Mbamaren—Kure Nen Ugbayol Mba Ônov Enev!

GBA u ônov vea zua a ityesen man tsaha u sha dooshima, hemban je yô hen mbamaren vev. Sha nahan yô, Tania Zagury u a lu ortesen ken tar u Brazil la, kaa ér: “Hanma anye yô msaanyol sar nan. Ka hange hange u a ver akighir. Ka mbamaren i lu u vea er kwagh ne ye. Aluer ve er nahan ga yô, ônov vea gande ave.”

Nahan cii kpa, ken ityar kpishi mlu u wan kwagh ikyo ga, u hanma or ka nan keren ian i nan lu a mi iyol i nan tseegh la, una na a taver kpishi u dondon kwaghwan u i we sha heen ne. Nahan, mbamaren vea zua a iwasen hana? Mbamaren mba cian Aôndo kav er ônov vev ve lu “dyako u TER A ne yô.” (Pasalmi 127:3) Sha nahan yô, ve ver ishima sha Bibilo, i̱ i̱ lu Mkaanem ma Aôndo la ér ma̱ tese ve u yesen ônov vev. Ikyav i tesen yô, Anzaakaa 13:24 kaa ér: “Or u nan ver akpa u nan gir gir yô, nan kôr wan u nan ihom; kpa u wan u nan a doo nan ishima yô, ka nan tsaha un sha gbashima.”

Ka u se kav inja i ishemberti i̱ “akpa,” i̱ Bibilo i̱ er kwagh sha mi ne, ér ka u gbidyen or tseegh ga; kpa i̱ tile sha ityough ki tsaha u nan sha hanma gbenda u i ne ú cii. Sha kpôô yô, alaghga kwaghôron u nduuluu la una lu kwagh u a lu hange hange sha u kôôm ihyembeato i anye je la. Anzaakaa 29:17 kaa ér: “Tsaha wan wou, tsô nana na u mmem ken ishima, een, nana na u iember ken ishima.”

Gba u a tsaha ônov sha dooshima sha er á dugh aeren a doon ga la ken a ve kera yô. Imba mkôôm u sha ishima i kangen man sha erdoo ne ka ikyav i tesen ér ormaren nan wa wan u nan ikyo. (Anzaakaa 22:6) Nahan yô mbamaren, taver nen ishima! Aluer se dondo kwaghwan u dedoo man u injaa u a lu ken Bibilo la yô, se er ishima i Yehova Aôndo, shi ônov asev vea na se icivir kpaa.