Gbenda u Wan Yange Wase Ter Na La

JAMES ka or u ken tar u Ingila, a hemba di anyom 30 nahan tsô, lu a angev mbu ken ityo shi meer ishima daalaa kpaa. Nahan kpa, yange za mbamkombo mba Mbashiada mba Yehova anyom kpishi je, a za vea ngô na man anmgbian na u kwase. Kpa ter na yô, mayange je kwagh gba un sha atesen aa ve lumun a mi la ga. Aikighe ugen shighe u i tese ikyav i nengen ken mkombo sha gbenda u lôhôn or u se fe nan u van M-umbur u ku u Kristu la ka been yô, James yem ken iyou na fese je. Ishimanyian ngô na kpishi, tsô maa á dondo un ijime, za nenge a na lu keren mbamgber mba magazin mba Iyoukura man Awake! mba tsegh yughur yughur je. Yange dugh môm ua lu a mlehe u iniongo i M-umbur sha peeji u ken jime la man kar a yem a yem za kohol ter na. Tsô a hii hônon uwegh sha foto u a lu ker la shi a hide a hôn uwegh sha ter na man a kaa ér “We!” Nahan ngô na man ter na kenger ayol a ve shi kpiligh ve iyol er ve kav er James a lu lôhôn ter na iniongo i M-umbur yô. Ter na kaa ér alaghga una za.

Ka kom aikighe u iyange i iniongo i M-umbur la yô, James maa za hen ape ter na a veren akondo la, za tôô uwondo uhar va a mi hen ter na, tsô a tese ikyav wener a huwa. Ter na gema kaa ér un ngu zan mkombo ga. Nahan James man ngô na mough ve tseegh gba yemen ken Iyou i Tartor.

Kpa shighe ze deghôô yô, James kera gba soon u zan mbamkombo mba tiônnongo shighe u ngô na una kaa ér a wa iyol vea yem la ga, kpa á gema á tsua u lun hen ya vea ter na. Tsô sha iyange i Lahadi ugen pepe yô, James shi venda u wan iyol zum u ngô na kaa ér a wa iyol vea yem mkombo yô. Kpa kwagh er u cier un iyol yô, ter u James gema kaa a na ér, “James, aluer m za mkombo nyian nahan, we kpa u zaa?” James maa saan ishigh sha. A kamber ter na uwegh iyol man a kaa ér “Een!” nahan ve utar mbara cii ve yem ken Iyou i Tartor.

Hii sha iyange la je, ter u James za hemen u zan mbamkombo mba sha iyange i Lahadi cii, shi ica gba ga tsô maa a kaa ér aluer ka u una zua a mzehemen yô, á gba u una zan mbamkombo mbagenev kpaa. (Mbaheberu 10:24, 25) Yange er kwagh ne nahan, shi iwer ngi karen ihiar yô, a hii Bibilo i henen hanma shighe. Yange yem hemen leva leva, lu eren mbamgem mba hange hange ken uma na fele fele je, shi ica gba ga tsô maa hii tom u pasen kwagh u Tartor. Yange hii Bibilo i henen inyom môm karen yô, tsegha uma na sha ci u Yehova shi tese kwagh ne sha u eren batisema shin mnger. Hegen ne ngu eren tom u diakon ken tiônnongo na. Shi tsombor la cii ngu civir Yehova imôngo hegen.