“Kwagh Ne Una Nyoon”

I lu nahan ú ungwa imba kwaghôron ne vee? Alaghga ortwer shin orwasen mbatwerev tom vande ôron we imba kwagh ne cii ve mase eren we twer u gba u á er ú la ye.

Alaghga yange ú venda twersôron shon sha ci u palegh mnyoon u i kaa la ga. Kpa ú wa ishima a mnyoon la sha er a lu ú guda ken hemen yô. Ashighe kpishi ka i hingir kwagh u sha ku u lumun shin vendan twersôron u u lu sha ishima yase ga yô.

Shin er i lu hanma shighe kwagh una gba se aa ortwer ga nahan kpa, er se cii se lu uumace mba se yen yô, gba u a tsaha se shi a kôôm se, shi aluer ka tsaha u ashighe agen alaghga ua nyoon se je kpaa. (Yeremia 10:23) Bibilo ôr var var e̱r i gbe u a tsaha mbayev yô, ér: “Lanegh kange wanye ken ishima, kpa kwagir u tsahan a mi ua zenda ku ua kende ica a nan.”—Anzaakaa 22:15.

Sha gbar ne yô, kwagir ka ikyav i tesen tahav mbu mbamaren ve lu a mi je la. Sha mimi yô, ka i kar a kar wanye nan soo tsaha ye. Aluer mtsaha la ka sha ma gbenda ugen yô, alaghga a doo ve u ngohol un ga. Nahan kpa, kwagh ka a̱ hemba gban mbamaren mba ve lu a kwaghfan man dooshima la sha mtsera u una due ken tsaha shon la, i̱ de lu ishimavihin i wan ve la ga. Mbamaren mba ve lu Mbakristu yô, ve fa ér kwagh u Mkaanem ma Aôndo ma er la ka u mimi, ma kaa ér: “Hanma mkôôm yô, sha shighe la ka i bee er ka kwagh u iember ga, kpa i lu kwagh u ijungwen, kpa ken masejime yô, ka a ume atam a perapera bem bem sha ci u mba i tsaase ve a tsaase sha mi la i var ve yô.”—Mbaheberu 12:11; Anzaakaa 13:24.

Nahan kpa, tsaha ngu sha ci u mbayev tseegh ga. Gba u a tsaha mbaganden kpaa. Ka kwagh u mbaganden Bibilo i̱ lu ôron ye, zum u i kaa nahan la, ér: “Kôr ityesen gbang gbang, de pasen i ga, waan i iko, gadia ka i i lu uma wou ye.” (Anzaakaa 4:13, 14) Een, ior mba ve lu a kwaghfan yô—mbayev man mbaganden—vea ngohol tsaha u ú har sha Bibilo, Mkaanem ma Aôndo la, sha ci u u eren nahan la una hingir u lun mkor u uma ve ken masejime.