase mbagenev u henen fan kwagh u Yehova sha er vea na un icivir tsembelee yô. Man mba ve vengese yô ve zua a mbamtsera kpishi je. Ka mbamtsera mba nyi ve zough a mini? Se time sha akaa ne ken kwaghhenen u a dondo ne.
[Footnotes]
^ Sha kwagh u zegetakerada u pasen asemberakaa u i yer ér The Catholic Encyclopedia la a kaa yô, shighe u i yilan ér Msér u Akaa la, yange i yilan mkighir u kighir ior a kwaghaôndo la sha mkaanem man nahan, ér: Cuius regio, illius et religio (inja na yô, ér: “Or u nan hemen tar yô, ka nan kpaa nana tsua kwaghaôndo u ú ye.”)
^ Ken mkohol u Mzough u United States u Nengen sha Kwagh u Ian i Ior sha Tar Cii i Eren Kwaghaôndo u yange i kumba ken Novemba 16, 2000 la, orgen pase mkposo u mba ve kighir ior ér ve̱ gema ishima la, man tom u Mbashiada mba Yehova ve eren la. Yange kaa ér, Mbashiada mba Yehova ka vea pasen or kwagh yô, ve pase nan sha gbenda u aluer nan soo ga yô nana kaa ér “kwagh gbam sha mi ga,” maa nana wuhe hunda u nan yô.
^ Iti i magazin ne kpôô kpôô yô, ka Iyoukura U Yôôn Tartor u Yehova.
Ú Fatyô u Pasen Kpa?
• Er nan ve Mbashiada mba Yehova ve lu a ishimatseen sha tom ivangeli?
• Er nan ve sha ajiir a Mbakristu Mbaaiev ve tim ayou a aduagh je kpa Mbashiada mba Yehova ve pasenkwagha?
• Er nan ve Mbashiada mba Yehova ve lu mba kighir ior a mgemshima er i fe ishemberti shon ainge nahan la ga?
• Tom u ivangeli ú Mbashiada mba Yehova la vese sha ayange ase ne nena?
[Study Questions]
[Picture on page 19]
Yesu yange tsee ishima sha tom u ivangeli, shi yange tese mbagenev kpa u eren tom shon
[Picture on page 20]
Hanma or ken tiônnongo u sha derianyom u hiihii la cii yange nan wa uwegh ken ivangeli
[Picture on page 21]
U kighir ior ér ve̱ gema kwaghaôndo ve la ka shami ga