Doo U Jighjigh u Nan Una Har sha Nyi?

Orhemen gbar kwagh henen ken makeranta u kwaghaôndo ken tar u United States nger wener “ior mba eren ‘kwaghaôndo’ ngee kpishi mba ve hingir mba eren kwaghaôndo jighilii sha u palegh u yaren tom a mhen ve yô.” A seer ér, “hanma kwagh yô ka ve gba ‘nan jighjigh’ a mi tsô.”

KWAGH ne tese ér ior kpishi mba ve senge ér ve na ma kwaghaôndo jighjigh la mba fe gbidyen kwar ken ishima fan e̱r i hii ve, ve lumun a kwagh u ve lumun a mi la ga, shin aluer ma ityôkyaa ngi i i we jighjigh ve la imagh kpaa ga. Kwagh u kwaghaôndo a kera ze mbakpishiv zwa u ôron ga la kera ka kwagh u cieryol ga.

Kwagh ka a er i vihi yô, aeren amba e̱r u yaren tom a ieev ken mcivir man u gban zeren kimbir mbamsen ken ityou tsô la kpa yangen ior u gbidyen kwar ken ishima. Aeren ne, kua uzege mba ayoughough mba ka i maa la, man ajingi a sha uwindou a ilen dimii, man ityogholouv mbi kuhwan gong gong la tese mkav u ior udubu udubu ve lu a mi sha kwaghaôndo i za kighir yô. Shin e̱r ucôôci mbagenev ve senge ér ve wa imaagh ki jighjigh u nan ve la sha Bibilo nahan kpaa, loho u ka ve pasen ér, ‘na Yesu jighjigh tsô u war’ la na Bibilo i henen sha gbashima hingir beerkwagh. Mbagenev je yô gema mba pasen a pase loho u tar sôron shin u patii kpaa. Kanyi i gem i dugh ken akaa ne ciili?

Orgen u ngeren kwagh u kwaghaôndo ôr kwagh u mlu u ken North America la wener: “Kwagh u Kristu . . . gema hingir kwagh u ken iti tseegh, [shi] mbadondon kwagh ne kpaa mba a mfe sha kwagh u ve ne jighjigh a mi la ga.” Je yô or u tôvon sha mnenge mba iorov sha akaa ugen za hemen ôr kwagh u tar u United States ér ka “tar u u gbe ijime ken bibilo i fan yô.” U ôron kwagh sha mimi yô, mbamnenge mban vea fatyô u lun nahan vough kpaa ken ityar igen i ior mba ve senge ér ve mba Mbakristu ve hemba ngeen la. Ukwaghaôndo kpishi mba ve lu Mbakristu ga la kpaa ka ve ture or ishima sha kwagh u yaren tom a mhen la, kpa mba gem mba hembe haren ishima sha u gban zeren kimbir akaaôron kpii tsô, kua u gban eren mbamsen sha ashighe a iniongo, man igbenda wue wue i gban di huan ving tsô nahan.

Nahan kpa, ken akaa ve a eren hanma iyange la, ior mba shon mba ve fetyô u tôôn anshighe kpuaa tsô u henen fan mlu u vough man mlu u mimi u kwaghaôndo u ve lumun a mi la ga nahan kpa, akaa agenegh yô ka ve shi timen sha mi vie vie. Kpiligh we iyol er ka a̱ lu kwagh u ikyondo, i̱ kper ia ande or a gema a ta kera je kpa or nan za kasua nan za kpe iyol nan ker imba i nana yam la kua hwe u nana er sha i̱ la kpaa, kpa a̱ hiden sah kwagh u kwaghaôndo u nan ve, nan kaa ér, ‘Aluer yange una kuma mbamaren av yô kape mo kpa a kumam vough je la, gaa’?

Aluer mimi je, se mba a isharen i eren ishima i Aôndo yô, nahan ka a inja u se kera ker tsung se fa shin una lumun a jighjigh wase la yô ga zee? Ka nahan ve apostoli Paulu ngise ôr  kwagh u mbaeren kwaghaôndo mba sha ayange a na la ér “mba a ishima i tseen sha kwagh u Aôndo kpa ka sha gbenda u kwaghfan ga” ye. (Mbaromanu 10:2) A fatyô u tôôn ambaaior la karen sha wanye u ngô u nan a tindi nan ér nana̱ za yam mkurem ma ahiim, kpa er nan kegh ato nan ongo ityom i ngô u nan la dedoo ga yô, nan gem nan za yam ma nyian la. A saan wanye la iyol ér nan za ityom la, kpa ngô u nan la nana ngohol mkurem ma nan za yam la kpa?

Kanyi Aôndo a lumun a mi ken mcivir u mimi? Bibilo kaa ér: “Ka kwagh u doon man shi kwagh u á rumun un sha ishigh ki Aôndo oryiman wase. Sar un u ior cii ve̱ war ve̱ ar sha mfe u fan mimi la.” (1 Timoteu 2:3, 4) A lu mbagenev inja er a kan shio u zuan a imba mfe la ken iniongo i kwaghaôndo i i dumbur ainge ne nahan. Kpa ú hen wer—aluer ka ishima i Aôndo u ior ve ar sha mfe u fan mimi nahan, sha kpôô yô una yer ve a mi he? Zua sha kwagh u Bibilo i kaa ér: “Aluer ú ker [Aôndo] yô, ú zua a Na” la ga.—1 Kroniku. 28:9.

Mba ve lu keren Aôndo sha gbashima mbara vea zua a na nena? Kwaghngeren u a dondo ne una na ikyar.