Yehova Er Ior Nav Hwe Sha Iwanger
Yehova Er Ior Nav Hwe Sha Iwanger
“Mough sha, ta iwanger; gadia iwanger you i va, iengem i TER kpaa ngi mondon sha a we.” —YESAIA 60:1.
1, 2. (a) Ka mlu u nyi nahan orumace nan lu keree? (b) Ka unô ve ve a ime sha orumace?
“KPA ahii, ma or er Yesaia shin Sent Paulu nahan ma nan shi lu heen he!” Ka iyol vaan i Harry Truman u lu presiden u U.S. ken kwavanyom u 1940 la vaa je la. Ka sha ci u nyi yange ôr mkaanem maraa? Ka sha ci u sha ayange a na la kwagh gba un sha mbahemenev mba ve lu a aeren a wang tsung yô. Orumace yange sember duen ken angôghime u hemban cii u ken derianyom u sha 20 la, ka ityav mbi tar cii mbi sha uhar la. Shin er ityav mbira bee kera je kpaa, haghelaa lu shin tar her. Ime lu her di tsô. Sha kpôô yô, ityav mbira bee ka anyom 57 hegen, kpa tar ngu ken ime her tsô. Ka u henen a hen ga, luun er Presiden Truman una lu uma nyian kpaa, ma a nenge er kwagh a gbe sha mbahemen mba ve lu a anza a wang er Yesaia shin apostoli Paulu nahan yô.
2 Pesiden Truman yange una fa shin una fa ga kpaa, Paulu yange ôr kwagh u ime i í we i himbir orumace ne, nahan a ta ikyur sha mi ken akaangeren a na la. Ikyav i tesen yô, á ta mbananjighjigh a na imôngo la ikyur ér: “Kera ka awambe man inyam se lu nôngon ityav a ve ga, kpa ka mbatarev man mbautahav man mba ve lu utor sha tar cii mba ime ngin ne, man ujijingi mba aferev mba sha ajiir a Sha.” (Ka se se nger i yier ye; Mbaefese 6:12) Paulu tese ken mkaanem man ér un fa kwagh u ime i ken jijingi i i himbir tar cii ne tseegh ga kpa shi un fa hen pe i dugh la jim jim—ka hen azôv aa lu aa tahav tsung i pase ér nga “utor sha tar” ne la. Er i lu azôv a a lu a tahav a ve a ime shin tar ne yô, kanyi uumace mba kaka ne vea er sha u karen a ime ne kera?
3. Er uumace ve lu ken ime nahan kpaa, kanyi Yesaia a tsengaôron sha ci u mba ve lu mbajighjigh laa?
3 Yesaia kpaa ôr kwagh u ime i i lu himbir orumace ne. (Yesaia 8:22; 59:9) Nahan kpa, er nengen ken hemen sha ayange a ase ne yô, a tsengankaan sha tahav mbu jijingi ér ken ayange a imegh ne je kpaa, Yehova una na ior mba iwanger i doo ve ishima la ishimaveren i dedoo. Een, er Paulu shin Yesaia ve kera lu a vese kpôô kpôô ga kpaa, se mba a akaangeren a i ne ve ve̱ nger la sha u hemen se. De se time nen sha kwaghôron u profeti u a lu ken takerada u Yesaia ityough 60 la, sha er se fa iveren i i lu sha ci u mba Yehova a doo ve ishima la yô.
Kwase u ken Kwaghôron u Profeti la Ta Iwanger
4, 5. (a) Yehova yange wa kwase ugen tindi ér a er nyi, man kanyi ityendezwa a ere? (b) Ka loho u sagher iyol u nyi u lu ken Yesaia ityough 60?
4 I ôr mkaanem ma hiihii ma ken Yesaia 60 la hen kwase u mlu na a ker kunya kpishi—a lu ken ime, a samber hen inya yô. Fese nahan, iwanger ta sha angôghime la, man Yehova yila un, kaa ér: “Mough sha, ta iwanger; gadia iwanger you i va, iengem i TER kpaa ngi mondon sha a we.” (Yesaia 60:1) Shighe kuma u kwase la una mough a tile sha, una mondo iwanger i Aôndo, iengem na la. Sha ci u nyi? Se zua a mlumun sha ivur i i dondo ne: “Nenge, ime ia cir tar, man angôghime kpaa una cir akuraior; kpa we yô, TER Una mondo iwanger sha a we, iengem Na kpaa á nenge a i sha a we.” (Yesaia 60:2) Zum u kwase ne er sha tindi la yô, i tsengakaan un kwagh u doon tsung u una va ker yô. Yehova kaa ér: “Akuraior aa va hen iwanger you, utor kpaa vea va hen iwanger i i mondo sha a we la.”—Yesaia 60:3.
5 Mkaanem ma sagher iyol ma i nger ken avur a atar ne cii ma bugh gbenda shi ma sav mkaanem ma ma lu ken Yesaia ityough 60 la cica cii. Ma tsengaôron akaa aa kwase u ken kwaghôron u profeti la a tagher a mi la shi ma pase se er se lu ken iwanger i Yehova shin er ime i yisa orumace nahan kpaa. Kpa jighilii yô, akav a i ter a ken avur atar a a hii kwaghôron ne tese nyi ikyav jimi?
6. Ka an nan lu kwase u i ôr kwagh na ken Yesaia ityough 60 laa, man ka an nan til sha ityough nagh shin tara?
6 Kwase u i ôr kwagh na ken Yesaia 60:1-3 la ka Shion, nongo u sha u Yehova ú akaa a uma a ken jijingi la. Nyian ne, asande a “Iserael u Aôndo” a á shi her shin tar ne tile sha ityough ki Shion shon la, ka tiônnongo u Mbakristu mba i shigh ve mkurem mba ve lu tar sha won cii, mba ishimaverenkeghen ve i lu i hemen sha vea Kristu imôngo la. (Mbagalatia 6:16) Ikyurior i ken jijingi ne jimin cii mba iorov 144,000, man mkur u Yesaia ityough 60 a lu kuren hen ashighe ne har sha mba ve lu uma shin tar ken “ayange a masejime” ne. (2 Timoteu 3:1; Mpase 14:1) Shi kwaghôron u profeti la ngu a kwaghôron kpishi sha kwagh u akar a Mbakristu mba i shigh ve mkuren la, ka “zegeikpelaior” mba ve lu “iyôngo igen” la.—Mpase 7:9; Yohane 10:16.
7. Ka mlu u nyi Shion yange lu ker ken inyom i 1918 la, man kwaghôron u profeti yange tsenganôron kwagh ne nena?
7 Ma shighe ngu u yange “Iserael u Aôndo” ne yav lu ken ime, er kwase u sha injakwagh u ken kwaghôron u profeti la nahanaa? Een, kwagh ne er anyom kar ken ijime hemba 80 hegen. Shighe u i lu nôngon ityav mbi tar cii mbi hiihii la, Mbakristu mba i shigh ve mkurem la nôngo tsung ér vea za hemen a tom u eren shiada ne. Kpa, ken inyom i 1918 i ityav mbia kure la, tom u kohol ior pasen kwagh yange u war memen kuaa. Joseph F. Rutherfold, u lu hemen tom u kwaghpasen tar sha won cii la, man Mbakristu mbagen mbahemen cii yange i ôr ve ijiir sha msende maa i wuhe ve anyom imôngo. Takerada u Mpase pase kwagh u Mbakristu mba i shigh ve mkurem mba ve lu shin tar sha shighe shon la ken kwaghôron u profeti ér ve lu e̱r akom a “sha gbenda ken zegegar u i yer un sha inja i jijingi er Sodom man Igipiti” la nahan. (Mpase 11:8) Sha mimi yô, shighe la ime cir Shion, u ônov nav mba i shigh ve mkurem mbara ve til sha ityough nagh shin tar la!
8. Gbande yange gema imo ken inyom i 1919 la nena, man lu nyi i gema i va kere?
8 Nahan kpa, ken inyom i 1919 yô, gbande gema imo. Yehova ta iwanger sha Shion! Mba ken Iserael u Aôndo mba yange ve war la ve mough sha sha u vea mondo iwanger i Aôndo, ve gba yôôn loho u dedoo a mciem shio. (Mateu 5:14-16) Mbagenev kpa maa gba kporom van ikyua hen iwanger i Yehova la, i wuese ishimatseen i i hide i lu tseen Mbakristu mban ne la. Sha hiihii la, i shighe mbahev mba ve sember van ne mkurem ve hingir ior mba Iserael u Aôndo. I yila ve ken Yesaia 60:3 ér utor, sha ci u vea va lu mbayandyako imôngo vea Kristu ken Tartor u sha u Aôndo la. (Mpase 20:6) Ken masejime yô, zegeikpelaior i iyôngo igen la kpa i gba udugh i van a ve hen iwanger i Yehova ne. Ka “akuraior” shon a i ter á ken kwaghôron u profeti shon je la.
Ônov mba Kwase la mba Van ken Ya!
9, 10. (a) Kanyi i kpilighyol kwase la yange nenge a mini, man ikyav i kwagh ne ér nyi? (b) Ka ityôkyaa i nyi Shion a lu a mi i embere?
9 Yehova hii u duen a mkaanem ma i pase ma ken Yesaia 60:1-3 la hegen. Shi a na kwase la tindi ugen. Kegh ase ato sha kwagh u á ôr a na la, ér: “Kende ashe, kenger hanma ian, nenge.” Kwase la er nahan, maa a nenge a kwagh u sagher un iyol kpishi! Ônov nav mba van ken ya. Ruamabera za hemen kaa ér: “Ve cii mba kohol mba van her a we; ônov ou mba nomso mba moughon ken ica, van her a we, ônov ou mba kasev kpaa, mba van a ve sha ihan.” (Yesaia 60:4) Tom u pasenkwagh tar sha won cii u ú hii ken inyom i 1919 la va a ior mbahev udubu imôngo u va shiren Yehova tom. Ve mban kpaa ve hingir ‘ônov mba nomso’ man “mba kasev” mba Shion mba i shigh ve mkurem ve lu Iserael u Aôndo la. Nahan, Yehova er Shion hwe sha u masen van a mba ve shi ken 144,000 mbara ken iwanger.
10 Ú nenge imba iember i Shion una ember u lun a ônov nav ikyum la kpa? Heela tseegh ga, Yehova na Shion atôakaa agenegh aa lun a iember. I nger ér: “Nahan wea nenge man ishigh yough kia engem sha iember, ishima you ia tsuwe, ia bugh ia gbanger; gadia inyaregh ki zegemnger kia gema á va hen a we, man akaa a injaa a akuraior kpaa aa va her a we.” (Yesaia 60:5) U zuan sha mkaanem ma profeti man yô, hii ken kwavanyom u 1930 la je, ikyum i Mbakristu mba ve lu a ishimaverenkeghen u lun shin tar gbem sha won la va hen Shion. Ve due shin “zegemnger” u orumace u a lu paleghaa a Aôndo la, man ve tile sha ityough ki akaainjaa a akuraior. Ka ve ve lu “akaainjaa a akuraior cii” ye. (Hagai 2:7; Yesaia 57:20) Shi fa kpaa wer, “akaainjaa” ne due sha u za eren Yehova tom sha mbamnenge vev kposo kposo ga. Kpa, ve seer a seer hwe u Shion sha u va civir imôngo a anmgbianev vev mba i shigh ve mkurem la, hingir “ikum i môm” a ve sha ikyev i “orkuran môm.”—Yohane 10:16.
Mbakpengav man Mbakuranilev Va hen Shion
11, 12. (a) Pase kwagh u ikpelaior i i nenge a i i lu van hen Shion la.
11 Kwagh u a gem a ve ken mkohol u i tsengeôron u kohol ior ne yô, ka mseer u vesen u ingyegh ki mba wuese Yehova ve lu seer la. I tsengaôron kwagh ne ken kwaghôron u profeti u i nger shin heen ne. Tôô ase wer ú tile vea kwase u ken kwaghôron u profeti ne sha Uwo u Shion. Ú gema ú kenger sha ityoughkitaregh yô, man ú nenge a nyi kwagha? “Ikpela i urakumi ia cir u, agumarakumi a Midian kua Efa; ve cii vea due ken Sheba, vea va a zenaria kua kwagh u human doon, vea yôô aeren a TER a a kom iwuese la, saan saan.” (Yesaia 60:6) Ikpela i mbakpengav aa urakumi vev cii wa nongo sha gbenda lugh lugh mba yemen ken Yerusalem. Urakumi mbara mba er ka mngerem mà má samber beer nahan! Mbakpengav mbara mba a uiyua mbainjaav kpishi er “zenaria kua kwagh u human doon” nahan. Man mbakpengav mban va hen iwanger i Yehova sha u wuese un ken igbar sha u ‘yôôn iwuese i Yehova.’
12 Ka mbakpengav tseegh ve ker gbenda yemen ga. Mbakuranilev kpaa kôr gbenda yemen ken Shion. Kwaghôron u profeti ne za hemen ér: “Akumauile a Kedar aa va kohol her a we cii, anomaiyôngo a Nebayoti aa er u tom.” (Yesaia 60:7a) Ikweior i kuran ilev la kpa ngi van ken icighan gar la sha u vea va na Yehova naagh sha ilev vev mbi hemban doon cii la. Ve na ayol a ve u eren Shion tom! Yehova una ngohol mbavannya mban nena? Aôndo iyolna na mlumun ér: “Aa va, á va hingir nagh ku dedoo sha atse Am a nanden nagh sha mi, man Me civir iyou Yam i icivirigh la.” (Yesaia 60:7b) Yehova lumun a iniaav man tom u atôatyev ne. Mlu ve hen ijiir la va a icivir sha tempel na la.
13, 14. Kanyi i nenge a mi i lu van shin ityôtara?
13 Gema ase ashe hegen kenger vegher u shin ityôtar la yôô. Kanyi ú nenge a mini? Ken ica yô, ú nenge a kwagh ngu inja er ibeenegh ki pupuu nahan samber sha zar u zegemnger cii. Yehova pine mpin u a lu sha ishima you vough, ér: “Ka unô ne, ve purugh er ibeenegh nahan, man ve ve er mkungum hen ahura a ma nahana?” (Yesaia 60:8) Yehova na mlumun sha mpin na ér: “Ityar i hen kpezegemnger ia keghem, utso mba Tarshishi kpaa vea hemen sha u tôôn ônov ou mba ken ica van a ve; mba van a azurfa ve kua zenaria ve a ve imôngo, sha ci u iti i TER, Aôndo wou man sha ci u Icighan u Iserael, gadia A civir we.”—Yesaia 60:9.
14 Ú fatyô u nengen a kwagh la ken ishima kpa? Ibeenegh ki pupuu kira ki kporom ikyua nahan ki er ikpela i akaa aa mough shin ityôtar ica nahan. Ki inja er ka ikpela i annyonov mba ve lu purugh sha agôndoamnger nahan. Kpa mba ngur kporom van ikyua yô, gema ka utso a akondo a samber sha ityôv mbi tsoo varen ahumbe ú nenge a mi ye. Utso kpishi tange van ken Yerusalem mba ve bee ikpela i mkungum yô. Utso mbara tôô mbananjighjigh sha ajiir a icaa mba van a ve ioo sha u ve̱ va civir Yehova ken Yerusalem yô.
Nongo u Yehova Ngu Samber
15. (a) Ka mseer u nyi Yesaia 60:4-9 a tsengeôrono? (b) Ka jijingi u nyi Mbakristu mba mimi ve tese?
15 Nenge imba er kwaghôron u profeti u ivur i sha u 4 zan zan 9 la a pase msamber u tom ne ú samber tar sha won cii hii ken inyom i 1919 je zan zan la vighe vighe sha wono! Er nan ve Yehova a ve Shion a imba mseer ne? Ka sha ci u hii ken inyom i 1919 la je, Iserael u Aôndo ungwa imo na shi za hemen u mondon iwanger i Yehova la. Ú ver ishima ú ungwa er ivur i sha 7 la i ôr er mbahev mba ve sember van ne ve ve “sha atse [a Aôndo] a nanden nagh sha mi” la kpa? Atse a nanden nagh ka ijiir i i ne iniaav sha mi yô, shi gbar u kwaghôron u profeti ne umbur se ér mcivir u Yehova kua naagh ku nan ker. Apostoli Paulu nger ér: “M ngu zamber a ven mer . . . gema nen ayol a en na nen nagh ku uma a mi, icighannagh ku doon Aôndo, ka mciviraôndo wen u ken jijingi je la. (Mbaromanu 12:1) Sha kwaghôron u Paulu a ôr ne yô, ka u Mbakristu mba mimi zan di mbaadua kwa môm ken sati tsô ga. Ka ve na shighe ve man agee a ve man inyaregh vev sha u mcivir u mimi a̱ za hemen yô. Mve u ambaaior a civir sha gbashima angara la una na iyou i Yehova ia dooashe ga he? Kwaghôron u profeti u Yesaia kaa ér kwagh a fatyô u lun nahan. Shi se fatyô u lun a vangertiôr ser amba a ior mba civir sha gbashima la gema mba kwagh u civirigh sha ashe a Yehova.
16. Ka unô yange ve wa ave sha tom u hiden maan imaagh sha ashighe a tsuaa laa, man ka unô ve er nahan sha ayange nee?
16 Mbahev mban soo u eren tom. Kwaghôron u profeti ne za hemen kaa ér: “Ior mba ken iniongo igen vea maa ugirgar ou, man utor vev vea er u tom.” (Yesaia 60:10) Sha mimi yô, hii sha shighe u mkur u mkaanem man hii kuren sha ayange a ve hide shir ken Babilon la je, utor man ior mba ken akuraior agen yange va wase ve sha u hiden maan tempel man gar u Yerusalem la. (Esera 3:7; Nehemia 3:26) U kwaghôron ne kuren sha ayange ne yô, zegeikpelaior sue asande a i shigh ve mkurem la sha u maan mcivir u mimi. Ve wase u maan atôônanongo a Kristu, nahan ve taver “ugirgar” mba nongo u Yehova la. Shi ve wa ave sha u maan imagh ki kpôô kpôô—ka u maan Ayou a Tartor man Ayou a Mkohol man iyaav mbi Betel kpaa. Sha igbenda ingin cii, mba suen anmgbianev vev mba i shigh ve mkurem la sha u wan ikyo sha ugbayol mba nongo u Yehova ú ú lu samber seer la!
17 Ka gbenda ugen u nyi Yehova a lu eren ior nav hwee?
17 Nenge er mkaanem ma masetyô ma Yesaia 60:10 ne ma lu ma taver ishima sha wono! Yehova kaa ér: “Gadia sha ishima i nyoon Yam M gbidye u, kpa sha erdoo Wam M zungu u mhôônom.” Een, Yehova yange tsaha ior nav ken inyom i 1918 man 1919 la. Kpa ka tsuaa je la. Hegen yô, gema ka shighe u Yehova zungwen mbatomov nav mba a shigh ve mkurem man iyôngo igen i i lu akar a ve la mhôônom. Ikyav i kwagh ne yô, ka mseer u kpilighyol u a ver ve doo doo ve lu seer la, ngu ‘eren ve hwe’ er a vande eren nahan.
18, 19. (a) Ka ityendezwa i nyi Yehova a er sha kwagh u ior mbahev van ken nongo na laa? (b) Avur a masetyô a ken Yesaia ityough 60 la ôr se nyi kwagha?
18 Hanma inyom yô, “ior mba ken iniongo igen” udubu uderi imôngo ka ve nyôr nongo a nongoior u Yehova, shi gbenda ua lu her ivegher sha u mbagenev kpishi vea dondo ve yô. Yehova kaa a Shion ér: “Ihindagar you kpaa ia luun ivegher gbem, á wuhen i tugh shin tetan kpaa ga, sha u i̱ va u a akaa a injaa a akuraior, kua utor vev kpaa.” (Yesaia 60:11) Mbaahendanev mbagenev ka ve nôngo ér vea wuhe “ihindagar” la, kpa se fa ser vea fatyô ga. Yehova iyolna kaa ér a ver ihindagar la ia lu ivegher her. Mseer la una za hemen.
19 Igbenda igen kpa ngi i Yehova a her ior nav iveren, a lu eren ve hwe ken ayange a masejime ne yô. Avur a masetyô a kwaghôron u profeti a ken Yesaia ityough 60 la pase kwagh u a lu igbenda shon la.
Ú Fatyô u Pasen Kpa?
• “Kwase” u Aôndo la ka ana, man ka unô ve til sha ityough nagh shin taraa?
• Lu hanma shighe ônov mba Shion yav lu hen inya, shi lu hanma shighe ve “mough sha” man lu sha nyi gbenda?
• Yehova yar tom a akav kposo kposo sha u tsenganôron er mbapasen loho u Tartor vea seer ainge nena?
• Ka ken igbenda i nyi nahan Yehova a te iwanger sha ior nava?
[Study Questions]
[Picture on page 22]
I kaa a “kwase” u Yehova ér a mough sha
[Picture on page 24]
Ikpela i utso mbara mba er mkungum ma purugh sha nahan