Mbampin mba Mbaôron Takerada Ne Ve Pin La

Kwase Kristu nana ver mtil sha mimi u nan hen Aôndo la vough, shi nana ungwan imo i nom u nan u a ne jighjigh ga la nena, aluer nan ngu ave ken ityom i umemyol mba ukwaghaôndo yôô?

A gba u nana lu a kwaghfan man mkav sha er nana er kwagh ne yô. Kpa aluer nana lu nôngon u veren ityom i ihiar i nan la vough yô, a lu kwagh u sha mi nana lu eren ye. Yesu yange wa kwagh sha imba mlu ne, ér: “Na nen Shisar akaa a a lu a Shisar yô, Aôndo kpaa na nen Un akaa a a lu a Aôndo yô.” (Mateu 22:21) Sha kpôô yô, yange lu ôron lu kwagh u ityom i i gbe u a er ugomoti, mba ken masejime yange i va kaa a Mbakristu ér ve̱ ungwan imo ve la. (Mbaromanu 13:1) Nahan kpa, kwaghwan na la zua sha kwagh u kwase ya veren ityom i nan hen Aôndo vough, shi ungwan imo i nom u nan er i kaa ken Ruamabera nahan la, aluer nan nan na jighjigh ga je kpaa.

Or môm u i hoghol nan a Bibilo nan ngu u nana nyiman ér í ôr kwagh u mtil u sha mimi sha hanma shighe la var var, ér ka tom u Orkristu hen Aôndo u Hembanagee la ga ze. (Aerenakaa 5:29) Nahan kpaa, ashighe kpishi or u civir sha mimi la nana fatyô u eren kwagh u or u nan jighjigh ga u nan lu a tahav la nan soo shin nan sôn la, kpa geman peren atindi a Aôndo a hemban la ga.

Se zua a ikyav i nan se ityesen sha kwagh u Mbaheberu mba utar la, er i pase ken takerada u Daniel ityough 3 nahan. Nebukadinesar, orvesen ve u ken gomoti la, yange yôô wener ve man ior mbagenev ve̱ za shin kpuun kpuun u Dura la. Alaghga yange a lu Mbaheberu mbautar mbara ape palegh u lun hen ijiir la, sha er yange ve kav e̱r i sôr i̱ ver ér á er mcivir u aie her yô. Alaghga Daniel yange fatyô u sônon ian sha ci na, kpa mba utar mbara yô ve fatyô ga. * Nahan ve za her a  ityough ki taver shio, kpa lu kwagh u vea nyôr iyol ker ga—shi ve venda—u lun iyol ken ma nyityô ieren i bo cii.—Daniel 3:1-18.

Kape sha ashighe a memyol kpaa, alaghga nom u nan ne jighjigh ga la nana soo shin nana kaa ér kwase Kristu na la nana er kwagh u a lu kwase la ape palegh je la. Nenge sha akav agen ne: A kaa ér kwase la a̱ jiidi inja kwaghyan igen sha iyange i̱ nana lu ember memyol vea mbagenev yô. Shin nan soo ér tsombor u nan (kua kwase u nan) ua za anmgbianev mba nan inya sha iyange la, sha er vea ya kwagh yô, shin sha ci u za sôron ve. Shin cii maa iyange i memyol la je kpa, alaghga nana kaa a kwase u nan ér sar nana yam nan akaa agen shighe u nan ze kasua la—akaayan a a lu sha ci u memyol shon la, man akaa a eren iyua a mi shin ikyatakerada i kangen iyua ker man ukaade mba una na aa uiyua nav mba shon yô.

Heen kpa, ka u kwase Kristu nana kange ishima sha er nana nyôr iyol ken aeren a kwaghaôndo u aie ga yô, kpa gema di akaa a nan sôn la ye? Ka un a lu orya ye, man Mkaanem ma Aôndo kaa ér: “Ne kasev, ungwan nen imo i noov enev er i doo ken Ter yô.” (Mbakolose 3:18) Sha avegher ne cii, nana fatyô u tesen m-ongo u kwase ungwan nom shi lun a mtil sha mimi hen Aôndo kpa? Gba u nana tsua e̱r nana ver m-ongo u ungwan imo i nom u nan la man m-ongo u hemban ungwan imo i Yehova la vough yô.

Ashighe agenegh yô, alaghga nom nana kaa a kwase u nan ér nana jiidi inja kwaghyan igen, alaghga ka sha ci u kwaghyan la doo un shin sha ci u ashighe nga a i hoghol un a kwaghyan la yô. A sar un u tesen dooshima hen nom na shi nan un civir i orya la kpaa. Nana fatyô u eren kwagh ne sha iniongo i memyol la aluer nom u nan soo ér nana̱ er nahan yôô? Alaghga kasev mbagenev mba ve lu Mbakristu vea fatyô u eren nahan a imoshima i dedoo, vea nenge kwagh ne ér ka tom ve u yôron hanma iyange la. Sha mimi yô, Orkristu u nan til sha mimi nan ngu u nana tôô kwagh u ma memyol nana magh sha kwagh ne ga, shin aluer nom u nan tôô ér ka nahan je kpaa. Kape alaghga nana soo ér kwase u nan a̱ lu vea nan, sha ashighe kposo kposo a nan ze hen anmgbianev mba nan ken hanma uwer shin hanma inyom je la. Nana fatyô u eren nahan aluer ka sha iyange i memyol la je kpaa yôô? Shin ka u nana yam hanma kwagh u a soo la, a u keren u fan kwagh u nom u nan a we ishima ér una er a akaa a nan ze kasua nan za yam un la shio?

Kpa, kwase Kristu nana̱ hen sha er kwagh ne una bende a mbagenev la. (Mbafilipi 2:4) A lu nan ape palegh u eren ma kwagh u a tese ér nan ngu ave ken memyol la yô, di er alaghga Mbaheberu mba utar mbara kpa yange á lu ve ape mbagenev ve̱ de nengen a ve zan shin kpuun kpuun u Dura la ga nahan. Nahan alaghga nana lam a nom u nan sha kwaghfan sha er nom u nan la nana er akaa a á bende a memyol la iyol i nan, sha u tesen ikyo i wan sha er i lu nan ken ishima la, man sha er nana lu a kwase u nan lu a dooshima man icivir sha nan yô. Alaghga nom la una nenge ér ityôkyaa ngi i za zeren ayôôso a kwase u nan ga, aluer ka u nana venda u nyôron iyol ken aeren a kwaghaôndo u aie yô. Een, iliam i í vanden lamen tsuaa la, a doo ga ia sôr kwagh ne ken bem.—Anzaakaa 22:3.

Kohol cii yô, ka u Orkristu nana gbidye kwar sha hanma kwagh cii man nana tsua kwagh u nana er la ye. Gba u a vande wan imo i Aôndo ikyo hiihii, di vough er Mbaheberu mba utar mbara yange ve er nahan. (Mbakorinte 10:31) Kpa Orkristu la nana faan kwagh ne nana luun a mi ken ishima yô, ka nan iyol i nan nana tsua akaa a a lu a sha mi a nana fatyô u eren sha kwagh u or u nan lu a tahav hen tsombor shin hen ityô i nan soo la ye.

[Footnote]