I Wanger Se Se Mba Ior Mba Eren Akaa A Dedoo
I Wanger Se Se Mba Ior Mba Eren Akaa A Dedoo
“Se wanger nen ayol a ase sha hanma kwagh u hôngorough u ken iyol kua ken jijingi cii, se sôr nen mtsegh wase, a̱ hingir vough sha mcie u cian Ter la.”—2 MBAKORINTE 7:1.
1. Kanyi Yehova a soo ér mbacivir un ve̱ ere?
“KA an je nana kôndo sha uwo u TERE? Ka an je nana tile ken icighanjiir Na?” Lu Tor Davidi u Iserael u sha ashighe a tsuaa la lu pine mpin u kôron ken ishima ne sha kwagh u mcivir u Yehova a lumun a mi la ye. A gema á na ikyar ér: “Ka u nan lu a ave a wang je, man ishima i mimi kpaa la; shi nan veren ishima i nan sha gbilinkwagh ga, man nan bumun sha icugh kpaa ga yô.” (Pasalmi 24:3, 4) Cii man Yehova u a lu imbor i mlu u icighanegh la a̱ lumun or yô, sar nana lu wang shi nana tsegha iyol i nan kpaa keng. Tsuaa la je, Yehova umbur nongoior u Iserael ér: “Tsegha nen ayol a en, lu nen uicighanmbaiorov je, gadia Mo M ngu icighan je.”—Levitiku 11:44, 45; 19:2.
2. Paulu man Yakobu pase var var e̱r i gbe u mcivir u mimi una lu wang keng la nena?
2 Anyom nga karen uderi imôngo yô, apostoli Paulu nger mba ve lu Mbakristu a na imôngo mba ken gar u Korinte u ieren i dang dumbur ker la ér: “Er se lu a uityendezwa mban yô, se wanger nen ayol a ase sha hanma kwagh u hôngorough u ken iyol kua ken jijingi cii, se sôr nen mtsegh wase, a̱ hingir vough sha mcie u cian Ter la.” (2 Mbakorinte 7:1) Kwagh ne shi seer tesen kwagh u a lu yô, ér, cii man or a̱ ya ikyar vea Aôndo shi nana̱ zua a averen a á tendezwa la yô, sar nana lu wang shi nana lu a acôghor iyol shin ken jijingi kpaa ga, shi nana lu a hôngor iyol kpaa ga. Kape orhenen Yakobu kpaa zum u a lu ngeren kwagh u mcivir u Aôndo a lumun a mi la yô, kaa la, ér: “Mcieaôndo u wang u a lu a acôghor iyol sha ishigh ki Aôndo ga yô, ka un ne: ka u za sôron ancôgholov kua kasev mba côgholov ken ican ve, man shi u kuran iyol you wang sha kwagh u taregh.”—Yakobu 1:27.
3. Cii man Aôndo a̱ lumun a mcivir wase yô, kanyi i gbe u se nôngo kpoghuloo se ere?
3 Er u lun wang shi u lun icighan shi lun a acôghor iyol ga la i lu akaa a hange hange ken mcivir u mimi yô, doo u hanma or u i sar nan u Aôndo a̱ lumun a nan cii nana nôngo kpoghuloo u eren akaa ne. Er mbamnenge mba iorov sha kwagh u mlu u wang a lu kposo kposo ainge, shi akaa a ve nenge ér nga wang la kpa a zough ga nahan kpa, gba u se kav shi se yar tom sha kwagh u Yehova a nenge ér ka u wang shi á lumun a mi la. Gba u se tôv se fa kwagh u Aôndo a soo ér mbacivir un ve̱ er sha gbar ne man kwagh u á er sha u wasen ve sha e̱r vea hingir wang shi vea lu a ieren ne her ve, una lumun a ve la.—Pasalmi 119:9; Daniel 12:10.
U Lun Wang sha ci u Mcivir u Mimi
4. Pase inja i kwagh u Bibilo i̱ yer ér mlu u wang la.
4 Ior kpishi hen ér u lun wang yô, ka di u nyaghen il shin kwagh u hôngorough tsô. Nahan kpa ken Bibilo yô, i pase mhen u kwagh u wang la sha asemberatii a ken zwa Heberu man zwa Grika a a pase mlu u lun wang ér ka kwagh u sha iyol tseegh ga, kpa ashighe kpishi ka i lu sha gbar u ieren i dedoo man kwaghaôndo kpaa. Ka nahan ve takerada ugen u pasen asemberatii a ken Bibilo ú er kwagh nahan ye, ér: “ ‘Wang’ man ‘acôghor’ ka asemberatii a a fe zuan sha kwagh u tsembelee u iyolough kpee ga, kpa a lu mkaanem ma kwaghaôndo di tsô yô. Nahan, kwaghwan u sha kwagh u ‘mlu u wang’ la nôngo u tseren sha avegher a uma cii.”
5. Tindi u sha ikyev i Mose la yange na kwaghwan sha kwagh u mlu u wang ken uma u Mbaiserael nan je?
5 Sha kpôô yô, Tindi u sha ikyev i Mose la yange lu a akaawan man atindiakaa a wasen sha hanma vegher u uma u Mbaiserael cii, yange pase kwagh u a lu u wang shi i lumun a mi la, man u a lu u wang ga la kpaa. Ikyav i tesen yô, i pase akaawan a sha kwagh u mlu u wang man mlu u wang ga la vindi vindi ken Levitiku ityough 11 zan zan 15. Ishôso igen yange i lu wang ga, nahan i tswer Mbaiserael ér ve̱ de ye í ga. Yange kwase a̱ mar yô, nan lu wang ga zan zan shighe u i tese la a kar been. Shi iangev mbigen mbi sha kwavyolough kpa yange mbi na or nan kera lu wang ga, hemban cii yô imande, man ityujer i duen or ken iyol nôndon inya, shin kwase u duen won. Shi Tindi yange tese kwagh u a er sha hanma gbenda u or nan kera lu wang ga la cii. Ikyav i tesen yô, i ôr ken Numeri 5:2 er: “Kaa Mbaiserael, ve̱ due a hanma orimande hen afo kera, man hanma or u kwagh a dugh nan ken iyol a nende inya yô, man hanma or u nan kera lu wang ga, sha ci u nan bende a ku yô.”
6. Yange i wa atindi a sha kwagh u mlu u wang la sha ci u nyi?
6 Atindi ne man agen a Yehova yange na la tese akaa a sha kwagh u twersôron man mkpeyol ica i gba cii ve i va mase fan á je ka u henen a hen ga, man yange ior vea yar tom sha a yô, ve zua a mtsera kpee. Nahan kpa, yange i wa atindi ne di tsô ér a̱ kura mkpeyol ve, shin a̱ tese ve gbenda sha kwagh u twersôron ga. Yange lu a lu gbar u mcivir u mimi. Er yange atindi ne bende a uma u ior u sha ayange ayange inja er—kwaghyan man mar man mlu u ken ivese kua akaa agen la nahan cii—lu sha u pasen ve ér Yehova, Aôndo ve ngu a ian i tsuan kwagh u a lu u vough man u a lu u vough ga la sha hanma vegher u uma ve u ve tsegh sha ci u Yehova la.—Duteronomi 7:6; Pasalmi 135:4.
7. Yange lu u ikyurior i Iserael ia kuran Tindi yô, ia zua a nyi iverene?
7 Ikuryan i Tindi la shi yange i̱ kura Mbaiserael sha aeren a hôngorough a akuraior a a kase ve a wa atô la. Lu u saa Mbaiserael vea kuran Tindi la sha jighjigh, kua akaa a yange gba u vea eren sha u lun wang sha ishigh ki Yehova la nahan ve, vea kuma u lun ior mba civir Aôndo ve, shi vea zua a averen na kpaa ye. Nahan Yehova kaa a ikyurior la ér: “Aluer né veren ato sha kwaghôron Wam mimi je, shi né waan ikuryan Yam iko kpaa yô, nahan akuraior a sha won cii, ka ne né hingir kwagh Wam iyol Yam je ye; gadia tar cii, ka u Wam je. Ka ne né lum tartor u upristi kua icighanikurior ye.”—Ekesodu 19:5, 6; Duteronomi 26:19.
8. Hii nan ve i gbe u Mbakristu vea ver ishima sha kwagh u Tindi a ôr sha kwagh u mlu u lun wang la nyiana?
8 Er Yehova yange pase akaa ken Tindi la vindi vindi sha u tesen Mbaiserael gbenda u lun wang shi lun uicighan kpaa sha er una lumun a ve nahan, ka a inja u Mbakristu mba ainge kpaa vea gbidye kwar vindi vindi vea nenge er ve lu yaren tom sha imba gbenda ne ga he? Shin er Mbakristu ve kera lu sha ikyev i Tindi la ga nahan kpa, gba u vea umbur ér, akaa a Tindi a pase cii, “ka di mure u akaa a a lu van la tsô, kpa kwagh jim jim yô, ka u Kristu” la, di er Paulu a kaa nahan. (Mbakolose 2:17; Mbaheberu 10:1) Aluer sha ayange a tsuaa la je, Yehova Aôndo u a kaa ér, “M gem kposo ga” la nenge mlu u wang man u lun a acôghor iyol ga la ér ka kwagh u vesen ken mcivir u mimi yô, nahan ka kpee u nyian kpa aluer se soo ser a̱ lumun a vese shi se zua a averen a na yô, saa se nenge kwagh u mlu u wang u sha iyol man sha ieren kua ken jijingi la ser ka kwagh u iniumbe ga keng.—Malaki 3:6; Mbaromanu 15:4; 1 Mbakorinte 10:11, 31.
Mlu u Lun Wang u sha Iyol la Pasen Mlu Wase
9, 10. (a) Hii nan ve u lun iyol wang la i lu kwagh u vesen hen Mbakristu? (b) Ka nyi akaa ior ka ve shi ôron sha kwagh u mbamkohol mba vesen mba Mbashiada mba Yehova?
9 Mlu u lun wang u sha iyol la ngu kwagh u injaa ken mcivir u mimi hereghee? Shin er u lun wang sha iyol la tseegh a ne or lu or u civir Aôndo sha mimi ga nahan kpa, ka a inja u or u nan civir Aôndo sha mimi yô nana̱ lu wang sha iyol er nan fetyô cii. Hemban cii yô ainge u ior kpishi ve fe veren ishima sha iyol ve ga, shin sha iyol wuhan ve shin uikyasen vev kpaa ga ne, mba̱ ka vea nôngo vea veren ishima u lun wang sha igbenda ne di tsô yô, ior mba ve we ndor a ve la ve ver ve ikyav kpee. Kwagh ne una fatyô u umen atam a dedoo, di er Paulu yange ôr a Mbakristu mba ken Korinte nahan, ér: “Se mba nan ityôkwagh i nôngon gbev sha ma gbenda môm je ga, sha u i̱ de teren tom wase sha kwagh u dang ga yô, kpa se mba pasen ayol a ase ken akaa cii je er se lu mbatomov mba Aôndo yô.”—2 Mbakorinte 6:3 4.
10 Mbatomov mba gomoti wuese Mbashiada mba Yehova kwa kimbir kimbir sha tsembelee ve man gbenda u ve eren kwagh sha inja la man aeren ve a sha icivir la, hemban cii yô, gbenda u ka i nenge ve eren kwagh sha mbamkohol vev mba vesen la. Ikyav i tesen yô, pipaabaver i̱ í yer ér La Stampa la i̱ nger abaver sha kwagh u mkohol u vesen u yange i zua ken tiôntar u Savona, Italy la ér: “Kwagh u ka wea nyôr ken agirigi pe ve lu la ve ú hii nengen a mi tseer tseer yô, ka mlu u wang man u ijiir la man gbenda u ior mba her ve eren hanma kwagh sha inja sha inja la.” Ken gar u São Paulo, Brazil di zum u Mbashiada bee mkohol ve u ve kumba hen agirigi u anumbegh la yô, orvesen u nengen sha agirigi u anumbegh la ôr a orhemen u nengen sha mba sôron ijiir la ér: “Hii nyian yem hemen se soo ser agirigi u anumbegh ne a̱ lu wang er Mbashiada mba Yehova ve ser un a lu nahan.” Orvesen ugen u hen agirigi u anumbegh shon kaa ér: “Hanma shighe u Mbashiada mba Yehova ka vea sôn ian ér ve soo u eren kwagh hen agirigi u anumbegh ne yô, ka i lu di sha kwagh u ayange a ve kaa ér i̱ na ve la tseegh ishima i nyian se ye. Kwagh ugen môm ze se iyol ga.”
11, 12. (a) Ka kwaghwan u Bibilo u nyi i doo u se umbur shighe u i ve sha kwagh u mlu u se lun wang yôô? (b) Ka mbampin mba nyi se fatyô u pinen sha kwagh u ieren yase man gbenda u se eren akaa ken uma wase laa?
11 Sha kpôô yô, aluer u eren a ijiir i se civir Aôndo her la wang shi eren akaa sha inja vough vough la ka gbenda u wuese Aôndo u se civir la yô, u se tesen aeren ne ken uuma asev kpaa ka kwagh u hange hange. Kpa alaghga se hen ser er se lu ken uyaav asev ken iuv yô, aluer se haa iyol inya, se er sha ishima yase kpa ka kwagh ga. Man hide sha kwagh u hwe u eren man iyol wuhan yô, se mba a ian i tsuan kwagh u a lu sha ishima yase shi a hembe doon se u huan la! Nahan kpa, aluer se gbidye kwar doo doo se nenge yô, se kav ser ian i eren kwagh ne je kpa ngi a ikighir. Umbur wer Paulu yange ngur tan mba ve lu Mbakristu a na imôngo la icin sha kwagh u akaayan agen a ve tsough ér vea ya la yô, a kaa ér: “Kura nen ayol, tahav enev mbura mbu̱ de hingir mba ve taver ga la ityôkyaa i nôngon gbev ga.” Maa a za hemen a wa ve kwaghwan u injaa ne, ér: “I na ian sha akaa cii. Kpa ka akaa cii man a lu iwasen ga. I na ian sha akaa cii kpa ka akaa cii a lu mmaa ga.” (1 Mbakorinte 8:9; 10:23) Se yar tom a kwaghwan u Paulu yange wa ne sha kwagh u mlu u lun wang la nena?
12 Ka vough u ior ve̱ ver ishima ér ortom u Aôndo nana̱ lu wang shi nana̱ eren kwagh sha inja ken uma u nan kpaa. Nahan, doo u se ver ishima ser ya wase man akôngo a ya cii a kaha kposo a kwagh u se kaan ser se mba la ga, inja na yô ka mlu u se lu mbatomov mba pasen Mkaanem ma Aôndo la je la. Ka shiada i nyi shin iti i nyi ya wase a ve a mi sha a vese man atesen a ase? A tese ér sar se tsung u lun ken tar u he u perapera, u lun wang shi lun sha inja, er se taver ior mbagen asema kpoghuloo sha kwagh u ú nahan la kpa? (2 Peteru 3:13) Kape mlu wase kpa una seer shin una pande icivir i ior ve ne loho u se pasen la je la, a̱ lu sha shighe u memen shin ken tom kwaghpasen kpaa. Ikyav i tesen yô, ungwa ase kwagh u or u tôôn abaver ugen yange nger ken pipaabaver i ken Mexico la, wener: “Sha mimi yô, igyumior hemba ingyegh ken Mbashiada mba Yehova, man kwagh u a hembe duen tseer tseer ken ave je yô, ka er ka ve hondo ityou doo doo shi ve lu wang shi ve wuha iyol sha inja kpaa la.” Nenge i lu kwagh u iember u lun a amba a igyumior ne hen atô wase sha wono!
13. Kanyi se er ve hanma vegher u uma wase u ayange ayange la cii una lu wang man shi una lu sha injaa?
13 Sha kpôô yô, u veren ishima ser iyol yase man akaa ase man ya wase cii mba tsembelee shi i ver hanma kwagh sha inja vough la ka kwagh u kiriki ga. Nahan kpa kwagh u a lu u vesen yô, ka u lun a ikyav kpishi shin mbaanar mba taver ishe kpelegh kpelegh la kwagh a gbe sha mi ga, kpa ka u sôron ian veren shi nôngon kwagh tsusee la a hembe lun a inja ye. Saa se lu a shighe u ôôn iyol man u kiren akondo ase man u sôron ya wase kua mato wase, kua u sôron akaa agen kpaa veren wang. U se uven ityough ken tom kwaghpasen man mbamkombo mba zan kua kwaghhenen wase ikyangegh la—kua akaa agen a ka se lu a mi a eren kpete kpete la cii—mayange ka ityôkyaa i ia yange se u lun wang ga, sha er Aôndo una lumun se shi ior kpaa vea lumun se yô. Kwagh u ior kpishi ka ve kaa ér: “Hanma kwagh ngu a ayange na” la ngu mimi nahan sha gbar u uma ne kpaa.—Orpasenkwagh 3:1.
Ishima I̱ I̱ Lu a Acôghor Iyol Shio La
14. Er nan ve a fatyô u kaan ér ieren i wang man mlu u wang u ken jijingi hemba ngun a inja a mlu u wang u sha iyolo?
14 Er i lu a inja u veren ishima sha mlu u wang u iyolough nahan, hemba kan a inja u veren ishima sha ieren i wang man mlu u wang u ken jijingi la cii. Ityôkyaa i í ne ve se kur ikyaa nahan yô, se umbur ser Yehova yange venda ikyurior i Iserael, kpa lu sha ci u ve hôngor sha iyol yum ga, kpa gema lu sha ci u ve hôngor sha ieren ve man mlu ve u ken jijingi la. Yehova ôr kwagh a ve sha ikyev i profeti Yesaia, kaa a ve ér, er ‘ve lu ikyurior i eren kwaghbo’ yô, iniaav vev man mkor u ve kuran uwer u he man iyange i memen la kua mbamsen vev cii je kpaa, nyôr un iyol a mi. Lu u vea er nyi ve Aôndo una lumun a ve? Yehova kaa ér: “Ôô nen ayol, wanger nen ayol a en; kar nen a ifer i aeren a en sha ishigh Yagh kera; de nen akaabo a eren.”—Yesaia 1:4, 11-16.
15, 16. Yesu yange kaa ér kanyi i̱ hôngor oro, man se zua a mtsera sha mkaanem ma Yesu mara nena?
15 U seer kaven er ieren i wang man mlu u wang u ken jijingi ve lu hange hange yô, time ase sha kwagh u Yesu yange ôr a Mbafarishi man mbangeren zum u ve gba ahon ér mbahenen nav mba wang ga sha ci u mba ee ave cii ve ye kwaghyan ga yum la. Yesu yange sôr ikyaa la ver vough sha u kaan a ve ér: “Ka kwagh u a nyer or ken zwa man a ne nan kera lu wang ga ze. Kpa ka kwagh u a dugh ken zwa, ka a na or nan kera lu wang ga ye.” Yesu shi pase ér: “Akaa a a dugh ken zwa yô, ka ken ishima a dugh ye, ka a je, a ne or nan kera lu wang ga ye. Gadia ka ken ishima man aferakaa a henen kua iwoo-or man idya man iiv man mbampase mba sha aie man ityuhwanev ve dugh ye. Ka ve ve ne or nan kera lu wang ga ye; kpa u ôôn ave ga, yan kwagh yô, gem or nan lu wang ga ze.”—Mateu 15:11, 18-20.
16 Mkaanem ma Yesu man ma tese se nyi? Yesu yange lu ôron ér, ifer man idya man ieren i wang ga cii mba dugh ken mhen u bo man u hôngorough man u wang ga u ken ishima la. Orhenen Yakobu una kera kaa ga yô, “hanma or ka i mee nan zum u asaren a nan iyol i nan ka a urugh nan a hôn nan la.” (Yakobu 1:14, 15) Nahan yô, aluer se soo ser se gba ken isholibo i vihin tsung i Yesu yange ôr kwagh u i̱ ne ga yô, se dugh mbamhen mbara ken a vese kera vindi vindi, shi se de u henen ve ken asema ase kpaa. Inja na yô, gba u se wa ikyo sha ityakerada i se ôron la man ufoto mba se nengen la man ityogholouv mbi se ongo la kpaa. Nyian ne, ikyômpeni i tesen ugurgurmbaakaav man í yôôn akaa kôr ave sha ian i hanma or nan lu a mi u lamen gbar gbar shi eren eev sha mnenge u nan la sha u tesen akaa a ngirigh isharen i iyol i i vôr kera ne a uwegh gban shio. Se nyima nen tsombo ser mayange den yase ser mbamhen mbara nahan ve̱ ya tor ken asema a ase ga. Semakwagh jim yô, gba u saa se lu tsevaa hanma shighe cii sha er se za hemen u lun wang, lun a acôghor iyol shio yô, aluer ka u a doo Aôndo a vese shi una lumun se yô.—Anzaakaa 4:23.
I Wanger Se sha ci u Akaa a Dedoo
17. Ka sha ityôkyaa i nyi Yehova a wanger ior nava?
17 Sha mimi yô, er Yehova a wase se ve, i lu u se fatyô u ember mtil u wang sha ishigh nagh nahan, ka iveren shi ka mkor kpaa. (2 Mbakorinte 6:14-18) Nahan kpa, se kav er Yehova a wanger ior nav i lu sha u ivin kwagh u a we ishima la jighilii yô. Paulu yange ôr a Titu ér Kristu Yesu “na [iyol na] sha ci wase sha u Una paa se sha hanma ifer cii man shi Una wanger nongoior sha ci Na iyol Na, mba asema a tsee ve u eren akaa a dedoo” yô. (Titu 2:14) Er se lu ior mba i wanger se yô, ka ityom i dedoo i nyi nahan i gbe u se lu eren a ishima i tseene?
18. Se tese ser se mba a ishimatseen sha ci u eren akaa a dedoo nena?
18 Kwagh u hiihii yô, se nôngo nen kpoghuloo ken mpase u pasen loho u dedoo u Tartor u Aôndo ken igbar la. (Mateu 24:14) Aluer se mba eren nahan yô, se lu nan ior ishimaverenkeghen i va lun uma gbem sha won ken tar ú ua lu a ma mvihi u mlu u wang ga la. (2 Peteru 3:13) U se eren akaa a dedoo la kua u se umen atam a jijingi u Aôndo la ken uuma asev ayange ayange kpaa, sha nahan yô, se lu nan Ter wase u sha la icivir. (Mbagalatia 5:22, 23; 1 Peteru 2:12) Shi se hungur nen mba ve lu ken mimi ga kpa alaghga ma aahe u sha gbaaôndo shin ipila i orumace i̱ caver a ve la ga. Se lu nen a kwaghwan u Paulu yange wa ne ken ishima, ér: “Nahan er se lu a ian yô, se eren nen akaa a doon a ior cii, kpa jim je yô, ka mbananjighjigh.” (Mbagalatia 6:10) U eren amba a tom angan ne a ishima i wang man a awashima u dedoo la, ka kwagh u doon Aôndo ishima.—1 Timoteu 1:5.
19. Aluer se za hemen u kuran atindi a tseng a sha kwagh u mlu u wang u iyolough man u sha ieren man u ken jijingi la yô, kanyi i̱ lu keghen se?
19 Er se lu mbatomov mba Aôndo Uhembansha yô, se yar nen tom sha mkaanem ma Paulu man, ér: “Anmgbianev av, m ngu zamber a ven sha mhôônom ma kôron ma Aôndo mer, gema nen ayol a en na nen nagh ku uma a mi, icighannagh ku doon Aôndo, ka mciviraôndo wen u ken jijingi je la.” (Mbaromanu 12:1) Se za nen hemen u veren ishima sha ian i civirigh i se lu a mi i lun ior mba Yehova a wanger se ne, shi se nôngo kpoghuloo u kuran atindi a tseng a sha kwagh u mlu u wang u iyolough man u sha ieren man u ken jijingi la. Aluer se er nahan yô, se zua a iciviryolough man mkom hegen tseegh ga, kpa shi se lu a ishimaverenkeghen i va nengen er “akaa a tse la” aa kar kera zum u Aôndo una ‘gema akaa cii aa hingir a he’ la yô, inja na yô ka botar u a hôngor yum ne je la.—Mpase 21:4, 5.
Baver We Kpa?
• Hii nan ve yange i na Mbaiserael atindi kpishi sha kwagh u mlu u wang na?
• Mlu u wang u iyolough la seer mdoom ma loho u se pasen ne nena?
• Er nan ve mlu wang u sha ieren man u ken jijingi la a hembe lun a inja a mlu u wang u iyolougho?
• Se tese ser se mba ior mba “asema a tsee ve u eren akaa a dedoo” nena?
[Study Questions]
[Pictures on page 29]
Mlu u wang u iyolough la seer mdoom ma loho u se pasen la
[Picture on page 30]
Yesu yange ta icin ér mbamhen mba bov mba ve a aeren a bo
[Pictures on page 31]
Er Mbashiada mba Yehova ve lu ior mba lun wang yô, mba a ishimatseen i eren akaa a dedoo