Iengem I Yehova Ngi Mondon Sha Ior Nav
Iengem I Yehova Ngi Mondon Sha Ior Nav
“TER Una lu iwanger you i tsôron.”—YESAIA 60:20.
1. Yehova veren ior nav mbajighjigh doo doo nena?
“DOO TER a ior Nav, Una wuha mbaasemaleghlegh iyol sha myom.” (Pasalmi 149:4) Kape orpasalmi u ngise la ôr je ne, shi tsegh ku mbayiase tese mimi u mkaanem nam man. Shighe u ior mba Yehova ve lu jighjigh yô, ka a wa ve ikyo, a na i kpe ve iyol shi a kura ve kpaa. Sha ashighe a tsuaa la, yange á na ve hemba mbaihyomov vev ityav. Nyian kpaa, ne ve tahav ken jijingi, shi a er ityendezwa i yiman ve sha ci u naagh ku Yesu la. (Mbaromanu 5:9) Eren a ve nahan sha ci u ve lu kwagh u hweegh sha ishigh nagh yô.
2. Shin er ior mba Aôndo ve tagher a ahendan nahan kpa, mba a vangertiôr ér nyi?
2 Sha kpôô yô, ken tar u ime i himbir u ne, “mba ve zenden sha mciviraôndo” cii vea tagher a ahendan. (2 Timoteu 3:12) Nahan kpa, Yehova lan mbaahendanev mbara ga, á ta se ikyur ér: “Ikurior vea tartor u ua er u tom ga yô, vea saa ishe, akuraior ngara á tim a purututu.” (Yesaia 60:12) Nyian ne, ahendan nga ve ken igbenda kposo kposo. Ken ityar igen yô, mbaahendanev nôngo u yangen shin cirin mcivir u Mbakristu mba mimi ve civir Yehova la. Ken ityar igen di yô, ior mba norom ikyaa ka ve ta num kpôô kpôo sha ior mba civir Yehova shi ve nande ve ikyav kpaa. Umbur wer, Yehova vande fan kwagh u una er a nyityô ahendan a a mough sha u yangen awashima na la. Ior mba hendan mbara vea hemba ga. Mba ve lu nôngon num a Shion, ônov nav mba ve lu shin tar la, vea gba bo. Kwagh u Yehova Aôndo wase u hemban a ôr ne ka u taver se ishima ga he?
Ve Zua a Iveren je Kpilighyol
3. I tese ikyav i hwe u ior mba civir Yehova la man mzehemen ve la nena?
3 Sha mimi yô, Yehova ver ior nav doo doo ken ayange a mkur u tar ne je kpilighyol ve iyol. Hembancii yô, á seer eren ijiir i civir un man ior mba ve lu ker ve yer sha iti na la cii hwe. Á ôr kwagh a Shion ken kwaghôron u profeti Yesaia ér: “Icivir i Lebanon ia va her a we, kon u fer man kon u pelane kua kon u ouki, i cii, sha ci u eren icighanjiir Wam hwe; Me gema ijiir Yam i veren angahar ia lu i icivirigh.” (Yesaia 60:13) Akô gba mure sha iwo doo kenger kpen kpen. Nahan, ikyon i gban mure la ngi tesen ikyav i i kom sha hwe vough man mzehemen u mbacivir Yehova la—Yesaia 41:19; 55:13.
4. Kanyi i lu “Icighanjiir” man “ijiir [i Yehova] i veren angahar” la, man i er i hwe nena?
4 Kanyi i lu “Icighanjiir” man “ijiir [i Yehova] i veren angahar” i i tér ken Yesaia 60:13 laa? Asemberatii ne tese ér ka ityembe i zege tempel u Yehova u ken jijingi, u a lu mserakaa u i ser i ver sha u kporom ikyua hen a na sha u civir un ken Yesu Kristu je la. (Mbaheberu 8:1-5; 9:2-10, 23) Yehova pase awashima na u a we u nan civir sha tempel u ken jijingi la sha u van a ior ken nongoior cii sha u van, va civir her. (Hagai 2:7) Yesaia yange vande nengen aa akuraior cii lu kôndon sha uwo u taven u mcivir u Yehova. (Yesaia 2:1-4) Anyom uderi imôngo nga karen yô, apostoli Yohane “nenge, zegeikpelaior lu, ma or fatyô u ôron i iyenge ga, ve due ken hanma ikurior man hanma nongo man hanma nongoior man hanma zwa kpaa.” Ve tile “sha ishigh ki ikônough ki Aôndo . . . , ve lu eren Un tom ken tempel Na tugh man tetan kpaa.” (Mpase 7:9, 15) Se nenge er i er iyou i Yehova hwe yô, sha er akaaôron a profeti ne a lu kuren sha ayange a ase ne yô.
5. Ka zege mgem u dedoo u nyi ônov mba Shion ve zough a mini?
5 Kwagh ne ka zege mgem u dedoo hen Shion! Yehova kaa ér: “Er ngise i ta u kera, i kôr u ihom, je ma or kera kar hen we ga, nahan Mo Me gema u, ú hingir kwagh u engem zan zan gbem, man shi kwagh u iember sha ikov ikov.” (Yesaia 60:15) Cii man mkur u ityav mbi tar cii mbi hiihii mbira mbi kure yô, “Iserael u Aôndo” nyôr ken iaven i or kera kar hen ve ga yô. (Mbagalatia 6:16) Yange i lu un inja er ‘i ta un kera’ yô, gadia mbayev nav mba shin tar la kera kav awashima u Aôndo wa sha ci ve ga. Kpa ken inyom i 1919 yô, Yehova nder mbatomov nav mba i shigh ve mkurem la, man hii shighe la zan zan hegen a ver ve doo doo sha u nan ve mzehemen u kpilighyol u ken jijingi. Sha kpôô yô, ityendezwa i i er ken ivur ne i na sagher se iyol ga he? Yehova una nenge Shion ér ngu “kwagh u engem.” Een, ônov mba Shion man Yehova iyolna kpaa vea ta ave vanger a Shion. Shion una “ember,” a lu un kwagh u ember a ikighir ga. Man iember la ia lu i sha anshighe kpuaa tseegh tsô ga. Mlu u doo doo u Shion a lu ker, er ônov nav mba shin tar ve tese ikyav la, una lu “sha ikov ikov.” Mayange je una bee sha won ga.
6. Mbakristu mba mimi yar tom a akaa a akuraior nena?
6 Shi kegh ase ato sha ityendezwa igen i Aôndo a er la. Yehova kaa a Shion ér: “Ú ma atumba a akuraior, man shi ú ambe atumba a utor, man ú fa er Mo TER, M lu Oryiman wou man Orpaan wou kpaa, U ageegh u Yakob.” (Yesaia 60:16) Shion ma “atumba a akuraior shi a “ambe atumba a utor” nena? Ikyav i kwagh ne ér Mbakristu mba i shigh ve mkurem man “iyôngo igen” i i lu a kar a ve la mba yaren tom a akaainjaa a akuraior sha u samber a mcivir u wang. (Yohane 10:16) Iyua i eren sha inyar a mkighir shio ne ka i wase u suen tom u pasenkwagh man ú tesen tar sha won cii. Myar u yaren tom a iwavaren i ainge sha inja la wase mgber u gberen Bibilo man ityakerada i i har sha Bibilo ken ijô uderi imôngo. Er i gbe je, ka ainge mimi u Bibilo a hembe aren a ior ngeen cii ye. Ior kpishi mba ve dugh ken akuraior kpishi fa ér ka Yehova ayem mbatomov mba i shigh ve mkurem mbara ken ikyangenev mbi jijingi la ye, man mimi je, ka un a lu Oryiman ye.
Mzehemen u Nongo Ne
7. Ka mzehemen u tseer tseer u nyi ônov mba Shion ve zough a mini?
7 Yehova er ior nav hwe ken gbenda ugen. Á na ve mzehemen. I ôr ken Yesaia 60:17 ér: “Me va a zenaria sha ityough ki togula, shi Me va a azurfa sha ityough ki iyôgh, togula sha ityough ki kon, iyôgh sha ityough ki awen. Me ver bem a̱ lu orkurantar wou man perapera a̱ lu ityoor wou.” U tôôn zenaria veren sha ityough ki togula ka mzehemen, shi mbaanar mbagenev mba i ter la kpa kape i lu vough je la. U zuan sha kwagh ne yô, Iserael u Aôndo ngu zuan a mzehemen u nongo ne u lu zan hemen ken ayange a masejime ne. Time ase sha akav kpuaa.
8-10. Pase mbamzehemen mba nongo ne mba ve lu zan hemen hii ken inyom i 1919 la.
8 Cii man inyom i 1919 la yô, lu mbatamen man udiakon nengen sha tiônnongo ye, yange i lu ishamior i ken tiônnongo i er ishangen i tsua ve ye. Hii ken inyom la je, “wanakiriki u jighjigh man u fan kwagh” ver orhemen u nengen sha tomshiren ken hanma tiônnongo sha u nana̱ nengen sha tom u kwaghpasen yô. (Mateu 24:45-47) Nahan kpa, ken atôônanongo kpishi, mserkwagh ne yange wase tsembelee ga, sha ci u mbatamen mbagen mba yange i tsua ve la ve sue tom ivangeli ne kpoghuloo ga. Sha ityôkyaa ne yô, ken inyom i 1932 la, i kaa a atôônanongo ér a̱ de u eren ishangen i tsuan mbatamen man udiakon. Kwagh u lu u vea er yô, lu u vea tsua ior mba vea lu kômatii u nengen sha tom kwaghpasen vea orhemen u nengen sha tom kwaghpasen la. Kwagh ne lu er i ver “zenaria” sha ityough ki “togula” nahan—lu mzehemen u kiriki ga!
9 Ken inyom i 1938 la, atôônanongo tar sha won cii er mhen ér vea lumun a mserkwagh u una va a mzehemen man u Ruamabera a hembe suen un la. Yange i gema tom u nengen sha tiônnongo i wa sha ikyev i ortom u hemen kômpeni man mbatomov mbagenev, mban ne cii lu sha ikyev i wanakiriki u jighjigh man u fan kwagh i tsuan ve ye. Kwagh u ishangenegh la maa kure! Nahan i gba veren ior sha tom ken tiônnongo sha hemen u Aôndo. Kwagh ne lu er ka u veren “iyôgh” sha ityough ki “awen” shin “zenaria” sha ityough ki “togula” nahan.
10 Hii hen shighe la je, mba a de u zuan a mzehemen ga. U tesen ikyev yô, ken inyom i 1972 la, i va nenge ér hemba doon u mzough u mbatamen mba i tsough ve sha hemen u Aôndo la a hemen atôônanongo a u veren ortamen môm tseegh hemen tiônnongo jimin cii la, mserkwagh ne nôngo u lun kwagh môm a gbenda ú Mbakristu mba sha derianyom u hiihii hemen la. Heela tseegh ga, anyom a a sember karen ken ijime er ahar la, mhen ugen shi va due. I nyôôso hemen u mbamzough mbagen mba i ver sha tindi la, nahan Mbahemenev mba Shin Tine hemba zuan a ian i veren ishima sha ugbayol mba ken jijingi mba ior mba Aôndo, kera lu u hanma sev yô, vea shi tôvon sha mbamzeyol mba jirigh ga.
11. Ka an nan lu ken ijime i mbamgem mba ve lu zan hemen hen atô u ior mba Yehova nee, man kanyi i gem i ve ken mbamgem mbana?
11 Ka an nan lu ken ijime i mbamgem mba ve lu zan hemen nee? Orgen ngu ga, ka Yehova Aôndo. Ka un a kaa ér: “Me va a zenaria” ye (Ka se se nger i yier ye). Shi a za hemen u kaan ér: “Me ver bem a̱ lu orkurantar wou man perapera a̱ lu ityoor wou.” (Ka se se nger i yier ye). Een, ka Yehova i lu tom na u nengen sha ior nav ye. Mzehemen u i tsengeôron sha kwagh u nongo ne ka gbenda ugen u á lu eren ior nav hwe je la. Sha ityôkyaa ne yô, igbenda ngi kpishi i i ver Mbashiada mba Yehova doo doo yô. I nger ken Yesaia 60:18 ér: “Mayange á kera ungwa iperakwagh ken tar wou ga, shin myôhôr shin mtim ken ipaventar wou kpaa ga; wea yila ugirgar ou wer Myom, man ihindagar you kpaa wer Iwuese.” Nenge er mkaanem man ma doo sha wono! Kpa ma a kure nena?
12. Hii nan ve bem a hingir u va dumbur hen atô u Mbakristu mba mimini?
12 Mbakristu mba mimi ver ashe zulee sha u zuan a ityesen man mkôôm sha ikyev i Yehova, man Yesaia tsengaôron kwagh u una va ker la nahan ér: “Ônov ou ci ca kpaa vea lu mba TER A tese ve yô; mkpeyol u ônov ou kpaa una vese je.” (Yesaia 54:13) Heela tseegh ga, icighan jijingi u Yehova eren tom ken ior nav, man ieren môm i ityamegh ki jijingi la yô, ka bem. (Mbagalatia 5:22, 23) Bem u ior mba Yehova la na mbá ijiir i ndôhôr shou shou ken tar u ipila i̱ iv ker ne. Bem u Mbakristu mba mimi ve lu a mi la har sha dooshima u ve lu a mi hen atô ve la, man ka di mafo u kwagh u una va lu ken tar u he la tsô. (Yohane 15:17; Mbakolose 3:14) Sha kpôô yô, a ngirigh hanma wase iyol u ember bem la shi seer nan sha u a lu, gadia ka kwagh u wuese Aôndo man civir un, shi ka semakwagh u paradiso wase u ken jijingi je la!—Yesaia 11:9.
Iwanger i Yehova Ia Za Hemen u Mondon
13. Hii nan ve se lu a vangertiôr ser iwanger i Yehova ia de u mondon sha ior nav ga?
13 Iwanger i Yehova ia za hemen u mondon sha ior nav hereghe? Een! I nger ken Yesaia 60:19, 20, ér: “Iyange ia kera lu iwanger you atetan ga; shin mte u uwer kpaa una kera lu u iwanger you ga, kpa TER Una gema á lu iwanger you i tsôron man Aôndo wou kpaa Una lu icivir you. Iyange you ia kera mire ga, uwer wou kpaa ua hide ijime ga, gadia TER Una lu iwanger you i tsôron; ayange a zungwen a ou kpaa aa bee.” Zum u “ijungwen” i mba̱ ve lu shir ken jijingi yange ngi been ken inyom i 1919 la yô, iwanger i Yehova maa hii u mondon sha ior nav. Ken masejime u anyom a a kar i hembe 80 ne kpa, mba ember mlumun u Yehova a lumun ve man a lu zan hemen u mondon iwanger sha a ve la her. Man ia bee sha won ga. Sha gbar u mbacivir Aôndo la yô, una “mire” er iyange nahan ga, shin una “hide ijime” er uwer nahan kpaa ga. Kpa una gema a mondo iwanger sha a ve gbem sha won. Iceghzwa la ka i̱ taver se asema se mba se lu ken ayange a masejime a tar u lu ken ime ne kpen kpen!
14, 15. (a) Ior mba Aôndo cii mba a “ishô” sha nyi gbenda? (b) Sha kwagh u Yesaia 60:21 a ôr la yô, ka mkur u injaa u nyi nahan iyôngo igen la i lu veren ashe gbenda a mini?
14 Ungwa ase ityendezwa igen i Yehova a er sha kwagh u mba ve til sha ityough ki Shion shin tar ne la. Yesaia 60:21 kaa ér: “Ior ou cii vea hingir mbaperapera, vea tsôr yan dyako u tar la sha won, ka gbaa u M lee je la, tom u ave Am, sha u i̱ civir Mo yô.” Yange mba hidi a mba i shigh ve mkurem mbara sha tom her ken inyom i 1919 yô, ve hingir kweior u he. Sha jighjigh ve u tenger ga u ve ne naagh ku ipaa ku Yesu Kristu la yô, i na ve “ishô” ken tar u u lumun a isholibo ne. (Mbaromanu 3:24; 5:1) Nahan, ve ngohol “tar” u ken jijingi shin ikyasen u tom ape vea ember paradiso u ken jijingi la di er Mbaiserael mba i hide a ve ken uikyangen ken Babilon la nahan. (Yesaia 66:8) Mdoom ma tar ma̱ ma lu sha inja i paradiso la ma á bee ga, sha ci u ikyuior i Iserael u Aôndo la vea hemba ato er Iserael u tsuaa la yange hemba ato nahan ga. Mayange je, vea de u van a icivir sha iti i Aôndo sha jighjigh ve u nan la man sha ishima i wan ve la man sha gbashima ve la ga.
15 Ior mba ve lu ikyuior i ken jijingi la cii mba ken ikyuryan i he la. I nger atindi a Yehova ken asema a ve cii, shi Yehova de ve a asorabo a ve sha ci u naagh ku Yesu la. (Yeremia 31:31-34) A na ve ishô ér mba “ônov” shi eren a ve er mba a isholibo iyol shio yô. (Mbaromanu 8:15, 16, 29, 30) Iyôngo igen i i lu akar a ve la kpaa i de ve a asorabo a ve sha ci u naagh ku Yesu la, shi sha ci u jighjigh ve u nan la yô, i na ve ishô ér mba akar a Aôndo er Aberaham nahan. “Ve ôô uriga vev ken awambe a Waniyôngo, ve kungu ve.” Shi iyôngo igen i i lu akar a ve la kpaa, ve ver ashe gbenda u zuan a iveren i vesen igen. Zum u vea va war “zegecan” la shin a va nder ve shin ku yô, vea nenge a mkur u mkaanem ma Yesaia 60:21 maa kure kpôô kpôô la, shighe la tar cii ua hingir paradiso. (Mpase 7:14; Mbaromanu 4:1-3) Hen zum la “mbaasemaleghlegh yô, vea ya dyako u tar, á saan ve iyol sha mngee u bem.”—Pasalmi 37:11, 29.
Mseer La Ngu Zan Hemen Her
16. Ka ityendezwa i vesen i nyi Yehova a ere, man ngi kuren nena?
16 Ken ivur i masetyô i Yesaia 60 la, i nger ityendezwa i masetyô i Yehova a er la ken ityough kin. Á kaa a Shion ér: “U kiriki una hingir kweior, man u hemban ndahar una hingir ikurior i ageegh; Mo TER, Me er kwagh ne fefa zum u shighe á kuma yô.” ( Yesaia 60:22) Yehova er sha mkaanem nam man ken ayange a ase ne. Zum u yange i hide a mba i shigh ve mkurem mbara sha tom ve her ken inyom i 1919 la, yange ve ngee ga—sha kpôô yô, ve lu “u kiriki.” Iyenge ve yange i seer zum u i seer van a Mbaiserael mba ken jijingi mbara va seer yô. Nahan, iyôngo igen hii van va kohol ve lugh lugh. Mlu u ior mba Aôndo ve lu ken bem ken paradiso u ken jijingi ua lu ken “tar” ve la urugh mbaasemaleghlegh kpishi, nahan sha mimi yô, u “kiriki” la hingir “ikyuior i ageegh.” Hegen ne je, “ikyuior”—mba ve lu Iserael u Aôndo man “ior mba ken iniongo igen” mba̱ tseghan ayol a ve mba ve hembe iorov umiliôn ataratar ne, ve hemba ngeen a ityar kpishi i i lu sha tseeneke u i yô. (Yesaia 60:10) Ior mba ve lu ker mbara cii mba a ci ken m-mondo u mondon iwanger i Yehova la, man kwagh ne na ve dooashe sha ishigh nagh.
17. Mtim u timen ken Yesaia ityough 60 ne bende a we nena?
17 Een, mtim u timen sha atôakaa a vesen a ken Yesaia ityough 60 ne ka kwagh u taver jighjigh u nan. Ka kwagh u taver se ishima er se nenge ser Yehova yange vande fan ér ior nav vea yem ken shir u ken jijingi man shi a hide a ve yô. Shi kpiligh se iyol er Yehova yange tsenga nengen er ingyegh ki mbacivir sha mimi kia seer sha ayange ne nahan. Heela tseegh ga, shi ka kwagh u surun se asema u umbur ser mayange je, Yehova una undu se ga la! Shi ka kwagh u taver se asema kpishi u fan ser “ihinda gar” ia lu ivegher her sha u ngohol “mba i ver ve sha u ve̱ zua a uma u tsôron” la sar sar! (Aerenakaa 13:48) Yehova una za hemen u mondo iwanger na sha ior nav her. Shion una za hemen u lun kwagh u tan ave vanger a mi er ônov nav vea lu tan a ta iwanger ve her la. (Mateu 5:16) Sha kpôô yô, se seer a seer u kangen ishima u lun ikyooso kyooso a Iserael u Aôndo man veren ishima sha ian yase i civirigh i se lu a mi i tan iwanger i Yehova la!
Ú Fatyô u Pasen Kpa?
• Sha gbar u ahendan yô, se lu a vangertiôr ser nyi?
• Shion ‘ma atumba a akuraior nena’?
• Ka sha nyi igbenda Yehova a ver ‘togula sha ityough ki kono’?
• Ka aeren ahar a nyi i te iwanger sha mi ken Yesaia 60:17, 21?
• U “kiriki” a hingir “ikyuior i ageegh” nena?
[Study Questions]
[Box/Pictures on page 18]
KWAGHÔRON U PROFETI U YESAIA—Iwanger i i Lu sha ci u Ior Cii La
Yange i na atôakaa a vesen a a lu ken kwaghngeren ne ken kwaghôron ugen shighe u “Mbatesen Mkaanem ma Aôndo” Mkohol u Vesen u ken inyom i 2001/2002 la. Sha ajiir kpishi or u nan kwaghôron la yange due a takerada u he ú i yier ér, Isaiah’s Prophecy—Light for All Mankind, Tihi u sha Uhar la, ken mkur u kwaghôron la. Yange i vande duen a Isaiah’s Prophecy—Light for All Mankind, Tihi u sha Môm la ken inyom i i kar ken ijime la. Takerada u he u i dugh a mi ne u nôngo u timen sha hanma ivur i ken takerada u Yesaia la. Utihi mba takerada ne mba a inja sha u wasen se sha er se seer lun a mkav man iwuese sha akaaôron a mimi a profeti a a lu ken takerada u Yesaia la.
[Pictures on page 27]
Shighe u se tagher a ahendan tsung je kpaa, ‘Yehova ka a er ior nav hwe sha myom’
[Pictures on page 28]
Ior mba Aôndo mba yaren tom a akaainjaa a a akuraior sha u zan hemen a mcivir u wang
[Picture on page 29]
Yehova ver ior nav doo doo sha u nan nongo ne mzehemen man bem