Ka An Je Nana War Iyange I Yehova Laa?
Ka An Je Nana War Iyange I Yehova Laa?
“Iyange ngi van ngi yeghen er usu u sha atse nahan.”—MALAKI 4:1.
1. Malaki pase kwagh u mkur u tar u ifer ne nena?
AÔNDO yange na profeti Malaki tahav mbu ngeren akaa a cieryol a ica a gba ga tsô aa er yô. Akaa ne aa bende a hanma or cii shin tar. Malaki 4:1 tsengaôron ér: “Nenge iyange ngi van ngi yeghen er usu u sha atse nahan; mbagengeseyol cii, man mbaerenafer cii vea hingir atôayia, man iyange i i ve la kpaa ia hia ve kera—kape TER u akum a Sha A kaa ne—je, ia shi ve mise shin gbaa kpaa ga.” A tim tar u ifer ungun ne kembe kembe nena? A lu inja er ka kon u í tim amise a ú sha er ua kera fatyô u vesen mayange ga yô.
2. Avur a ruamabera agen pase kwagh u iyange i Yehova la nena?
2 Alaghga ú pine wer ‘profeti Malaki ngu tsenganôron kwagh u “iyange” i nyi?’ Ka iyange shon i môm môm í er kwagh u i̱ ken Yesaia 13:9 la ér: “Nenge, iyange i TER ngi van, ngi a mhôônom ma zungwen ga, ngi a ishimavihin kua iyugh tsung, sha u geman tar u̱ hingir ice dang, man shi u timin mbaasorabo mba ve lu ken u kera.” Sefania 1:15 pase nahan ér: “Iyange la ka iyange i iyughugh, ka iyange i ican man i ishima, nyian, ka iyange i mvihi man i myôhôr, ka iyange i ime i wan mgbigh mgbigh, ka iyange i abeen man i angôghime.”
“Zegecan La”
3. Kanyi i lu “iyange i Yehova”?
3 Sha m-iv u vesen u kwaghôron u profeti Malaki la yô, “iyange i Yehova” la ka iaven i shighe u “zegecan.” Yesu tsengaôron ér: “Zum la zegecan una er, imbacan i hii er i gba tar la je zan zan ainge ne i lu a er mayange ga yô, man mayange kpaa ia kera shi er nahan kpaa ga.” (Mateu 24:21) Hen sha kwagh u ican i tar u hira nenge a mi, hemban je yô hii ken inyom i 1914 la. (Mateu 24:7-12) Nenge sha wono, Ityav mbi Tar cii Mbi sha II la tseegh yange mbi wua ior hemba miliôn 50! Nahan kpa, “zegecan la” una va a akaatseren aa hemba a ngan ica je. Kwagh u a lu iyange i Yehova shon môm la una kure sha Armagedon, man una kuusu ayange a masejime a tar u ifer ne.—2 Timoteu 3:1-5, 13; Mpase 7:14; 16:14, 16.
4. Ka akaa a nyi aa vande eren kera sha shighe u iyange i Yehova ia kure laa?
4 Sha mkur u iyange i Yehova la, a tim tar u Satan kua mba ve lu suen u la cii kera. A hii timin kwaghaôndo u aiegh cii. A been yô, ijirôron i Yehova ia va sha tar u Satan u kpenga eren kua shi pati u ú kpaa la. (Mpase 17:12-14; 19:17, 18) Esekiel tsengaôron nahan ér: “Vea haa azurfa ve sha igbenda i ken gar, man zenaria ve kpaa una hingir er kwagh u hôngorough nahan; azurfa ve man zenaria ve vea fatyô u yiman ve sha iyange i iyugh i TER la ga.” (Esekiel 7:19) Sefania 1:14 ôr sha kwagh u iyange la nahan ér: “Iyange i vesen i TER mgbôghom, ngi van fefa je.” Sha er Bibilo i er sha kwagh u iyange i Yehova la nahan yô, se kange nen ishima u eren sha atindi a Aôndo a perapera la vough.
5. Kanyi i lu eren mba ve cie iti i Yehova?
5 Yange tsenganôron kwagh u iyange i Yehova ia er a tar u Satan ne been yô, a nger mkaanem ma Yehova kaa la ken Malaki 4:2 ér: “Ne mba ne cie iti Yam yô, iyange i perapera ia due ne a mbee u uange ken akper a i; né due, né tsuwe er anibuav ka ve due ken ityôr nahan.” “Iyange i perapera” la ka Yesu Kristu. Ka un a lu “iwanger” i ken jijingi “i tar” ne ye. (Yohane 8:12) Yesu va a mbee u uange, hiihii yô, ka mbee u angev mbu ken jijingi mbu a lu been se nyian ne, man mbee u angev mbu sha iyol jimin cii ken tar u he la. Er Yehova a kaa nahan, mba a bee ve angev la vea “tsuwe er anibuav” mba ka a̱ bugh ve ér ve̱ due ken ityôr ve i saan ve iyol la nahan.
6. Ka iember i mhembe i nyi ior mba Yehova vea emberee?
6 Kpa mba ve gem ijime a atindi a Yehova di ye? Malaki 4:3 kaa nahan ér: “Né [mbacivir Aôndo] ndyar mbaaferev; gadia vea hingir mtwem shin akevangahar a en sha iyange i Me er i yô, kape TER u akum a Sha A kaa ne.” Uumace mbacivir Aôndo vea lu ave ken mtim u a tim tar u Satan ne ga. Nahan kpa, vea “ndyar mbaaferev” sha injakwagh, sha u lun a ci ken m-ember u a ember mhembe shighe u iyange i Yehova ia kar kera la. Yange ior ember kpishi zum u i tim akumautya a Farao shin Zegemnger u Nyian kera la. (Ekesodu 15:1-21) Kape iember i mhembe ia lu shighe u a tim Satan man tar na ken zegecan je la. Ior mba jighjigh mba vea war iyange i Yehova vea genger amo nahan ér: “Sé lu nen saan saan, sé ember nen myom Na.” (Yesaia 25:9) Nenge iember i ia lu shighe u a paase ahon a gban sha hementor u Yehova shi a sôr tar ua hingir wang sha u ior ve̱ tema ker ken bem la sha wono!
Mbakristu Mbaaiev Dondo Gbenda u Iserael La
7, 8. Pase mlu u ken jijingi u Iserael sha shighe u Malaki la.
7 Ior mba ve lu sha ian i Yehova á lumun a ve yô, ka mba ve civir un la, kpa mba ve civir un ga yô a venda ve. Yange lu kwagh shon môm lu zan hemen shighe u Malaki nger takerada na la. Ken inyom i 537 C.S.W la, asande a Iserael hide ken Babilon ape ve tsa uikyangen anyom 70 la. Nahan kpa, ka kôron ken derianyom ugen yô, ikyuior i i hide a i la shi hii u nyôron ken mvende u vendan mimi man ifer i eren. Kpishi ken ior mbara lu lahan iti i Yehova; shi lu vendan atindi na a perapera; shi lu hôngor a tempel na sha u tôôn ishôso i pirin ashe man i gban iwan man i uange va nan naagh a mi; shi lu paven ivaa a kasev vev mba sha uye la kpaa.
8 Sha nahan yô, Yehova kaa a ve ér: “Me kporom her a ven sha u ôron ijir, Me lu Orshiada fese je sha mbaahiriv man sha udyambaiorov man sha mbabumun sha aie man sha mba ve kighir or u eren tom sha tôndo sha injar i nan, kua kwasecôghol man wancôghol kpaa, man mba ve daan shiror kera, man ve ciem ga . . . Gadia Mo TER M gem kposo ga.” (Malaki 3:5, 6) Kpa Yehova yange lôhô nyityô or ú nana undu igbenda i nan i bo la cii ér: “Hide nen her a Mo, Mo kpaa Me hide her a ven.”—Malaki 3:7.
9. Akaaôron a profeti a Malaki la yange hii kuren nena?
9 Mkaanem mara shi kure ken derianyom u hiihii S.W la. Asande a Mbayuda yange ve civir Yehova shi ve hingir vegher u ‘ikyuior’ i he i Mbakristu mba i shigh ve mkurem sha jijingi, mba yange Atôatyev kpa va nyôr nongo a ve la. Kpa ikpelaior i Mbaiserael mba sha marami yange ve venda Yesu. Nahan, Yesu kaa a ikyuior i Iserael la ér: “Nenge ase, i undu ya wou, hingir ice.” (Mateu 23:38; 1 Mbakorinte 16:22) Er Malaki 4:1 tsengakaan nahan, ken inyom i 70 S.W la, ‘iyange i . . . yeghen er usu u sha atse nahan’ la i̱ va sha Iserael u sha iyol la. Yange i̱ tim Yerusalem man tempel na, man ibaver tese ér ijen kua num u nôngon sha ci u keren tahav, man num u akumautya a Mbaroma la cii, wua ior hemba miliôn môm jimin. Nahan kpa, mba yange ve civir Yehova yô, ve war ican la.—Marku 13:14-20.
10. Ka sha nyi gbenda ior jimin cii kua mbahemenev mba ukwaghaôndo ve lu dondon gbenda u Iserael u sha derianyom u hiihii laa?
10 Uumace, kpa hemban je yô Mbakristu Mbaaiev mba kaven ikyuior i Iserael u sha derianyom u hiihii la. Mbahemenev man ior jimin cii ken Mbakristu Mbaaiev hemba soon atesen a ukwaghaôndo vev a mimi u Aôndo u yange Yesu tese la. Mbahemenev mba ukwaghaôndo hemba mban a ibo cii. Ve venda u yaren tom a iti i Yehova, shi ve dugh í sha ken mbamgem mba Bibilo vev kpaa. Ve laha Yehova sha atesen a á har sha ruamabera ga la, amba er atesen a mbafanaôndoga a ican i tsôron ken usu u hel man Mbautar man uma u kpen ga kua ityesen i akaa cii gbaduen iyol i á tsô la. Nahan, ve venda u nan Yehova icivir i i lu i̱ na la, di er upristi mba sha ayange a Malaki la nahan.
11. Ukwaghaôndo mba tar ne mba tesen or u ve civir jim jim la nena?
11 Ken inyom i 1914, shighe u ayange a masetyô hii la, ukwaghaôndo mba tar ne mba i lu mba ve sengen ér ve mba Mbakristu ve̱ hemen gbenda la, tese or u ve lu civir un jim jim yô. Shighe u ityav mbi tar cii la, ve taver ior vev asema ér ve̱ nôngo ityav sha ci u anyiman a hen atô u ityar kposo kposo, aluer u eren nahan la ka u vea wua ior mba ken kwaghaôndo ve je kpaa. Mkaanem ma Aôndo ma pase ior mba ve lu ungwan imo i Yehova man mba ve lu ungwan ga la wang nahan ér: “Ka sha kwagh ne man i pase ônov mba Aôndo a ônov mba diabolo ye; hanma or u nan eren perapera ga yô, nan due hen Aôndo ga, man shi u anmgbian u nan a doo nan ishima ga la kpaa. Gadia ngun ka loho u ne ungwa sha hiihii ne: ka u ma se doo ayol a ase, i̱ de luun er Kain u a due ken Orbo man a wua anngô na la nahan ga.”—1 Yohane 3:10-12.
Ú Kuren Kwaghôron u Profeti
12, 13. Mbacivir Aôndo kure akaaôron a profeti a nyi sha shighe wase nee?
12 Ken mbee u Ityav mbi Tar cii Mbi sha 1 ken inyom i 1918 la, mbacivir Yehova nenge ibo i Aôndo na Mbakristu Mbaaiev kua ukwaghaôndo mbaaiev mbagen jimin cii la. Hii sha shighe la je, loho ar a mbaasemaleghlegh ér: “Nongoior Wam, due nen ken a na kera sha er né nyôr nongo sha asorabo a na ga, shi né ngohol atsan a tseren un la kpaa ga yô, gadia asorabo a na hingir tihi tav je ar Sha, Aôndo kpaa umbur afer a na.” (Mpase 18:4, 5) Mba yange sar ve u eren Yehova tom yô, i hii u ôôn ve hôngor u kwaghaôndo u aiegh la iyol kera cii shi ve hii u pasen loho u Tartor u i we imaagh ki u la sha tar cii, ka tom u a bee ú cii mkur u tar u ifer ne una va la.—Mateu 24:14.
13 Kwagh ne lu sha u kuren kwaghôron u profeti u ken Malaki 4:5 la, ape Yehova a kaa ér: “Nenge nen, tindim Yam ne a profeti Eliya er iyange i vesen i cieryol i TER i lu a va ga yô.” Kwaghôron u profeti la yange hii kuren ken tom u Yohane u Eren Batisema, u yange Eliya tile sha ityough nagh la. Yange Yohane er tom u lun inja er u Eliya la zum u á er Mbayuda mba yange ve gema asema sha asorabo ve a ve per Tindi u ikuryan la batisema la. Hemban cii je yô, Yohane yange lu oryôônangwe u Mesiya. Nahan kpa, tom u Yohane lu a lu mkur u hiihii u kwaghôron u profeti u Malaki la tseegh. Yange Yesu tese ér tom u “Eliya” ngu ken hemen, shighe u lu pasen wener Yohane ka Eliya u sha uhar la.—Mateu 17:11, 12.
14. Ka tom u hange hange u nyi a er ú keng keng cii man mkur u tar nee?
14 Kwaghôron u profeti u Malaki la tese ér, á er zege tom u Eliya ne cii man “iyange i vesen i cieryol i TER” la ye. Iyange la ia kure ken ityav mbi vesen mbi Aôndo u Hembanagee la, mbi mbi lu van ioo la ka Armagedon je la. Inja na yô, ka u a vande eren tom u lun kwagh môm a tom u Eliya la cii man mkur u tar u ifer ungun ne man Hemen u Dubuanyom u Tartor u Aôndo u sha, u sha ikyev i Yesu u a tem tor la ua va ye. Man er kwaghôron u profeti la a kaa vough nahan, cii man Yehova una tim tar u ifer ungun ne yô, nongo u Eliya u ainge man umiliôn mba ve sue ve, ka mba ve lu Mbakristu a ve imôngo shi ve lu a ishimaverenkeghen shin tar ne la, mba eren tom u hiden veren mcivir u wang her shi kenden a iti i Yehova sha shi tesen mba ve lu inja er ka iyôngo la mimi u Bibilo sar sar kpaa.
Yehova Veren Mbacivir Un Doo Doo
15. Yehova ka a umbur mbacivir un nena?
15 Yehova veren mba ve civir un la doo doo. Malaki 3:16 kaa ér: “Tsô mbacian TER kpaa gema ôr kwagh ayol a ve; TER kpaa ver ato, ungwa, i nger ruamabera u umbur akaa sha ishigh Nagh, sha ci u mba ve cie TER, man mba ve civir iti Na yô.” Hii sha shighe u Abel la je zan zan, Aôndo ngu ngeren ati a mba a va umbur ve a na ve uma u tsôron la shin takerada. Hen mban ne yô, Yehova kaa ér: “Va nen a môm-ken-upue mba jimin ken iyou i koson inyaregh, sha u iyou Yam i̱ lu a kwaghyan; yô, karem nen ase sha kwagh ne . . . tsô Mea bugh ne aan a Sha, Mea haa ne iveren, je ia neer á haa inya.”—Malaki 3:10.
16, 17. Yehova ver ior nav kua tom ve la doo doo nena?
16 Sha kpôô yô, Yehova ver mba ve civir un la doo doo. Inja nena? Gbenda môm yô, ka sha mkav u i̱ seer nan ve u kaven mbaawashima nav la. (Anzaakaa 4:18; Daniel 12:10) Vegher ugen yô, ka sha mne u a ne, ve lu umen atam a kpilighyol ken tom kwaghpasen la. Mbaasemaamimi kpishi kohol se ken mcivir u mimi, man mban cii kohol hingir “zegeikpelaior . . . ve due ken hanma ikurior man hanma nongo man hanma nongoior man hanma zwa kpaa. . . . Ve lu genger imo kaan er: Myom ka u Aôndo wase u A tem sha ikônough ki torough la man shi Waniyôngo kpaa.” (Mpase 7:9, 10) Zegeikpelaior ne due ken igbar sha gbenda u kpilighyol, man mba civir Yehova kpoghuloo hegen hemba miliôn ataratar ken atôônanongo aa hemban je e̱r 93,000 nahan tar sha won cii!
17 Shi se nenge a iveren i Yehova, sha er Mbashiada mba Yehova ve gber ityakerada i i har sha Bibilo shi i hembe samber a i er i gbe tar je. Hegen u se lu ôron kwagh ne, mba gberen ukôpi mba magazin u Iyoukura man Awake! la hanma uwer miliôn 90, Iyoukura ngi ken ijô 144, man Awake di ken ijô 87. Takerada u wasen or u henen Bibilo u i yer ér The Truth That Leads to Eternal Life ú yange i gber ú ken inyom i 1968 la, i̱ samber a ú hemba miliôn 107 ken ijô 117 nahan. Takerada u Ú Fatyô u Lun Uma Gbem sha won ken Paradiso Shin Tar u yange i due a ú ken inyom i 1982 la di, i na ior ú hemba miliôn 81 ken ijô 131 nahan. Takerada u Mfe u Una Va a Uma u Tsôron La di, i due a ú ken inyom i 1995 la, i̱ hira gber ú hemba miliôn 85 ken ijô 154 nahan. I samber a antakerada ú Kanyi Aôndo a Soo her Avese? u i gber ken inyom i 1996 la kuma ukôpi miliôn 150 ken ijô 244 hegen ne.
18. Er nan ve ka se ember mzehemen u ken jijingi shin er i̱ lu tôvon se a ican nahan kpaa?
18 Mba ember mzehemen u ken jijingi shin er tôvacan u tar u Satan ne a taver kpishi shi a lu zan hemen her nahan. Kwagh ne tese mimi u Yesaia 54:17 la ér: “Hanma ityumugh ki i var sha ci u vihin we iyol, ikôl ia lagh ki ga; hanma zwa u ua mough ua hendan a we sha ijir kpaa, ú hemba u. Kwagh ne ka dyako u mbayev mba TER kua perapera ve u a dugh her a Mo je ne, kape TER A kaa la.” Ka kwagh u nan ishimasurun kpishi u mbacivir Yehova fan ér Malaki 3:17 ngu kuren sha ve sha gbenda u vesen, i kaa her ér: “Vea hingir kwagh Wam jim je, kape TER u akum a Sha A kaa ne, sha iyange i Me er i la.”
U Civir Yehova Saan Saan
19. Ka nena mbacivir Yehova ve lu kposo a mbacivir un ga?
19 Mkposo u hen atô u mbacivir Yehova sha jighjigh man mba ken tar u Satan ngu hemban duen ken igbar cii, e̱r shighe a lu karen yô. Malaki 3:18 tsengaôron ér: “Né gema né kav mkposo u orperapera a iferor, man u or u civir Aôndo a or u civir Un ga la.” Môm ken mbamkposo mban yô, mba civir Yehova mba civir un a iember i vesen je. Ken atôakaa a a ne ve kwagh a lu nahan yô, ka ishimaveren i kpilighyol i ve lu a mi la. Mba a vangertiôr jimin cii hen Yehova zum u á kaa ér: “Nenge, M ngu gban Usha u he man tar u he kpaa; á kera umbur akaa a tsuaa la ga, man shi aa kera va or ken ishima kpaa ga. Kpa lu nen saan saan, ember nen gbem sha kwagh u M lu gban yô.”—Yesaia 65:17, 18; Pasalmi 37:10, 11, 29; Mpase 21:4, 5.
20. Er nan ve se lu ior mba lun saan saan?
20 Se na jighjigh a uityendezwa mba Yehova a er wener ior nav mba mimi vea war iyange na man a nyôr a ve ken tar u he la. (Sefania 2:3; Mpase 7:13, 14) Man mbagen mba alaghga vea kpe sha ci u iyolbeen man angev shin aikôr cii shighe la yô, Yehova na ibumun ér una nder ve shin ku sha u ve̱ lu uma gbem sha won yô. (Yohane 5:28, 29; Titu 1:2) Nahan er se lu kporom ikyua a iyange i Yehova ne yô, se mba a hanma ityôkyaa i se lu ior mba hemban lun saan saan shin tar ne yô, shin er se cii se lu a mbamzeyol man mbamtaver nahan kpaa.
U Na Mlumun Wer Nyi?
• Kanyi i lu “iyange i Yehova”?
• Ukwaghaôndo mba tar ne mba dondon gbenda u Iserael u sha ayange a tsuaa la nena?
• Ka akaaôron a profeti a nyi mbacivir Yehova ve lu kuren á?
• Yehova ver ior nav doo doo nena?
[Study Questions]
[Picture on page 27]
Yerusalem u sha derianyom u hiihii la ‘yegh er usu u sha atse nahan’
[Pictures on page 29]
Yehova we mbacivir un la ikyo
[Pictures on page 30]
Mimi je, mbacivir Yehova mba saan saan sha ci u ishimaverenkeghen ve i kpilighyol la