A Beeyol Gande u Henen Kwagh Ga

I MAR Kseniya ken inyom i 1897. Yange lu a ônov mbakasev u 3, man wannomso môm, kua ônov mba ônov nav 15, man ônov mba ônov mba ônov nav 25. Yange er kwagh u mbamaren nav tese un u eren la ken uma na cii. Yange kwase ne zua a mkom ken uma na, hemban je yô sha kwagh u kwaghaôndo na u yange i mar un ker la, shin er yange yevese va ken Moscow sha ci u ityav mbi ken tar u Abkhaz ù a lu ikyua a Zegemnger u Ilen man tar u Caucasus la kpaa.

Ken inyom i 1993 la, Meri wan u Kseniya u̱ kwase hingir môm ken Mbashiada mba Yehova. Meri yange hii u lamen a Kseniya sha kwagh u Yehova Aôndo man Bibilo, kpa yange soo ú ungwan ga. Kseniya zer ôron a wan na u kwase la wener, “m beeyol gande u mer hen kwagh u he.”

Nahan kpa, Meri wan na u kwase la; man Londa kwase u wan u wan na; man Nana kua Zaza, mbayev mba ônov mba ônov nav mba ve cii yange ve hingir Mbashiada mba Yehova la, za hemen u lamen a na ken Bibilo. Aikighe ugen ken inyom i 1999 la, ve ôr Kseniya ivur ruamabera igen i yange i kôr un ken ishima yô. I̱ ôr kwagh u mkaanem ma Yesu ma kôron ken ishima ma yange ôr aa mbaapostoli mba nan jighjigh shighe u yange lu veren iniongo i Kwaghyan u Umbur Ter la. (Luka 22:19, 20) Aikighe la je, Kseniya lumun u hiin Bibilo i henen, e̱r lu anyom 102 la.

Kseniya kaa ér: “Ka e̱r m lu uma i kom anyom 102 ne, m mase kaven kwagh u a lu inja i uma ye. M fa hegen mer kwagh môm hemba u civir Yehova, Aôndo wase u kpilighyol man u dooshima ga. M ngu tsevaa heregh man kpem iyol kpaa. Me fatyô u ôron takerada a ajingi shio man kohol hanma shighe a tsombor wam.”

Sha iyange i Novemba 5, 2000 la, Kseniya er batisema. A kaa ér: “Hegen ne m na uma wam hen Yehova sha u̱ me er un tom sha dooshima. Ka m na ior umagazin man antyakerada mba kiriki shighe u m tem hen ijiir i mato tilen ikyua a ya wam la. Ashighe kpishi anmgbianev av ka ve vam inya, man ka i saan mo iyol u pasen ve mimi sha kwagh u Yehova.”

Kseniya ngu keghen shighe u ‘inyam na ia hingir hegh á hemba i wanye kpaa; man una hide a hingir er sha ayange aa lu iyev la yô.’ (Yobu 33:25) We yô u ngu eren nana, aluer or u nan tse i hembe derianyom je kpa, nan hen ér nan beeyol gande u nana hen kwagh u a lu inja ì uma ken Bibilo ga yôô?