Atindiakaa A Aôndo Nga Sha Ci U Iwasen Yase
Atindiakaa A Aôndo Nga Sha Ci U Iwasen Yase
“Atindiakaa a Ou, doom ishima zee!”—PASALMI 119:97.
1. Ior mba nengen mkor u kuran atindi a Aôndo ainge nena?
IOR soo u kuran atindi a Aôndo ainge ga cii. Ior kpishi nenge ér ka gbilinkwagh u dang je u lun sha ikyev i tahav mbu i nengen a mi ga la. Se mba ken shighe u ior ve eren sha asema a ve, ve kera fe mkposo u kwagh u bo man kwagh u dedoo ga yô, shi mbamlu mba ve taver u paven ifer a kwagh u dedoo la. (Anzaakaa 17:15; Yesaia 5:20) Abaver sember duen sha gbenda u ior kpishi ve henen kwagh ken asema a ve sha ityar wue wue yô, á kaa ér “ior i tar u America kpishi nenge ér vea tsua kwagh u a lu u shami man u dedoo man u injaa la ayol a ve.” Nahan, ve tsua “Aôndo u tsahan or ga. Atindi doo ve ishima ga. Shi ve venda mbahemenev mba ageegh, man aeren a wang shin amba akaa la nahan.” Or u timen sha akaa a taregh kaa ér, ainge ne “i ver ishima ér ior ve tsua ikyav i kwagh u a lu u eren uma u a doo man u sha inja la ayol a ve.” A za hemen ér: “Ma nyityô utaha i hemban cii gba u ia wa atindi a a kure mbamgbe mba iorov jighilii yô.”
2. M ter u i hii teren tindi ken Bibilo la gba biishi a iveren i Aôndo man mlumun na nena?
2 Er ior kpishi ve lu gban ahon sha mluainja u atindi a Yehova yô, gba u se taver asema sha mlumun u se lumun ser atindi a Aôndo nga a mtsera hen avese la. A lu kwagh u injaa kpishi aluer se time sha kwagh u i nger hen ape yange i hii teren tindi u hiihii ken Bibilo la yô. Se ôr Mkaanem ma Aôndo er i nger ken Genese 26:5 la, ér: “Aberaham . . . waan iko sha imo Yam man atindi Am man akaawan Am man atindiakaa Am.” Mkaanem man i ôr ma tsa uderimbaanyomov imôngo cii Yehova mase nan tsombor u Aberaham kwaghngeren u Tindi ye. Aôndo yange na Aberaham injar sha ikyo i wan na la, kua ikyo i wan sha atindi Na la nena? Yehova Aôndo er ityendezwa a na ér: “Akuraior a sha won cii aa zua a iveren ken tsombor wou, sha ci u, u we imo Yam iko yô.” (Genese 22:18) Nahan ikyo i wan sha atindi a Aôndo gba biishi vea iveren i Aôndo man mlumun na kpaa.
3. (a) Orpasalmi ugen tese mnenge na sha tindi u Yehova nena? (b) Ka mbampin mba nyi ve kuma u se nenge sha mini?
3 Môm ken upasalmi—alaghga a lu wantor u Yuda u va lu tor ken masejime la—yange pase mlu u ken ishima u kera yô, yange bende a tindi ga yô. A kaa a Aôndo sha ikyenge ér: “Atindiakaa a Ou, doom ishima zee!” (Pasalmi 119:97, ka se se nger i yier ye.) Yange kwaghôron ne gba lun di kwaghôron u iemberegh u shin ishima tsô ga. Yange lu u tesen dooshima u a lu a mi u eren ishima i Aôndo er í tese ken atindi na la nahan. Yesu Kristu, Wan u Aôndo u vough la kpa kape yange i lu un ken ishima vough je la. Yange i pase kwagh u Yesu sha kwaghôron u profeti lu kaan ér: “Doom u eren ishima You, Aôndo wam; atindiakaa a Ou ngam ken ishima.” (Pasalmi 40:8; Mbaheberu 10:9) Se di ye? Ka i doo se u eren ishima i Aôndo kpa? Se na jighjigh sha mluainja man iwasen i atindiakaa a Yehova kpa? Ikyo i wan sha atindiakaa a Aôndo nga a ma ian ken mcivir wase man uuma asev mba sha hanma iyange man u tsuan kwagh u se soo u eren, kua mlu wase a ior mbagenev kpa? Aluer tindi u Aôndo doo se ishima yô, doo u se nôngo u kaven er i hii ve Aôndo a lu a ian i wan atindi shi nengen ér se kura á la.
Ka Yehova A Kuma u Wan Tindi Ye
4. Hii nan Yehova a lu a ian i lun Orwan Atindi u hembana?
4 Er Yehova a lu Orgbanakaa yô, ka un tswen a kuma u lun Orwan atindi u hemban tar sha won cii ye. (Mpase 4:11) Profeti Yesaia nger wener: “TER ka Orwan se atindi.” (Yesaia 33:22) A ver atindi a igbetar sha ci u hemen akaa a á gbe la cii, a uma man a a lu a uma ga kpaa. (Yobu 38:4-38; 39:1-12; Pasalmi 104:5-19) Or ngu sha ikyev i atindi a igbetar a Yehova la sha ci u un kpa i lu Aôndo a gbe un yô. Shin er or a lu or u eren kwagh sha ishima i nan, shi nan lu a tahav mbu henen kwagh sha tseeneke u nan nahan kpaa, ka i saan nan iyol shighe u nan we iyol i nan sha atindi a Aôndo a sha aeren man a ken jijingi la yô.—Mbaromanu 12:1; 1 Mbakorinte 2:14-16.
5. Kwaghwan u i we ken Mbagalatia 6:7 la tese mimi u a lu sha kwagh u atindi a Aôndo la nena?
5 Er se fe nahan, atindi a igbetar a Yehova nga bundu ga. (Yeremia 33:20, 21) Aluer or hendan a atindi a igbetar agen inja er u or tsuen sha ityough ki iyoughough va gban shin inya nahan yô—nana sunda injar i nan kpee je. Kape atindi a Aôndo a we sha kwagh u anza a dedoo la kpa í gem a ga je la, shi a fatyô u karen á sha kpe shin peren á yemen iyol ishô kpaa ga. Ka i kura á di vough er atindi na a igbetar la nahan, shi aluer sea sunda injar la ave ave ga je kpaa. “Mba nahan Aôndo tar ga. Kwagh u or nan lee yô, shi ka un je nana sunda ye.”—Mbagalatia 6:7; 1 Timoteu 5:24.
Tahav Mbu Tindi u Yehova
6. Atindi a Aôndo samber sha akaa nena?
6 Tindi u Mose yange lu gbenda u tseer tseer u i tese tindi u Aôndo yô. (Mbaromanu 7:12) Ica i gbe ga yô, Yehova Aôndo gema Tindi u Mose la ver “tindi u Kristu” la. * (Mbagalatia 6:2; 1 Mbakorinte 9:21) Er se lu Mbakristu mba sha ikyev i “tindi u vough u a pasen se a toho la” yô, doo u se dondo kwaghwan u Aôndo a lu wan se sha igbenda i uma asev igen amba er atesen a ior man uiniongo mba eren nahan. Akaawan na tser sha avegher a uma cii, kua uma u ken tsombor man kasua u eren man er se eren kwagh a kasev shin kasev ve eren a nomso la man ieren yase a mba ve lu Mbakristu imôngo a vese man ci u se lun a mi ken mcivir u mimi la cii.—Yakobu 1:25, 27.
7. Na akav a atindi a Aôndo a injaa.
7 Ikyav i tesen yô, Bibilo kaa ér: “Mbadyarev shin mbasôronakombo shin mbavihin ivaa sha idya shin nomso mba ve yaven a ayol a ve shin mbaiv shin mbahuav shin mbahundenmsôrom shin mbauityuhwanev shin mbanumungbenda kpaa, vea ya dyako u tartor u Aôndo je ga.” (1 Mbakorinte 6:9, 10) Een, idya man ijimba gban kan di “ieren i dooshima” tsô ga. U nomsoor yaven a nomsoor la ka “uma u eren u a due kposo tsô ga.” Ka tindi u Yehova u peren jighilii. Nahan kape iv mbu iin man aie u eren man anger a eren ken myer kpa a lu di tindi u peren tsô je la. (Pasalmi 101:5; Mbakolose 3:9; 1 Peteru 4:15) Yakobu puu ihagh i tan, Paulu gema wa se kwagh wener se palegh beer kwaghôron man asenge a doon ga la cii. (Mbaefese 5:4; Yakobu 4:16) Hen Mbakristu yô, atindi a i we sha kwagh u aeren ne cii ka vegher u tindi u vough u Aôndo.—Pasalmi 19:7.
8. (a) Tindi u Yehova la ngu inja nena? (b) Kanyi ikyav i vesen jighilii i lu ken ishember i ken zwa Heberu i “Tindi” laa?
8 Atindiakaa a vesen a a lu ken Mkaanem ma Yehova ne tese er tindi na hemba di atindi a wan tsô la. Nga gbenda u uma u akuma akuma man uma u wasen, u a bende a uuma asev sha igbenda wuee sha er se zua a mtsera yô. Tindi u Aôndo ngu a maa a maa shi ngu sha inja shi we se kwagh kpaa. (Pasalmi 119:72) Sha gbenda u orpasalmi a yar tom a ishemberti i “Tindi” la yô, i gema i ken ishember i ken zwa Heberu i i yer ér toh·rahʹ la. Or u timen ken Bibilo ugen kaa ér: “I zua a ishember ne ken ishember i tesen ieren i̱ ikyav na i lu u tesen gbenda, man u hemen or man u únan man u keren ken hemen la. Nahan . . . ikyav na yô a lu tindi u aeren je la.” Hen orpasalmi yô, yange tindi lu iyua i hen Aôndo. Se tôô nen tindi la a lu se a inja di nahan vough, shi se na nen i ian i kôôm uuma asev ga zee?
9, 10. (a) Er nan ka se keren gbenda u u kom u se suur sha mi? (b) Se zua a msaanyol man mzehemen ken uma nena?
9 Gba u akaa a igbe a cii aa har sha gbendatesen man hemen u u kom u suur sha mi yô. Kwagh ne ka kwagh u mimi sha kwagh u Yesu man mbatyomov mbagenev mba ve hembe or tahav yô. (Pasalmi 8:5; Yohane 5:30; 6:38; Mbaheberu 2:7; Mpase 22:8, 9) Aluer akaa a i gbe a a lu vough ne je kpa zua a mtsera sha hemen u Aôndo yô, ka di se uumace mba se yen mban ve se kera zua a mi ga yee? Mlu u yiase u orumace man akaa a eren ase la tese mluainja u mnenge u profeti Yeremia yange nenge la, wener: “TERE, m fa, gbenda u or ngu sha ikev i nan ga; or u zenden la, mvershigh u iaven i angahar a nan ngu sha ikev i nan ga.”—Yeremia 10:23.
10 Aluer ka se ape se ember uma shi se za hemen yô, saa se suur sha hemen u Aôndo la. Tor Solomon ngise kav kwagh bo u a lu sha u tsuan u eren kwagh sha tseeneke aa u suur sha hemen u Aôndo shio la, a kaa wener: “Gbenda ugen sha mnenge u or yô, ka u lu vough, kpa mkur u u yô, ka igbenda i kuugh je.”—Anzaakaa 14:12.
Atôakaa a Tindi u Yehova Una Doo Se La
11. A saa se u kaven tindi u Aôndo ser nena?
11 Doo u se maa isharen i kaven tindi u Yehova. Orpasalmi pase imba isharen la zum u a kaa ér: “Bughum ashe, m̱ nenge akaakpilighyol a ken atindiakaa a Ou la” la. (Pasalmi 119:18) Er se lu seer u fan Aôndo man igbenda na la, shi se lu hemban lun a iwuese sha mimi u mkaanem ma Yesaia la, á kaa ér: “TER Orpaan wou, Icighan u Iserael, ngu kaan nahan er: Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la. Ma u ver ato sha atindi Am.” (Yesaia 48:17, 18) Ka Yehova pe ior nav ma ve palegh kwaghtseren man ma ve ember uma sha u veren ato sha atindi na. De se nenge nen atôakaa a vesen a i hii ve i gbe u tindi u Aôndo una doo se ishima la.
12. Mfe u Yehova a lu a mi sha kwagh wase la na un ú lun Orwanatindi u hemban cii nena?
12 Tindi u Aôndo due hen Un u á hembe fan se la. Yehova ngu Orgban wase, nahan ka sha mi u wen fan orumace vindi vindi. (Pasalmi 139:1, 2; Aerenakaa 17:24-28) Azende a ase a kôôsôô man anmgbianev asev shin mbamaren asev je kpaa vea fatyô u fan se imba er Yehova a fe se la nahan ga. Sha ci u nyi, Aôndo hemba fan se a ayol a ase je kpaa! Orgban se ngu a mfe u ken jijingi man sha mhen man sha ieren man sha mbamgbe asev mba sha iyol mba ve zough a ma or ga la. Er a ne ishima na sha a vese yô, ka a tese er a lu a mkav sha mbamlu asev doo doo, man a fe akaa a saren se man ishimaveren keghen yase kpaa yô. Yehova kav mbamyina asev, man kwagh u se fatyô u eren kpaa á lan ga. Orpasalmi kaa ér: “Un yô, A fa mlu wase, A umbur er se lu vuulevu je yô.” (Pasalmi 103:14) Nahan, se mba a mkor u ken jijingi er se lu keren u dondon tindi u Aôndo man wan iyol yase sha ikyev i hemen na a ishima i môm la.—Anzaakaa 3:19-26.
13. Hii nan ve se lu a vangertiôr ser kwagh wase gba Yehova ishima?
13 Atindi a Aôndo nga dugh hen Or u se doo un ishima la. Kwagh gba Aôndo sha mkpeyol wase u tsôron la. A er kwagh ne sha ishe taver sha u nan Wan na va hingir “ipaan sha ci u ior kpishi.” (Mateu 20:28) Yehova vande eren ityendezwa a vese ér ‘Una rumun er i̱ va mee se i̱ hemba agee a se ga’ ze gaa? (1 Mbakorinte 10:13) Bibilo taver se ishima ér una ‘koso se’ gaa? (1 Peteru 5:7) Ma or môm u í hemba gban nan ishima u tesen orumace gbenda u hemban wasen aa Yehova nan ngu ga. A fa kwagh u a doo sha ci wase shi a fa kwagh u una na se msaanyol man kwagh u una ule se kpaa yô. Shin er se yen man se nenge gbev nahan kpaa, aluer se ker perapera yô, ka a tese er se doo un ishima sha igbenda i ia na se uma man averen yô.—Esekiel 33:11.
14. Ka gbenda u injaa u nyi tindi u Aôndo a kaha kposo a mbamhen mba orumacee?
14 I taver se ishima er tindi u Aôndo ka kwagh u geman ga. Sha ashighe a ican a se lu ker ne, Yehova ka bar uwo wase, u a lu zan zan gbem sha won yô. (Pasalmi 90:2) A ôr kwagh u iyol na ér: “Mo TER M gem kposo ga.” (Malaki 3:6) Atindiakaa a Aôndo a̱ i nger ken Bibilo la kuma u suur sha mi—nga inja er mbamhen mba orumace mba ka i zer geman hanma shighe la ga. (Yakobu 1:17) Ikyav i tesen yô, mbatôvon mhen mbaiorov ndera tesen igbenda i yesen ônov sha ue hegen kuma anyom imôngo, kpa ken masejime yô, mbagen ka ve gema mbamhen vev mbara shi ve lumun ér kwaghwan ve la yange i lu u sha mlan. Atindi a taregh man akaa a tesen a ve sha kwagh ne nga kpegher kpe kpegher inja er a humbe nga daase a mi nahan. Kpa, Mkaanem ma Yehova ka kwagh u tenger ga. Bibilo ndera tesen igbenda i yesen ônov sha dooshima hegen kuma anyom uderi uderi. Apostoli Paulu nger wener: “Ne uter kpaa, de eren nen a ônov enev er vea yuwe ga kpa yese nen ve sha mkôôm man kwaghwan u Ter.” (Mbaefese 6:4) Ka kwagh u taver se asema u fan er se fatyô u suur sha atindi a Yehova; a a gem ga nahan!
Ior Mba Ve Lu Kuran Atindi a Aôndo Cii Vea Zua a Averen
15, 16. (a) Kanyi ia er aluer se yar tom a atindi a Yehova yôô? (b) Atindi aa Aôndo aa tese se gbenda u dedoo ken ivese nena?
15 Aôndo kaa a vese sha ikyev i profeti na Yesaia ér: “Kwaghôron Wam, u a dugh ken zwa Wam . . . yô, ikôr ia lagh un.” (Yesaia 55:11) Kape se kpa a lu je la, ikyôr ia lagh se shi se zua a akaa a injaa kua msaanyol zum u se nenge sha afatyô wase u dondon atindi aa lu ken Mkaanem nam yô.
16 Nenge er atindi aa Aôndo a lu gbenda u dedoo u ivese zan doon yô. Paulu nger ér: “Ivaa i̱ lu kwagh u icivirigh hen ior cii, gambe u ivaagh kpaa a̱ de lu a acôghor ga, gadia Aôndo Una ôr mbaerenijimba man mbavihin ivaa sha idya la ijir.” (Mbaheberu 13:4) Gba u mba ken ivese vea na icivir shi vea doo ayol a ve kpaa: “Nahan ne kpaa, hanma or kwase u nan a̱ doo nan ishima er iyol i nan nahan, kwase kpaa, a̱ cia nom u nan.” (Mbaefese 5:33) I pase ikyav i imba dooshima u kwagh a gbe sha mi la ken 1 Mbakorinte 13:4-8, ér: “Dooshima we ishima, lu sar sar, gbe iwuhe ga; dooshima gengese iyol ga, moron iyol kpaa ga, we dang ga, keren kwagh na iyol na tsô ga, nyoon ishima ga, koson kwagh u bo ken ishima ga. Ka saan un iyol a ifer ga, kpa saan un iyol a kwagh u mimi. Dooshima we ishima a akaa cii; un ne jighjigh sha akaa cii, luun a ishimaverenkeghen sha akaa cii, taver ishima sha akaa cii. Dooshima been mayange ga.” Ivese i i har sha imba dooshima ne cii ia saa ishe ga.
17. Atindi a Yehova a ne sha kwagh u msôrom ma man kpoghuloo la aa wase se nena?
17 Ikyav igen i tesen ér atindi a Yehova nga a iwasen yô, ka sha er a vende ihundugh ki msôr la. Je yô, a lumun a “or u cihin msôrom” kpaa ga. (1 Timoteu 3:3, 8; Mbaromanu 13:13) Ior kpishi mba ve hure atindi a Aôndo a ne sha kwagh ne yô, ka ve ya ican a angev mbu msôrom ma man ganden ikyaa inya la. Mbagen hure kwaghwan u Bibilo i we sha kwagh u man msôrom akuma akuma la, nahan ve nyôr ken ieren i man msôrom kpoghuloo sha ci u ma “wase ve vea zua a mmem yô.” Msôrom ma man kpoghuloo la ma a mbamzeyol kpishi, ka ma pande or icivir shi ma va a ayôôso hen ya shi ka ma pav icombor shi ka ma na or kera lu a ikile i inyar ga, shi ka ma na i de or tom u uke u sha tôndo la kpaa. (Anzaakaa 23:19-21, 29-35) Atindi a Yehova a ne sha kwagh u msôrom ma man kpoghuloo ka mkor gaa?
18. Atindi a Aôndo nga wasen sha kwagh u inyar kpa? Na mpase.
18 Atindi a Aôndo shi wase sha gbar u kwagh u inyar. Bibilo taver se Mbakristu asema ér se lu a mimi iyol shi se eren tom taveraa. (Luka 16:10; Mbaefese 4:28; Mbakolose 3:23) Mbakristu kpishi mba ve dondo kwaghwan ne yô, ve zua a mzehemen ken tom, gayô i de ior tom i undu ve her. Ka or zua a mtsera sha inyar zum u nan palegh aeren a hendan a ruamabera imba er ishor i haan man ityu i man kua u menan mcimbim ma bov la. Ú fatyô u henen akav agenegh a atindi a Aôndo aa fatyô u wasen ken kasua u eren je ka u henen a hen ga.
19, 20. Er nan i lu gbenda u kwaghfan u ngohol shi dondon atindi a Aôndo?
19 Ka kwagh u ican ga cii u uumace mba ve yen ne tsumen undun tindi u Aôndo man igbenda na. Umbur kwagh u Mbaiserael yange ve er sha Uwo u Sinai la. Aôndo kaa a ve ér: “Aluer né veren ato sha kwaghôron Wam mimi je, shi né waan ikuryan Yam iko kpaa yô, nahan akuraior a sha won cii, ka ne né hingir kwagh Wam iyol Yam je ye.” Ve gba zwa môm ér: “Akaa a TER A kaa cii, sé er.” Kpa, nenge imba er yange ve tsua u dondon gbenda ugen sha wono! (Ekesodu 19:5, 8; Pasalmi 106:12-43) Kpa se yô, de se ngohol shi se dondo nen atindi a Aôndo la.
20 Gbenda u kwaghfan man msaanyol ú u lu yô, ka u dondon akaawan a Yehova a ne sha u a wase u hemen uuma asev la, man atindi ne zua kwav sha atindi agen ga. (Pasalmi 19:7-11) U se er kwagh ne se kure doo doo yô, gba u se kpaa se tese iwuese sha mluainja u akaawan a Aôndo la doo doo. Ka itinekwagh i se lu nengen sha mi ken ngeren u a dondo la je la.
[Footnote]
^ U zuan a mfe seer sha kwagh u “tindi u Kristu” la yô, nenge ken Iyoukura (zwa Buter) i uwer u Setemba 1, 1996, peeji 14-24 la.
Baver We Kpa?
• Hii nan ve se lumun ser atindi a Aôndo nga sha ci u iwasen yase?
• Ka sha ityôkyaa i nyi i gbe u tindi u Aôndo una doo se ishima?
• Atindi a Aôndo nga a iwasen sha nyi gbenda?
[Study Questions]
[Picture on page 3]
Aberaham yange zua a averen kpishi sha u wan ikyo sha atindi a Yehova
[Pictures on page 5]
Ishimanyian i uma u a taver ainge yum ne ngu a dan ior kpishi u undun tindi u Aôndo
[Picture on page 7]
Tindi u Aôndo gem ga, ngu dông er ka iyou i usu i tesen utso mbamngerev gbenda i í mar i sha vande nahan