Ker Aôndo A Ishima You man Mfe Wou

Mbakristu mba mimi mba taver ior asema u yaren tom a asema a ve man mbamhen vev sha u maan jighjigh u nan u una na a saan Aôndo iyol yô.

SHA mimi yô, Yesu Kristu, u a we imaagh ki Kwagh u Kristu la tese ér saa Aôndo a doo se ishima a ‘mfe wase cii’ shin tahav mbu mhen asev, kua sha ‘ishima yase cii,’ man a ‘uma wase cii.’ (Mateu 22:37) Een, a gba keng u mbamhen asev vea er tom u vesen ken mcivir wase.

Ashighe kpishi, Yesu yange una lôhôn ior mba ve keghen ato a na la sha u ve hide ve gbidye kwar sha ityesen na yô, á kaa ér: “U hen nena?” (Mateu 17:25; 18:12; 21:28; 22:42) Ka kwagh shon môm, apostoli Peteru kpa yange nger mbananjighjigh a na imôngo la kwagh sha u ‘nderen ishima ve i wang’ la ye. (2 Peteru 3:1) Apostoli Paulu lu ormishen u hemba zenden sha tar wuee sha ashighe a tsuaa la, yange wa Mbakristu kwagh sha u ve yar tom a ‘agee a henen kwagh’ a ve la shi “[ve] kar er ishima i Aôndo i lu yô man kwagh u a doo man a kom u rumun un man shi a lu vough la kpaa yô.” (Mbaromanu 12:1, 2) Ka u Mbakristu gbidyen kwar sha atesen a ve la zulee shi vie vie ken imba gbenda la ve vea fatyô u maan jighjigh u nan u una na a saan Aôndo iyol man shi vea fatyô u hendan a akaren a a ve ken uma kpaa ye.—Mbaheberu 11:1, 6.

Sha u wasen mbagenev u maan imba jighjigh u nan la yô, Mbakristu mba tsuaa mba ve lu mbaivangeli la yange ve ‘ôron kwagh a ve sha akaa a ken icighanruamabera, ve pasen shi ve tesen ve akaa’ ken akaa a ve tesen la. (Aerenakaa 17:1-3) Imba gbenda u injaa u henen kwagh la yange u sagher mbaasemaamimi iyol u keghen ato. Ikyav i tesen yô, ior kpishi ken Berea, gar u Masedonia la yange “ve  rumun kwaghôron [u Aôndo] la sha gbashima shi ve lu timen ken icighanruamabera ayange ayange sha [akaa a Paulu man ahuraior na lu pasen la] u vea nenge shin akaa la aa lu nahan yô.” (Aerenakaa 17:11) Akaa nga heen ahar a se fa yô. Kwagh u hiihii yô, ior i Berea yange ve lu a gbashima u ungwan Mkaanem ma Aôndo; sha uhar yô, yange ve gba lumun a kwagh u ve ungwa la sha mlan ér ngu vough ga, kpa ve hide ve timen ken Ruamabera. Orkristu Luka u yange lu ormishen la yange wa ior i Berea kwagh a iyol hiden jime, yilan ve ér mba a “inja i mimi.” Ú tesen imba inja i mimi la sha gbenda u ú eren akaa a ken jijingi la kpa?

Mfe Zua vea Ishima

Er i vande ôron kwagh teren ken ijime nahan, mcivir u mimi wa mfe man ishima ker. (Marku 12:30) Hide gbidye kwar sha injakwagh i sha kwagh u wanye u ngô u nan a tindi nan ér nana za yam mkurem ma ahiim kpa nan za yam ma nyian, u i er kwagh na ken kwaghngeren u ken ijime la. Luun er nana kegh ato nana ongo ityom i ngô u nan la dedoo nahan, ma nan za tsum ma nan yam mkurem ma nyian ga. Kwagh ne kaha a mcivir wase ga.

Yesu kaa ér: “mba ve civir sha mimi yô, vea civir Ter ken jijingi kua ken mimi.” (Yohane 4:23, ka se se nger i yier ye.) Sha ityôkyaa ne yô, apostoli Paulu nger ér: “Sha ci u nahan yô, . . . se kera mem u eren msen man shi u zamber sha ci wen ga, ser, ma i iv ne a mfe u fan ishima Na sha kwaghfan cii man mkav u ken jijingi kpaa, sha u ne̱ zende zende u u kom Ter, ne̱ doon Un ken akaa cii.” (Mbakolose 1:9, 10) Imba ‘mfe u vough’ la i wasen ior mbaasemaamimi u haren asema a ve man uuma vev sha mcivir ve a vangertiôr ngegh je, sha ci u “mba civir kwagh u [ve] fe un yô.”—Yohane 4:22.

Sha ityôkyaa ne yô, Mbashiada mba Yehova mba eren anikyundanev shin ior mba hev mba ve lu a isharen kpa ve lu a hen Ruamabera vie vie ga la batisema ga. Yesu yange wa mbadondon nav tindi ér: “Gema nen akuraior cii a̱ hingir mbahenen, . . . tesen nen ve u kuran akaa a M we ne kwagh sha mi cii.” (Mateu 28:19, 20) Saa shighe u mbahenen Bibilo sha mimi vea zua a mfe u vough u sha kwagh u ishima i Aôndo la ve, vea tsua kwagh u ve fe i kom ve la a ishima ve sha kwagh u mcivir ye. Ú ngu nôngon we ú zua a imba mfe u vough la kpa?

U Kaven Inja i Msen u Ter La

U nengen a mkposo u zuan a mfe u vough u Bibilo man u lun a mkav u mir mir sha kwagh u i kaa la yô, de se time nen sha kwagh u i yer wuee ér Ter Wase, shin Msen u Ter u i nger ken Mateu 6:9-13 la.

Ior udubu udubu mba kimbir msen u Yesu u a lu ikyav i tesen la hanma shighe ken côôci. Kpa ka iorov u me i tese ve ikyav i msen shono, hembancii yô, vegher u hiihii u msen la ape i tér iti i Aôndo man i Tartor na laa? Atôakaa ne nga hange hange je yô, Yesu yange ver a hiihii ken msen la.

A hii ér: “Ter wase u Sha, i tsegha iti You.” Fa wer Yesu kaa ér i er msen sha u i tsegha iti i Aôndo yô. Hen ior kpishi yô, alaghga kwagh la na u vea pine mbampin uhar. U hiihii yô, iti i Aôndo ér nyi? Shi u sha uhar yô, hii nan i gbe u a tsegha i?

A fatyô u zuan a ikyar sha mpin u hiihii la ken ajiir a hemban er 7,000 nahan ken Bibilo ken ijô i yange i ngeren i hiihii la. Ijiir i môm yô, ka ken Pasalmi 83:18, ape i kaa ér: “Ior vea fa er we, u iti you i lu Yehova la, i lu we tseegh u lu Uhembansha, sha tar cii yô.” (NW , ka se se nger i yier ye.) Sha kwagh u iti i Aôndo i Yehova la yô, Ekesodu 6:3 kaa ér: “M ande hen Aberaham man Isaka man Yakob, Mo Aôndo Uhembanagee, kpa iti Yam i TER (ka Yehova je la) ne yô, ve fa ga.” * Kpa, er nan ve iti i Aôndo  i i lu kwagh u wang shin i lu kwagh u icighanegh la i gbe u a tsegha i? Ka sha ci u hii sha mhii u tsegh ku uumace la je tsô i hii lahan i shi lamen sha i dang.

Aôndo yange kaa a Adam man Ifa ken Eden ér, aluer ve ya ityamegh ki kon ki i we tindi sha mi la yô, vea kpe. (Genese 2:17) Satan hende kwaghôron u Aôndo la, kaa a Ifa ér: ‘Ú kpe je ga.’ Sha kwaghôron ne yô, Satan yange sende Aôndo ityough ér á er aie. Nahan kpa, á mem heela tseegh ga. A seer van a va a ilyahan sha iti i Aôndo, a kaa a Ifa ér kwagh u injaa ngu u Aôndo a soo ér a de fe ga yô. “Aôndo fa iyange i né ya [kon u mfe u fan kwagh u dedoo man kwagh u bo] la ashe aa bugh ne, né hingir er Aôndo nahan, né gba fan kwagh u dedoo man kwagh u bo.” Ungwa imba ikperen anger la sha wono!—Genese 3:4, 5.

Yange Adam man Ifa mba ye ityamegh ki kon la yô, maa ve ta ikyaa ken Satan. Hii shighe la je, mfe u uumace yange una lu sha mi shin una lu ga je kpaa, mba seer van a va aa ilyahan sha ilyaha i hiihii la sha u vendan atindi a perapera a Aôndo la. (1 Yohane 5:19) Zan zan hegen, ior mba lamen sha iyol i Aôndo dang sha u nan un ibo sha atsan a ve lu yan la—shin aluer ka sha aeren a ve a bo ve lu yan a je kpaa. Anzaakaa 19:3 kaa ér: “Ibumegh ki orough ka ki vihi nan gbenda, ishima i nan kpaa i hingir iyongo a TER.” Hegen ne, ú fatyô u kaven er i hii ve, Yesu u Ter na doo un ishima la yange er msen ér i tsegha iti Na kpa?

“Tartor Wou u Va”

Yesu yange eren msen ér i tsegha iti i Aôndo been yô, á kaa ér: “Tartor Wou u va, i er ishima You shin tar kpaa vough er i eren i Sha nahan.” (Mateu 6:10) Sha kwagh u ivur la i er yô, alaghga se pine mpin ser: ‘Tartor u Aôndo kanyi? Man m ve u ú bende aa m-er u i eren ishima i Aôndo shin tar nena?’

Ken Bibilo yô, ishemberti i “Tartor” la inja i i jighilii yô, ka “hemen u sha ikyev i tor.” U ôron jighilii yô, Tartor u Aôndo la tese ér ka hemen shin gomoti u sha ikyev i Aôndo, ua lu a tor u i lu un a tsough la. Tor la ka orgen ga, ka Yesu Kristu u i nder un shin ku—a lu “Tor u utor man Ter u uter” la. (Mpase 19:16; Daniel 7:13, 14) Profeti Daniel nger kwagh sha kwagh u Tartor u i we sha ikyev i Mesiya Yesu Kristu la ér: “Sha ayange a utor mbara [ugomoti mba uumace mba ve lu hemen hegen ne], Aôndo u Sha Una ver tartor ugen u ua gba mayange ga yô, man shi tahav mbu u kpaa mbua hingir sha ikev i ma ikur igen ga, kpa ua hembe ityartor igen ne cii avur avur, ua tim i, kpa u yô, ua lu gbem sha won.”—Daniel 2:44.

Een, Tartor u Aôndo ua hemen sha tar cii, ua tim aferakaa cii, shi ua hemen “gbem sha won,” inja na yô, ka sha ikyov ikyov je la. Sha ci u nahan yô, Tartor u Aôndo ka gbenda u Yehova a lu tseghan iti na shi a lu wanger ilyahan i Satan man uumace mbaaferev ve lu lahan i la.—Esekiel 36:23.

Er hanma gomoti a lu a ior sha ikyev nahan, kape Tartor u Aôndo kpaa u lu je la. Ior mban ne ka unô? Bibilo na ikyar ér: “Kpa mbaasemaleghlegh yô, vea ya dyako u tar, á saan ve iyol sha mngee u bem.” (Pasalmi 37:11) Ka kwagh shon môm Yesu kpa a kaa ér: “Saan mba ve lu a ishima i legh legh la iyol, gadia tar ua lu dyako ve je” ye. Sha mimi yô, ve mban ne, mba a mfe u vough u Aôndo, u a lu hange hange u zuan a uma la.—Mateu 5:5; Yohane 17:3.

Nenge ase er tar cii ua iv a ior mbaasemaleghlegh, mbaasemaamimi mba Aôndo a doo ve ishima shi hanma or nan doo ve ishima la sha wono? (Yohane 4:7, 8) Ka kwagh u Yesu yange er msen sha mi je la, zum u a kaa ér: “Tartor Wou u va, i er ishima You shin tar kpaa vough er i eren i Sha nahan” la. Ú kav ityôkyaa i i hii ve Yesu yange tese mbadondon nav ér ve eren msen nahan kpa? Kpa, kwagh u hembancii yô, ú nenge er mkur u msen la una bende a uma wou iyol you kpa?

Ior Udubu Udubu mba Timen ken Ruamabera Hegen

Yesu yange tsengaôron kwagh u yôôn angwe u ityesen i ken jijingi u a yôô tar cii sha mve u Tartor u Aôndo la. Á kaa ér: “Loho u Dedoo u  tartor ne yô, á ôr u á tser tar, sha u u̱ lu mpase hen akuraior cii; ka zum la man mkur [u tar u hegen ne] una kuma ye.”—Mateu 24:14.

Mbashiada mba Yehova mba ve lu er umiliôn ateratar sha tar cii la mba karen loho u dedoo ne vea mbawanndor a ve. Mba lôhôn we ér ú seer henen kwagh u Aôndo man Tartor na sha u yaren tom a tahav mbu mhen wou, ‘timen ken Ruamabera vie vie.’ Aluer ú er nahan yô, jighjigh wou u nan la una taver shi una seer bughun we ashe a ishimaverenkeghen i uma ken paradiso shin tar ú ua va “mgbough a mfe u TER er mngerem ma ngee shin zegemnger nahan” la.—Yesaia 11:6-9.

[Footnote]

 [Box/Picture on page 8]

Kav Ortesen U Tamen La

Yesu yange hemban veren ishima u tesen kwagh sha atineakaa a Bibilo jighilii. Ikyav i tesen yô, zum u i nder un shin ku kera la, a pase mbahenen nav uhar mba kondo ve iyol sha kwagh u ku na la tom u i gbe u una er ken awashima u Aôndo la. Luka 24:27 kaa ér: “Hii sha Mose kua uprofeti cii, A gba pasen ve akaa a sha iyol Na ken icighanruamabera cii.”

Fa wer, Yesu yange tsua itinekwaghôron jighilii, ka—“iyol Na,” Mesiya je la—shi yange ôron kwaghôron na teren “Ruamabera cii.” Inja na yô, Yesu yange a tôô avur a Bibilo kposo kposo á a lu ôron injakwagh i môm yô a va a mi ijiir i môm shi a pase á i wanger je i kpilighyol, kwagh la yange wase mbahenen nav u nengen a gbenda u mimi u ken jijingi la wang. (2 Timoteu 1:13) Sha ci u nahan yô, yange ve zua a iwanger tseegh ga kpa i kôr ve ken ishima tsugh tsugh. Kwaghôron la kaa a vese ér: “Ve kaa ayol a ve er: Asema lu yeghen se a yegh zum u A lu ôron kwagh a vese sha gbenda, pasen se icighanruamabera la gaa?”—Luka 24:32.

Mbashiada mba Yehova mba nôngon u dondon igbenda i Yesu yange pasenkwagh la ken tom kwaghpasen ve. Ikyav mbi tomov vev mbi vesen yô, ka antakerada u i yer ér Kanyi Aôndo a Soo her Avese? man takerada u Mfe u Una Va a Uma u Tsôron La. Ityakerada ne time sha atineakaa a Bibilo kpishi a injaa amba er: “Ka An Nan Lu Aôndo?” man “Er Nan Aôndo A Ne Ican I Yan Iana?” man “Ka Nena Ú Zua a Kwaghaôndo u Mimi?” man “Angan Ka Ayange A Masetyô Je Ne!” kua “U Maan Tsombor U Civir Aôndo” la. Hanma iaven cii ngi a avur a ruamabera kpishi.

Ú fatyô u nengen a Mbashiada mba Yehova hen haregh wou shin ngeren hen mba adereshi mba ve lu sha peeji 2 ken magazin ne sha u or nana va hen Bibilo a we hen ya wou gbilin sha atineakaa ne man agen kpaa.

[Picture]

Tese i kôr or u ú lu henen Bibilo a nan la ken ishima sha u veren ishima sha atineakaa a Bibilo jighilii

[Pictures on page 7]

Ú kav inja i msen u Yesu u a lu ikyav i tesen la kpa?

“Ter wase u Sha, i tsegha iti You . . . ”

“Tartor Wou [Mesiya] u va . . . ”

“I er ishima You shin tar kpaa vough er i eren i Sha nahan.”