Mhii u Ieev Mbi Kwaghaôndo sha Ayange a Tsuaa La

“Ieev mbi kwaghaôndo ka gbenda u van a vese imôngo ken erdoo u Aôndo man icighan mlu na la man Uicighanmbaiorov Nav.”—GREEK ORTHODOX ARCHDIOCESE U AUSTRALIA.

SHA iyange i fam ne ken uwer u Agusutu, oo ta baveraa kôr sha angahar a i gber u unden yemen sha Ya u i maa sha ci u “Icighan Ngô u Aôndo,” ken icile i Tínos ken Zegemnger u Aegean la. Iorov mba hemban ingyegh 25, 000 mba ken kwaghaôndo u Greek Orthodox mba ve mough ken ityar igen la lu sha nongo lu keren gbenda tegh tegh u aren a eev mbu kwaghaôndo mbu ngô u Yesu mbu i wuha mbu iyol yoholoo la, lu kwagh u iceenyolough ia fatyô u panden ishima ve i kangen la ga.

Wanye kwase ugen u kpen alegh, lu yan ican man kôr kunya tsung, lu zenden sha anu a na a a lu nôndon awambe la. Ngô kwase u mough ken vegher ugen u tar la lu ikyua a na, er zende vôr gbeda gbeda nahan kpa, lu nôngon sha ityou her tsô. Organden ugen kume iusa iyol mbor mbor sha u foghor ken ikpelaior i i lu gir gi gir la. Awashima ve yô, lu u susen eev mbu Maria man yaven mbu inya.

Ka u henen a hen ga, ior mba zan kwaghaôndo mban mba a isharen i civir Aôndo sha mimi ve je. Nahan kpa, ka iorov u me ve fe ér imba mcivir u civir ieev mbi kwaghaôndo la hii sha atesen a ngise lu tsuaa uderimbaanyomov kar imôngo cii man kwagh u Kristu laa?

Mdumbur u Ieev mbi Kwaghaôndo mbi Dumbur La

Ken kwaghaôndo u Orthodox yô, ieev mbi kwaghaôndo mbi hanma ijiir cii. I er ieev mbi Yesu man Maria man “uicighanmbaiorov” la hingir shagba kwagh ken ayou a ucôôci kpen kpen. Mba ve ne jighjigh a mbi ka ve shi civir ieev mbi kwaghaôndo mbin, sha u susen mbi man nanden kwaghhumandoon man ukyandor kpaa. Heela tseegh ga, hanma ya u kwaghaôndo u Orthodox cii nôngo u lun a ijiir i eev mbu kwaghaôndo, ape i eren msen her yô. Mbakristu mba Orthodox cii mbá kaan ér shighe u ve lu civir eev mbu kwaghaôndo yô, ve mba ikyua a Aôndo. Ior kpishi na jighjigh ér ieev mbi kwaghaôndo mbi a mhôônom ma Aôndo shi mbi a tahav mbu eren ivande.

A kpiligh mba ve ne mbi jighjigh la iyol u fan ér yange Mbakristu mba sha derianyom u hiihii la venda u yaren tom a ieev mbi kwaghaôndo ken mcivir. Takerada u i yer ér Byzantium la kaa ér: “Mbakristu mba tsuaa mbara ve dondo Kwaghaôndo u Mbayuda sha u kôron mcivir u akombo ihyom, yange ishima i vihi ve a nyityô mcivir u civir ufoto mba uicighanmbaiorov la.” Takerada shon la shi kaa ér: “Hii sha Derianyom  u sha Utaan la zan zan, ieev mbi kwaghaôndo shin ieev mbigen . . . dumbur mbi i civir mbi̱ ken igbar man ken iuv yô. Aluer myar u yaren tom a ieev mbi kwaghaôndo la hii sha ikyev i Mbakristu mba sha derianyom u hiihii la ga yô, mbi hii hana?

U Tôvon Mhii u Mbi

Ortimenshaakaa Vitalij Ivanovich Petrenko nger ér: “Myar u yaren tom a ieev man u civir mbi la hii ica i gba cii man shighe u Mbakristu ye, man kwagh ne ‘due ityô ken mcivir u mbafanaôndoga’ la.” Mbatimen sha akaa a mbayiase kpishi lumun a kwagh ne, ve kaa ér mcivir u ieev mbi kwaghaôndo hii sha ikyev i ukwaghaôndo mba Babilon man Igipiti man Grika u tsuaa la. U tesen ikyav yô, ken Grika u tsuaa la í er ieev mbi lu sha inja i akaa a uma nahan. Yange i na mbi jighjigh ér mbi a a tahav mbu Aôndo. Ior yange ve hen ér i gba a gba ieev mbigen mbin ga, kpa mbi sen sha Aôndo mbi va gba shin inya. Zum u vea eren uiniongo mba civirigh yô, i ningir a ieev mbi ve civir la ken gar la cii, shi i na mbi iniaav kpaa. Petrenko kaa ér: “Mba civir eev mbula yange ve tôô mbu ér ka aôndo, kpa i nôngo u . . . tesen mkposo u aôndo la man eev nav la.”

Imba mbamhen mbara man aeren la nyôr ken kwagh u Kristu nena? Ortimenshaakaa shon la kaa ér, mbaapostoli mba Kristu mba kpen uderimbaanyomov mba karen yô, “ ‘atesen kposo kposo a mbafanaôndoga’ la hendan aa Mbakristu hemban cii yô, ken Igipiti—lu atesen a a due sha ikyev i Mbaigipiti man Grika man Mbayuda man Ior Mba sha Ityoughkitaregh man Mbaromanu kua atesen aa yange i lu eren a imôngo aa atesen a Mbakristu la.” Kwagh u gema va ker yô, “Mbakristu mba gbanakaa mbagen lumun a ieren i [jighjigh u nan igbenda ihiar] nahan ve yar tom a ieev mbi mbafanaôndoga la, ve gema mbi hingir kwagh u Mbakristu, kpa ve palegh mbi aa ieev mbi mbafanaôndoga la jimin cii ga.”

Ica i gbe ga yô, mcivir u civir ieev mbi kwaghaôndo hingir tamen kwagh ken kwaghaôndo je u a civir mbi ken iuv man ken igbar kpaa yô. Ken takerada u The Age of Faith la, or u timen sha akaa a mbayiase u i yilan un ér Will Durant la pase er yange kwagh ne hii yô, á kaa ér: “Er yange ior seer ken mcivir u civir uicighanmbaiorov la yô, gba  hange hange u a fa ve shi a umbur ve; nahan i er ufoto vev man ufoto mba Maria kpishi; sha gbar u Yesu yô, lu eev nav tseegh ga, kpa hingir u a civir terankon Na u yange kpe sha mi la—shi a na jighjigh a mi kpishi shi ú hingir akpagher a eren ahir a mi kpaa. Kwagh la doo ior ken ishima je ve gema uicighanmbaakaav man ufoto man ieev hingir akaa a ve a civir; ior lu yaven inya sha ishiv mbì mbi, man lu susen mbi shi lu nanden ukyandor man kwaghhumandoon sha ishiv mbi akaa ne, ve cir mbi uimondon iyol shi ve ker uivande mba eren hen akaa ve a imegh la. . . . Uter man mbawasenmhen mba ken Côôci zer pasen ér ieev mbira ka mbaaôndo ga, kpa ka di u umbur kwagh ve di tsô; kpa kwagh gba ior u fan mkposo la ga.”

Nyian ne kpaa, ior kpishi mba ve yaren tom a ieev mbi kwaghaôndo vea nyiman ér ieev ka di kwagh u nan mbi icivir di tsô—ka u civir mbi kpôô kpôô ga. Alaghga je yô, vea kaa ér ufoto mba kperan mba akaa a kwaghaôndo la ka kwaghbo ga—ka kwagh u hange hange—ka akaa a wasen u civir Aôndo. Alaghga kape we kpa ú hen je la. Kpa mpin ngu ér, ka Aôndo ken ishima nena sha kwagh ne? A fatyô u kaan ér u nan ma eev mbu cuku di icivir tsô maa ka u civir a civir mbu jee? Mimi je, aeren ne aa fatyô u lun a akaabo a a lu myer yôô?

[Box/Picture on page 4]

Eev Mbu Kwaghaôndo Kanyi?

Ieev mbi kwaghaôndo mbi atô kposo kposo. Ka i maa a maa ieev mbi kwaghaôndo mbigen. Mbigen di ka i gba mbi a gba. Mbaroman Katoliko kpishi mba yaren tom a mbi ken mcivir ve. Shi ka eev mbu ka i er i shighe ivue sha mi doo doo sha mlu u Kristu man Maria man “usent” la man mbatyomov man akaa agen man akaa a ken Bibilo shin akaa a mbayiase a ken Côôci i Orthodox la. Mbá hembe eren mbi sha ikpande i i kehe ga yô.

Côôci i kwaghaôndo u Orthodox kaa ér, “ufoto mba uicighanmbaiorov mban mba er ufoto mba or u iyol i inyam man awambe la ga.” “Mbi gbe mure shin mbi tesen mkposo u sev man tugh ga.” Shi i na jighjigh ér “iengem i Aôndo” ia fatyô “u lun” sha kon man ivue i sha eev la.

[Picture on page 4]

Myar u yaren tom a ieev la hii sha aeren a mbafanaôndoga la

[Picture Credit Line on page 3]

© AFP/CORBIS