U Eren Sha Atindi A Aôndo La Ne Yehova Icivir
U Eren Sha Atindi A Aôndo La Ne Yehova Icivir
“Me civir Un sha ishughun.”—PASALMI 69:30.
1. (a) Er nan ve Yehova a kom u se na un iciviri? (b) Se na un icivir sha ishughun nena?
YEHOVA ka Aôndo uhembanagee, Tor u Hemban Cii, shi ka Orgbanakaa. Sha nahan yô, a kuma u se na iti na man mbaawashima nav icivir. U nan Yehova icivir la inja na yô, ka u se kenden un sha tseng hemban hanma kwagh cii shi wuese un man civir un sha kwaghôron man sha ieren yase. U se eren nahan “sha ishughun” yô, gba u hanma shighe cii, se lu a ishughun sha kwagh u a lu eren sha ci wase hegen shi sha kwagh u una va er sha ci wase ken hemen la. Ieren i i gbe u se lu a mi la í tese i̱ ken Mpase 4:11, ape akaauma aa jighjigh aa lu sha ken jijingi a yôô ér: “We, Ter Aôndo wase, U kuma u ngohol iengem man icivir man agee gadia U gba akaa cii man ka sha ishima You kpaa a lu, shi i gbe a kpaa ye.” Se na Yehova icivir nena? Ka sha u se henen kwagh na shi eren kwagh u a soo her avese la. Se lu nen a mhen u Orpasalmi kpa yange lu a mi shighe u lu kaa ér: “Tesem, m̱ er ishima You, gadia We U ngu Aôndo wam” la.—Pasalmi 143:10.
2. Yehova ngu a er a mba ve ne un icivir la nena, man gema di mba ve ne un ga la ye?
2 Mba ve ne Yehova icivir la mba̱ un zege kwagh. Ka nahan man a “ne mba ve lu keren Un la injar” ye. (Mbaheberu 11:6) Injar shon kanyi? Yesu yange er msen hen Ter na u sha la ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.” (Yohane 17:3) Een, mba ve “icivir [Yehova] sha ishughun” vea “ya dyako u tar, vea lu ken u gbem.” (Pasalmi 37:29) Sha vegher ugen yô, “iferor nan ngu a injar ken hemen ga.” (Anzaakaa 24:20) Man ken ayange a masetyô ne di yô, hingir torough torough u nan Yehova icivir sha ci u ica a gba ga tsô una tim mbaaferev shi una war mbaperapera. “Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.”—1 Yohane 2:17; Anzaakaa 2:21, 22.
3. Er nena i doo u se ver ishima sha takerada u Malaki laa?
3 Bibilo tese kwagh u a lu ishima i Yehova la, gadia “icighanruamabera cii ka Aôndo A ne i nger ye.” (2 Timoteu 3:16) Mkaanem ma Aôndo ma aa akaangeren kpishi a yange Yehova na mba ve ne un icivir la iveren man akaa a yange er mba ve vende u nan un icivir la kpaa. Môm ken akaangeren la ka sha kwagh u yange er ken Iserael sha shighe u profeti Malaki la. Malaki yange nger takerada u i yer u̱ sha iti na la ken inyom i 443 C.S.W. la, zum u Nehemia lu gomna u Yuda la. Takerada ú u lu a akaa a vesen shi u lu u̱ sagher iyol ne ngu a mkaanem man akaaôron a profeti aa “i nger a sha u a̱ lu se ityesen, se mba mkur u ashighe a ve sha a vese ne yô.” (1 Mbakorinte 10:11) U veren ishima sha mkaanem ma Malaki la una wase se u wan ago iyol sha ci u “iyange i vesen i cieryol i TER,” zum u̱ una tim tar u ifer ne la.—Malaki 4:5.
4. Ka atôakaa ataratar a nyi i̱ tese se ken Malaki ityough 1?
4 Takerada u Malaki u i nger u i̱ hembe anyom 2,400 la, ua wase se ken derianyom u sha 21 ne u wan ago iyol sha ci u iyange i vesen i cieryol i Yehova la nena? Ityough ki hiihii la tese se atôakaa je kuma er ataratar nahan, aa lu hange hange aa se na Yehova icivir sha ishughun sha er una ngohol se shi se zua a uma u tsôron yô: (1) Ior mba Yehova doo un ishima. (2) Gba kpee u se tese iwuese sha uicighanmbaakaav. (3) Yehova soo ér se̱ civir un a ishima yase môm. (4) Kwagh u a mgbeghan mcivir u mimi yô ka dooshima u tangen iyol ga la, ka lu hua ga. (5) Tom u Aôndo a lumun a mi yô gban kan azuur a yuhwan tsô ga. (6) Hanmô wase nana va ôr Aôndo kwagh u nan iyol i nan keng keng. Nahan yô, ken kwaghngeren u hiihii u akaangeren atar a sha kwagh u takerada u Malaki ne, se time nen sha atôakaa aa lu ken Malaki tyough 1 la sha alô sha alô.
Ior Mba Yehova Doo Un Ishima
5, 6. (a) Er nan ve yange Yakob doo Yehova ishima? (b) Aluer se dondon ikyav i jighjigh u nan u Yakob la yô, kanyi se ver ashe a mini?
5 Avur a hiin Malaki la ta iwanger sha dooshima u Yehova la wang. Mkaanem ma hiin takerada la kaa ér: “Mkaanem ma TER ôr a Iserael” la. Heela tseegh ga Aôndo kaa ér: “Ne doom ishima.” Ikyav i tesen yô, ken ivur shon môm môm la, Yehova kaa ér: “Yakob doom ishima.” Yakob yange lu or u na Yehova jighjigh yô. Shighe karen yô, Yehova gema iti i Yakob hingir Iserael, shi yange hingir ter tamen u ikyuior i Iserael. Yange Yakob doo Yehova ishima sha ci u lu orjighjigh. Mbaiserael mbagen mba yange ve lu a ieren i Yakob la hen Yehova cii yô, ve̱ doo un ishima.—Malaki 1:1, 2.
6 Aluer Yehova doo se ishima shi se var a ior nav gbang yô, se zua a msurshima sha kwaghôron u ken 1 Samuel 12:22 la, ér: “TER Una gbihi ior Nav kera ga, sha ci u iti Na i vesen la.” Ior mba Yehova doo un ishima shi ne ve injar kpaa, hemban je yô una na ve uma u tsôron. I kaa a vese heen nahan ér: “Suur sha TER, eren akaadedoo, tema ken tar la, dondo sha kwagh u mimi. I̱ saan we iyol ken TER, man Una na u asaren a ken ishima you ye.” (Pasalmi 37:3, 4) U̱ Yehova doon se ishima la zua sha ityôkyaa i sha uhar i i̱ er se kwagh sha mi ken Malaki ityough 1 la.
Tese Iwuese sha Uicighanmbaakaav
7. Er nan ve Yehova yange kôr Isou ihyomo?
7 E̱r se er ken Malaki 1:2, 3 la nahan, Yehova kaan ér “Yakob doom ishima” yô, shi a kaa ér, “Isou yô, M kôr un ihom.” Hii nan ve mkposo a lu? Yakob yange na Yehova icivir, kpa Isou u yange i mar un ahina vea na la yô, er nahan ga. Shi yange i yila Isou kpaa ér Edom. Ken Malaki 1:4 la, i yila tar u Edom ér ka tar u ifer shi ior nav kpaa ka mba i̱ vihi ishima a ve yô. Yange i na Isou iti i Edom la (inja na ér “nyian”) zum u tee dyako na u injaa u waniunda sha ci u alev a nyian la. I nger ken Genese 25:34 ér: “Isou laha dyako na u waniunda la.” Apostoli Paulu wa mbananjighjigh a na imôngo kwagh ér ve wa ikyo sha er “Ma or nana̱ de luun or u idya shin dangor er Isou u a tee tamen na sha wankwaghyan ityô i môm tseegh nahan la ga.”—Mbaheberu 12:14-16.
8. Kanyi i ne ve Paulu a kar Isou sha idyaor?
8 Er nan ve Paulu a tôô ieren i Isou ne a kar i̱ sha idya? Ityôkyaa yô, u or lun a mhen u Isou la una fatyô u nán nan u kera lun a iwuese sha uicighanmbaakaav ga. Kwagh ne una gema a fatyô u van a isholibo i vesen imba er idya nahan. Nahan a gba u hanma wase nana pine iyol i nan ér: ‘Ashighe agen ka i sarem u musan dyako wam u Orkristu—u uma u tsôron la—sha ankwagh u kpuaa er gbande u alev nahana? Alaghga m lahan uicighanmbaakaav aa u kaven shio?’ Isou yange lu a ishima i waan a isharen i hangen un u kuren gbayol na u sha iyol la ga. A kaa a Yakob ér: “Shi nam kwagh u nyian ashe ne, m̱ ya.” (Genese 25:30, ka se se nger i yier ye.) Kwagh ka a er i vihi yô, mbatomov mba Aôndo mbagen kpaa kape ve kaa vough je la, ér: “Me timbir ashe ga! A er nan ve me shi keghen ivese i civirigh?” Ishima i a̱ lu nyi je ia er kpa vea pir isharen ve i idya la hingir gbande alev hen a ve.
9. Ka nena se fatyô u lun a mcie u cian Yehova sha iciviri?
9 Mayange je se laha nen uicighanmbaakaav sha u nengen mlu u wang man mtil sha mimi man dyako wase u ken jijingi la dang ga. Kpa u lun er Isou nahan yô, de se lu nen er Yakob u̱ lu a jighjigh la, shi se lu a mcie u cian Aôndo sha icivir la sha u tesen iwuese tsung sha uicighanmbaakaav. Se fatyô u eren kwagh ne nena? Sha u wan ikyo u eren akaa a Yehova a soo la. Kwagh ne gema va a vese sha kwagh u sha utar u a lu ken Malaki ityough 1 la. Kwagh shon kanyi?
U Nan Yehova Iniôngon Yase Cii
10. Ka sha nyi gbenda upristi yange ve lu lahan tebur u Yehova-a?
10 Upristi mba Mbayuda mba ve lu eren tom ken tempel ken Yerusalem sha ayange a Malaki la, lu nan Yehova iniav mbi hemban doon ga. Malaki 1:6-8 kaa ér: “Wan civir ter na, ortom kpaa civir orvesen na; aluer Mea lu ter yô, icivir Yam ngi hana? Man aluer Mea lu orvesen yô, mcia u i ciem ngu hana? Kape TER u akum aa Sha A kaa a ven ne, ne upristi mba ne lahan iti Yam la.” Upristi mbara pine ér: “Se laha iti You hana?” Yehova gema kaa ér: “Ne mba nan nagh sha kwaghyan u hôngorough sha atse Am a nanden nagh sha mi” la. Upristi mbara pine ér: “Ka sha nyi se hôngor a we?” Nahan Yehova kaa a ve ér: “Ka er ne kaan ner: Tebur u TER ka kwagh u injaa ga yô.” Upristi mbara yange ve tese ér ve laha tebur u Yehova hanma shighe u yange vea na naagh ku doon ga cii, shi vea kaan ér: ‘ka kwaghbo ga’ la.
11. (a) Kanyi Yehova yange ôr sha kwagh u iniav mbi shin iyol nee? (b) Ka sha nyi gbenda nahan ior mbara jimin cii yange ve lu a ibo?
11 Nahan Yehova kaa a ve sha kwagh u iniav mbi doon ga mbira ér: “Na ase ortaregh wou kwagh la; á doo un a we kpa? Una rumun we kpa?” Ei, gomna ve una lumun imba iyua ngira nahan ga. Man gema Tor u Hemban Cii la kpaa una ngohol naagh ku shin iyol ga! Shi ka upristi mbara tseegh yange ve ya ibo ga. Sha mimi yô, yange ve lu lahan Yehova sha u nan iniav mbira. Kpa ior mbara jimin cii ye, yange ve lu a ibo gaa? Ei he! Ka ve je yange ve tsua uzendenya mba pirin ashe kua mba gban iwan man mba lun uange, shi ve va a mi hen upristi sha u ve na naagh a mi ye. Nenge imba kwaghbo la sha wono!
12. I̱ wase se u nan Yehova akaa ase a hemban cii la nana?
12 U nan Yehova akaa ase a hemban cii la ka gbenda môm u tesen ér a doo se ishima je la. (Mateu 22:37, 38) Nongo ú Yehova nyian ne ngu er ka upristi mbalanenkwagh mba sha ayange a Malaki la ga, ka ve tese kwaghwan u ken Ruamabera u a wasen se u nan Yehova icivir la sha u dondon mbamne mba Aôndo. U zuan sha kwagh ne yô, ka kwagh u sha unyiin u hange hange u a fatyô u zuan a mi ken Malaki ityough 1 la.
Kwagh u a Mgbeghan Mcivir u Mimi yô Ka Dooshima, Ka Hua Ga
13. Kanyi kwagh upristi yange ve lu eren u tesen ér ka hua yange lu mgbeghan ve?
13 Upristi mba sha ayange a Malaki la lu mba tangen iyol man mba lun a dooshima ga man mba eren hua sha inyar. Er nan se fe kwagh ne? Malaki 1:10 kaa ér: “Or man nan lu ase ken a ven u nana wuhe ihinda sha u né de kera keer usu sha atse Am a nan nagh sha mi la gbilin ga yô! Doom a ven ga, kape TER u akum a Sha A kaa ne, Me ngohol nagh ku sha ave a en la ga.” Een, upristi mbahuav mban yange ve̱ ngohol kpandegh sha ityom i hemban gban jime i ken tempel la, shi ve̱ hanger ér i̱ kimbi ve injar sha ihinda wuhen man usu u keer sha atse je kpaa! Kape i lu je ve yange doo Yehova u ngohol naagh ku sha ave a ve ga je la!
14. Er nan ve se fatyô u kaan ser ka dooshima a mgbeghan Mbashiada mba Yehova-a?
14 Hua man msoo u upristi mba ken Yerusalem u ngise la yange ve̱ soo ayol a ve tseegh shi ve lu mbaasorabo la alaghga una umbur se kwagh u Mkaanem ma Aôndo ma kaa ér, ior mba eren hua vea ya dyako u Tartor u Aôndo ga la. (1 Mbakorinte 6:9, 10) U gbidyen kwar sha igbenda i upristi mba nengen a ayol a ve tseegh la shi na se u seer iwuese yase sha tom u kwaghpasen u Mbashiada mba Yehova ve lu eren tar sha won cii la. Ka kwagh u sha mkighir ga; se mba we ishe sha tom wase kpaa ga. Ei, “Se mba zenden kpenga a kwaghôron u Aôndo ga.” (2 Mbakorinte 2:17) Hanma wase nana fatyô u ôron sha mimi er Paulu yange ôr nahan, ér: “M ôr ne Loho u Dedoo u Aôndo gbilin.” (2 Mbakorinte 11:7) Aluer u nenge yô, Paulu yange ‘ôr Loho u Dedoo ne saan saan.’ Kwagh la tese ikyav i kwagh u sha utaan u se ver ishima sha mi ken Malaki tyough 1 la.
Mcivir u Civir Aôndo ka Azuur a Yuhwan Ga
15, 16. (a) Upristi yange ve lu a nyi ieren sha kwagh u naagh ku nan laa? (b) Mbashiada mba Yehova mba ne iniav vev nena?
15 Upristi mba banen a jighjigh mba ken Yerusalem u ngise la yange ve nenge iniav mbi nan ér ka azuur a nan iyol kpen. Yange lu ve kwagh u yuhwan. Er i̱ lu ken Malaki 1:13 nahan, Aôndo kaa a ve ér: “Shi ne kaa kpaa, ner: Nenge, er i lu kwagh u zan iyol yô! Shi ne ta un ahenga kpaa.” Upristi mbara yange ve ta uicighanmbaakaav mba Aôndo ahenga shi ve laha ve kpaa. De se er nen msen sha er mayange je se asange asange se hingir er ve nahan ga yô. Kpa, hanma shighe yô ma se lu tesen ikyav i ieren i i pase ken mkaanem ma ken 1 Yohane 5:3 la, ér: “Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.”
16 I̱ saan se iyol u nan Aôndo iniav mbi ken jijingi, mayange se hen nen ser ka ikyav mbi yuhwan tsung ga. Se yar nen tom sha mkaanem ma profeti man, ér: ‘Kaa nen a [Yehova] ner: De se a ifer yase cii, rumun kwagh u a lu u doon yô, nahan sé gema ityumbujôôv yase sé na nagh sha mi, sha ityough ki anomabua.’ (Hosea 14:2) Ishemberkwaghôron i ‘ityumbujôôv sha ityough ki anomabua’ la tese iniav mbi ken jijingi, ka mkaanem ma se er sha u wuese Yehova man mbaawashima nav la. I nger ken Mbaheberu 13:15 ér: “Nahan se naan nen Aôndo nagh ku iwuese gbem sha [Yesu Kristu], ka atam a ityumbujôôgh i pasen iti Na ken igbar je la.” Se mba a iember kpishi sha e̱r iniav yasev mbi ken jijingi mbi lun di kwagh u gban eren tsô ga, kpa mbi lu mtese u tesen mdoom ma Aôndo a doo se ishima a ishima yase i môm la yô! Kwagh ne gema va a kwagh u sha ataratar u a fatyô u yaren twar ken Malaki ityough 1 zuan a mi yô.
Hanma Wase Nana Ôr Kwagh u Nan Iyol i Nan Keng Keng
17, 18. (a) Er nan ve Yehova a kaa ér “ifan i̱ kôr orcugh”? (b) Yange kwagh gba mbaeren kwagh sha icugh la sha nyi ga?
17 Hanma or u sha ayange a Malaki la cii yange nan tôô ikyav mbi nan iyol i nan, man se kpaa kape a lu je la. (Mbaromanu 14:12; Mbagalatia 6:5) Nahan, i nger ken Malaki 1:14 ér: “Ifan i̱ kôr orcugh, u ka nan lu a nomile [u wang] ken ikumuile i nan la, man nan tôndo zwa je, kpa nan gema nan na TER nagh sha kwagh u lun a ihogholough iyol.” Or u nan lu a ikyumuile cii nan ngu a zendenya môm tseegh tsô ga—u tesen ikyav yô, er iyôngo nahan nan ngu a i̱ môm tseegh ve—nana hen ér nan ngu a mô ugen ga ze. Nana nguren tsuan zendenya u nana na naagh a mi yô, ka u nana za tsua u a pir ashe shin a gbe iwan shin a lu uange la ga. Aluer ka zendenya u lun a ihyogholough iyol la nan za tsough yô, kwagh la una tese ér nan ngu lahan mserakaa u Yehova sha kwagh u naagh ku nan, sha ci u or u nan lu a ikyumuile cii yô ka keng nana fatyô u zuan a i i lu wang yô!
18 Ka nahan ve Yehova a we orcugh u nan lu a nomile kpa nan tee—alaghga nan kper a kpela—ankwagh u pirin ashe shin u gban iwan shin u lun uange la nan ve a mi hen pristi sha u nan naagh la ifan ye. Nahan kpa, ikyav cuku tsô ngi i tesen ér ma pristi môm tsô kpa nan ter kwagh u tindi a kaa la nan pase e̱r i lumun a imba zendenya u lun a ihyogholough la ga nahan ga. (Levitiku 22:17-20) Or u nan lu a shinshima cii nana fa kwagh u una er luun er ve nôngo sha u kighir gomna ve a imba iyua ngila nahan yô. Kpa sha kpôô yô, yange kwagh zua ve a Yehova u a lu Tor u Hemban Cii, a hembe hanma gomna u orumace i yem zende zende la. Malaki 1:14 kaa nahan ér: “Gadia Mo M ngu Zegetor, kape TER u akum a Sha A kaa ne, iti Yam kpaa cier iyol ken akuraior.”
19. Kanyi se lu veren ashe a mi, man kanyi i doo u se lu erenee?
19 Er se lu mbacivir Aôndo sha mimi yô, se mba veren ashe a iyange i uumace cii vea civir Zegetor, Yehova la. Zum la, “tar ua mgbough a mfe u TER er mngerem ma ngee shin zegemnger nahan.” (Yesaia 11:9) Kpa hegen di yô, se kange nen ishima u kuran atindi a Yehova sha u dondon orpasalmi, u a kaa ér: “me civir Un sha ishughun” la. (Pasalmi 69:30) Sha nahan yô, Malaki ngu a akaawan agen aa a fatyô u wasen se tsung yô. Nahan yô, se ver nen ishima zulee sha avegher agen a takerada u Malaki ne ken akaangeren ahar aa dondon ne.
Ú Umbur Kpa?
• Er nan i doo u se na Yehova iciviri?
• Er nan ve iniav mbi upristi mba sha ayange a Malaki la lu kwagh u doon Yehova ga?
• Se mba ne Yehova naagh ku ityumbujôôv nena?
• Kanyi ia lu kwagh u mgbeghan se sha ci u mcivir u mimini?
[Study Questions]
[Picture on page 15]
Kwaghôron u profeti u Malaki la lu ôron kwagh u ayange ase
[Picture on page 16]
Isou lu a iwuese sha uicighanmbaakaav ga
[Picture on page 17]
Yange upristi man ikyuior la na iniav mbi doon ga
[Picture on page 18]
Tar sha won cii, Mbashiada mba Yehova mba ne iniav mbi ityumbujôôv ve gbilin